Ol Miting Bilong Wok Bilong Julai
Wik i Kirap long Jun 29
Singsing 220
10 min: Ol toksave bilong kongrigesen.
20 min: “Ol Samting Yu Ken Mekim na Bai Ol Miting i Helpim Yu Yet na Ol Narapela Tu.” Paslain long miting, makim wanpela brata i save gut long kaunim tok na em i ken redi long kaunim ol paragraf. Kaunim pinis paragraf, orait kamapim askim bilong en. Stori long ol samting bilong helpim kongrigesen, olsem ol samting kongrigesen i mas wok strong moa long mekim. Mekim sampela tok amamas long ol gutpela samting ol brata sista i bin mekim.
15 min: Lainim Maus Long Mekim Tok Bilong Helpim Ol Man i Stap Bel Hevi. Mekim olsem wanpela tok na kamapim sampela askim tu.
Planti samting long nau i save mekim man i bel hevi, olsem: Hevi long mani, o wanpela wanblut i dai, o sik, o pikinini o poroman marit i gat sampela hevi long ol samting bilong spirit, na kain hevi olsem. Sapos yumi larim bel hevi i daunim yumi, bai i no hatwok tumas long Satan i pundaunim yumi. (Snd 24:10; lukim tu Luk 22:31.) Ol Kristen i gat wok long strongim na helpim ol narapela Kristen. (1 Te 5:14; Ga 6:2) Sapos yumi mekim olsem, yumi bihainim pasin bilong Jisas. (Mt 11:28-30) Olsem wanem yumi inap bihainim pasin bilong Jisas? Yumi mas sori long ol man olsem Jisas i bin mekim. (Ro 12:15) Yumi mas redi long helpim ol. (Je 2:14-17; Buk Reasoning, pes 117-121) Tokim tupela o 3-pela brata o sista na ol i ken redi long stori long taim ol i gat hevi na wanpela brata o sista i bin helpim ol na strongim ol. No ken singautim ol i kam antap long pletfom, ol i ken sindaun tasol long sia bilong ol. (Ap 28:15) Oltaim go klostu long God long rot bilong beten, na tokim ol elda long helpim yu, na long dispela rot bai yu inap daunim bel hevi bilong yu.—Je 4:8; Ais 32:1, 2; Ef 6:17, 18.
Singsing 62 na beten.
Wik i Kirap long Julai 6
Singsing 22
10 min: Ol toksave bilong kongrigesen.
20 min: “Ol Yangpela—Wok Strong Long Kamap Pren Tru Bilong Jehova.” Paslain long miting, makim sampela brata sista i save gut long kaunim tok na ol i ken redi long kaunim ol paragraf. Kaunim pinis paragraf, orait kamapim askim bilong en. Taim yu mekim dispela hap, tingim ol yangpela i stap long kongrigesen bilong yu. Tok yu mekim i mas helpim ol long wok yet long kamap strong long ol samting bilong spirit.
15 min: “Yumi Ken Mekim Wanem Bilong Helpim Ol Pikinini Long Save i Gat Sampela Wok Ol i Mas Mekim?” Gutpela sapos wanpela elda, em i lapun liklik na em i bin mekim gutpela wok long mekim bikpela long ol pikinini bilong em, em i ken mekim dispela tok. Kamapim ol bikpela tok long ol paragraf hia. Kamapim tok olsem i bikpela samting long papamama i mas toktok gut wantaim pikinini bilong ol, na stori long ol samting papamama i ken mekim taim pikinini i mekim rong.
Singsing 220 na beten.
Wik i Kirap long Julai 13
Singsing 211
10 min: Ol toksave bilong kongrigesen. Ripot bilong ol akaun.
15 min: Holimpas Ol Gutpela Samting. Toktok wantaim ol brata sista long ol dispela tok:
Sapos yumi holimpas ol gutpela samting, yumi bihainim savepasin. Dispela ol gutpela samting yumi mas holimpas, em ol samting oganaisesen i tok yumi mas mekim, na ol wok Kristen bilong yumi, na ol tok bilong Baibel.—1 Te 5:21; Hi 10:23.
