Yu Save Stap Gut Long Husat?
1 Yu save stap gut long husat? Yu save stap gut long Jehova na oganaisesen bilong em? o yu bihainim ol wanblut i no Witnes na pasin bilong ples?
2 Tripela meri i sanap long maus rot. Ol i bel hevi. Naomi em i lapun na em i laik i go bek long as ples bilong em long Betlehem, long Judia. Naomi em i tambu mama bilong tupela yangpela meri hia, em Rut na Orpa. Tupela i bilong ples Moap. Traim i painim ol. Bai ol i stap gut long Naomi na God bilong em, Jehova? Bai ol i go bek wantaim Naomi long Betlehem? o bai ol i go bek long lain bilong ol yet, em ol i save lotuim planti god giaman?
3 Orpa i tingim tumas lain bilong em na ol god giaman bilong ol, na em i laik i stap gut long ol. Olsem na em i krai nogut na em i tok gutbai long Naomi na lusim em na wokabaut i go bek long ples bilong em. Baibel i no stori moa long ol samting i painim Orpa.—Rut 1:14, 15.
4 Tasol Rut i tokim Naomi: “Yu no ken tokim mi long lusim yu na yu no ken pasim mi long i go wantaim yu. Olgeta ples yu go long en, mi tu bai mi go long en. Olgeta ples yu stap long en, mi tu bai mi stap long en. Lain bilong yu bai i kamap lain bilong mi. Na God bilong yu bai i kamap God bilong mi.”—Rut 1:16, 17.
5 Rut i stap gut long Jehova na lain bilong em. Olsem na Jehova i blesim em, na em i kamap tumbuna mama bilong Devit na Jisas. Em i no lusim Jehova, olsem na em i kisim gutpela blesing tru! Long 2 Samuel 22:26, Baibel i stori long Jehova olsem: “Bikpela, sapos man i no lusim yu, orait yu no save lusim em.”
6 Olsem wanem long yumi olgeta wan wan? Yu kain olsem Rut, o yu kain olsem Orpa? Taim bikpela traim i painim yumi, gutpela sapos yumi askim yumi yet, olsem: ‘Mi save tingting long amamasim famili na ol wanblut pastaim, na mi tingim laik bilong Jehova i nambatu? Mi save lusim bikpela hap taim long sindaun stori wantaim ol wanblut o wantok bilong mi, em ol i no stap long tok i tru? Sapos mi poromanim ol man ausait, bai dispela inap bagarapim bilip bilong mi na bai mi lusim Jehova na oganaisesen bilong em olsem Orpa i bin mekim?’ Tru, i gat sampela samting yumi mas mekim bilong helpim ol wanblut, em ol i no i stap long tok i tru. Tasol olsem wanem? Dispela i pulim bikpela hap taim tumas bilong yumi?
7 Yu save tingim meri pikinini pastaim, em ol i stap long tok i tru, na yu givim mani na taim bilong yu bilong helpim ol? O yu save tromoi mani bilong helpim ol kandere o wantok samting, na nau yu no gat mani bilong helpim famili bilong yu, em ol i stap long tok i tru? Yu save mekim wok long mani bilong yu bilong helpim wok bilong autim tok long olgeta hap?—Mt 24:14.
8 Taim ol wanblut o ol narapela man i wokim kaikai bilong man i dai pinis o kaikai bilong marit na ol i mekim sampela pasin i no stret long lo bilong Jehova o ol i mekim sampela wok bilong ol spirit nogut, yu larim ol i pulim yu o subim yu na yu lusim lo bilong Jehova? O yu sanap strong long bilip na stap gut long Jehova, na yu tokim ol: “Mi no ken insait long kain samting olsem. Jehova i tambuim dispela samting!” Taim wanpela man i tokim yu long kisim sampela buai, yu save mekim wanem? Yu save kisim, nogut em i kros, na bihain yu tromoi? O yu save stap gut long Jehova na yu tokim dispela man: “Mi no ken kisim. Mi wanpela Witnes Bilong Jehova na Baibel i tok mipela i mas klia long ol dispela samting bambai mipela i stap klin.”—Ais 52:11.
9 Yu save larim pikinini bilong yu i poromanim oltaim ol yangpela i no Witnes? Ating yu lukim pasin bilong ol dispela yangpela na yu ting ol i gat gutpela pasin winim bilong sampela pikinini Witnes. Tasol ol i no lotuim Jehova, a? Sapos yu larim pikinini bilong yu i poromanim ol yangpela i no Witnes, olsem wanem long ol long taim ol i go bikpela? Ating bai ol i laik marit long ausait. (2 Ko 6:14-17) Taim papamama i larim pikinini i poromanim ol man ausait, yu ting papamama i stap gut long Jehova? Rut i laik stap klostu long lain bilong Jehova. Jehova i blesim Rut na Rut i maritim gutpela man. Devit i tok long God olsem: “Sapos man i no lusim yu, orait yu no save lusim em.”—2 Sml 22:26.
10 Tru tumas, sapos yu stap gut long Jehova na long lain bilong em, ating ol wanblut bilong yu na ol narapela man bilong ausait, ol bai kros long yu. Tasol olsem wanem? Dispela bai kirapim yu long lusim Jehova na bihainim ol pasin bilong ples, em ol dispela pasin i no stret wantaim lo bilong Jehova? Sapos yu mekim olsem, Jehova i no ken amamas long yu. Jehova i tingim ol man i stap gut long em olsem Rut i bin mekim, na Buk Song 37:28 i tok olsem: “[Jehova] i laikim tumas stretpela pasin. Em i no inap larim ol manmeri bilong en i lus. Oltaim [Jehova] i save lukautim ol manmeri i wokabaut stret. Tasol ol pikinini bilong ol man nogut bai i bagarap tru.”
[Ol Askim]
1. (a) Ol manmeri inap i stap gut long husat? (b) Tasol yu ting i gutpela long yumi stap gut long husat?
2, 3. (a) Orpa i mekim wanem? (b) Yu ting i gat wanem as na Baibel i no stori moa long Orpa?
4. (a) Rut i laik poromanim husat? (b) Rut i laik lotuim husat? (c) Bilong wanem yu ting Rut i bihainim gutpela tingting long dispela tupela samting?
5. (a) Rut i stap gut long Jehova na em i kisim wanem blesing? (b) Sapos yu stap gut long Jehova long olgeta taim, bilong wanem yu ting em bai blesim yu?
6. (a) Bilong wanem i no gutpela sapos yumi bihainim pasin bilong Orpa? (b) Bilong wanem yumi bihainim savepasin sapos yumi bihainim pasin bilong Rut?
7. (a) Yumi mas tingim husat pastaim na givim mani na taim bilong yumi bilong helpim ol? (b) Olsem wanem traim inap painim yu long dispela samting?
8. Kolim sampela samting yumi mas klia long en bambai yumi ken i stap klin, olsem Aisaia 52:11 i tok.
9. (a) Bilong wanem ol papamama i mas tingim gut tok bilong 2 Korin 6:14-17? (b) Long wanem taim i gutpela sapos ol i tingim gut dispela hap tok bilong Baibel?
10. (a) Wanem bikpela traim inap painim yumi olgeta wan wan? (b) Wanem samting i painim ol man i lusim Jehova? (c) Jehova i mekim wanem tok promis long ol man i stap gut long em?
This article is unique to PNG.