Ol Miting Bilong Wok Bilong Septemba

Wik i Kirap long Ogas 31

Singsing 43

10 min: Ol toksave bilong kongrigesen.

20 min: “Tingim Ol Mak Bilong Wok Yu Laik Winim Bilong Helpim Bilip Bilong Yu Long i Stap Strong.” Paslain long miting, makim sampela i save gut long kaunim tok na ol i ken redi long kaunim ol paragraf. Bihain, tokim sampela yangpela na sampela papamama na sampela wokman na sampela painia long stori long ol wok ol i laik mekim.

15 min: Sampela Samting Bilong Strongim Yumi Long Spirit Long Olgeta De. Wanpela strongpela brata em inap lukautim gut dispela hap em i ken toktok wantaim tupela o 3-pela pablisa i bihainim stretpela pasin. Ol i ken stori long olsem wanem pasin bilong mekim teks long olgeta de, na tingim teks bilong yia na ol tok i stap long kalenda, em inap helpim olgeta wan wan pablisa na olgeta famili long i stap strong long spirit. Yumi mas kisim ol dispela samting i kam long Jehova bilong kirapim tingting bilong yumi. (Sng 119⁠:2; 1 Pi 1⁠:​12, 13; Ap 17⁠:11) Stori long olsem wanem ol dispela samting inap strongim na helpim yumi taim yumi autim tok.

Singsing 128 na beten.

Wik i Kirap long Septemba 7

Singsing 145

5 min: Ol toksave bilong kongrigesen.

20 min: Redi Long Lusim Samting Bilong Yu Yet Olsem Ofa! Wanpela brata i ken stori long ol tok i stap long pes 25-28 bilong Wastaua bilong Februeri 1, 1992. Stori gut olsem pasin bilong redi long lusim samting bilong yumi yet olsem ofa, em i no samting bilong laik bilong yumi olgeta wan wan; nogat; em wanpela lo bilong Baibel ol Kristen i mas bihainim. Sapos yumi lusim sampela samting bilong skin o bilong painim amamas bambai yumi inap mekim ol wok bilong Kingdom pastaim, orait, bai yumi no sot​—⁠God bai givim gutpela pe long yumi.

20 min: Nupela Kat Medical Directive. Kuskus bilong kongrigesen i ken lukautim dispela hap. Kuskus i ken makim sampela brata bilong tilim nupela kat Medical Directive, em Sosaiti i stretim pinis sampela tok long en, na ol i ken tilim long ol brata sista i baptais pinis. No ken tilim long pablisa i no baptais yet. Na tu, tilim kat Identity Card long ol papamama Witnes, em bilong yangpela pikinini bilong ol i no baptais yet. Orait, nau kuskus i ken kaunim na stori long ol tok i stap long pas bilong Ogas 1, 1992, em Asosiesen i salim i go long olgeta wan wan kongrigesen. Stori gut olsem taim pablisa i laik sainim nem bilong em, tupela narapela man i mas lukim pablisa i mekim, na taim em i sainim pinis, orait nau tupela i ken sainim nem bilong ol. Toktok gut wantaim kongrigesen na bai ol i ken save i gat wanem as na ol i mas bihainim stret pasin bilong raitim dispela tupela kat na bai kat i gat strong inap long lukautim ol. Long pinis bilong miting, gutpela sapos ol elda na ol narapela strongpela brata i redi long helpim ol pablisa long raitim kat bilong ol.

Singsing 113 na beten.

Wik i Kirap long Septemba 14

Singsing 55

10 min: Ol toksave bilong kongrigesen. Ripot bilong ol akaun.

20 min: Wanem Samting i Gutpela Moa ​—⁠Skulim Bodi o Givim Bel Long God? Lukim ol tok i stap long sapta 16 bilong buk Yangpela na stori long en. Mekim olsem wanpela tok, na givim gutpela tok long ol yangpela long kongrigesen bilong helpim na strongim ol.

Bilong helpim yu long mekim dispela tok, yu ken kamapim ol dispela askim:

1. Olsem wanem yumi inap save, Jehova i laik bai ol yangpela i amamas?

2. Wanem gutpela tok i stap long 1 Timoti 4⁠:​7, 8 bilong helpim ol yangpela taim ol i laik painim amamas?

3. Bilong wanem i no gutpela sapos yangpela Kristen i insait long wanpela tim bilong skul bilong pilai spot?

4. Olgeta samting yu lukim na harim, bai yu kisim pasin i wankain long dispela. Stori long olsem wanem televisen na video na buk samting inap mekim olsem long yu.

5. Kolim sampela gutpela samting ol yangpela i ken mekim bilong kisim amamas. (Stori long sampela samting ol yangpela long hap bilong yu inap mekim.)

15 min: Nupela Yia Bilong Wok Bilong 1993 i Kirap Pinis Long Septemba 1, 1992. Wasman siaman i ken lukautim dispela hap na toktok wantaim ol narapela elda bilong komiti bilong lukautim wok bilong kongrigesen. Stori long ol samting kongrigesen inap mekim long yia bilong wok bilong 1993.

Yupela i ken stori long ol dispela samting:

Tokim kongrigesen long ol gutpela wok ol i bin mekim long yia bilong wok bilong 1992.

