Bilong Helpim Yumi na Bai Yumi No Gat Planti Wok Long Taim Bilong Kibung Distrik na Kibung Sekit
1 Yumi amamas tru taim yumi stap long ol bung bilong kisim ol gutpela kaikai bilong spirit, maski em miting bilong kongrigesen, o kibung sekit, o bikpela de kibung, o kibung distrik! Yumi amamas long wanem, taim yumi bung wantaim ol man i save pret long God, dispela i givim nupela strong long yumi, na ol tok bilong spirit yumi harim i kirapim yumi long tingim gen ol samting i bikpela samting tru.
2 Inap sampela yia pinis, planti tausen manmeri moa ol i wok long kam long ol dispela bung bilong spirit. Kirap long 1985 i go inap 1994, ol kongrigesen long olgeta hap ol i kamap planti, winim 50 pesen—pastaim i gat 49,716, nau i gat 75,573. Jehova i hariapim dispela wok bilong bungim ol man, olsem na long olgeta hap bilong graun, ol kibung distrik na kibung sekit i wok long kamap planti. (Ais 60:22) Long 1994 na 1995 long Papua Niugini, i gat 14 kibung distrik na 8,953 manmeri i kam bung. Wok bilong lukautim ol samting bilong ol dispela kibung i go bikpela tru. Yumi kam long ol kibung bilong kisim kaikai bilong spirit, olsem na gutpela sapos sampela brata tasol i mekim wok bilong lukautim yumi long ol samting bilong skin.
3 Sampela Samting Moa: Jehova i bin mekim gut long lain bilong em, tasol dispela i mekim na yumi mas mekim bikpela wok moa na dispela i givim hatwok liklik long yumi, olsem na yumi amamas Jehova i bin givim gutpela tingting na save long yumi lain bilong em bilong inapim yumi long mekim dispela wok. Yumi olgeta i save pinis, long rot bilong ‘gutpela wokboi,’ Krais Jisas i bin stiaim gut ol samting bambai laik bilong God i ken kamap. (Mt 24:45-47; Kl 1:9, 10) Wastaua bilong Februeri 15, 1995, i tokaut olsem, ol kibung distrik bilong 1995-1996 bai kamap long 9-pela hap tasol. Na i no gat planti sekit olsem bipo—nau i gat 9-pela tasol—olsem na i no gat planti kibung sekit olsem bipo. Ating bai i no gat kibung sekit long ol hap i no gat planti elda bilong mekim ol tok long taim bilong kibung. Olsem na mipela laik kirapim olgeta pablisa long painim rot bilong i go long kibung i stap long hap klostu long ol, long wanem, dispela bai helpim gut ol, olsem: Ol elda i save gut long mekim tok, ol tasol bai mekim ol tok long kibung, na long dispela rot ol pablisa bai harim ol gutpela tok, winim bilong bipo. Na tu, bai ol inap bung wantaim bikpela lain brata sista, winim bilong bipo, na dispela bai strongim bilip bilong ol. (Neh 8:8; Hi 10:25) Bilong i go long ol dispela kibung, sampela i mas hatwok tru, tasol sapos yumi stretim gut ol samting na redi long lusim sampela samting bilong skin, bai yumi kisim planti gutpela samting bilong spirit, na strongim bilip bilong yumi wantaim pasin bilong wetim God i kisim bek yumi.—Ro 13:11.
4 Wanpela nupela pasin bilong helpim yumi na bai yumi no gat hatwok tumas, i olsem: Kirap long ol kibung distrik bilong 1995-1996, bai ol i no ken wokim planti kaikai, na long sampela kibung, bai i no gat kaikai. Mipela laik kirapim olgeta wan wan long bringim kaikai na koldring bilong ol yet, sapos inap. Long ol kibung distrik i kamap long biktaun, ating bai i no gat kaikai; koldring tasol. Long kibung distrik i kamap long ol longwe longwe hap, ating bai i gat bisket samting bilong stua i stap bilong helpim ol man i kam longwe, tasol long ol dispela kibung tu ating bai ol inap pinisim pasin bilong kukim kaikai long taim bilong kibung. Sapos inap, olgeta i mas bringim kaikai bilong ol yet. Long ol kibung sekit na bikpela de kibung, pasin bilong wokim kaikai i ken i stap olsem tasol i go inap long pinis bilong Disemba 1995. Tasol kirap long Janueri 1996, long taim bilong kibung sekit na bikpela de kibung, bai yumi kirap bihainim dispela nupela pasin bilong wokim kaikai, wankain olsem bilong kibung distrik. Ating yu laik save olsem wanem dispela samting inap helpim yumi.
