“Mekim Olgeta Samting Bilong Givim Glori Long God”

YUMI ol wokman bilong God i dediket pinis, yumi gat wok long kamapim glori bilong Jehova long toktok na olgeta samting yumi mekim. Aposel Pol i kamapim wanpela stiatok taim em i tok: “Maski yupela i kaikai o dring o mekim narapela samting, yupela i mas mekim olgeta samting bilong givim glori long God.” (1 Kor. 10:31) Bilong mekim olsem yumi mas bihainim ol stretpela lo bilong Jehova, em ol dispela lo i kamapim klia ol pasin bilong Jehova i gutpela olgeta. (Kol. 3:10) Yumi lain manmeri i holi, olsem na yumi mas bihainim ol pasin bilong God.—Efe. 5:1, 2.

² Aposel Pita i kirapim ol Kristen long tingim dispela, na em i tok: “Yupela i stap olsem pikinini bilong harim tok, olsem na no ken bihainim moa ol laik em yupela i bin i gat long bipo taim yupela i no bin save long God. God Holi i bin singautim yupela, olsem na yupela i mas kamap holi long olgeta wokabaut bilong yupela. Rait Holi i tok: ‘Yupela i mas i stap holi, long wanem, mi holi.’” (1 Pita 1:14-16) Olsem lain Israel bilong bipo, ol bratasista long kongrigesen Kristen i mas holimpas ol pasin holi. Dispela i makim olsem ol i mas i stap klin na ol pasin doti bilong dispela graun i no ken stap long ol. Long dispela rot ol i stap narapela kain bilong mekim wok bilong God.—Kis. 20:5.

³ Bilong yumi ken holimpas pasin bilong stap holi, yumi mas bihainim ol lo na stiatok bilong Jehova. Ol dispela tok i stap ples klia long Baibel. (2 Tim. 3:16) Long rot bilong stadi long Baibel, yumi kisim save long Jehova na ol pasin bilong em, na yumi go klostu long em. Yumi stadi long Baibel na dispela i mekim na yumi bilip tru olsem yumi mas painim Kingdom Bilong God pastaim na putim pasin bilong mekim laik bilong Jehova i stap nambawan long laip bilong yumi. (Mat. 6:33; Rom 12:2) Bilong mekim olsem, yumi mas kamap olsem nupela man.—Efe. 4:22-24.

STAP KLIN LONG OL SAMTING BILONG LOTU NA LONG PASIN BILONG YUMI

⁴ Sampela taim i hatwok long bihainim ol stretpela lo bilong Jehova. Birua bilong yumi, Satan dispela Devil, i laik pulim yumi long lusim tok i tru. Ol pasin nogut bilong ol man bilong graun na sin i stap long skin bilong yumi yet i mekim na sampela taim yumi hatwok. Bilong truim dediket bilong yumi, yumi mas pait strong bilong stap gut long God. Baibel i tok yumi no ken kirap nogut taim ol man i birua long yumi o traim i painim yumi. Yumi mas karim hevi bilong bihainim stretpela pasin. (2 Tim. 3:12) Yumi ken amamas taim ol traim i painim yumi, long wanem, yumi save ol dispela traim i soim olsem yumi mekim laik bilong God.—1 Pita 3:14-16; 4:12, 14-16.

⁵ Jisas em i gutpela olgeta, tasol em i lainim pasin bilong bihainim tok long rot bilong ol hevi em i karim. I no gat wanpela taim em i pundaun long ol traim bilong Satan o kirap tingting long kisim ol gutpela samting bilong dispela graun. (Mat. 4:1-11; Jon 6:15) Jisas i no tingting liklik long mekim samting i no stret. Pasin bilong em long stap gut long Jehova i mekim na ol man bilong graun i birua long em, tasol oltaim em i bihainim ol stretpela lo bilong God. Paslain liklik long Jisas i dai, em i mekim tok lukaut long ol disaipel olsem ol man bilong graun bai birua long ol tu. Kirap long dispela taim i kam inap long nau, ol man i bin mekim nogut long ol disaipel bilong Jisas, tasol ol disaipel i save olsem Pikinini Bilong God i winim pinis strong bilong dispela graun, na dispela i save strongim bel bilong ol.—Jon 15:19; 16:33; 17:16.

