Lukautim Gut Pikinini na Bai Wok Nogut Bilong Blut i No Ken Painim Em

¹ “Ol pikinini . . . i gutpela blesing tru yumi kisim long God.” (Sng 127⁠:⁠3) Sapos yu kisim pinis gutpela blesing olsem, em Jehova i givim long yu, orait yupela ol papamama i ken amamas, tasol yupela i gat bikpela wok bilong skulim na lukautim ol pikinini. Olsem wanem? Yu stretim rot pinis bambai ol yangpela pikinini bilong yu i no ken kisim blut? Sapos dokta i tokim pikinini long kisim blut, pikinini yet bai mekim wanem? Yu bin toktok wantaim famili bilong yu long ol samting ol inap mekim sapos sik samting i kamap na ol dokta i tok ol i mas kisim blut?

² Wok bilong helpim famili bilong yu olsem i no ken givim hatwok na hevi long ol. Tru yu no save long olgeta samting inap kamap long i stap bilong yu na bai yu redi, nogat; tasol i gat planti samting em yupela ol papamama i ken mekim pastaim bilong lukautim ol pikinini na bai ol i no kisim blut. Sapos yu les long mekim dispela wok na bihain pikinini i slip long haus sik, ating dokta i gat rot long givim blut long em. Orait, yupela i ken mekim wanem?

³ Bilip Strong, Em Bikpela Samting: Yu mas tingim gut ol dispela askim olsem: Yu yet yu bilip strong long lo bilong God long blut? Yu save lainim ol pikinini bilong yu long bihainim lo bilong God long blut olsem yu lainim ol long bihainim ol lo bilong em long no ken stil, o giaman, o pamuk, o insait long ol wok bilong dispela graun, na kain samting olsem? Yumi wanbel tru long lo bilong God long Lo 12⁠:23 i tok: “Yupela i no ken kaikai abus wantaim blut bilong en”? Na ves 25 i tok: “Sapos yupela i no dring blut bilong abus, bai Bikpela i laikim pasin bilong yupela, na bai em i mekim olgeta wok bilong yupela na bilong ol tumbuna pikinini bilong yupela i kamap gutpela.” Ating dokta bai tok, blut bai mekim pikinini “i kamap gutpela.” Tasol taim dispela kain samting i no kamap yet, yu mas strong long tingting olsem yu mas sakim blut​—⁠yu yet i no ken kisim, na no ken orait long ol pikinini bilong yu i kisim. Pasin bilong i stap gut wantaim Jehova olsem pren bilong em, dispela i mas i stap olsem nambawan samting long tingting bilong yu​—⁠nogut yu tingting long skruim liklik hap taim moa long laip bilong yu na yu brukim lo bilong God. Yumi mas mekim ol samting na bai yumi inap stap gut wantaim God long nau, na bihain yumi inap kisim laip oltaim!

⁴ Tru tumas, ol Witnes Bilong Jehova i laik i stap laip. Ol i no laik i dai. Ol i laik i stap laip bambai ol inap litimapim nem bilong Jehova na bihainim laik bilong em. Em wanpela as na ol i go long haus sik na bringim ol pikinini bilong ol tu i go bambai dokta i ken oraitim sik bilong ol. Na taim dokta i tok long givim blut, ol i tokim dokta ol i laikim narapela samting bilong helpim ol​—⁠blut nogat. I gat planti narapela samting i stap olsem senis bilong blut. Ol dokta i gat save ol i mekim wok long ol dispela narapela samting na ol i no mekim wok long blut. Ol dispela narapela samting yumi inap kisim i gutpela na sampela buk bilong dokta i tok orait long en. Planti tausen dokta long olgeta hap ol i wok gut wantaim yumi na oraitim yumi na ol i no mekim wok long blut, tasol sampela taim i hatwok long painim dokta em i orait long helpim ol pikinini Witnes na maski long blut.

⁵ Painim Dokta i Laik Wok Gut Wantaim Yumi: Ol dokta i mas tingim planti samting taim ol i wok long oraitim ol sikman, na taim yu tokim dokta long helpim pikinini bilong yu na maski long blut, dispela i givim hatwok moa long em. Sampela dokta bai oraitim ol sikman i bikpela pinis na maski long blut sapos sikman i wokim wanpela pepa i tok: Em i no laik kisim blut na sapos em i kisim bagarap, orait, dokta i no gat asua long dispela. Na sampela dokta bai orait long helpim ol pikinini i kamapim bel bilong ol olsem ol yet ol i no laik kisim blut. Sampela kot i save, sapos ol pikinini i gat save na tingting na ol yet inap tingim wanem kain marasin samting ol i laik kisim, ol dispela kot i ting i stret ol dispela pikinini i ken mekim olsem. (Lukim ol tok i stap long pes 16, 17 bilong Wastaua [tok Inglis] bilong Jun 15, 1991, i stori long ol samting i kamapim klia olsem pikinini i gat save na em yet inap tingim ol samting em i mas mekim.) Tasol ating sampela dokta i no orait long helpim ol liklik pikinini, olsem ol bebi, sapos ol i no kisim tok orait long givim blut long ol. Wan wan dokta tasol bai tok promis long ol i no ken givim blut long pikinini, maski wanem wanem samting i kamap. Ol lo bilong dokta na kot i mekim na planti dokta i pilim olsem ol i no inap tok promis long ol i no ken givim blut long pikinini. Tasol long nau i gat planti dokta i laik helpim ol pikinini bilong ol Witnes Bilong Jehova na ol i tok ol bai wok strong long mekim ol samting bambai ol i no gat wok long givim blut long ol.