5 Olsem: Inap planti yia pinis long ol biktaun na long ol narapela hap tu, ol i no bin wokim planti kaikai tumas olsem pastaim. Ol brata i mas mekim bikpela wok bilong lukautim famili na i gat planti samting i givim hevi long ol long olgeta de, na tu, oganaisesen bilong yumi i wok long go bikpela, olsem na long dispela as, lain bilong yumi i bin stretim sampela pasin bilong mekim wok long taim bilong kibung. Dispela i mekim na nau ol brata i no gat hatwok tumas—ol inap sindaun na amamas long harim ol tok, winim bilong bipo. (Lo 31:12) Tasol i gat wanem wok moa ol i ken pinisim na bai program bilong kibung i ken helpim sampela brata moa?
6 Sampela Senis Yumi Wet Long En: Inap sampela yia pinis long sampela hap, ol i no bin mekim bikpela wok tumas bilong redim kaikai, na dispela i kamapim klia olsem sampela samting tasol em inap. (Skelim wantaim Luk 10:38-42.) Tasol maski sampela samting tasol em inap, sapos planti manmeri i kam bung, ol brata i mas baim planti bilong ol dispela samting na mekim yet bikpela wok, na i mas i gat ol samting olsem bokis ais na ges-aven samting, em ol samting i gat bikpela pe long en. Na tu, i mas i gat planti volantia bilong stretim na lukautim dispela wok.
7 Mipela i pilim tru gutpela wok volantia ol brata sista i bin mekim bilong redim kaikai. Tasol nau i gat dispela nupela pasin bilong wokim kaikai, olsem na ol dispela volantia, em ol i bin mekim wok bilong baim kaikai samting, redim kaikai, tilim kaikai, bai ol inap mekim wok long dispela hap taim na mekim ol narapela wok bilong Kingdom ol i mas mekim, olsem amamas na toktok gut wantaim sampela brata sista moa long taim bilong kibung. Planti brata sista em bipo ol i bin mekim wok long dipatmen bilong kaikai, nau bai ol inap helpim ol brata long mekim wok long ol narapela dipatmen, olsem mekim wok atendan na klinim. Long dispela rot yumi olgeta bai i no gat bikpela wok tumas, na bai i no gat planti brata sista long mekim wok long biknait o long moning tru o long taim ol brata i mekim tok, olsem sampela bipo ol i bin mekim em ol i gat wok long redim kaikai.
8 Bilong Helpim Ol Wok: Sosaiti i pilim tru gutpela wok yupela ol brata sista i bin mekim, em inap planti yia pinis ‘bel bilong yupela i bin kirap long givim planti gutpela samting’ bilong helpim wok bilong kibung, olsem wok bilong lukautim kaikai. (1 Sto 29:9) Dispela i bin kamapim planti gutpela samting. Olsem: Dispela i bin inapim ol brata long baim ples bilong putim kibung na long baim ol samting bilong kibung. Na tu, dispela i bin helpim ol man i kam bung long ol i ken stap long ples kibung long taim bilong malolo long belo, na bai ol i ken kisim kaikai, na kisim nupela strong, na taim program i no kirap yet long belo bek ol i sindaun pinis. Yumi ken ting olsem ol brata sista bai wok yet long givim planti gutpela samting bilong helpim kibung. Long dispela rot ol i bin tokaut olsem ol i pilim tru ol gutpela samting Jehova i bin putim bilong helpim ol.—Snd 11:25; Lu 16:9.