⁶ Yumi mas bihainim ol stretpela lo bilong Jehova, olsem Bikpela bilong yumi i bin mekim, na bai yumi no ken i stap olsem ol manmeri bilong dispela graun. Yumi mas klia long wok politik na kain kain wok bilong senisim sindaun bilong ol man, na tu, yumi mas sakim ol pasin doti bilong dispela graun. Yumi tingim gut tok i stap long Jems 1:21, em i tok: “Rausim olgeta samting i no klin na olgeta pasin nogut. Na long pasin isi, yupela i mas larim God i planim tok bilong em long bel bilong yupela, em dispela tok inap kisim bek yupela.” Long rot bilong stadi na go oltaim long ol miting, yumi ken “planim tok bilong em,” em tok i tru, long tingting na bel bilong yumi, na yumi bai no laikim ol samting bilong dispela graun. Disaipel Jems i tok: “Ating yupela i no save long dispela, a? Pasin bilong i stap pren bilong ol manmeri i stap longwe long God, dispela em pasin bilong birua long God. Man husat i laik i stap pren bilong ol manmeri i stap longwe long God, em i mekim em yet i kamap birua bilong God.” (Jems 4:4) Dispela em as na Baibel i tok strong long yumi mas holimpas ol stretpela lo bilong Jehova na stap longwe long ol pasin bilong dispela graun.

⁷ Baibel i mekim tok lukaut long yumi no ken insait long pasin sem na pasin pamuk. Baibel i tok: “Olsem i stret long ol manmeri i holi, yupela i no ken larim toktok bilong pasin pamuk na olgeta kain pasin i no klin na gridi pasin i kamap namel long yupela.” (Efe. 5:3) Olsem na yumi no ken larim tingting bilong yumi i stap long ol pasin sem na pasin doti, na yumi no ken toktok long ol dispela samting. Long dispela rot yumi kamapim klia olsem yumi laik bihainim ol klinpela na stretpela lo bilong Jehova.

STAP KLIN LONG SKIN

⁸ Ol Kristen i mas i stap klin long ol samting bilong lotu na long pasin bilong ol, na tu, ol i save em i bikpela samting long stap klin long skin. Long Israel long bipo, God bilong pasin holi i tok kem bilong ol i mas i stap klin. Yumi tu mas stap klin na bai Jehova “i no ken lukim wanpela samting i no stret” long yumi.—Lo 23:14.

⁹ Baibel i tok pasin holi na pasin bilong stap klin long skin i poroman wantaim. Olsem, Pol i tok: “Ol pren mi laikim tumas, . . . yumi mas rausim olgeta pasin doti bilong skin na bilong tingting. Yumi mas pret long God na wok oltaim long kamap holi.” (2 Kor. 7:1) Olsem na ol man na meri Kristen i mas wok strong long stap klin long skin long rot bilong waswas oltaim na wasim ol klos bilong ol. Sindaun bilong ol man i no wankain long olgeta kantri, tasol yumi inap painim sop na wara bilong klinim bodi bilong yumi na bilong ol pikinini bilong yumi.

¹⁰ Yumi save raun autim tok, olsem na planti man long komiuniti i save long yumi. Taim haus na banis bilong yumi i klin na ol samting i stap stret, insait na ausait, dispela i autim tok long ol neiba. Dispela em samting famili olgeta i ken insait long en. Ol brata i mas tingim tru haus na banis bilong ol, taim banis na haus i stap stret na klin, ol narapela bai mekim gutpela tok long yumi. Taim ol het bilong famili i mekim olsem na go pas long ol samting bilong lotu, dispela i makim olsem ol i lukautim gut famili bilong ol. (1 Tim. 3:4, 12) Ol sista tu i gat wok long lukautim ol samting, moa yet ol wok bilong haus. (Tai. 2:4, 5) Ol pikinini em papamama i lainim ol gut, ol i save mekim ol samting bilong stap klin na klinim na stretim rum bilong ol yet tu. Olsem na famili olgeta i wok wantaim long kamapim pasin bilong stap klin i stret wantaim sindaun bilong ol man long nupela taim aninit long Kingdom Bilong God.

¹¹ Planti wokman bilong Jehova long nau i save yusim kar bilong go long ol miting. Long sampela hap, ol i mas i gat kar bilong go autim tok. Olsem na kar i mas i stap klin na ol i mas stretim gut. Haus na kar bilong yumi i mas kamapim klia olsem yumi insait long lain bilong Jehova i klin na i holi. Yumi mas bihainim wankain pasin tu long beg bilong yumi long autim tok na Baibel bilong yumi.

