Ol Tok Bilong Stiaim Wok Bilong Ol Wasman Skul

LONG olgeta kongrigesen, ol i makim wanpela elda long i stap wasman bilong Skul Tiokratik Bilong Autim Tok. Sapos yu holim dispela wok, pasin bilong yu long givim bel long dispela skul na laik bilong yu long helpim olgeta sumatin long mekim gutpela wok moa, dispela inap helpim skul long mekim gutpela wok long hap bilong yu.

Wanpela bikpela hap bilong dispela wok bilong yu em wok bilong lukautim Skul Tiokratik Bilong Autim Tok long kongrigesen bilong yu long olgeta wik. No ken lusim tingting olsem long olgeta taim i gat ol narapela i stap long odiens, i no ol sumatin tasol. Lukautim skul long pasin i save helpim olgeta brata sista bilong kongrigesen long kisim ol gutpela tok i stret wantaim wanpela o sampela samting skul i laik helpim yumi long mekim olsem buk hia i stori long en long pes 5 i go 8.

Tingting long helpim olgeta sumatin, maski sediul i makim ol long ritim sampela tok, o mekim wanpela tok olsem soim, o ol i mekim wanpela tok. Helpim ol long kisim tingting olsem tok ol i mekim i no wanpela wok bilong mekim na em tasol, nogat, em i givim rot long ol long kamap strong long wok bilong Jehova. Bilong wok bilong ol i ken kamap gutpela moa, pasin bilong ol long givim bel long mekim wok em i bikpela samting. Tasol em i bikpela samting long soim olsem yu tingim ol, na helpim ol long save wanem as na wanpela hap tok kaunsel inap helpim ol, na stori gut long olsem wanem ol i ken bihainim dispela tok kaunsel. Bilong mekim olsem, putim gut yau long olgeta wan wan tok bambai yu inap kamapim ol tok bilong helpim ol.

Yu mas kirapim na pinisim skul long taim stret. Stap olsem gutpela piksa na kamapim ol tok bilong yu insait long ol minit sediul i makim. Sapos wanpela tok bilong sumatin i kalapim minit bilong tok, orait yu o helpim bilong yu i mas paitim liklik belo samting. Sumatin i mas pinisim sentens em i wok long kolim na lusim pletfom. Sapos narapela hap bilong program i kalapim minit, orait sotim ol tok yu mekim, na bihain long miting toktok wantaim brata i bin kalapim minit bilong tok.

Taim yu stap long miting, yu mas lukautim skul. Sapos yu no inap i stap, orait wanpela elda, em lain elda i bin makim em pastaim, i mas lukautim skul. Sapos yu laikim sampela helpim long wokim sediul, raitim na tilim ol asainmen pepa, o stretim ol samting bilong kisim ol volantia taim sumatin i no stap, orait wanpela kongrigesen sevent em lain elda i bin makim inap helpim yu long mekim ol dispela samting.

Ol Nupela Sumatin. Kirapim olgeta pablisa long insait long skul. Ol narapela i save kam oltaim long ol miting inap insait long skul sapos ol i wanbel wantaim ol tok bilong Baibel na sindaun bilong ol i stret wantaim ol stiatok ol Kristen i mas bihainim. Taim wanpela i tok olsem em i laik insait long skul, mekim gutpela tok amamas long em. Sapos em i no wanpela pablisa, orait yu mas toktok wantaim em long ol mak em i mas winim bilong insait long skul, na i gutpela sapos man i stadi wantaim em (o papa o mama Witnes bilong em) i stap taim yu mekim olsem. Ol mak em i mas winim i wankain olsem man i laik kamap wanpela pablisa i no baptais yet. Ol dispela mak i stap long pes 97 i go 99 long buk Lo Bilong Yumi Bilong Mekim Wok Autim Tok. Wokim wanpela lista i gat nem bilong olgeta sumatin na putim nem bilong ol nupela sumatin long en.

