Mekim Wok Long Ol Tok Ol i Makim

BAIBEL i tok kongrigesen Kristen i kain olsem wanpela bodi. Olgeta hap bilong en i gat wok, tasol “olgeta hap i no mekim wankain wok tasol.” Bilong wanbel wantaim dispela tingting, yumi mas mekim wanem wanem wok ol i makim yumi long mekim. Bilong mekim olsem yumi mas save gut long tok ol i makim yumi long mekim na yumi mas mekim gut dispela tok. Yumi no ken ting tok yumi mekim em i liklik samting, long wanem, yumi ting ol man bai i gat laik moa long harim narapela tok. (Ro. 12:​4-8) Em wok bilong wokboi i gat gutpela tingting long givim kaikai bilong spirit long yumi “long taim bikman i makim.” (Mt. 24:45) Taim yumi mekim wok long save bilong yumi long redim tok long pasin ol i tokim yumi long mekim, dispela i soim olsem yumi tingim tru dispela pasin bilong ol long mekim wok. Dispela i mekim na ol samting bilong kongrigesen i save ran gut.

Ol Samting i Insait Long Dispela. Taim ol i makim yu long stori long wanpela samting insait long skul, wok long kamapim ol tok bilong dispela samting tasol, ol narapela samting nogat. Klostu olgeta taim ol bai makim stret ol buk samting yu mas kisim tok long en. Sapos ol i no mekim olsem, orait yu ken painim ol tok long ol buk long laik bilong yu yet. Tasol taim yu wok long redim tok, tingim dispela: Olgeta tok yu mekim i mas strongim tok ol i makim yu long stori long en. Taim yu wok long tingim wanem ol tok yu bai stori long en, yu mas tingim odiens.

Stadi gut long ol buk samting ol i makim, na skelim gut ol skripsa bilong en. Orait nau tingting gut long olsem wanem yu inap kamapim ol dispela tok bilong helpim tru odiens. Kisim tupela o tripela gutpela tok long ol dispela buk samting na yu ken mekim wok long en olsem ol bikpela tok. Na tu, long ol dispela buk makim ol skripsa yu laik ritim na stori long en.

Yu mas kamapim hamas bilong ol dispela tok? Kamapim tasol ol tok yu inap kamapim gut. No ken stori long planti samting tumas na dispela i mekim na yu no mekim gutpela wok tisa. Sapos sampela hap tok i no stret wantaim samting yu laik bai tok bilong yu i mekim, kamapim tasol ol hap tok bai helpim tok bilong yu long mekim olsem. Long ol buk samting ol i makim bilong painim ol tok long en, mekim wok long ol tok em inap givim gutpela save na helpim tru odiens. Taim yu wok long dispela hap tok kaunsel, i no olsem yu laik stori long planti samting, nogat, yu laik yusim ol tok ol i makim bilong mekim tok bilong yu.

Yu no ken kamapim ol bikpela tok tasol bilong ol tok ol i makim yu long kamapim. Yu mas kamapim insait bilong sampela tok, stori moa long ol, mekim ol tok piksa i makim ol dispela tok, na kamapim wanpela stori i soim olsem wanem ol i ken bihainim ol dispela tok. Yu mas kamapim ol narapela tingting bilong kamapim gut ol bikpela tok i stap insait long ol tok ol i makim yu long mekim wok long en. Yu no ken kamapim ol narapela tingting bilong kisim ples bilong ol tok ol i makim.

Ating bihain ol bai singautim ol brata i winim mak bilong mekim wok tisa long givim ol tok bilong skulim man long Miting Bilong Wok Autim Tok. Ol i save ol i mas mekim gutpela wok long ol tok ol i makim ol long mekim na ol i no kisim sampela narapela tok bilong kisim ples bilong dispela. Na tu, ol i save givim ol autlain long ol brata i save mekim ol pablik-tok na ol i mas bihainim autlain. Yu inap senisim liklik ol tok bilong ol autlain, tasol ol i makim stret ol bikpela tok bilong kamapim, na ol tok i helpim ol dispela tok, na ol skripsa bilong helpim dispela tok. Pasin bilong mekim wok long ol tok ol i makim yumi long kamapim, dispela em i bikpela samting bilong lainim yumi long mekim wok tisa na bai yumi ken redi long mekim ol narapela tok ol i givim long yumi.

Na tu, dispela skul inap helpim yu long mekim ol Baibel-stadi i save helpim ol man long kamap strong. Bai yu lain long stori long ol hap bilong stadi tasol na bai yu no stori nabaut long ol samting i no helpim man long save gut long samting yupela i mas stori long en. Tasol sapos yu kisim gut as bilong dispela stadi, bai yu no strong strong long kamapim ol tok bilong stadi tasol na yu no kamapim sampela tok moa ating sumatin i mas save long en bilong kisim gut dispela tok.