¹² Klos na bilas bilong yumi i mas stret wantaim ol stiatok bilong God. Sapos yumi go lukim wanpela bikman bilong gavman, ating bai yumi bilas gut na werim klos i klin na i stret, a? Yumi mas tingim dispela moa yet taim yumi mekim wok bilong Jehova long taim bilong autim tok o mekim tok long pletfom! Klos na bilas bilong yumi inap stiaim tingting bilong ol man long lotu bilong Jehova i wanem kain. I no stret long werim ol klos i no haitim gut skin o i soim olsem yumi no tingim ol arapela. (Mai. 6:8; 1 Kor. 10:31-33; 1 Tim. 2:9, 10) Olsem na taim yumi redi long go autim tok o go long ol miting bilong kongrigesen, o long ol kibung, yumi mas tingim tok Baibel i mekim long pasin bilong stap klin long skin na long bilas bilong yumi. Oltaim yumi laik givim ona na glori long Jehova.

¹³ Yumi mas bihainim wankain pasin taim yumi go raun long hetkota o long ol brens ofis bilong ol Witnes Bilong Jehova. Tingim, nem Betel i makim “Haus Bilong God.” Olsem na klos, bilas, na pasin yumi bihainim i mas wankain olsem long taim yumi go long ol miting long Haus Kingdom.

¹⁴ Maski yumi raun nating, yumi mas bilas gut na pasim klos i stret. Askim yu yet olsem: ‘Klos na bilas bilong mi bai mekim na mi sem long autim tok long kain kain taim na ples?’

OL GUTPELA AMAMAS

¹⁵ Yumi mas malolo na kisim sampela amamas bambai yumi ken stap gut na stap helti. Wanpela taim Jisas i tokim ol disaipel long kam wantaim em long wanpela hap i no gat man na “malolo liklik.” (Mak 6:31) Sapos sampela taim yumi malolo na kisim gutpela amamas, dispela i gutpela samting. Em inap givim nupela strong long yumi na bai yumi inap mekim yet ol wok bilong yumi.

¹⁶ I gat kain kain samting bilong kisim amamas long nau, olsem na ol Kristen i mas skelim gut na bihainim savetingting bilong God long ol samting ol i mekim. Amamas i gutpela samting, tasol em i no nambawan bikpela samting long laip bilong yumi. Baibel i tok lukaut olsem, long “taim bilong las de” ol man bai “i no laikim God, nogat, ol bai laikim kain kain amamas.” (2 Tim. 3:1, 4) Planti samting long nau ol man i save kolim olsem samting bilong amamas, ol i no stret long ol man i laik bihainim ol stretpela lo bilong Jehova.

¹⁷ Ol Kristen bilong bipo i mas sakim ol amamas nogut, long wanem, ol i bin stap namel long ol manmeri i tingting tasol long painim amamas. Long ol haus spot bilong ol Rom, ol man i kisim amamas long rot bilong lukim ol arapela i karim bikpela pen. Pasin bilong pait na bagarapim man, kapsaitim blut, na pasin pamuk i bikpela samting long amamas bilong ol man, tasol ol Kristen bilong bipo i stap longwe long ol kain samting olsem. Long nau, planti amamas bilong graun i kamapim ol dispela wankain pasin na i save amamasim ol laik nogut bilong ol man. Yumi mas “was gut tru long wokabaut” bilong yumi na givim baksait long ol amamas nogut. (Efe. 5:15, 16; Sng. 11:5) Na maski sampela amamas i orait, tasol ating pasin bilong ol man long dispela hap we amamas i kamap i no stret.—1 Pita 4:1-4.

¹⁸ I gat sampela gutpela amamas ol Kristen i ken insait long en. Planti ol i kisim helpim taim ol i bihainim tok bilong Baibel na ol tok i givim gutpela tingting i stap long ol buk na nius bilong yumi.

