Buk Baibel—God i Givim Bilong Stiaim Ol Man
1 Ol man i wokim pinis 4 bilion Baibel long 2,100 tok ples, olsem na winim 90 pesen bilong ol man long dispela graun ol inap kaunim Tok Bilong God. Tasol bikpela hangre tru i stap yet long dispela graun—ol man i ‘hangre tumas long harim tok bilong God.’ (Amo 8:11) Planti man i gat Baibel, tasol ol i no kaunim o ol i no kisim insait bilong en. Olsem wanem yumi ken kirapim ol long mekim wok long Baibel bilong stiaim wokabaut bilong ol?
2 Long mun Disemba bai yumi tilim buk Yu Inap i Stap Oltaim Long Paradais Long Graun, Nambawan Man Tru i Winim Olgeta Narapela Man, o Baibel Stori Buk Bilong Mi. Bai yumi kamapim klia olsem yumi pilim tru tok i tru Jehova i kamapim pinis long Baibel taim yumi wok strong long tilim wanpela o sampela bilong ol dispela gutpela buk. Ol inap helpim ol man i gat gutpela bel long pilim tru olsem Baibel em i buk God i givim long yumi bilong stiaim ol man, na yumi tu i pilim olsem. Yu ken tilim wanpela o sampela bilong ol dispela buk. Taim yu tilim buk Yu Inap i Stap Oltaim Long Paradais Long Graun yu ken mekim sampela tok olsem mipela raitim long hia:
3 Bilong kirapim tok yu ken mekim wok long liklik nius “I Gat Wanem As na Yu Inap Bilip Tru Long Baibel?” Yu ken tok olsem:
◼ “Maski klostu olgeta man i stap long dispela graun ol i gat rot long kisim wanpela Baibel, sampela man tasol i kaunim Baibel long olgeta taim. Yu ting i gat wanem as bilong dispela?” Kaunim tupela paragraf long kirap bilong dispela liklik nius wantaim 2 Timoti 3:16. Tilim buk Stap Oltaim na stori liklik long sapta 5. Sapos man i no laik kisim, askim em long kaunim ol tok i stap long dispela liklik nius. Soim laspela liklik het-tok long em, em i tok “Ol Tok Profet.”
4 Taim yu go bek bilong lukim man i bin kisim liklik nius “I Gat Wanem As na Yu Inap Bilip Tru Long Baibel?,” yu ken traim dispela tok:
◼ Taim yu kolim gen nem bilong yu, kaunim tupela laspela paragraf bilong dispela liklik nius. Askim man olsem, em i ting bai yumi inap i stap oltaim long dispela graun. Taim em i bekim pinis, yu ken tok: “Ol Witnes Bilong Jehova i bilip tru olsem olgeta tok profet bilong Baibel bai kamap tru. Na ol tok profet i makim wanpela gutpela taim bai kamap long bihain na ol manmeri i bihainim ol lo bilong God, ol bai stap long en, dispela tok profet tu bai kamap.” Soim man long piksa i stap long pes 13 long buklet Yumi Mas Mekim Wanem?, na bihain opim buklet long Stadi 5, na tokim em bai yu amamas long stori wantaim em long bekim bilong olgeta askim i stap long dispela pes; long dispela rot yu kirapim wanpela Baibel-stadi.
5 Taim yu save pinis wanpela man em i man bilong lotu, yu ken traim dispela tok:
◼ “Planti famili long PNG ol i gat Baibel na ol i ting Baibel em i tok bilong God, tasol i luk olsem taim ol bikpela hevi i painim ol, planti ol i no kaunim na bihainim tok bilong en. Olsem wanem? Yu luksave long dispela samting tu? [Larim man i bekim tok.] Ating ol i tingim Baibel olsem buk bilong ol tok profet tasol, na ol i no ting em i gat planti gutpela tok bilong stiaim sindaun bilong yumi long olgeta wan wan de. Dispela buk Yu Inap i Stap Oltaim Long Paradais Long Graun i kamapim klia olsem tok bilong Baibel i tru na i kamapim sampela tok bilong helpim yumi long winim ol bikpela hevi insait long famili.” Kamapim sampela bikpela tok bilong sapta 5 o sapta 29 na tokim man long kisim dispela buk.
6 Taim yu go bek lukim man yu bin tilim buk “Stap Oltaim” long em, yu ken tok:
◼ “Taim mi kam lukim yu pastaim, yumi stori long olsem wanem Baibel i helpim famili long winim ol hevi. Ol man i bilip olsem Baibel em i tok bilong God, ol i kisim gutpela helpim na ol i amamas moa long i stap bilong ol. Mi laik soim yu wanpela lo bilong Baibel i save helpim ol famili, em i stap long dispela buk mi bin lusim wantaim yu.” Stori long wanpela lo bilong Baibel i stap long sapta 29, paragraf 16, 17 long buk Stap Oltaim, na kaunim paragraf 3 bilong pinisim stori. Sapos em i harim tok, tokim em yu laik mekim Baibel-stadi wantaim em long buk Save o long buklet Yumi Mas Mekim Wanem?
7 Ating ol lapun bai amamas taim yu tok olsem:
◼ “Bipo klostu olgeta famili i kaunim Baibel na ol i bihainim ol lo bilong en. Olsem wanem? Famili bilong yu i bin mekim olsem tu? [Larim em i bekim tok.] Tasol long nau, i olsem planti samting i pulim nabaut tingting bilong planti man na ol i no gat taim bilong kaunim Baibel o ol i ting ol lo bilong en i samting bilong bipo tasol. Sapta 26 bilong dispela buk, Yu Inap i Stap Oltaim Long Paradais Long Graun, i kamapim klia olsem, taim yu stadi long Baibel na yu wok long pilim tru ol lo bilong God na yu wok strong long bihainim, yu bihainim gutpela tingting. Sapos yu laik lain moa long gutpela samting yu inap kisim taim yu bihainim ol lo bilong God, mi bai amamas long tilim dispela buk long yu long K2.00 tasol.”
8 Taim yu mekim gobek, yu ken tok:
◼ “Taim mitupela i bin toktok long pastaim, mitupela i wanbel long tok olsem, long nau ol man i no tingim moa ol gutpela lo bilong Baibel. Yumi mas ting olsem wanem long dispela pasin? [Larim man i bekim tok.] Krais Jisas i tok em i bikpela samting long kisim save long Baibel.” Kaunim Jon 17:3. Na bihain yu ken toktok wantaim em long paragraf 5 long sapta 1 bilong buk Save. Stori long em long pasin bilong mekim Baibel-stadi i no gat pe long en, na tokim em yu laik soim em long olsem wanem yu mekim dispela stadi.
9 Beten na askim Jehova long blesim ol wok bilong yu long helpim ol man long tingim Baibel olsem buk God i givim bilong stiaim ol man.