Yu Laik Mekim Sampela Wok Moa?
1 Jisas i tok Kingdom em i wanpela gutpela samting tru. (Mt. 13:44-46) Wok bilong autim tok bilong Kingdom, em tu i wanpela gutpela samting tru. Wok autim tok em i mas stap olsem namba wan bikpela samting long i stap bilong yumi, maski yumi mas lusim sampela laik bilong yumi bilong mekim dispela wok. (Mt. 6:19-21) Yu laik mekim sampela wok moa bilong Kingdom?
2 Skelim Ol Dispela Bikpela Samting: Yumi mas mekim sampela samting bambai yumi ken mekim bikpela wok moa bilong autim tok: (1) strong tru long putim ol samting bilong Kingdom i stap namba wan long i stap bilong yumi (Mt. 6:33); (2) bilip strong na wet long Jehova i helpim yumi (2 Ko. 4:1, 7); (3) beten strong long bel bilong God i ken helpim yumi (Lu. 11:8-10); (4) mekim ol samting i stret wantaim beten bilong yumi.—Jems 2:14, 17.
3 Rot Bilong Mekim Bikpela Wok Moa: Yumi olgeta inap putim mak bilong lusim sampela hap taim bilong mekim wok autim tok long olgeta mun. Tasol olsem wanem? Yu bin traim painim rot bilong autim tok long kain kain taim na ples, o wok strong long mekim ol tok yu autim i kamap gutpela moa, o mekim gut moa ol gobek, o strong long mekim gut ol Baibel-stadi? Yu inap mekim wok painia haptaim o painia oltaim o i go wok long hap ol i sot long ol man bilong autim tok? Sapos yu wanpela brata i baptais pinis, yu inap putim mak bilong kamap kongrigesen sevent o wanpela elda? (1 Ti. 3:1, 10) Yu inap putim aplikesen bilong wok long Betel, o go long Ministerial Trening Skul bambai yu ken mekim bikpela wok moa?—Lu. 10:2.
4 Wanpela brata i save mekim wok mani fultaim na i save lusim bikpela hap taim long pilai spot, ol i kirapim em long mekim wok painia oltaim. Em i kirap mekim wok painia haptaim, na em i stretim sindaun bilong em na kirap mekim wok bilong God fultaim. Bihain em i go long Ministerial Trening Skul, na dispela skul i helpim em long redi long mekim wok wasman sekit, em dispela wok nau em i save mekim. Em i amamas tru long em i bin bihainim dispela tok ol narapela i mekim bilong kirapim em, na nau em i amamas moa, long wanem, em i mekim bikpela wok moa bilong Kingdom.
5 Jehova i save mekim gut long ol man i redi long mekim wok bilong em. (Ais. 6:8) No ken larim wanpela samting i pasim yu long mekim bikpela wok moa na long kisim amamas na nupela strong long dispela wok yu mekim.