Yusim Tok Kaunsel Fom. Tok kaunsel fom bilong wan wan sumatin i stap insait long skul-buk bilong ol yet long pes 79 i go 81. Olsem ol kala i makim, ol hap tok kaunsel namel long stadi 1 i go 17 em bilong sumatin taim ol i makim em long ritim sampela tok. Long ol tok ol i mekim olsem soim, ol sumatin bai wok long wanpela bilong olgeta hap tok kaunsel, tasol namba 7, 52, na 53 nogat. Ol brata i mekim ol tok bai wok long olgeta hap tok kaunsel, tasol namba 7, 18, na 30 nogat.

Taim wasman skul i makim wanpela hap tok kaunsel bilong wok long en, em i mas yusim wanpela pensil bilong raitim det aninit long hap ol i kolim “Det Ol i Makim” long buk bilong sumatin yet, long lain i stap klostu long dispela hap tok kaunsel sumatin i wok long en. Taim sumatin i mekim pinis tok bilong em, bihain long miting askim em olsem em i mekim pinis eksasais long pinis bilong dispela stadi o nogat. Sapos em i mekim pinis, orait tikim dispela liklik blok i stap long fom. Sapos yu tok em i mas wok yet long dispela hap tok kaunsel, orait yu no gat wok long raitim narapela samting long tok kaunsel fom; no ken raitim det long hap ol i kolim “Det Yu Winim.” Raitim det long dispela hap taim sumatin i redi long wok long narapela hap tok kaunsel. Na tu, long pes 82 long buk bilong sumatin, long han kais bilong pasin bilong mekim tok em i bin wok long en, raitim det em i bin mekim dispela pasin. I gat tupela spes long tok kaunsel fom na long lista bilong ol pasin bilong mekim tok bilong makim olsem sumatin i bin mekim wok pinis long ol wan wan tok kaunsel na ol wan wan pasin bilong mekim tok. Ol sumatin i mas bringim buk bilong ol i kam long taim bilong skul.

Taim sumatin i mekim tok, makim em long wok long wanpela hap tok kaunsel tasol. Em i gutpela long bihainim lista na makim ol hap tok kaunsel ol sumatin bai wok long en. Tasol sapos sampela sumatin ol i save mekim gutpela wok tru, orait yu ken kirapim ol long skelim gut na bihainim sampela stadi bilong skul-buk long taim bilong ol yet. Taim yu mekim olsem yu ken wok wantaim ol long ol hap tok kaunsel yu ting i gutpela moa long helpim ol long kamap man bilong mekim gutpela tok na mekim gutpela wok tisa.

Maski sumatin i bin insait long skul inap planti yia, em inap kisim gutpela helpim taim em i skelim na bihainim ol tok bilong ol wan wan stadi. Bilong helpim ol sumatin i gat hevi long sampela pasin bilong mekim tok, ating yu ken makim wanem stadi i stret long helpim ol na no ken bihainim lista tasol.

Givim Tok Kaunsel. Taim yu givim tok kaunsel long sumatin, mekim gutpela wok long ol stori na ol stiatok bilong Baibel. Ol sumatin i mas pilim olsem ol gutpela stiatok bilong Baibel i as bilong ol tok kaunsel na pasin bilong givim dispela tok kaunsel.

No ken lusim tingting olsem yu save “wok wantaim” ol brata sista bilong yu. (2 Ko. 1:24) Wankain olsem ol brata sista, oltaim yu mas wok strong long kamap gutpela moa long pasin bilong mekim tok na mekim wok tisa. Yu yet mas stadi long buk Kisim Helpim Long Skul Tiokratik Bilong Autim Tok, na bihainim ol tok kaunsel bilong en, na stap olsem gutpela piksa ol narapela i ken bihainim.

Taim yu mekim olsem, yu mas putim mak olsem yu laik helpim ol sumatin long kisim pasin bilong ritim gut tok, mekim gutpela tok, na kamap gutpela tisa. Bilong mekim olsem, wok long helpim ol sumatin long save gut long ol wan wan pasin bilong toktok, na bilong wanem ol i bikpela samting, na olsem wanem ol i ken kisim ol dispela pasin. Ol i wokim dispela skul-buk bilong helpim yu long mekim olsem. Tasol planti taim sapos yu ritim tok long buk tasol, dispela i no inap helpim sumatin; yu mas mekim sampela samting moa. Toktok wantaim ol sumatin long insait bilong ol tok buk i kamapim na olsem wanem yumi ken bihainim dispela tok.

