Autim Save i Bringim Man Long Laip Oltaim

 ¹ Jehova “em i tisa bilong olgeta manmeri.” (Sng 94:10) Em i givim wok long yumi long autim save bilong em long ol man i no save long rot bilong mekim wok bilong God long pasin em i laikim​—⁠dispela save inap helpim man long kisim laip. Buk Save i Bringim Man Long Laip Oltaim em i gutpela buk tru bilong helpim man i gat gutpela bel long kisim stretpela save long God long rot bilong Baibel. (1 Ti 2:​3, 4) Ol tok bilong buk Save i klia na i skruim gut narapela hap tok i go long narapela hap tok, na dispela samting bai helpim man long kisim gut ol save Jehova i laik skulim man long en. Long dispela mun yumi laik kirapim man na bai em i gat laik long kaunim dispela buk. Em hia sampela tok yu ken traim. No ken lainim lainim ol dispela tok na bai yu ken kolim stret; kamapim ol dispela tok long toktok bilong yu yet na long pasin bilong yu.

 ² Planti man i gat wanblut i bin i dai, olsem na yu ken kamapim tok bilong kirap bek olsem:

◼ “Yumi planti i gat sampela wanblut i bin i dai. Yu ting yumi inap lukim gen ol? [Larim man i bekim tok.] I no laik bilong God long pastaim long man i mas i dai. Jisas i soim olsem man i dai pinis em inap stap laip gen. [Kaunim Jon 11:​11, 25, 44.] Tru, dispela samting i bin kamap planti handet yia i go pinis, tasol dispela i makim ol samting God i tok promis pinis long mekim. [Opim buk Save long piksa long pes 85 na kaunim ol rait klostu long piksa. Nau soim piksa long pes 86 na stori long en.] Sapos yu laik kaunim sampela gutpela tok moa bilong kirap bek, bai mi amamas long lusim dispela buk long yu, long K1.50 tasol.”

 ³ Taim yu go bek lukim man yu bin stori wantaim em long kirap bek, yu ken kirapim tok olsem:

◼ “Yu tingim yet dispela tok mi bin mekim olsem i no laik bilong God long pastaim long man i mas i dai? Sapos dispela tok i stret, orait, i gat wanem as na yumi go lapun na dai? Sampela trausel i winim 100 yia, na i gat sampela diwai i winim planti tausen yia pinis. Bilong wanem ol man i save stap 70 o 80 yia tasol? [Larim man i bekim tok.] Yumi save dai, long wanem, namba wan man na meri i bin sakim tok bilong God.” Kaunim Rom 5:​12. Opim buk Save long pes 53 na kaunim het-tok bilong sapta. Stori long paragraf 1 i go 3, na makim long pinga ol bekim bilong ol askim i stap daunbilo long pes. Stretim rot long go bek lukim em na bai yu ken stori long olgeta narapela hap bilong sapta. Kirapim em na bai em yet i ken kaunim ol paragraf paslain long taim yu kam gen.

 ⁴ Sapos yu autim tok long man na em i olsem man bilong lotu, yu ken tok:

◼ “I gat planti handet kain kain lotu i stap long nau. Ol bilip bilong ol i narapela narapela na i pait. Sampela man i save tok, olgeta lotu i gutpela na ol bilip bilong yumi i no bikpela samting. Wanem tingting bilong yu? [Larim man i bekim tok.] Jisas i lainim ol man long lotu i tru na em i kamapim klia God i no orait long ol narapela kain lotu. [Kaunim Matyu 7:​21-​23.] Sapos yumi laik bai God i ken amamas long yumi, yumi mas lotuim em long pasin i stret long laik bilong em.” Opim buk Save long sapta 5, kaunim het-tok, na soim sampela liklik het-tok long man. Tokim em, ol dispela tok bai helpim em long kisim save long ol samting em i mas mekim na bai God i ken amamas long em. Tilim buk long K1.50.

 ⁵ Ol man, em tingting bilong ol i paul liklik long wanem i gat planti lotu i stap, ating bai ol i amamas long kisim bekim bilong dispela askim taim yu mekim gobek:

◼ “I gat kain kain lotu i stap long nau, na olsem wanem yumi inap save long lotu i tru? Yu laik bai lotu i tru i bihainim wanem kain pasin? [Larim man i bekim tok.] Jisas i helpim yumi long save husat ol i disaipel tru bilong em.” Kaunim Jon 13:35. Stori long paragraf 18 na 19 long sapta 5 bilong buk Save. Tokim em, sapos man i skelim lotu wantaim ol dispela tok bilong Baibel, dispela bai helpim em long save long lotu i tru. Stori olsem, ol Witnes Bilong Jehova long olgeta hap ol i gat nem olsem ol man i laikim tru ol narapela na ol i bihainim ol stretpela pasin. Tokim em, sapos em i stadi long Baibel long rot bilong buk Save, dispela bai helpim em long save long wanem kain lotu God i orait long en.

 ⁶ Sapos yu bungim wanpela papa o mama, yu ken tok:

◼ “Long olgeta de, yumi harim tok long pasin nogut ol yangpela i mekim, na i olsem ol i no gat lo i bosim ol. Sampela papamama i laik putim asua i go long skul na tok skul i no bin skulim ol pikinini long wanem pasin i stret na wanem pasin i no stret. Yu ting em wok bilong husat long skulim ol pikinini olsem? [Larim man i bekim tok.] Bekim bilong dispela askim i stap hia long Baibel. [Kaunim Efesus 6:⁠4.] Em nau, wok bilong skulim ol pikinini long ol stretpela lo, em wok bilong papamama.” Opim buk Save long pes 146, kaunim paragraf 16, na stori long ol piksa long pes 147. Stori olsem dispela buk em bilong famili olgeta i ken stadi long en. Stori long paragraf 17 na 18 long pes 146, na tokim em yu laik soim em long pasin bilong yumi long mekim stadi wantaim famili. Tilim buk long K1.50.

 ⁷ Sapos yu bin kirapim stadi wantaim wanpela papa o mama long namba wan taim yu bin lukim em, taim yu mekim gobek, yu ken stori moa olsem:

◼ “Long nau i gat kain kain samting bilong dispela graun i laik pulim ol yangpela. Dispela i mekim na taim ol i wok long go bikpela, ol i hatwok long aninit long God. Taim mi lukim yu bipo, yumi bin stori long tupela lo. Yu tingim? Yumi ol papamama i stap aninit long God, yumi mas makim gutpela pasin ol pikinini i ken bihainim, na oltaim yumi mas tokim ol yumi laikim ol tumas. Na i gat narapela samting Baibel i tok ol pikinini i mas kisim long papamama.” Kaunim Sindaun 1:8. Opim buk Save long pes 148 na kirapim stadi long paragraf 19-23. Tokim em yu laik kam bek na stadi wantaim famili olgeta, kirap long sapta 1. Sapos em i orait long dispela, tilim buk long K1.50.