Helpim Moa Yet Ol Painia

¹ Komiti Bilong Lukautim Wok Bilong Kongrigesen, na ol narapela elda tu, ol i mas tingim gut ol painia. Ol dispela askim hia bai helpim ol elda long tingim ol samting ol inap mekim bilong helpim ol painia. Olsem: Ol painia i mekim gut ol wok bilong autim tok o i mas i gat sampela bilong lainim ol long mekim gut ol gobek na Baibel-stadi? Ol i wok long bihainim ol gutpela pasin em spirit holi i as bilong en? Na ol i wok gut wantaim na i stap wanbel? (Ro 14⁠:19) Sampela i mas helpim ol long wokim wanpela sedyul ol inap bihainim? Ol i save stadi na bekim tok long taim bilong miting? Sapos ol elda i tingim tru ol painia, bai ol i tingim ol samting ol inap mekim bilong helpim ol na toktok wantaim ol long olgeta taim.

² Ol painia i save pilim tru gutpela pasin sori ol elda i mekim bilong tingim ol. Taim ol painia i raitim pas long Sosaiti, planti taim ol i tok tenkyu long gutpela pasin sori lain elda i bin mekim bilong helpim ol. Gutpela pasin ol elda i mekim i bin helpim sampela na ol i no lusim wok painia; ol i mekim yet.

³ Ol elda i mas strong long ol painia i mas inapim ol mak bilong wok painia, na wanpela mak ol i mas inapim em ol aua. Tasol sapos painia i karim sampela hevi i bilong sotpela taim tasol na ol aua bilong em i sot, ol elda i tingting gut ol i mas hariap na helpim dispela painia​—⁠nogut ol i tokim em ol bai pinisim em long wok painia sapos em i no wok strong long winim ol aua bilong painia. Ol i no ken larim ol hevi i stap inap planti mun na nau ol i wok long helpim em, nogat; sapos olsem, ating painia bai i hatwok long winim ol aua na bai em i bel hevi na laik lusim wok painia.

⁴ Olsem wanem? Dispela hevi bilong painia em inap pinis insait long sampela mun? Sapos olsem, ol elda i ken mekim wanem bilong helpim painia? Sapos em wanpela hevi em painia yet i mas stretim, orait, ol elda i ken mekim sampela gutpela tok bilong strongim bel bilong em​—⁠ol i ken givim sampela tok long em bilong helpim em, na tokim em, em i bin mekim gutpela wok.

⁵ Tasol ol elda i mas was gut. Sapos painia i no askim ol elda long helpim em, ol i no ken insait nating long ol samting bilong em yet o bilong famili bilong em. Tasol sapos hevi i bikpela na i olsem painia i no inap kisim ol aua inap sampela mun, ating ol elda i ken pasim tok olsem mobeta painia i lusim wok painia inap long taim em i stretim dispela hevi.

⁶ Sapos painia i gat hevi, maski raitim pas long Sosaiti; mobeta em i toktok wantaim ol elda na kamapim ol hevi bilong em. Sapos i mas i gat sampela samting moa bilong helpim painia, ating i gutpela sapos ol elda i raitim pas. Taim wasman sekit i kam lukim kongrigesen, ol painia i no ken pret long toktok wantaim em long ol samting em inap pasim ol long mekim gut wok painia. Sapos ol i toktok wantaim em olsem, dispela bai kamapim planti gutpela samting. Ol elda i save gut long dispela painia. Ol i save long pasin na tingting bilong em​—⁠em i givim bel long wok o em i no givim bel; em i bosim gut skin o em i mekim nabaut ol samting. Na ol i save tu long i stap bilong famili bilong em, na em i gat sik o em i stap gutpela, na ol i save long sedyul bilong em long mekim wok skin. Mipela i save, ol elda inap skelim gut ol samting olsem: Painia inap wok yet long mekim wok painia o mobeta em i lusim na mekim gen long bihain.