Yumi mas autim tok bilong Kingdom, na kamapim ol disaipel, na tokim ol man long strafe bilong God i laik painim ol man nogut, na lukautim ol sipsip bilong God.—Mt 24:14; 28:19, 20; Ese 3:17-19; 1 Te 5:2, 3.
Jehova i hariapim wok bilong bringim ol man i kam insait long lain bilong em, olsem na yumi mas “skelim gut olgeta pasin,” olsem save gut long ol bikpela samting.—Fl 1:10; Ais 60:22.
Yumi mas givim baksait long ol samting i save pulim bikpela hap taim bilong yumi na i no kamapim gutpela wok. Sapos yumi bihainim ol tok i kam long oganaisesen bilong Jehova, bai bilip bilong yumi i kamap strong, na bai yumi lukim planti manmeri moa i kam insait long lain bilong Jehova.—Ap 16:4; 1 Ko 4:6.
Yumi yet yumi no ken les long stadi, na oltaim yumi mas mekim famili-stadi. Oltaim yumi mas wok long kisim stretpela save long ol tok i tru bambai yumi inap i stap strong na God i ken kisim bek yumi. (1 Pi 2:2, 3) Sapos yumi mekim ol dispela samting, na yumi go long olgeta miting, dispela samting bai helpim yumi long pilim tru ol gutpela samting bilong spirit. Sapos yumi wok long pas gut moa long oganaisesen bilong Jehova, bai yumi inap wok gut wantaim ol brata i gat wok long lukautim kongrigesen. Long dispela rot, bai yumi kamap strong na bai yumi pas tru wantaim Krais Jisas, em i het bilong kongrigesen.—Ef 4:11-16.
20 min: “Strongim Bel Bilong Ol Brata.” Makim wanpela brata i save gut long kaunim tok na bai em i ken kaunim ol paragraf. Kaunim pinis paragraf, orait kamapim askim bilong en.
Singsing 200 na beten.
Wik i Kirap long Julai 20
Singsing 67
10 min: Ol toksave bilong kongrigesen. Mekim dispela toksave tu:
Sapos long dispela mun kongrigesen i bin autim tok long longwe teritori, orait stori liklik long ol gutpela samting i bin kamap.
20 min: “Kirapim Man Long Harim Tok Long Taim Yu Mekim Ol Gobek.” Wanpela brata i ken toktok wantaim kongrigesen long ol bikpela tok bilong dispela hap. Sapos inap, orait em i ken stori liklik long wanpela gobek, i no longtaim i go pinis brata o sista i bin mekim, na em i bin kirapim man bilong haus long harim sampela tok moa. Bilong pinisim tok, mekim wanpela soim inap 6-pela o 8-pela minit samting, olsem: Wanpela brata bilong lukautim Buk-Stadi i helpim tupela o 3-pela pablisa long redim sampela tok ol i ken mekim taim ol i go bek lukim sampela man ol yet i bin autim tok long ol.
15 min: Yu Mekim Wok Long Ol Liklik Nius? Yu Redi Long Autim Tok Long Kain Kain Taim na Ples? Mekim sotpela tok na wanpela soim. Redim gut na bai ol brata i ken save, ol liklik nius inap helpim ol gut long autim tok. Helpim ol long save, taim ol i autim tok long kain kain taim na ples, ol inap kisim amamas.
Oganaisesen bilong Jehova i wokim kain kain liklik nius bilong yumi ken tilim. Olsem wanem? Yu save mekim gutpela wok long ol dispela liklik nius? [Holim ol dispela liklik nius long han na ol brata i ken lukim.] Long olgeta taim ol pablisa i mas i gat sampela liklik nius na ol narapela buk na magasin samting, na taim rot i op, ol i ken autim tok na helpim narapela man.
Taim wanpela man i harim tok bilong yumi, gutpela sapos yumi raitim nem na atres bilong em long notbuk samting. Sapos yumi mekim olsem, orait bai yumi inap i go bek lukim dispela man gen na helpim em.
Taim yumi autim tok long kain kain taim na ples, yumi no ken lusim tingting long raitim long wanpela hap pepa samting hamas minit yumi bin autim tok. Yumi mas bungim olgeta minit yumi lusim long autim tok olsem, na putim long ripot bilong yumi. Sapos wanpela taim yumi autim tok long 10 minit na narapela taim yumi autim tok long 15 minit samting, na yumi mekim olsem planti taim, ating bai yumi winim wanpela o tupela aua samting. Maski yumi autim tok long kain kain taim na ples, tasol taim mun i pinis, yumi mas raitim long ripot bilong yumi hamas aua yumi bin lusim long mekim dispela wok.
