Wok Painia Oltaim​—⁠Rot Bilong Kisim Bikpela Amamas Moa

¹ Sapos wanpela man i singautim yu long mekim wanpela wok em inap givim bikpela amamas na nupela strong long yu, bai yu mekim wanem? Ating bai yu laik tru long mekim dispela wok, a? Jisas i singautim ol disaipel bilong em long mekim wanpela wok em inap givim amamas long ol oltaim oltaim. Em i tok: “Yupela kisim save long mi na aninit long tok bilong mi . . . na bai ol samting i no ken givim hevi long yupela na bai yupela i kisim malolo.” Hap wok bilong yumi taim yumi kamap disaipel bilong Krais em olsem: Yumi mas singautim ol narapela tu long mekim wok bilong autim gutpela tok bilong Kingdom. Sapos yu mekim wok painia oltaim, dispela em gutpela rot bilong mekim bikpela wok moa bilong autim tok, na bai yu kisim bikpela amamas moa.​—⁠Mt 11:28-30; 28:19, 20.

² Yumi amamas long save, kirap long 1988 i go inap 1994, lain painia oltaim i go bikpela tru inap 109 pesen! Long 1988 i gat 101 painia oltaim, tasol long 1994 i gat 211! Yumi lukim dispela samting na yumi kisim wanem save? Olsem: Long nau planti brata sista moa i wok strong long mekim wok bilong Jehova, na ol i kisim bikpela amamas long dispela rot na ol i stap bel isi. Ol i givim bel long mekim wok painia na dispela i bin kirapim sampela narapela brata sista long skelim gut ol wok bilong ol na askim skin bilong ol, ol inap mekim wok painia oltaim o nogat? Olsem wanem? Yu save tingting na beten long dispela samting?

HUSAT INAP MEKIM WOK PAINIA

³ Wanpela yangpela brata, em i bin kirap mekim wok painia oltaim long laspela yia bilong em long skul, em i tok: “Taim mi mekim wok painia, mi amamas tru, winim olgeta taim bipo.” Wanpela mama i gat tupela pikinini em i kirap mekim wok painia, na em i tok: “Nau mi stap amamas tru, winim olgeta taim bipo.” Man bilong wanpela sista i dai pinis, na bihain sista i kirap mekim wok painia, na dispela sista i tok: ‘Olgeta brata sista ol inap long mekim wok painia, mi laik kirapim ol long mekim. Dispela bai helpim yu long pas tru wantaim Jehova na kongrigesen.’ Ol dispela brata sista i kirap mekim wok painia oltaim, ol i amamas tru ol i bin mekim olsem!

⁴ Tasol ating yu ting olsem yu no inap mekim wok painia. Tasol sapos yu beten strong long Jehova na skelim gut ol wok bilong yu, bai yu inap save, yu inap kirap mekim wok painia oltaim o nogat. Wanpela sista, nau em i mekim wok painia oltaim na em i stap amamas, em i tok, pastaim em i askim skin bilong em: ‘Wanem samting i pasim mi long mekim wok painia oltaim?’ Na bihain em i askim skin bilong em: ‘Bilong wanem i stret mi mas mekim wok painia oltaim?’ Em i skelim gut dispela tupela askim na bihain em i save, i stret em i mas mekim wok painia. Pastaim em i tingting planti, tasol em i bilip tru long Jehova na laikim em tumas, na dispela samting i helpim tingting bilong em na em i kirap mekim wok painia.​—⁠Lukim Saveman 11:⁠4.

⁵ Olsem wanem? Yu pinis long mekim wok mani long olgeta de? Sapos yu no gat sik na i no gat wanpela samting i pasim yu, gutpela sapos yu kirap mekim wok painia oltaim na long dispela rot i stap bilong yu bai i gat gutpela as moa bilong en. Na olsem wanem long ol papamama, em pikinini bilong ol i bikpela pinis na ol i no gat wok moa long lukautim ol? Sapos yu stap olsem, orait, olsem wanem? Yu inap stretim ol samting na bai yu inap kirap mekim wok painia oltaim na kisim bikpela amamas moa?

⁶ Sapos ol marit i mekim wok painia taim ol i no gat pikinini yet, orait bihain, taim ol i gat pikinini, bai ol inap helpim ol long save, wok painia em i gutpela wok, na ol inap kirapim ol long mekim dispela wok. Tasol sampela ol i mekim yet wok painia, maski ol i gat pikinini. (Snd 22:⁠6) Long Papua Niugini, inap 25 pesen bilong olgeta painia ol i marit, na sampela i gat pikinini, tasol ol i bin stretim ol samting bilong ol bambai ol inap mekim wok painia. Dispela i bin helpim famili olgeta long tingim gut ol samting bilong spirit.

⁷ Long Papua Niugini, inap 75 pesen bilong olgeta painia ol i no marit. Planti bilong dispela lain ol i no gat wok bilong famili ol i mas mekim, na ol i save pinis, sapos ol i mekim wok painia oltaim, bai ol inap mekim Jehova i bel gut tru na ol inap kisim bikpela amamas moa.

⁸ Ating liklik taim na yu bai pinisim skul. Bai yu mekim wanem? Jisas i tok, ai bilong man i mas lukluk i go long ol samting bilong spirit; em i no ken larim ol samting bilong skin na ol kain kain wok na amamas i no gat as bilong en i kamap olsem nambawan bikpela samting long i stap bilong em. Man i ran long resis i save em i mas lusim olgeta samting i no inap helpim em na inap pasim em long winim resis. Olsem na sapos yu wanpela yangpela, na yu wok strong long mekim wok bilong Jehova, ating bai Jehova i orait long yu na yu no hatwok long klia long ol pasin bilong dispela graun em inap pasim yu long ran strong. Wok painia bai strongim yu long givim bel moa long Jehova na kirapim yu long mekim planti wok bilong spirit. Olsem na sapos yu inap mekim wok painia oltaim, gutpela sapos yu kirap na mekim dispela wok, a?​—⁠Mt 6:22; 1 Ko 15:58; 1 Ti 6:​7, 8.

⁹ Yumi mas bihainim laik bilong Jehova na mekim wok bilong em bambai yumi inap i stap amamas long nau na long bihain. Ol samting Jisas i mekim na ol tok bilong em i kamapim long ples klia dispela samting. (Jo 4:34; Hi 12:2) Taim yumi wok strong long singautim ol narapela man i kam “kisim wara bilong givim laip,” yumi yet i save stap amamas tru. Olsem wanem? Yu inap mekim wok painia oltaim na kisim bikpela amamas moa?​—⁠KTH 22:17; Snd 11:⁠25.