Ol Tok Man i Harim i As Bilong Bilip
1 Taim yumi painim pinis man em “bel bilong [em] i gutpela tru” inap long em i ‘kisim laip oltaim,’ yumi mas strongim bilip bilong em long ol samting em i bin harim. (Ap 13:48; Ro 10:17) Bilong mekim olsem, yumi mas go bek lukim ol man i bin kisim magasin o sabskripsen na traim kirapim stadi long buk Save. Em hia sampela tok yu ken mekim:
2 Sapos yu bin tilim “Kirap!” bilong Epril 8, taim yu mekim gobek, traim kirapim stadi long buk “Save,” olsem:
◼ “Taim mi kam lukim yu bipo, yumi bin toktok long rot bilong pinisim pait. Ating i hatwok long yumi tingim dispela samting. Em hia wanpela piksa i makim i stap bilong ol man long taim i no gat pait moa. [Soim piksa long em i stap long pes 188-189 bilong buk Save.] Bai yumi amamas long stap long kain gutpela ples olsem, a? [Opim pes 4-5, soim piksa, na kaunim blok.] Nem bilong dispela buk i wankain liklik long dispela tok bilong Jisas i stap long Jon 17:3. [Kaunim.] Mi laik soim yu olsem wanem yu ken mekim wok long dispela buk wantaim Baibel bilong yu bilong helpim yu long kisim dispela save i bringim man long laip oltaim. Pe bilong buk em K1.50 tasol.” Sapos man bilong haus i tok orait, yu ken kirapim stadi long namba wan sapta.
3 Sapos namba wan taim yu lukim man em i gat planti wok, taim yu go bek lukim em, yu ken tok:
◼ “Taim mi kam lukim yu bipo, yu kisim tupela nius Wastaua na Kirap! Dispela tupela nius i save helpim yumi long tingim gut Baibel na ol stretpela lo bilong en. Mi pilim olsem em i bikpela samting olgeta man i mas save gut long ol tok bilong Baibel, olsem na mi kam bek bilong soim wanpela samting long yu bilong helpim yu long kisim dispela save.” Tilim buk Save, na opim long pes 3 na soim lista long em. Askim em wanem sapta em i laik kisim save long en, na opim buk long dispela sapta, na kirapim stadi.
4 Sapos yu bin tilim buklet “Tewel Bilong Ol Daiman” long man bilong haus, tokim em long kisim i kam, na tok:
◼ “Dispela tok hia long pes 30 na 31 i stori long ol gutpela samting bai kamap long graun.” Stori liklik long ol tok i stap long pes 30 na 31. Askim man bilong haus, sapos em i laik kisim sampela save moa, em i mas mekim wanem. Orait, nau yu ken tok: “Em bikpela samting yumi mas save bilong wanem Kingdom bilong God i mas i kam.” Tilim buk Save na tokim em, dispela buk i stori moa long ol tok i stap insait long buklet Tewel Bilong Ol Daiman. Stretim rot bilong i go bek lukim em na bai yu ken toktok long i gat wanem as na yumi mas wetim gavman bilong God tasol.
5 Bai yumi kisim bikpela amamas sapos yumi inap ‘opim rot long ol narapela na ol i bilip,’ em rot i bringim man long laip oltaim.—Ap 14:27; Jo 17:3.