Nau yumi ken lukim wanpela soim. Wanpela pablisa i laik i go long maket na em i laik mekim traim ol dispela samting nau yumi stori long en.
Sista: [Em i toktok wantaim pikinini bilong em.] Nau yumi mas i go long maket. Tasol pastaim mi mas lukim gen lista bilong ol samting yumi mas baim. [Em i lukim.] Tasol nau mi tingim tok bilong Wok Kingdom, em i tok yumi mas redi long autim tok long kain kain taim na ples. [Em i lukim ol samting i stap long bilum bilong em.] Em gutpela! Mi gat sampela liklik nius i stap na sampela magasin tu. Orait pikinini, yumi go.
Brata i lukautim dispela hap: Em namba wan samting yumi mas tingim. Sista i redi pinis long autim tok long kain kain taim na ples. Nau yumi lukim em i wokabaut i go long ples bilong kisim bas. Em i lukim wanpela meri, em Sera na pikinini bilong em, ol tu i wokabaut i kam bilong kisim bas. Olsem wanem? Sista bai autim tok long em?
Sista: Moning Sera! Ating yu tu yu laik i go long maket, a?
Sera: Yes, mi laik go long maket, long wanem, sista bilong mi bai kam na mi laik baim sampela kaikai moa.
Sista: Em bai kam long ples, a?
Sera: Yes. Bebi bilong em i dai pinis na em bai kam stap liklik hap taim wantaim mi.
Sista: Sori tru! I dai i save bagarapim tru yumi, a? Tasol taim wanpela bilong famili bilong mi i dai, wanpela samting mi kaunim i bin helpim mi.
Sera: Em wanem samting?
Sista: [Nau sista i mekim wok long liklik nius, I Gat Gutpela Samting Bai Painim Ol Man i Dai Pinis? na em i stori liklik long kirap bek.]
Sera: Tenkyu tru long dispela liklik nius yu givim long mi. Na tok yu mekim em i helpim mi.
Sista: Mi save long haus bilong yu. Olsem wanem? Yu laik bai mi kam lukim yu na yumi ken stori moa long ol dispela samting?
Sera: Yes, em i gutpela. Bas i kam nau!
Brata i lukautim dispela hap: Tasol i gat wanpela samting moa sista i no ken lusim tingting long en. Em wanem samting? Em i no ken lusim tingting long raitim long ripot ol dispela minit em i bin lusim long autim tok long dispela meri. Em i bin lusim hamas minit long autim tok? [Brata i lukim hanwas bilong em.] Ating 10-pela minit samting. Orait, sapos em i mekim dispela samting inap sampela taim moa, ating em inap winim wanpela aua! Sapos olgeta pablisa long olgeta hap bilong graun, em ol inap olsem 4 milion, ol i mekim wankain pasin long olgeta de, ating dispela bai litimapim tru nem bilong Jehova! Long Buk Song 96:2, Baibel i mekim gutpela tok yumi ken bihainim. Gutpela yumi kaunim, a? [Brata i kaunim dispela ves bilong pinisim tok bilong em.]
Singsing 64 na beten.
Wik i Kirap long Julai 27
Singsing 220
10 min: Ol toksave bilong kongrigesen. Ripot bilong kongrigesen. Mekim sampela tok amamas long ol gutpela wok ol pablisa i bin mekim na stori long sampela wok ol i mas wok strong long mekim gutpela moa.
20 min: “Kaikai Bilong Spirit Long Olgeta De—Ol Famili Kristen i Mas Kisim.” Paslain long miting, makim wanpela brata i save gut long kaunim tok na em i ken redi long kaunim ol paragraf. Kaunim pinis paragraf, orait kamapim askim bilong en.
15 min: Toktok Wantaim Long Teks Bilong De. Mekim wanpela soim long famili i toktok wantaim long teks bilong de. Gutpela sapos olgeta wan wan long dispela famili, na ol liklik tu, i kamapim sampela tok.
Singsing 59 na beten.