2015 Skul Tiokratik Bilong Autim Tok i Helpim Yumi Long Kamap Gutpela Tisa Moa

¹ Man bilong raitim song i tok: “Bikpela, mi laik bai tok bilong mi na tingting bilong mi i ken i orait long ai bilong yu. Bikpela, yu ples hait bilong mi na helpim bilong mi.” (Sng. 19:14) Yumi tu i laik bai toktok bilong yumi i mekim Jehova i amamas, long wanem, yumi lukautim gut wok bilong yumi long autim tok i tru long kongrigesen na long taim yumi autim tok. Skul Tiokratik Bilong Autim Tok em wanpela rot Jehova i skulim yumi long mekim wok autim tok. Dispela skul i save kamap long olgeta wik long 111,000 samting kongrigesen long olgeta hap bilong graun. Em i bin helpim ol brata na sista long olgeta hap bilong graun na bilong kain kain sindaun long winim ol mak olsem wokman bilong autim gutnius, skulim gut man na kirapim tingting bilong ol long bilip, na strong long autim tok na ol i no pret.—Apo. 19:8; Kol. 4:6.

² Long sediul bilong skul bilong 2015 bai yumi kisim ol tok long buklet Tok i Go Pas Long Tok Bilong God (igw). Na tu, i gat ol senis long ol minit bilong Ol Bikpela Tok Yumi Ritim Long Baibel na Tok Namba 1. Ol paragraf bihain i stori long ol dispela senis na tu long olsem wanem bai yumi mekim ol wan wan tok bilong skul.

³ Ol Bikpela Tok Yumi Ritim Long Baibel: Ol brata i mekim dispela hap ol bai gat 2-pela minit long stori long wanpela gutpela poin na wanpela gutpela poin long Baibel ritim bilong wik em i gutpela long yumi bihainim. Taim yu redi gut bai yu inap kamapim wanpela gutpela poin we inap helpim kongrigesen insait long haptaim yu gat. Bihain long en, kongrigesen bai gat 6-pela minit bilong kamapim sampela tok insait long 30 seken o aninit long en long sampela gutpela poin ol i laikim long Baibel ritim bilong wik. Yu mas redi gut na bosim bel bambai yu inap kamapim wanpela gutpela tok i helpim ol narapela insait long 30 seken, tasol taim yu mekim olsem dispela i skulim yu yet. Long dispela rot, ol narapela tu i gat taim long stori long samting ol i kisim save long en long wok painimaut bilong ol.

⁴ Tok Namba 1: Ol minit bilong Baibel ritim em i go daun long 3-pela minit o aninit long en na ol bai ritim sampela ves tasol. Pablisa i kisim dispela asainmen em i mas prektis planti taim, ritim strong, kolim stret na kolim klia ol tok na bai odiens inap kisimgut astingting bilong ol ves. Olgeta long lain bilong Jehova i mas wok strong long kisim pasin bilong ritim gut tok, long wanem, pasin bilong ritim gut tok i gat bikpela wok insait long lotu bilong yumi. Yumi amamas olsem planti pikinini bilong yumi ol i save rit gut! Mipela i laik tok amamas long yupela ol papamama long wok strong long helpim ol pikinini bilong yupela long kisimgut pasin bilong ritim gut tok.

⁵ Tok Namba 2: Dispela tok i gat 5-pela minit na wanpela sista bai mekim. Mekim wok long het tok sediul i makim. Sapos asainmen i kam long buklet Tok i Go Pas Long Tok Bilong God, sumatin i mas mekim olsem wanpela pasin bilong autim tok we i stret long teritori. Taim sumatin i kisim asainmen long wanpela man em Baibel i stori long en, em i mas mekim wok painimaut long dispela man, ritim na stori long ol skripsa i stret long dispela tok, na skul yumi kisim long pasin bilong dispela man. Na tu, em i ken ritim na stori long sampela skripsa i stret long dispela tok. Wasman skul bai makim wanpela helpim bilong em.

