Olsem Wanem? Yu Winim Ol Mak Bilong Mekim Wok Painia?
1 Bilong winim mak bilong mekim wok painia, pablisa i mas baptais pinis inap 6-pela mun, na insait long 6-pela mun i go pinis em i bin autim tok long olgeta mun. Em i mas inap long winim 1,000 aua insait long wanpela yia. Em i mas bihainim stretpela pasin Kristen. (om pes 113-114) Pasin Kristen em i wanem kain pasin? Ol elda i mas lukim wanem kain pasin long pablisa i putim aplikesen bilong mekim wok painia?
2 Stretpela pasin i olsem: Yu mas stap klin long bodi na long spirit. Man o meri i laik mekim wok painia em i mas i gat gutpela nem na bihainim stretpela pasin Kristen insait na ausait long kongrigesen. Em i mas givim bel olgeta long Jehova. Wokabaut bilong em i mas kamapim klia olsem em i bihainim ol gutpela pasin, em spirit bilong God i as bilong en. Namba wan samting painia i mas tingim em wok bilong autim tok na kamapim ol disaipel. Taim em i autim tok long ol haus em i mas mekim gutpela wok long Baibel, na go bek lukim ol man i laik harim tok, na kirapim na mekim gut ol Baibel-stadi. Ol painia i mas wok gut wantaim ol elda long ol samting bilong autim tok na ol miting.
3 Sapos kongrigesen i kisim bek man i raus o komiti bilong harim kot i bin givim sampela tok long em bilong stretim em, orait, em i mas wet wanpela yia olgeta pastaim na nau ol elda i ken tingim aplikesen bilong em bilong mekim wok painia haptaim o painia oltaim. Na sapos komiti bilong harim kot i bin putim sampela tambu long man, ol dispela tambu i mas pinis pastaim na nau em i ken tingting long mekim wok painia.
4 Olsem wanem? Pablisa i mas wok painia haptaim inap sampela mun na nau ol elda i ken toksave long Sosaiti ol i ting em inap kamap painia oltaim? Nogat. Tasol sapos pablisa i mekim wok painia haptaim pastaim, ating bai em i no hatwok long bihainim sedyul bilong painia oltaim. Ol elda i laik save em inap winim 90 aua long olgeta mun na winim mak bilong 1,000 aua insait long wanpela yia o nogat. Ol i no ken putim sampela mak long ol painia em Sosaiti i no bin putim.
5 Taim pablisa i wokim Pepa Bilong Mekim Wok Painia Oltaim na em i givim long wasman siaman, Komiti Bilong Lukautim Kongrigesen i mas hariap na skelim ol tok bilong dispela pepa. Sapos wanpela elda bilong komiti i lusim kongrigesen inap wanpela o tupela wik samting, ol dispela elda i no ken wetim em. Narapela elda i ken kisim ples bilong em inap long taim em i kam bek. Sapos Komiti Bilong Lukautim Kongrigesen i orait long dispela pablisa i kamap painia oltaim, ol i mas toksave long lain elda na bai ol dispela elda tu i ken kamapim tingting bilong ol. Mekim olsem, na nau ol i ken salim dispela pepa i go long Sosaiti.
6 Long Pepa Bilong Mekim Wok Painia Oltaim ol elda i mas raitim ol aua em pablisa i bin mekim long 6-pela mun i go pinis. Ol elda i mas save, pablisa inap winim mak bilong ol aua long olgeta mun o nogat. Ating averes aua bilong pablisa insait long 6-pela mun i no makim tru ol wok pablisa inap mekim insait long bikpela hap taim. Sapos pablisa i bin wok strong na inap wanpela o tupela mun em i bin kisim planti aua, ol elda i mas tingim dispela samting. Olsem na ol elda i mas tingim olgeta wok em pablisa i bin mekim insait long 6-pela mun. Maski averes aua bilong em i bikpela, sapos wok bilong em i no kamap gutpela tumas, ating ol elda bai tokim em long mekim gut ol hap wok bilong autim tok em i no save mekim gut long nau, na taim ol dispela wok i kamap gutpela, nau em i ken kisim wok painia. Taim ol elda i kisim aplikesen, sapos ol i ting pablisa i no inap kisim wok painia oltaim long nau, ol i mas toksave i gat wanem as na ol i ting em i no inap, na ol i mas tokim em ol i no ken salim pepa i go long Sosaiti. Ol elda i mas tokim em long ol samting em i ken mekim na bai em inap winim mak bilong mekim wok painia oltaim. Sapos bihain ol elda i ting em inap kisim wok painia oltaim na ol i laik mekim wok long dispela pepa em pablisa i wokim pastaim, pablisa i mas senisim det em i bin putim bilong kirapim wok.
[Ol Askim]
1. Kolim ol mak bilong painia oltaim.
2. Pablisa i laik mekim wok painia oltaim em i mas i stap olsem wanem?
3. (a) Sapos kongrigesen i kisim bek man i raus o komiti bilong harim kot i bin stretim em, em i mas wet hamas mun samting pastaim na nau ol elda i ken tingim aplikesen bilong em bilong mekim wok painia haptaim o painia oltaim? (b) Sapos komiti bilong harim kot i bin putim sampela tambu long man, Sosaiti i ken makim em long mekim wok painia o olsem wanem?
4. (a) Pablisa i laik kamap painia oltaim, pastaim em i mas mekim wok painia haptaim o olsem wanem? (b) Sapos ol elda i ting pablisa inap kisim wok painia oltaim, pastaim ol i mas save long wanem samting?
5. Taim Komiti Bilong Lukautim Kongrigesen i kisim Pepa Bilong Mekim Wok Painia Oltaim ol i mas mekim wanem?
6. (a) Taim Komiti Bilong Lukautim Wok Bilong Kongrigesen i tingim averes aua bilong pablisa i laik mekim wok painia, ol i mas tingim wanem ol samting? (b) Sapos ol elda i ting em i no inap kisim wok painia oltaim, ol i mas mekim wanem?
This article is unique to PNG.