Askim

◼ Long wanem taim i gutpela long kamapim wanpela nupela Buk-Stadi Bilong Kongrigesen?

Ol elda i ken tingting long kamapim nupela grup taim namba bilong ol man i kam long wanpela Buk-Stadi i abrusim 15, maski grup i bung long Haus Kingdom. Bilong wanem i gutpela long mekim olsem?

Taim Buk-Stadi Bilong Kongrigesen i liklik, brata i lukautim grup inap tingim gut olgeta wan wan i kam long Buk-Stadi. Na tu, dispela i mekim na i no hatwok long olgeta i ken bekim tok na kamapim bilip bilong ol long ai bilong ol man. (Hi 10:23; 13:15) Taim i gat ol liklik grup long planti hap bilong teritori bilong kongrigesen, dispela i mekim na ol brata i no hatwok long go long Buk-Stadi Bilong Kongrigesen na bung bilong wok autim tok. Ol kongrigesen i bin kamapim sampela Buk-Stadi moa na ol i lukim olsem namba bilong ol man i go long ol Buk-Stadi tu i go antap.

Ating sindaun bilong ol man long sampela ples i mekim na i gutpela long kamapim nupela grup, maski em i liklik grup tasol. Ating dispela samting i kamap long ol ples i longwe, o ol man i pas pas long ples bilong bung o ol i no gat inap sia samting bilong sindaun long en. Taim yupela i mas mekim, yupela i ken kamapim wanpela grup i bung long taim bilong san bilong helpim ol lapun, ol man i wok long nait, o ol sista em man bilong ol i no Witnes.

Olgeta wan wan grup i mas i gat sampela strongpela brata i save givim bel long autim tok, na tu, i mas i gat brata i gat save long lukautim Buk-Stadi na brata bilong ritim ol paragraf. Ol brata i mas wok strong bilong winim mak bilong mekim ol dispela wok bilong kongrigesen.

Ol elda i ken helpim kongrigesen long kamap strong na stretim ol samting bambai ol Buk-Stadi grup bilong kongrigesen i no bikpela tumas, na i gat ol strongpela brata bilong lukautim grup na ol i bung long hap ol brata i no hatwok long go long en. Taim i gutpela long mekim, yupela i mas kamapim ol nupela grup bambai olgeta brata sista inap kisim ol gutpela samting bilong spirit long rot bilong dispela miting. Olsem wanem? Yu amamas long haus bilong yu i ken kamap wanpela hap bilong mekim Buk-Stadi long en? Planti brata i bin mekim olsem na ol i kisim planti gutpela samting bilong spirit.

This article is repeated in km 3/08.