⁶ Tasol olsem wanem sapos yu wok long painim wanpela dokta i orait long helpim pikinini bilong yu i gat sik, na yu painim pinis wanpela dokta i save wok gut wantaim ol Witnes Bilong Jehova na bipo em i bin katim sampela Witnes na em i no mekim wok long blut, tasol dokta i pilim olsem lo bilong gavman i pasim em long tok promis long em i no ken mekim wok long blut? Olsem wanem sapos em i tokim yu em i ting em inap oraitim pikinini na no gat wok long blut? Ating bai yu larim em i mekim, a? Tasol yu mas tokaut klia olsem, taim yu tok orait long dokta i helpim pikinini, yu no orait long em i givim blut long pikinini. Sapos yu mekim dispela samting, yu yet yu mas karim ol hevi i kamap long dispela.

⁷ Tasol sapos yu inap painim narapela samting ol dokta i ken mekim wok long en na i no olsem ol i mas givim blut long pikinini, orait, yu ken bihainim dispela rot. Tasol gutpela sapos yu wok strong long painim wanpela dokta i orait long helpim pikinini na em i tok em i no ken givim blut long em. Gutpela sapos yu tingim ol dispela samting taim hevi i no kamap yet. Taim pikinini i no sik yet, wok strong long painim wanpela dokta i orait long mekim dispela wok sapos sik i painim pikinini. Gutpela sapos yu surik long ol dokta na ol haus sik i no laik wok gut wantaim yu.

⁸ Sampela dokta i gat tok long ol Witnes i no kamapim kwik tingting bilong ol long blut. Nogut yupela i mekim olsem. Taim papamama Witnes i go long haus sik o lukim dokta, namba wan samting ol i mas mekim, em ol i mas toktok wantaim dokta samting long tingting bilong ol long blut. Sapos dokta i tok em i mas katim pikinini, orait, tokim em yu laik lukim dokta i gat wok long mekim dai tingting bilong sikman taim dokta i laik katim em (anesthesiologist) na bai yu inap kamapim tingting bilong yu long blut. Ating dokta bilong katim man inap stretim rot na bai yu lukim em. Skelim gut ol pepa yu mas sainim​—⁠no ken sainim hariap. Sapos yu no wanbel long wanpela tok, orait katim long pen bilong makim olsem. Bilong tokaut klia long tingting bilong yu, raitim tok olsem yu no ken kisim blut maski wanem wanem samting i kamap, na as bilong dispela tingting em tok bilong Baibel na ol save ol dokta i kisim.

⁹ Oganaisesen Bilong Jehova i Helpim Yu: Oganaisesen bilong Jehova i bin mekim wanem ol samting bilong lukautim ol pikinini bilong yupela na dokta i no ken givim blut long ol? I gat planti samting. Sosaiti i bin wokim planti buklet samting bilong skulim yumi long ol samting bilong blut na ol samting yumi ken kisim i olsem senis bilong blut na i no gat blut long en. Bipo ol kongrigesen i bin stadi long buklet Ol Witnes Bilong Jehova na Tingting Bilong Ol Long Blut. Na ol brata sista long kongrigesen bai helpim yu na sambai long yu. Taim bikpela hevi i kamap, ating ol elda bai makim wanpela elda long i go wantaim papa o mama bilong pikinini o narapela bilong famili long haus sik na was i stap long pikinini inap sampela aua na bihain narapela elda i senisim em. Ol i mas was i stap inap san na nait olgeta, olsem 24 aua, long wanem, taim ol famili na pren i lusim haus sik long nait na i go bek long haus bilong ol yet na i no gat wanpela i stap wantaim pikinini, orait nau rot i op long dokta i givim blut long em. Dispela samting i bin kamap planti taim.

¹⁰ “Sapos man i putim yau gut long tok bilong ol man i skulim em, orait em bai i gat gutpela sindaun. Na sapos man i bilip strong long Bikpela, bai em i ken amamas.” (Snd 16⁠:20) Yupela ol papamama, gutpela sapos pastaim yupela i mekim ol samting bilong lukautim ol pikinini bilong yupela na ol i no ken kisim blut em inap bagarapim ol long ol samting bilong spirit. (Snd 22⁠:⁠3) Yupela ol pikinini, givim bel tru long bihainim tok bilong papamama bilong yupela long ol dispela samting. Na yupela olgeta long famili, ‘yupela i no ken kaikai blut, na olgeta wok bilong yupela bai kamap gutpela,’ long wanem, Jehova bai mekim gut long yupela.​—⁠Lo 12⁠:​23-25.

This is a repeat of article in km 9/92 taken from km-E 9/92 “Safeguarding Your Children From Misuse of Blood.”