Rot Bilong Mekim Wok Bilong Yu i Go Bikpela
1 Inap 40 yia i go pinis, wanpela tok nem bilong en “Gutpela Wok Yu Mekim—Em i Inap Tru, o Nogat?” i kamap long Wastaua (tok Inglis) bilong Janueri 15, 1955. Long gutpela pasin dispela tok i kamapim klia olsem wanem lain bilong Jehova i ken stretim gut wok ol wan wan i save mekim long wok autim tok bambai ol i ken mekim bikpela wok moa bilong Kingdom. Dispela gutpela tok i stret long nau tu, taim yumi wok yet long mekim gutpela wok bilong yumi i kamap gutpela moa.
2 Samting i mas kirapim yumi long mekim olgeta wok bilong yumi, em dispela nambawan lo: “Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela na long strong bilong yupela.” (Mk 12:30) Yumi kamapim klia olsem yumi laikim tru Jehova taim yumi mekim gut wok long olgeta rot i op long yumi bilong mekim bikpela wok moa bilong Kingdom. Tingim ol dispela rot bilong mekim wok autim tok bilong yu i go bikpela moa.
3 Mekim Wok Bilong Yu: Ol brata i dediket pinis ol i ken wok strong long inapim ol mak bilong kamap wokman bilong kongrigesen na bihain ol i ken mekim ol wok bilong kamap elda. Ol stori “Yu Gat Laik Long Kisim Wok Insait Long Kongrigesen?” na “Yu Inap Long Mekim Wok Insait Long Kongrigesen?” long Wastaua bilong Jun 1, 1991, ol i bin kirapim planti brata long mekim ol wok insait long kongrigesen. Askim ol elda long kamapim stret ol samting yu mas mekim bilong kisim wanpela wok insait long kongrigesen na ol mak yu mas inapim.
4 Mipela i kirapim ol elda na wokman i singel long tingting strong long putim aplikesen bilong Skul Bilong Lainim Wok Bilong Lukautim Kongrigesen i kamap long Ostrelia. Yu inap kisim sampela save long dispela skul taim yu kaunim sampela nius bilong Sosaiti. (w87-E 6/1 28-30; w88-E 3/15 30, 31; g93-E 9/8 16-19; w98 1/1 24) Olsem wanem? Yu save olsem rot i op long yu ken mekim “bikpela wok bilong helpim planti manmeri”? (1 Ko 16:9a) Sampela brata i wok strong bilong save gut long tok Inglis bambai dispela skul i ken helpim tru ol. Etpela brata bilong Papua Niugini i bin go long dispela skul, nau sampela bilong ol i mekim wok painia, olsem painia oltaim o painia salim, o ol i mekim wok olsem helpim bilong wasman sekit.
5 Tingting Strong Long Mekim Wok Painia o Wok Long Betel: Ol yangpela i pinis long haiskul, ol meri marit i no wok mani, na ol lapun i no mekim wok mani moa, ol i ken tingting long mekim wok painia. Skelim pepa yumi kisim wantaim Wok Kingdom bilong Julai 1998, na bihain toktok wantaim ol painia em sindaun bilong ol i wankain olsem bilong yu. Ating dispela bai kirapim yu long mekim bikpela wok moa long autim tok na mekim wok painia, olsem ol i mekim. (1 Ko 11:1) Yu ting yu inap lusim sampela aua moa long autim tok, olsem 70 aua long olgeta wan wan mun na mekim wok painia oltaim?
6 Long nau, winim 17,000 brata sista i mekim wok long ol brens-ofis na ol haus Betel long olgeta hap bilong graun. Wastaua bilong Jun 15, 1994, pes 28-31 i stori long ol gutpela blesing bilong dispela wok. I gutpela yu ken kaunim dispela Wastaua na skelim olsem yu inapim ol mak bilong mekim dispela gutpela wok long Betel, o nogat? Yu ken kisim sampela save moa long ol dispela mak, sapos yu go long miting bilong ol brata sista i gat laik long wok long Betel, em i save kamap long ol kibung distrik. Wasman sekit tu i ken toktok wantaim yu long dispela samting.
7 Mekim Wok Long Hap i Sot Long Man Bilong Autim Tok: Olsem wanem? Long hap yu stap long en, yupela i save wokim teritori bilong yupela planti planti taim, na yupela i gat planti narapela brata bilong mekim ol wok? Yu bin tingting long mekim bikpela wok moa bilong autim tok na helpim ol grup i wok aninit long kongrigesen bilong yu o ol kongrigesen i stap klostu? Ating yu inap i go sindaun long hap bilong kongrigesen o grup i sot long ol man bilong autim tok. (Mt 9:37, 38) Tasol yu mas tingting gut pastaim long yu mekim olsem. Beten long dispela samting na skelim gut. (Lu 14:28-30) Kamapim tingting bilong yu long ol elda na wasman sekit. Ol bai givim ol gutpela tok bilong helpim yu long save i gutpela long yu i go nau o yu ken redi long mekim olsem long bihain? Sapos yu laik raitim pas long Sosaiti bilong kisim tingting bilong ol long wanem hap yu ken i go long en, orait Komiti Bilong Lukautim Wok Bilong Kongrigesen i mas salim wanpela pas i go wantaim pas bilong yu.
8 Mekim Wok Autim Tok Bilong Yu i Kamap Gutpela: Ating yumi olgeta inap insait moa long wok bilong autim tok, long rot bilong mekim wok autim tok bilong yumi i kamap gutpela moa. Olsem wanem? Yu insait long olgeta kain wok bilong autim tok, olsem autim tok long ol haus na long kain kain taim na ples, na tu, mekim ol gobek na Baibel-stadi? Sapos yu lukautim wanpela Baibel-stadi, yu ting yu inap mekim wok tisa bilong yu i kamap gutpela moa? I gutpela long lukim pepa yumi kisim wantaim Wok Kingdom bilong Jun 1996, bilong kisim sampela gutpela tok yu ken mekim wok long en bilong kirapim Baibel-stadi bilong yu long dediket na kisim baptais.
9 Sampela stori moa long rot bilong mekim bikpela wok moa bilong autim tok na mekim i kamap gutpela, i stap long sapta 9 long buk Lo Bilong Yumi Bilong Mekim Wok Autim Tok. Yumi olgeta i mas i gat laik long mekim bikpela wok moa long wok bilong God. Olsem wanem? Yu tingting strong long sampela mak bilong spirit yu ken wok long winim? Mekim olsem 1 Timoti 4:15 i tok: “Oltaim yu mas [tingting long] ol dispela wok bilong yu. Yu mas wok hat long mekim olgeta dispela wok i kamap gut, na bai olgeta manmeri i lukim pasin bilong yu yet i kamap gutpela tru.”