Ol Samting Yu Ken Mekim na Bai Skul Bilong Wok Autim Tok i Helpim Yu Tru
1 Skul Bilong Wok Autim Tok i bin lainim yumi long pasin bilong “skulim ol [man] gut” na bai yumi inap helpim ol man long kisim gut ol tok tru bilong Baibel. (2 Ti 4:2) Long olgeta wik yumi kisim save long ol narapela narapela tok bilong Baibel. Yumi ken mekim wanem na bai ol tok bilong skul inap helpim tru yumi?
2 Putim gut yau taim wasman bilong skul i kamapim sampela gutpela tok em miting inap lainim yu long en. Tingim ol askim em i kamapim na olsem wanem yu inap mekim wok long ol bekim long taim yu autim tok.
3 Brata i mekim Tok Namba Wan em i no ken stori tasol long ol tok i stap long buk o long pepa. Em i mas helpim kongrigesen long save olsem wanem ol inap mekim wok long ol dispela tok na olsem wanem ol tok inap helpim ol wan wan. Sapos paslain long miting yu kaunim ol tok i stap long dispela buk o pepa, dispela bai helpim yu long putim tingting i go long ol bikpela tok bilong en na redi long bekim sampela askim.
4 Sapos yu kaunim hap tok bilong Baibel em sedyul i makim, dispela inap helpim yu long laikim moa yet ol tok bilong Baibel. Na sapos yu wok long painim sampela save moa long ol buk samting bilong Sosaiti, bai yu kisim save long sampela nupela samting na kisim gut ol tok i tru. Brata i kamapim ol bikpela tok bilong Baibel em sedyul i makim em i no ken stori tasol long ol dispela tok. Em i mas mekim liklik tok, na nau em i ken stori long ol bikpela tok bilong ol dispela sapta bilong helpim kongrigesen long save olsem wanem ol dispela tok inap helpim sindaun bilong ol na helpim ol long lotuim God. Putim gut yau na bai yu ken save olsem wanem yu inap bihainim moa yet ol tok bilong Baibel.—Sng 119:105.
5 Sapos ol i makim yu long mekim wanpela tok, tingim tok em wasman bilong skul i bin tokim yu long tingim long taim yu mekim tok, na kaunim hap tok bilong Buk Bilong Skul i stori long dispela samting, na wok long bihainim. Taim yu redim tok, kamapim sampela tok ol brata i ken mekim wok long en long taim ol i autim tok.—sg pes 19, 20.
6 Sapos yu wanpela sista na ol i makim yu long mekim Tok Namba 3 o Tok Namba 4, mekim olsem yu bungim wanpela man stret. Ating helpim bilong yu i ken wanbel long sampela tok yu mekim, na sampela tok, nogat. Helpim em long tingim na bilipim ol lo bilong Baibel em as bilong ol tok yu kamapim. (sg pes 37-39) Sapos yu mekim olsem, dispela bai helpim ol brata sista long save long ol samting ol yet i ken mekim taim ol i autim tok na wankain samting i painim ol. Redim gut pastaim, na stretim rot bilong traim dispela tok wantaim helpim bilong yu. Tasol nogut yu traim long taim miting i kirap pinis.
7 Ol sumatin i mas mekim tok, gutpela sapos ol i sindaun klostu long pletfom na bai taim i no lus nating long wokabaut i go long pletfom, na wasman bilong skul inap lukim sumatin taim em i givim sampela tok long em. Sapos wasman i kolim stret ol tok bilong Buk Bilong Skul na mekim long gutpela pasin, dispela inap helpim olgeta brata sista. Em i no ken bihainim tasol ol tok em pepa “Bilong Helpim Sumatin Long Mekim Gut Tok” i makim, nogat; em i mas tingim wanem wanem samting long pepa em inap helpim sumatin long mekim gut tok.
8 Em nau, em sampela gutpela as na yumi mas redim ol tok bilong Skul Bilong Wok Autim Tok na kam long miting long olgeta wik. Ol tok yumi kisim inap helpim yumi long bihainim gutpela tingting na mekim gut wok autim tok.—Snd 1:5.
[Ol Askim]
1. Skul Bilong Wok Autim Tok bai helpim yumi olsem wanem long wok autim tok?
2. Yumi mas putim gut yau long wanem samting?
3. Sapos paslain long miting yu kaunim ol tok bilong Tok Namba Wan, olsem wanem dispela bai helpim yu?
4. Sapos long olgeta wik yu kaunim hap tok bilong Baibel em sedyul i makim, olsem wanem dispela inap helpim yu?
5. Sapos ol i makim yu long mekim wanpela tok, yu mas mekim wanem?
6. (a) Ol sista i mekim Tok Namba 3 na 4 ol i mas mekim long wanem kain pasin? (b) Dispela inap helpim ol brata sista olsem wanem?
7. (a) Bilong wanem i gutpela sapos ol sumatin i mas mekim ol tok ol i sindaun klostu long pletfom? (b) Wasman bilong skul i mas tingim wanem samting taim em i laik givim sampela tok long sumatin?
8. Skul Bilong Wok Autim Tok i bin lainim yumi long wanem samting?
This article is repeated in km 1/96 entitled “Skul Bilong Wok Autim Tok i Helpim Yu.”