Mekim Wok Painia—Dispela i Makim Olsem Yu Laikim Tru God na Ol Narapela
1 Pasin bilong laikim tru Jehova na ol narapela man i kirapim yumi long mekim bikpela wok moa long autim tok. Taim pasin bilong laikim Jehova na ol narapela man i kamap strongpela moa, dispela i kirapim yumi long stretim ol samting bambai yumi inap mekim bikpela wok moa. Taim yumi wok long kisim stretpela “save” moa long Tok bilong God, dispela pasin bilong laikim ol narapela i save kamap strong moa. (Fl 1:9, 10) Ol save yumi kisim long laik bilong God i helpim yumi long pilim olsem taim i sot pinis—no gat bikpela hap taim moa. Dispela save i kirapim yumi long tingim gut ol narapela. Planti brata sista i kirap mekim wok painia na long dispela rot ol i kamapim bel bilong ol olsem ol i tingim gut ol narapela.
2 Olsem wanem? Yu inap stretim rot bilong mekim wok painia haptaim o painia oltaim? Gutpela sapos yumi olgeta i beten na skelim gut ol samting yumi yet i mekim—yumi inap mekim wok painia o nogat?
3 Planti Kristen i gat planti wok na ol i no gat bikpela hap taim bilong mekim wok painia, olsem na ol i mas stretim gut ol wok bilong ol bambai ol i “gat taim bilong mekim pasin bilong God.” (Ef 5:15-17) Yumi laikim tru God na ol narapela man, olsem na yumi mas redi long lusim sampela samting yumi yet i laik mekim na sampela samting i helpim sindaun bilong yumi, tasol i no samting tru bilong helpim yumi long i stap laip, na bai yumi inap kamapim moa yet bel bilong yumi, yumi laikim tru ol narapela. (Mk 12:33) Planti samting yumi save kisim, na ating yumi pilim olsem i stret long yumi kisim, ol man long sampela hap i tingim i olsem bilas nating na i no samting tru bilong helpim yumi long i stap laip.
4 Papamama i ken mekim wanem bilong helpim pikinini long tingim ol samting bilong God? Taim pikinini i yangpela yet, papamama i ken helpim em long putim sampela mak long wok bilong God em i laik winim. Olsem wanem? Taim pikinini i laik winim skul, em i tingim ol wok bilong dispela graun em i laik mekim o em i tingim ol wok bilong God em i laik mekim? Yumi laik helpim ol yangpela long save sapos ol i kirap mekim wok painia taim ol i yangpela yet, dispela bai helpim ol inap longtaim. Long dispela rot yumi inap bungim ol gutpela samting long heven. (Mt 6:19-21) Dispela bai mekim Jehova i belgut na kamapim klia olsem yumi stap gut long em na yumi givim bel long lotuim em. Na tu, dispela inap helpim ol narapela long kisim laip oltaim.
5 Jehova i gat laik long ‘kisim bek olgeta kain man.’ (1 Ti 2:4) Olsem wanem? Yumi inap mekim sampela samting i kamapim klia olsem yumi gat wankain laik? Yumi inap mekim olsem sapos yumi tingim ol samting bilong Kingdom pastaim. Na tu, yumi mas bilip olsem Jehova inap lukautim yumi long ol samting bilong skin, olsem kaikai samting. (Mt 6:31-33) Tru hevi bilong painim wok mani bilong lukautim meri pikinini inap i go bikpela moa, tasol tok promis bilong God long lukautim yumi i no ken lus nating.—Sng 37:25.
6 Sapos yumi givim bel olgeta long autim tok inap long skel bilong yumi, dispela bai kamapim klia olsem yumi laikim tru ol man. Bilong mekim olsem, sampela bai mekim wok painia oltaim. Gutpela sapos yu wok strong long stretim rot na bai yu inap mekim wok painia kirap long Septemba 1, 1992, o liklik taim bihain.
[Ol Askim]
1, 2. (a) Wanem samting inap kirapim yumi long stretim ol samting bambai yumi inap mekim bikpela wok moa long wok autim tok? (b) Wanem samting i kirapim planti yangpela long mekim wok painia? (c) Gutpela sapos yumi olgeta i tingim wanem samting?
3. (a) Kaunim Efesus 5:15-17. Yumi ken mekim wanem bambai yumi “gat taim bilong mekim pasin bilong God”? (b) Olsem Mak 12:33 i tok, pasin bilong laikim tru ol narapela bai kirapim yumi long mekim wanem?
4. Papamama i ken mekim wanem bilong helpim ol yangpela long bungim ol gutpela samting long heven? Olsem wanem dispela i mekim Jehova i belgut?
5, 6. Olsem wanem yumi ken kamapim klia yumi gat wankain laik olsem bilong God?