Askim

● Olsem wanem? I stret yumi putim tripela o fopela bokis kontribusen long Haus Kingdom ol i gat narapela narapela wok bilong en?

I stret. Olgeta wan wan kongrigesen i mas putim tripela bokis kontribusen long Haus Kingdom na ol i mas raitim gut ol tok long en olsem: 1. “Kontribusen Bilong Helpim Wok Bilong Kingdom.” Dispela mani em i bilong baim ol samting bilong kongrigesen, na tu, ol i salim kontribusen long Sosaiti bambai Sosaiti yet i ken makim wanem wok ol i laik mekim long en. Bilong mekim olsem, planti kongrigesen i mekim wanpela tokaut na bai ol brata sista i ken pasim tok long hamas mani ol i laik salim i go long Sosaiti long olgeta mun. 2. “Mani i Go Long Sosaiti Bilong Wokim Ol Haus Kingdom.” Olgeta mani i stap long dispela bokis em bilong salim i go long Sosaiti. Sosaiti bai putim dispela mani long wanpela akaun bilong ol i ken givim olsem dinau long ol kongrigesen i laik wokim Haus Kingdom. 3. “Ol Kontribusen Bilong Helpim Wok Bilong Sosaiti Long Olgeta Hap​—⁠Matyu 24:14.” Olgeta mani i stap long dispela bokis em i bilong salim i go long brens-ofis long olgeta wan wan mun na em i bilong helpim wok bilong ol Witnes Bilong Jehova long olgeta hap bilong graun olsem “bosboi i gat gutpela tingting” i makim.​—⁠Lu 12:⁠42.

Sapos kongrigesen i laik stretim Haus Kingdom bilong ol yet o wokim nupela Haus Kingdom, ol i ken putim narapela bokis kontribusen i gat rait olsem “Mani Bilong Wokim Haus Kingdom.” Dispela bokis i narapela long bokis i gat rait “Mani i Go Long Sosaiti Bilong Wokim Ol Haus Kingdom.” Long dispela rot ol pablisa inap helpim kongrigesen bilong ol yet, na ol narapela tu.

Ating sampela taim ol elda i ken makim wanpela de na tokim kongrigesen (wanpela o tupela wik paslain long dispela de) olsem mani ol i putim long ol bokis kontribusen long dispela de, em bilong helpim ol brata em hevi i bin painim ol.

I gutpela tu sapos ol i putim bokis kontribusen long ples bilong mekim ol Buk-Stadi. Mani ol brata i putim long dispela bokis, ol elda bai bungim wantaim mani bilong kongrigesen.

Taim yu givim kontribusen, putim long bokis i stret long wok yu makim bilong dispela mani. Ol elda i ken mekim sampela toksave long dispela samting sapos i gat wok long ol i mekim olsem. Tasol i no stret sapos ol elda o ol wokman bilong kongrigesen i kisim mani long bokis kontribusen na putim bilong mekim narapela wok. Taim yu putim kontribusen, yu gat wok long makim wanem wanem wok ol i mas mekim long dispela mani, olsem na yu mas putim long bokis i stret long dispela.