¹⁹ Sampela taim wanpela Kristen i singautim sampela famili i kam long haus bilong em. O sampela i singautim ol bratasista long kam long kaikai bilong weding o long kain bung olsem. (Jon 2:2) Man i go pas long kain bung olsem i mas tingim olsem em wok bilong em long bosim gut ol samting. Tru tumas, taim bikpela lain i bung wantaim, yumi mas was gut. Taim ol man i amamas wantaim long kain bung olsem, sampela i mekim ol samting i no stret ol Kristen i mas mekim, ol i kaikai planti tumas o dring planti tumas o mekim sampela arapela pasin nogut. Ol Kristen i bihainim gutpela tingting, ol i tingim dispela na ol i luksave olsem em i savetingting long no ken singautim planti man tumas na no ken larim bung i stap inap planti aua. Sapos i gat alkohol, liklik tasol em inap. (Fili. 4:5) Sapos ol brata husat i bosim bung i stretim gut ol samting na bai bung i gat gutpela amamas na i givim nupela strong long sait bilong bilip, orait kaikai na dring i no bikpela samting.

²⁰ Em i gutpela pasin long mekim gut long ol arapela. (1 Pita 4:9) Taim yumi singautim ol arapela Kristen i kam long haus bilong yumi long kaikai, malolo na kisim amamas wantaim, na stori long sampela tok bilong Baibel, yumi laik tingim ol bratasista i no gat planti samting. (Luk 14:12-14) Sapos sampela i singautim yumi long kam long haus bilong ol, pasin bilong yumi i mas stret wantaim tok i stap long Mak 12:31. Em i gutpela long tok tenkyu long gutpela pasin ol arapela i mekim.

²¹ Ol Kristen i amamas long planti gutpela presen God i save givim na ol i save olsem ol i ken “kaikai na dring na kisim amamas long olgeta wok ol i taitim bun long mekim.” (Ekl. 3:12, 13) Taim papa bilong bung na ol manmeri em i bin singautim i “mekim olgeta samting bilong givim glori long God,” ol bai tingim bek ol dispela bung na ol bai amamas long ol i bin kisim nupela strong long sait bilong bilip.

OL SAMTING BILONG SKUL

²² Ol pikinini bilong ol Witnes Bilong Jehova i save go long skul na dispela i helpim ol. Taim ol i go long skul, ol i laik lain long rit na rait. Ol arapela sabjek ol i skulim ol pikinini long en inap helpim ol long putim ol mak bilong winim long mekim wok bilong God. Taim ol i skul yet, ol i laik wok strong long “tingim Bikpela Man Bilong Wokim” ol na putim ol samting bilong lotu i stap nambawan.—Ekl. 12:1.

²³ Sapos yu wanpela yangpela Kristen i skul yet, yu mas was gut na no ken bung nating wantaim ol yangpela i no lotuim Jehova. (2 Tim. 3:1, 2) Jehova i givim ol samting bilong banisim yumi, olsem na i gat planti samting yu inap mekim bilong sakim ol pasin bilong dispela graun. (Sng. 23:4; 91:1, 2) So bilong lukautim yu yet, yu mas mekim wok long ol samting Jehova i givim.—Sng. 23:5.

²⁴ Bilong ol pikinini Witnes i ken stap longwe long ol samting bilong dispela graun taim ol i stap long skul, planti i no laik insait long ol program o spot samting bilong skul i save kamap taim skul i pinis long apinun. Ating ol wanskul na ol tisa i no kliagut long as na yu no laik insait long ol dispela samting. Tasol pasin bilong mekim ol samting God i laikim, dispela i bikpela samting. Bilong mekim olsem, yu mas bihainim maus bilong bel em Baibel i skulim na strong long sakim ol pasin bilong litimapim kantri o resis long winim ol arapela. (Gal. 5:19, 26) Long rot bilong putim yau long tok bilong Baibel em papamama i givim na bung wantaim ol gutpela poroman insait long kongrigesen, dispela bai helpim yupela ol yangpela long bihainim ol stretpela lo bilong Jehova.

WOK MANI NA OL POROMAN

²⁵ Baibel i tok ol het bilong famili i gat wok long lukautim famili bilong ol long ol samting bilong skin. (1 Tim. 5: 8) Tasol ol i wokman bilong God, olsem na ol i save olsem wok mani bilong ol i stap namba tu na wok bilong Kingdom i stap nambawan. (Mat. 6:33; Rom 11:13) Taim ol i givim bel long wok bilong God na ol i ting kaikai na klos ol i gat em inap long ol, dispela bai helpim ol long abrusim pasin bilong tingting planti na pasin bilong bungim ol samting bilong skin.—1 Tim. 6:6-10.