9 Bilong Lukautim Yu Yet Long Kaikai: I gat dispela nupela pasin bilong wokim kaikai, olsem na ol famili na olgeta wan wan i mas bringim kaikai na koldring bilong ol yet i kam, em kaikai bilong ol long belo. Yumi save tingim ol kaikai bilong spirit yumi kisim em i bikpela samting tru. Olsem na yumi no ken larim ol kaikai bilong skin i kamap olsem nambawan bikpela samting. Yumi olgeta wan wan i mas skelim wanem wanem samting em i bikpela samting tru. (Fl 1:9, 10a) Long ol bikpela kibung i bin kamap long Polan na Rasia na Yukren long sampela yia i go pinis, na long sampela narapela hap tu, maski ol i no wokim kaikai, olgeta samting bilong kibung i bin kamap gutpela. Sampela sekit hia long Papua Niugini, ol tu ol i no bin wokim kaikai, em long taim bilong kibung sekit na bikpela de kibung bilong ol. Ol brata sista i bin bringim kaikai bilong ol yet i kam. Sapos yumi no bringim planti kaikai tumas, bai yumi no ai slip—bai yumi inap putim gut yau long olgeta tok i kamap long belo bek. Olsem na gutpela sapos yumi olgeta i bringim liklik kaikai tasol, em bilong strongim skin. Tingim: Taim Jisas i givim kaikai long planti manmeri, em i givim tupela kain samting tasol long ol, em bret na pis. (Mt 14:16-20; lukim tu Luk 10:42a.) Mipela i bin sotim hap taim bilong kisim malolo long taim bilong belo, na mipela i tingim kain ples mipela i putim kibung long en, olsem na mipela i amamas long kamapim sampela tingting bilong helpim yupela long save wanem kain kaikai samting i gutpela long bringim i kam.
10 Sapos yu stretim gut ol samting, bai yu inap kaikai wantaim famili bilong yu long moningtaim. Sapos long nait yu slip hariap, bai yu inap kirap long moningtaim tru bilong yu ken kaikai gut na kamap long ples kibung taim program i no kirap yet na toktok gut wantaim ol brata sista na amamas wantaim ol.
11 Long ol kibung distrik, bai ol i sotim dispela hap taim bilong kisim malolo long belo. Tasol dispela hap taim bai inap long yu ken kaikai liklik na toktok gut wantaim ol narapela. Ol brata sista i sindaun long biktaun em kibung i kamap long en o klostu long dispela taun, orait, taim program bilong wan wan de i pinis na ol i go bek long haus long apinun, bai ol i no hatwok long redim sampela kaikai bilong olgeta wan wan long famili i ken bringim long kibung long de antap. Ating yu ken bringim sanwis o prut, o rais o kaukau samting yu kukim pinis. Planti man, taim ol i go long ples wok, ol i save kisim wankain kaikai i go wantaim ol.
12 Ating ol brata sista i stap longwe long taun em kibung i kamap long en, bai ol i hatwok liklik, long wanem, ol i mas stretim gut ol samting na bai ol i gat kaikai bilong belo. Ating prut o kaukau samting em inap, na ating ol i ken kisim long gaden bilong ol na bringim i kam. Ating ol narapela hap kaikai ol i laik kisim ol i ken baim long stua long taun em kibung i kamap long en. Tasol sapos yumi bringim kaikai bilong yumi yet, yumi no ken kaikai o redim kaikai taim program i no pinis yet. Sapos ol brata i lukautim kibung i kamapim sampela toksave long pasin bilong kukim kaikai long ples kibung o long ples slip Sosaiti i bin putim, orait, yumi mas bihainim ol dispela toksave.
13 Sampela Samting Moa Bilong Helpim Yumi: Dispela nupela pasin bilong mekim ol samting em i gutpela samting tru. Bai olgeta brata sista inap putim olgeta tingting bilong ol i go long kisim ol gutpela samting bilong spirit—em as tru na yumi go long ol kibung. Bai yumi inap bung wantaim ol brata sista na amamas i stap, na harim ol gutpela tok bilong program tu. Olsem na bilong kisim kaikai, yumi no ken lusim ples kibung long belo, nogat; yumi mas bringim sampela kaikai i kam wantaim yumi. Long dispela rot bai yumi inap toktok gut na amamas wantaim ol brata na sista, na harim olgeta tok bilong program i kamap long belo bek—bai yumi no lusim wanpela hap tok.