⁶ Tok Namba 3: Dispela tok i gat 5-pela minit, wanpela brata o sista bai mekim. Taim sista i mekim, em i mas mekim wankain pasin olsem long Tok Namba 2. Na sapos brata i kisim dispela asainmen, em i mas mekim olsem tok em i givim long odiens. Sumatin i mas kamapim wanpela tim, kamapim ol skripsa i stret long tok, na kamapim skul yumi kisim long eksampel bilong dispela man em Baibel i stori long en.

⁷ Wanpela Nupela Samting Long Tok Namba 3 Bilong Ol Brata: Sapos ol i kisim dispela asainmen long buklet Tok i Go Pas Long Tok Bilong God, ol i mas mekim olsem soim bilong famili lotu o wok autim tok. Planti taim wasman skul bai makim wanpela helpim bilong em na em bai mekim tok olsem wanem. Helpim bilong en em wanpela long famili o wanpela brata long kongrigesen. Long tok bilong em, em i ken kamapim sampela stiatok moa bilong Baibel i stret long tim bilong em. Wan wan taim bai wanpela elda i kisim dispela asainmen. Ol elda yet i ken makim helpim bilong ol na ol bai mekim tok olsem wanem. Yumi save, taim kongrigesen i lukim wanpela elda i mekim soim wantaim wanpela long famili o narapela brata dispela bai strongim ol.

⁸ Tok Kaunsel: Wasman skul bai yusim 2-pela minit bihain long tok bilong wan wan sumatin bilong mekim tok amamas long sumatin na mekim sampela tok i stret bilong helpim sumatin olsem i stap long buk Kisim Helpim Long Skul Tiokratik Bilong Autim Tok. Taim wasman skul i kolim tok sumatin bai mekim, em bai no inap kolim ol poin long tok kaunsel em sumatin bai wok long en. Tasol bihain long sumatin i mekim tok bilong em wasman skul bai tok amamas long sumatin, kolim ol poin bilong tok kaunsel em sumatin i wok long en, na kolim stret samting em sumatin i mekim gut o sapos em i lukim olsem i gat sampela samting em sumatin i mas wok yet long en, orait long gutpela pasin em i ken stori long wai na i gutpela long sumatin i mas wok yet long winim dispela mak.

⁹ Fom bilong tok kaunsel bilong sumatin i stap long buk Skul Bilong Autim Tok, pes 79 i go long pes 81 long buk bilong em yet. Taim sumatin i mekim pinis tok bilong em, wasman skul bai raitim sampela tok we i stret long sumatin long buk bilong sumatin na bihain long miting samting em i ken askim sumatin sapos em i bin mekim eksasais long tok kaunsel em i makim long sumatin i wok long en. Na tu, bihain long miting o long narapela taim tok amamas long sumatin na kamapim sampela tok moa bilong helpim em. Taim wan wan sumatin long skul i kisim ol tok bilong helpim ol, ol i mas tingim olsem dispela bai helpim ol long kamap strong long mekim wok bilong God.—1 Tim. 4:15.

¹⁰ Sapos sumatin i kalapim minit bilong tok, wasman skul o helpim bilong em i mas paitim liklik belo samting i makim olsem sumatin i mas lusim pletfom. Sumatin i mas luksave olsem em sain long em i mas pinisim sentens em i wok long kolim na lusim pletfom.—Lukim buk Skul Bilong Autim Tok, p. 282, par. 4.

¹¹ Olgeta husat i winim mak, kirapim ol long insait long Skul Tiokratik Bilong Autim Tok. (Lukim buk Skul Bilong Autim Tok, p. 282, par. 6.) Save em lain bilong Jehova i kisim long dispela skul i strongim ol long autim tok na skulim ol man long gutnius bilong Kingdom long pasin i kamapim olsem ol i bilip tru long tok ol i autim, na mekim long pasin rispek na pasin laikim. Tru tumas, Jehova i amamas long olgeta man husat i kisim helpim long skul em i bosim!—Sng. 148:12, 13; Ais. 50:4.