⁷ Taim ol elda i toktok wantaim painia, sapos ol i save dispela hevi i bilong sotpela taim tasol na taim yia bilong wok i no pinis yet bai painia inap winim ol aua em i sot long en, orait, ol i ken givim sampela gutpela tok long em bilong helpim em na strongim em, na em tasol. Tasol sapos narapela kain hevi i painim em na em i no inap mekim wanpela samting bilong stretim, na ol aua bilong em i sot tru na em i no inap winim mak bilong ol aua bilong yia bilong wok, orait, nau ol elda i mas tingting: ol i ken mekim pasin marimari long em olsem Wok Kingdom Bilong Yumi (km-E [Ostrelia] 3/78, insert, par. 18-20) i tok, o nogat. Sapos ol i pilim olsem i gat as na ol i ken marimari long em, orait, ol i ken raitim liklik tok olsem long kat bilong dispela painia, em Kat Ripot Bilong Pablisa. Na ol i ken tokim painia, kirap long nau em i ken wok strong long winim mak bilong ol aua, na em i no ken tingting planti long ol aua em i sot long en. Sapos ol elda i ting dispela hevi bilong painia bai stap longtaim na ol i ting i gutpela sapos painia i lusim wok painia, orait ol i mas wokim pepa bilong dispela na salim long Sosaiti bilong toksave long ol. Komiti Bilong Lukautim Wok Bilong Kongrigesen i no ken raitim pas long Sosaiti na askim ol long dispela samting, tasol sapos ol i no klia long ol tok bilong dispela Wok Kingdom, na ol i no save gut olsem ol i ken marimari long painia o nogat, orait ol i ken raitim pas long Sosaiti bilong kisim sampela save moa. Long pas bilong ol, ol i mas kolim gut olgeta samting bilong dispela hevi na ol i mas raitim ripot long ol aua painia i bin lusim long autim tok long yia bilong wok bilong nau.

⁸ Taim yia bilong wok i pinis, long baksait bilong pepa Ripot Bilong Skelim Wok Bilong Kongrigesen, ol elda i save raitim nem bilong olgeta painia oltaim na ol aua ol i kisim insait long dispela yia. Sapos painia i no winim mak bilong ol aua bilong yia, Komiti Bilong Lukautim Wok Bilong Kongrigesen i mas raitim liklik pas na salim wantaim dispela pepa na toksave i gat wanem as na painia i no kisim ol aua. Sapos ol i ting olsem painia inap stretim dispela hevi na inapim ol aua long nupela yia bilong wok, orait ol i ken toksave long dispela. Sosaiti i no ken bekim pas long ol elda sapos ol i pilim olsem ol i no gat wok long bekim.

⁹ Na mipela laik askim ol wasman sekit tu long tingim gut ol painia. Wasman sekit i save stap liklik taim tasol wantaim kongrigesen na ating em i no inap lusim bikpela hap taim tumas na toktok wantaim ol wan wan painia. Tasol taim em i skelim ol ripot, na bung wantaim ol painia, na autim tok wantaim ol, ating bai em inap save olsem wanem em inap helpim na strongim gut ol. Gutpela sapos em i autim tok wantaim planti painia na pablisa inap long mak bilong sedyul bilong em. Sapos i gat planti painia, orait, taim em i kam lukim kongrigesen ating em i ken wok wantaim sampela tasol, na narapela taim em i ken wok wantaim sampela moa. Em bai toksave long ol elda sapos em i ting ol elda i mas helpim sampela painia, na em i ken tokim ol elda long ol samting ol i ken mekim bilong helpim painia long mekim gut wok bilong em.

[Ol Askim]

1. (a) Wanem lain i laik helpim ol painia? (b) Ol elda i ken tingim wanem ol askim long ol samting bilong ol painia?

2. Olsem wanem yumi save, ol painia i pilim tru ol gutpela samting ol elda i mekim bilong helpim ol?

3. Ol elda i mas mekim wanem sapos ol i save ol aua bilong painia i sot?

4. Sapos painia yet i mas stretim hevi bilong em, ol elda i ken mekim wanem?

5. Sapos em i bikpela hevi, ating ol elda i ken mekim wanem?

6. Bilong wanem painia i mas toktok wantaim ol elda long kongrigesen bilong em na kamapim ol hevi bilong em?

7. (a) Ol elda i ken mekim wanem sapos ol i save hevi bilong painia bilong kisim ol aua i bilong sotpela taim tasol? (b) Ol elda i mas mekim wanem sapos ol i ting dispela hevi bilong painia bai stap longtaim? (c) Long wanem taim tasol ol elda i ken rait long Sosaiti long ol samting bilong dispela hevi bilong painia?

8. Long olgeta yia, Komiti Bilong Lukautim Wok Bilong Kongrigesen i mas raitim wanem tok long baksait bilong Ripot Bilong Skelim Wok Bilong Kongrigesen?

9. Wasman sekit i ken mekim wanem bilong helpim ol painia?

This article is unique to PNG.