Yiabuk Bilong 1992 i Kamapim Ripot Bilong Papua Niugini na Ostrelia
1 Brens-ofis long Papua Niugini i kisim wanpela pas i kam long provins Morobe, i tok olsem: “Mipela long Lengbati i stap long ples bus i gat ol bikpela maunten na no gat rot bilong ol ka. I gat liklik ples balus, tasol balus i no save kam planti taim. Long 1987 i gat wanpela Witnes tasol i save autim tok long ol man na mekim ol Baibel-stadi. Wasman sekit wantaim meri bilong em i bin kam na helpim mipela, tasol long dispela taim sampela hevi i kamap. Ol man i biruaim tok bilong Kingdom ol i wok long pasim wok bilong mipela na ol i kukim Haus Kingdom long ai bilong wasman sekit. Wanem samting i kamap long ol dispela hevi? Nau i gat 7-pela pablisa na mipela i bung long nupela Haus Kingdom mipela i wokim. Taim mipela i autim tok bilong Kingdom mipela i pilim bikpela amamas olsem olgeta narapela brata sista long ol narapela hap ol tu ol i amamas taim ol i mekim wankain wok.”
2 Ol yangpela inap mekim bikpela wok bilong helpim ol narapela yangpela long kisim save long ol tok i tru. Long Ostrelia, tisa long skul i tokim Linda, em i gat 9-pela krismas, long sindaun long sia klostu long Rebeka, em i sindaun wanpis. Linda i pren gut wantaim Rebeka na em i toktok wantaim em long ol tok bilong Kingdom. Bihain em i kirapim Baibel-stadi wantaim Rebeka, na tupela i stadi long belo. Ol i stadi long buk Harim Tok Bilong Bikpela Tisa. Bihain ol i toktok wantaim narapela wanskul, nem bilong em Eboni, na em tu i kirap long stadi. Bihain narapela wanskul, nem bilong em Sera, em i kam tokim ol em tu i laik insait long pilai bilong ol. Linda i toksave olsem i no wanpela pilai—ol i stadi long Baibel. Olsem na Sera tu i kirap long stadi. Narapela pikinini meri i tok em tu i laik stadi, na nau sampela taim i gat tupela lain pikinini i stadi long buk Bikpela Tisa—Linda i lukautim wanpela lain na Rebeka i lukautim wanpela. Orait bihain tisa i laik save ol i mekim wanem, olsem na Linda i soim buk Bikpela Tisa long em, na tisa i tok orait long ol i stadi.