²⁶ Olgeta Kristen i dediket pinis em ol i wok mani, ol i mas tingim ol stiatok bilong Baibel. Bilong bihainim stretpela pasin na mekim wok mani, dispela i makim olsem yumi no laik insait long sampela wok em lo bilong God o lo bilong kantri i no orait long en. (Rom 13:1, 2; 1 Kor. 6:9, 10) Yumi was gut long ol poroman nogut. Yumi ol soldia bilong Krais, olsem na yumi no laik insait long ol wok mani i no stret wantaim ol stretpela lo bilong God, o wok mani i helpim pait, o wok we inap bagarapim pasin pren bilong yumi wantaim God. (Ais. 2:4; 2 Tim. 2:4) Na yumi no save insait long wok bilong “Bikpela Babilon,” em birua bilong God.—Rev. 18:2, 4; 2 Kor. 6:14-17.

²⁷ Pasin bilong bihainim ol stretpela lo bilong God i mekim na yumi no tingting long helpim wok bisnis bilong yumi o kisim sampela samting bilong helpim yumi yet taim yumi bung wantaim ol wanbilip. Taim yumi bung wantaim ol arapela long ol miting Kristen, ol kibung sekit na kibung rijinel, yumi mekim olsem bilong lotu long Jehova. Yumi kisim ol tok i kam long Jehova, na yumi amamas long narapela i ken strongim narapela narapela. (Rom 1:11, 12; Hib. 10:24, 25) Ol kain bung olsem i bilong kisim strong long sait bilong bilip.

OL KRISTEN I STAP WANBEL WANTAIM

²⁸ Ol stretpela lo Jehova i givim long lain bilong em i makim tu olsem ol i mas ‘holimpas pasin wanbel bilong holi spirit na stap bel isi, em pasin i save bungim ol wantaim.’ (Efe. 4:1-3) Ol Kristen i no ken tingting long ol yet tasol, nogat, ol i laik mekim ol samting i helpim ol arapela. (1 Tes. 5:15) Ating yu luksave pinis long dispela samting long kongrigesen bilong yu. Maski yumi gat wanem skin kala, wanem lain o sindaun, o yumi bin kisim wanem kain skul, yumi olgeta i mas bihainim ol wankain stretpela lo. Ol man i no wanbilip ol i luksave long dispela gutpela pasin bilong lain bilong Jehova.—1 Pita 2:12.

²⁹ Aposel Pol i stori gut long as bilong pasin wanbel, na em i tok: “I gat wanpela bodi tasol na i gat wanpela holi spirit tasol, wankain olsem i gat wanpela prais tasol yumi wetim na God i bin singautim yumi long kisim. I gat wanpela Bikpela tasol, na wanpela bilip tasol, na wanpela baptais tasol. I gat wanpela God na Papa bilong olgeta manmeri, em i antap long olgeta, na em i wok namel long olgeta, na em i wok insait long olgeta.” (Efe. 4:4-6) Dispela tok i kirapim yumi long yumi mas i gat wankain tingting long ol bikpela tok bilong Baibel na ol arapela strongpela tok bilong Baibel, na long dispela rot yumi soim olsem yumi daun long wok bos bilong Jehova. Tru tumas, Jehova i bin givim gutpela tokples olsem tok i tru bilong Baibel long lain bilong em, na dispela i helpim ol long wok gut wantaim long mekim wok bilong em.—Sef. 3:9.

³⁰ Pasin wanbel na pasin isi i stap insait long kongrigesen Kristen i save givim nupela strong long olgeta man i lotuim Jehova. Yumi lukim truim bilong tok promis bilong Jehova, olsem: “Long pasin wanbel, bai mi putim ol olsem sipsip long banis.” (Mai. 2:12) Yumi laik holimpas dispela pasin wanbel long rot bilong bihainim ol stretpela lo bilong Jehova.

³¹ Ol manmeri i stap insait long klinpela kongrigesen bilong Jehova ol i ken amamas! Em i wanpela gutpela samting tru long nem bilong Jehova i stap long yumi, na yumi redi long lusim wanem wanem samting yumi gat bilong holim dispela nem. Yumi laik holimpas pasin bilong pas gut wantaim Jehova, na tu, wok strong long bihainim ol stretpela lo bilong em na kirapim ol arapela man long mekim olsem.—2 Kor. 3:18.