14 Yumi amamas tru long kisim planti gutpela kaikai bilong spirit long ol dispela kibung—yumi kisim ol nupela buk na buklet samting, na ol brata i skulim gut yumi, na yumi harim ol gutpela tok bilong stretim yumi. Yumi amamas tu long bung wantaim lain bilong God. Ol dispela gutpela blesing em ol samting yumi olgeta wan wan i save tingim yet. Sindaun 10:22 i tok: “Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.” Jehova i mekim olsem, long wanem, yumi lain bilong em i no go long ol kibung long wanem yumi tingting long kisim ol samting bilong skin, nogat. Yumi save bung, long wanem, yumi gat bikpela laik long kisim ol gutpela samting bilong spirit, na taim yumi kamapim stretpela tingting long ol dispela samting, Jehova i save givim planti gutpela samting long yumi.—1 Ti 6:6-8; Hi 11:6.
15 Ol dispela bung bilong strongim yumi i kirapim yumi long tingim olsem planti manmeri ol i wok long kam insait long tok i tru. (Jo 4:35, 36) Ol ves long kirap bilong Aisaia sapta 54 i singautim lain bilong Jehova long heven, ol i olsem meri bilong em, long ol i mas redi long lukautim planti manmeri ol i laik kam insait long tok i tru. Aisaia i tok profet olsem, lain bilong yumi bai go bikpela na kisim nupela strong, olsem: “Yu mas makim bikpela hap graun na sanapim haus sel bilong yu. Na yu mas opim haus sel bilong yu olgeta, na lusim ol rop i go longpela na planim strong ol stik i go daun long graun, na taitim ol rop na pasim strong long ol dispela stik. Long wanem, mak bilong graun bilong yu bai i op bikpela na i go olsem long han sut na long han kais.” Dispela lain i lotuim God long pasin i tru em i go bikpela bikpela na dispela i truim dispela tok profet.—Ais 54:1-4.
16 Mipela i bin skelim gut ol samting na mipela ting i gutpela sapos yumi bihainim dispela nupela pasin bilong wokim kaikai, long wanem, long dispela rot ol brata i no ken lusim bikpela hap taim tumas long redim kaikai na yumi olgeta inap harim ol tok bilong program. Na tu, i no gat planti kibung sekit na kibung distrik olsem bipo, na mipela i bilip olsem Jehova bai orait long dispela samting, long wanem, long dispela rot bai yumi inap harim ol gutpela gutpela tok, winim bilong bipo, na rot bai op long yumi ken bung wantaim ol brata sista na narapela i ken strongim narapela—ol dispela samting bai helpim yumi long stap strong nau long dispela las taim. Sapos yumi tingim ol samting yumi mas kisim, na em tasol, bai yumi amamas long bung wantaim ol brata sista na kisim ol gutpela samting bilong spirit. Yumi go long ol kibung na kisim ol kaikai bilong spirit long tebol bilong Jehova, na mipela beten long Jehova i ken blesim hatwok bilong yumi na mekim i kamap gutpela.—Skelim wantaim Lo 16:14, 15.
[Box on Page 5]
Nupela Pasin Bilong Kisim Kaikai i Helpim Yumi Olsem Wanem
◼ Taim program i no kirap yet, na taim program i kirap pinis, na bihain long pinis bilong program, bai i no gat planti wok tumas long mekim olsem bipo, na yumi inap toktok gut wantaim sampela brata sista moa
◼ No gat planti samting tumas bilong lukautim, olsem bokis ais samting
◼ Planti brata sista moa inap harim olgeta tok bilong kibung
◼ Bai i gat planti volantia moa bilong helpim ol narapela dipatmen
◼ Sampela hap taim moa i stap bilong mekim ol narapela wok bilong spirit
Sampela Kain Samting Yumi Ken Bringim Bilong Kaikai Long Belo
◼ Liklik kaikai tasol bilong strongim skin
◼ Sanwis, kaikai yu kukim pinis, prut
NO KEN Bringim Ol Dispela Samting i Kam Insait Long Ples Kibung
◼ Bia o wain samting
◼ Ol bikpela bikpela samting bilong putim kaikai na koldring long en