Stori long ol wok bilong kongrigesen i bin kamap gutpela, olsem i gat hamas pablisa long kongrigesen, na hamas aua ol i bin lusim long autim tok, na hamas gobek na Baibel-stadi ol i bin mekim, na hamas magasin ol i bin tilim.

Stori long sampela wok kongrigesen i mas wok strong moa long mekim long dispela nupela yia bilong wok bilong 1993.

Singsing 38 na beten.

Wik i Kirap long Septemba 21

Singsing 132

10 min: Ol toksave bilong kongrigesen.

20 min: Stretim Ol Long Pasin Sori. Wanpela tok. Lukim ol tok i stap long buk Famili, sapta 10, paragraf 1-16.

Stori long ol dispela askim:

1. Olsem wanem tingting bilong planti man long pasin bilong stretim pikinini i narapela kain long tok bilong Baibel?

2. ‘Stik bilong stretim man’ em wanem samting?

3. Bilong wanem sampela yangpela i kamap raskol?

4. Taim papamama i putim lo long pikinini, bilong wanem ol i no ken senisim nabaut tok bilong ol?

5. Ol pikinini i save laikim wanem kain papamama?​—⁠Snd 29⁠:17; Hi 12⁠:⁠11.

6. Papamama i save laikim wanem kain pikinini?

Toktok wantaim sampela yangpela em ol i bihainim gutpela pasin. Paslain long miting, stori wantaim ol long sampela askim na bai ol i redi long bekim. Yu ken givim ol dispela askim long ol, olsem:

1. Yu ting olsem wanem long ol samting papamama i mekim bilong stretim yu?

2. Ol i strong long yu mas mekim wanem ol samting?

3. Yu bihainim tok bilong papamama na wanem ol gutpela samting i kamap?

4. Yu tingim ol samting i bin painim yu, na yu laik givim wanem tok long ol narapela yangpela?

Toktok wantaim sampela papamama, em ol i bin lainim gut pikinini bilong ol. Yu ken givim ol dispela askim long ol, olsem:

1. Yu strong long pikinini bilong yu i mekim wanem ol samting?

2. Taim yu mas givim strafe long ol pikinini bilong yu, yu bin givim wanem kain strafe long ol?

3. Olsem wanem? Yu bin wok long lainim pikinini bilong yu bambai God i laikim ol, na yu laikim ol, na kongrigesen i laikim ol?

15 min: Sampela Stori long Wok BIlong Kingdom. Sapos inap, gutpela sapos yu wokim gutpela mep long blekbot, na bai ol brata sista inap save ol dispela kantri i stap we.

Kongo: Mipela i amamas long toksave olsem long Novemba 1991, gavman long Kongo i orait long ol Witnes Bilong Jehova i rejista long gavman. Olsem na olgeta brata sista i amamas tru long ol inap mekim long ples klia olgeta miting bilong ol na go long ol haus na autim tok long ol man.

Peru: Long mun Disemba long yia i go pinis, inap 39,104 pablisa i autim tok na dispela i winim ol pablisa i bin autim tok long Disemba 1990 inap 12 pesen. Inap 8,842 brata sista i mekim wok painia, dispela em inap olsem 23 pesen bilong olgeta pablisa.

Korea: Long mun Janueri, em namba wan taim lain pablisa i go bikpela inap 68,310. Sevenpela kongrigesen i ripot olsem: Ol pablisa i baptais pinis, olgeta i mekim wok bilong God long olgeta de olsem mekim wok painia samting. Wanpela kongrigesen i ripot olsem: Kongrigesen i no gat wanpela pablisa; ol i gat ol painia tasol​—⁠12-pela painia oltaim na 15 painia haptaim.

Yiabuk bilong 1992 (tok Inglis) long pes 46 na 47 i stori long wanpela ekspiriens i bin kamap long Korea, olsem:

Kat Medical Document i bin lukautim laip bilong wanpela sista long Korea, long wanem, dispela kat i bin i stap wantaim em. Olsem: Sista i laik kalap i go daun long ka bilong em na wantu 4-pela man i holim em na subim em i go daun long baksait bilong ka. Em i tok long givim ring na paus mani bilong em long ol na bai ol i lusim em i go, tasol ol i no laik. Em i pret olsem ol i gat tingting long bagarapim em. Em i kirap long singaut strong. Wanpela man i kros na i tok, “Yumi mas kilim em i dai.” Ol i sutim lek bilong em long naip. Ol i pasim plasta long ai bilong em na pasim tupela lek wantaim. Em i pret nogut tru na em i kirap long krai na beten long maus na kolim strong nem bilong Jehova.

Wantu ol dispela man i stap isi. Wanpela i askim em: “Meri, yu wanpela Witnes Bilong Jehova?” Ol i bin opim paus bilong em na lukim dispela kat Medical Document. Ol i pasim tok olsem bai ol i no kilim em i dai, na ol i draivim ka i go klostu long haus bilong em. Ol i hariap lusim ka na larim sista i stap. Sista i beten olsem bai ol dispela man i pilim dispela rong ol i mekim na ol i ken tanim bel na kamap man bilong lotuim Jehova.

Singsing 191 na beten.