Sapos wanpela sumatin i bin mekim gut wanpela stadi, orait mekim tok amamas long em. Mekim sotpela tok long as na tok em i mekim i gutpela, o bilong wanem samting em i mekim em i bikpela samting. Sapos em i mas wok yet long stretim wanpela samting, orait yu mas tokim em bilong wanem em i mas wok moa long dispela samting. Stori long olsem wanem em i ken mekim. Kolim stret samting em i mas wok long en, tasol mekim long gutpela pasin.

Yu mas save, planti man i hatwok long sanap long ai bilong wanpela lain na givim tok long ol. Sapos wanpela man i pilim olsem em i no mekim gutpela tok, em inap kisim tupela tingting olsem em i mas traim yet long mekim ol tok o nogat. Bihainim pasin bilong Jisas, em i no bin brukim “pitpit i no gat strong” o em i no bin “mekim i dai lam i no lait gut.” (Mt. 12:20) Tingim tu bel bilong sumatin, em i pilim olsem wanem. Taim yu givim tok kaunsel long em, tingim, em i wanpela nupela sumatin o em i stap pablisa longpela taim. Pasin bilong mekim gutpela tok amamas i save strongim ol man long wok yet long traim bes bilong ol.

Soim rispek long ol wan wan sumatin. Rom 12:10 i tokim yumi olsem: “Yupela i mas strong long litimapim nem bilong ol arapela tasol.” Dispela tok i stret tru long brata i save givim tok kaunsel long Skul Tiokratik Bilong Autim Tok! Sapos krismas bilong sumatin i winim krismas bilong yu, orait bihainim gut tok i stap long 1 Timoti 5:​1, 2. Tasol maski man i gat hamas krismas, taim yu givim tok kaunsel long em long stretim pasin bilong em long mekim sampela samting, ating em bai kisim dispela tok sapos yu mekim long gutpela pasin.​—Snd. 25:11.

Taim yu givim tok kaunsel, helpim sumatin long tingim wok bilong dispela skul em i kisim. Wok bilong dispela skul i no bilong wasman skul i ken tok olsem sumatin i mekim gutpela tok na nau em i ken wok long narapela stadi bilong skul, nogat. Mak em i laik winim i no bilong i stap olsem wanpela gutpela man bilong mekim tok na wanpela gutpela tisa ol man i save litimapim nem bilong em. (Snd. 25:27) Yumi laik yusim maus bilong yumi long litimapim nem bilong Jehova na helpim ol narapela long kisim save long em na laikim em. Skul yumi kisim em bilong helpim yumi long mekim gut dispela wok Matyu 24:14 na 28:​19, 20 i tok long en. Ol brata i baptais pinis na i winim mak, ating bihain ol bai singautim ol long helpim wok bilong “lukautim gut ol manmeri bilong God” olsem ol man bilong mekim tok na mekim wok tisa.​—1 Pi. 5:​2, 3.

Tokim ol sumatin olsem taim ol i kisim asainmen em i gutpela sapos insait long sampela de tasol ol i ritim hap tok kaunsel long skul-buk ol i mas wok long en. Kirapim ol long bihainim ol tok ol i lainim taim ol i redim ol hap bilong ol bilong skul, na taim ol i toktok wantaim ol man long olgeta de, na taim ol i autim tok.

Givim Ol Asainmen. Yu mas givim ol asainmen long ol sumatin tripela wik o moa paslain long taim bilong mekim. Sapos yu inap, yu mas raitim ol dispela asainmen long wanpela pepa na givim long ol sumatin.

Ol tok bilong skulim kongrigesen, yu mas makim ol elda long mekim, em ol elda i save mekim gut ol kain tok olsem, na ol kongrigesen sevent i save mekim gut wok tisa.

Bilong save wanem ol tok bilong sumatin yu mas makim bilong ol brata na wanem tok yu mas makim bilong ol sista, bihainim tok i stap long sediul bilong skul. Sapos i no gat planti brata tasol i gat planti sista i save givim ol tok, orait was gut na larim ol brata long mekim ol narapela tok tu, i no ritim Baibel tasol.

