Oltaim Givim Biknem Long God
1 Taim yumi bung wantaim ol brata sista bilong yumi, dispela i save strongim bel bilong yumi. (1 Ko 16:17, 18) Yumi bung wantaim ol long ol miting na kibung na long wok autim tok. Na yumi bung wantaim ol taim yumi singautim ol i kam long haus bilong yumi. Long dispela rot yumi mekim pasin bilong lukautim gut ol man, na narapela i strongim bel bilong narapela. (Ro 12:13; 1 Pi 4:9) Taim yumi stretim bung bilong kaikai bilong marit, gutpela sapos yumi tingim ol gutpela tok bilong Wastaua bilong Janueri 1, 1985.
2 Bosim Gut Ol Bung Bilong Amamas: Maski yumi ‘kaikai o dring o mekim narapela samting, yumi mas mekim olgeta samting bilong givim biknem long God.’ (1 Ko 10:31-33) Sampela i no bihainim dispela tok, na sampela hevi i bin kamap, long wanem, sampela bung bilong amamas i bikpela tumas na i hatwok long bosim gut. Taim yumi stretim ol bung bilong marit, yumi mas was gut; nogut ol i kamap wankain olsem ol bung bilong amamas bilong dispela graun. Long kain bung olsem ol man i no save bihainim gutpela tingting—ol i mekim pasin i kalapim ol lo bilong Baibel.—Ro 13:13, 14; Ef 5:15-20.
3 I hatwok long bosim gut kain bikpela bung olsem, na sampela taim ol man i save bikmaus na mekim nabaut, na dring planti tumas, na ating pamuk tu. (Ef 5:3, 4) Kain bung olsem i no givim biknem long Jehova. Dispela kain bung i save nogutim gutnem bilong kongrigesen na pundaunim ol man. (1 Ko 10:23, 24, 29) Sori tru sapos ol bung yumi mekim bilong amamas, olsem bung bilong marit, i kamap olsem disko i go inap tulait, na i gat ol danis nogut, na musik i pairap strong, na ol man i kam bung ol i mekim pasin i no stret wantaim pasin Kristen.
4 Ol Kristen i mas bihainim pasin bilong singautim ol man i kam long haus bilong ol, tasol bikpela samting ol i mas tingim taim ol i bung wantaim, em pasin bilong strongim narapela long ol samting bilong spirit. (Ro 1:11, 12) Sapos ol bung i liklik tasol, em i gutpela. Buk Lo, pes 135-136, i tok: “Sampela taim famili i ken singautim sampela famili moa i kam long haus bilong ol na bai ol i ken toktok na amamas wantaim. . . . Sapos brata i singautim sampela man i kam long ol kain bung olsem, orait, em i mas save long ol samting ol bai mekim, nogut sampela pasin nogut i kamap na em i gat asua long dispela. Kristen i gat gutpela tingting em i no ken singautim planti tumas manmeri i kam bung, o larim bung i stap planti aua.” Tok bilong Jisas i makim olsem, sapos yumi gat bikpela laik long strongim ol pren bilong yumi long ol samting bilong spirit, orait maski long mekim bikpela wok bilong redim planti samting.—Lu 10:40-42.
5 Pasin bilong singautim ol brata Kristen long kam long haus bilong yu, em i gutpela samting tru. Tasol sapos yu baim wanpela haus bilong wokim wanpela pati na pati i kamapim tingting bilong dispela graun, na yu singautim planti man i kam, dispela em i narapela kain long pasin bilong singautim sampela man tasol i kam long haus bilong yu. Taim yu singautim ol man i kam long haus bilong yu, yu mas skelim gut ol samting; yu inap bosim gut dispela bung o nogat.—Lukim Wastaua, Ogas 15, 1992, p. 17-20.
6 Tru tumas, yumi stap olsem bikpela lain brata em Jehova i bin mekim gut long ol, na long dispela rot narapela inap strongim bel bilong narapela na kirapim narapela long mekim yet ol gutpela wok. (Mt 5:16; 1 Pi 2:12) Long ol bung bilong amamas, sapos yumi bihainim gutpela tingting na yumi no hambak, bai yumi givim biknem long God na strongim bel bilong ol narapela.—Ro 15:2.