Stadi 5
Redim Tok
1 Pol i tok, ol Kristen i mas “redi long mekim olgeta kain gutpela wok.” (Ta 3:1) Sapos yu laik autim gut tok, yu mas redi long mekim wok.
2 Sapos yumi redim ol tok bilong Skul, orait tok bilong Skul bai helpim gut yumi. Sapos yumi redi gut, bai yumi kisim tingting bilong Jehova na save gut long tok i tru.—Sef 3:9.
3 Kaunim Baibel. Sapos ol i makim yu bilong kaunim hap tok bilong Baibel long Skul, yu mas redi gut. Yu mas kaunim kaunim long haus bilong yu. Kolim dispela tok long maus. Skelim gut minit bilong kaunim.
4 Kisim tok long Wastaua na mekim tok. Pastaim kaunim tok bilong Wastaua. Katim ol bikpela tok o raitim long wanpela hap pepa. Kisim ol tok i stret long (1) ol man bilong harim na (2) as tok bilong tok.
5 Kisim ol tok ol man bai laikim. No ken kisim ol strongpela tok. Kamapim ol skripsa i stret long as tok bilong tok na i truim dispela tok. No ken kamapim planti tok tumas.
6 Sapos long Skul ol i makim yu bilong mekim tok namba 3 o 4, yu ken mekim olsem yu autim tok long ol haus o mekim gobek samting.
7 Kamapim ol tok i stret long as tok. Tingim wanpela as tok i stret long ol bikpela tok bilong Wastaua na bihainim dispela tok.
8 Kisim ol ves na mekim tok. Sapos ol i makim planti tumas ves bilong tok bilong yu, yu ken lusim sampela. Tingim gut tok bilong ol ves na bilong wanem yu laik kamapim dispela ves na kamapim gut insait bilong en.
9 Taim yu kisim as tok tasol. Sapos ol i makim as tok tasol bilong tok, yu ken tingim sampela hap tok i stret long dispela, na raitim long hap pepa. Askim ol strongpela brata, ol i gat sampela tingting long dispela as tok o nogat. Lukim Baibel na ol buk bilong Sosaiti.
10 Raitim sampela tok. Taim yu wok long redim tok bilong yu, gutpela sapos yu raitim sampela tok long wanpela hap pepa; raitim wanpela wanpela bikpela tok long dispela hap pepa. Raitim hap tok tasol. Raitim ol sapta na ves i helpim dispela tok na nem bilong buk o Wastaua yu bin kisim dispela tok long en.
11 Yumi mas redi. Sapos yumi laik bai Jehova i amamas long yumi, yumi mas redi. (Lu 1:17) Sapos yumi redim gut ol tok ol i makim yumi bilong mekim long Skul, bai yumi lainim gut tok bilong Jehova na bai yumi inap mekim gut wok bilong Em, na bai yumi redi long mekim ol gutpela wok.