Tingim i stap bilong ol man taim yu givim asainmen long ol. Olsem wanem? Yu mas makim wanpela elda o kongrigesen sevent long mekim tok long skul long wankain nait em bai lukautim hap bilong Miting Bilong Wok o long wankain wik em bai mekim wanpela pablik-tok long kongrigesen? Ating wanpela sista i save helpim yangpela pikinini long redim tok bilong em, olsem na yu ting em i gutpela long makim tupela wantaim long mekim tok long wanpela miting? Olsem wanem? Samting sumatin bai stori long en i stret long sumatin i yangpela tru o long sumatin i no baptais yet? Skelim na painimaut olsem samting tok i stori long en i stret long hap tok kaunsel sumatin bai wok long en.

Long ol tok ol i makim ol sista long mekim, sumatin yet bai makim olsem em bai mekim tok olsem wanem na em bai bihainim ol tok i stap long pes 78 na 82. Ol i mas makim wanpela helpim bilong ol sista i mekim tok, tasol sista inap kisim narapela helpim tu. Sapos sumatin i askim yu long kisim wanpela helpim i stret tru long makim pasin em i laik mekim tok long en, orait i gutpela yu tingim gut askim bilong em.

Ol Nambatu Klas. Sapos namba bilong ol sumatin i winim 50, ating bai yu gat laik long makim sampela narapela hap we ol sumatin i ken mekim tok bilong ol. Skelim kongrigesen bilong yu, ating long narapela klas ol i ken mekim olgeta tok bilong sumatin o tupela laspela tok tasol.

Ol nambatu klas i mas i gat wanpela gutpela brata bilong givim tok kaunsel, na mobeta em i wanpela elda. Sapos i no gat elda, orait wanpela kongrigesen sevent i gat save long mekim tok em i ken mekim. Lain elda bilong kongrigesen i mas orait long ol dispela brata i holim dispela wok. Wasman skul i mas wok gut wantaim ol brata i lukautim ol nambatu klas bambai ol i ken stretim gut ol samting bilong ol sumatin maski ol bai mekim tok long wanem hap bihain.

Klas Bilong Rit. Sapos lain elda i luksave olsem i gat sampela brata sista long kongrigesen husat i mas i gat helpim long lain gut long ritim tok ples kongrigesen i save mekim, orait yu ken stretim rot bilong mekim kain klas olsem long wankain taim ol i mekim Skul Tiokratik. Wok bilong dispela klas em bilong lainim man long rit rait, o bilong helpim ol man long ritim gut tok.

Tasol i no olsem yu mas mekim dispela kain skul long wankain taim olsem yu mekim Skul Tiokratik Bilong Autim Tok. Nogat. Bilong helpim tru man, ating yu mas lusim sampela hap taim moa, winim hap taim yu inap lusim long taim bilong skul. Ol elda bilong kongrigesen bai luksave long wanem helpim ol man i mas kisim, na ol bai kisim long wanem taim. Ol bai skelim, na sapos ol man i mas kisim helpim, ol bai stretim rot bilong givim skul long wanpela lain o long wan wan man.

I mas i gat wanpela man i save mekim gutpela wok tisa. Mobeta em i wanpela brata i save rit gut na i save gut long tok ples bilong kongrigesen. Sapos i no gat wanpela brata, orait ol elda i ken askim wanpela sista i stap gutpela piksa long mekim dispela wok. Em i mas pasim hat o laplap samting long het taim em i skulim klas.​—1 Ko. 11:​3-10; 1 Ti. 2:​11, 12.

Ol i wokim buklet Wok Strong Long Lain Long Rit na Rait long planti tok ples. Ol i wokim dispela buklet bilong lainim man long rit na rait. Yu ken yusim ol narapela buk samting tu sapos pasin bilong ol man long rit i winim skel bilong dispela buklet. Taim pasin bilong ol long rit i kamap gutpela, orait kirapim ol long insait long Skul Tiokratik.

Yu stap wasman bilong Skul Tiokratik Bilong Autim Tok, olsem na yu inap mekim planti samting bilong helpim kongrigesen. Redim gut, na bihainim tok i stap long Rom 12:​6-8 taim yu lukautim dispela gutpela wok God i givim long yu.