Namba 1 Hap: Stretim Rot Nau Bilong Kam Long “Ol Man i Stap Olsem Lait” Kibung Distrik Bilong 1992-1993
1 Jisas i tok, ol disaipel bilong em bai stap olsem “lait bilong graun.” (Mt 5:14) Tasol ol manmeri bilong dispela graun ol i stap tudak long ol samting bilong spirit na stretpela pasin, na long olgeta wan wan de dispela tudak i wok long kamap bikpela moa. (Ais 60:2; Ro 1:21) Klostu nau pasin bilong dispela graun bai pinis, olsem na yumi gat bikpela wok long i stap olsem gutpela lait moa. Yumi save pinis long dispela bikpela wok yumi mas mekim, olsem na yumi wet long harim ol tok bilong “Ol Man i Stap Olsem Lait” Kibung Distrik bilong 1992-1993. Namba wan kibung distrik bai kirap long Disemba 25, 1992.
2 Tripela De Kibung: Long Papua Niugini, 15 kibung bai kamap. Namba wan kibung distrik bai kamap long Pot Mosbi, long Disemba 25-27, 1992, na laspela kibung bai kamap long Lake Murray, long Janueri 30, 31, 1993. Ol kibung bilong 3-pela de bai kirap long Fraide long 10:20 long moningtaim, na bilong pinisim kibung long Sande long 4:15 samting long apinun ol bai mekim singsing na beten. Gutpela sapos olgeta Witnes Bilong Jehova i no ken lusim wanpela hap tok bilong kibung. Olsem wanem? Yu yet yu bin pasim tok long bel bilong yu olsem bai yu go long kibung long olgeta de? Wok strong long mekim olsem na beten askim Jehova long helpim yu.
3 Yumi mas putim gut yau long namba wan tok i kamap long Fraide long moningtaim na olgeta tok i go inap long laspela tok long Sande long apiniun. Bai yumi harim sampela gutpela tok ol bai kamapim insait long ol tok, na ol soim samting, na wanpela pilai. Gutpela sapos yumi kam hariap long moningtaim, na taim program bilong Fraide i no kirap yet, yumi sindaun pinis. Long namba wan de bilong kibung, ating yumi mas lusim bikpela hap taim liklik long painim ples bilong putim ka na bilong painim ples sindaun. Olsem na yumi mas skelim gut taim bambai yumi gat taim bilong mekim ol dispela samting. Sapos yumi putim yau long olgeta tok bilong kibung i go inap long laspela singsing na beten, long dispela rot ol tok bilong kibung inap helpim tru yumi na yumi kamapim klia olsem yumi pilim tru gutpela wok bilong yumi long i stap olsem gutpela lait.
4 Putim Gut Yau: Wanpela man bilong raitim ol song em i tok: “Mi save tingting long olgeta lo bilong yu. Mi laikim tru lo bilong yu. Mi save tingting long en long san na long nait.” (Sng 119:95b, 97) Taim yumi bung wantaim bilong Jehova i skulim yumi, long olgeta taim yumi mas putim gut yau long harim ol tok, na tu, yumi mas putim gut long bel. Na taim yumi go long ol bikpela kibung olsem kibung distrik, bai yumi mas strong moa long putim yau na harim gut tok na kisim save, long wanem, i gat planti samting bilong pulim ai na tingting bilong yumi. Sori tru sapos yumi lusim bikpela hap taim na mani bilong i go long kibung, tasol taim kibung i pinis yumi hatwok long tingim bek ol tok i kamapim klia ol samting yumi mas mekim na bai wok bilong yumi long i stap olsem gutpela lait i kamap gutpela moa! Bilong program inap helpim tru yumi, yumi mas wok strong long sakim ol samting i laik pulim ai na tingting bilong yumi. Yumi ken mekim wanem na taim kibung i pinis ol tok yumi harim inap pas insait tru long tingting na bel bilong yumi?
5 Yumi mas lain long pasin bilong putim gut yau. Dispela tok “putim gut yau” i olsem: Yumi mas putim gut tingting na bel na yau bilong yumi long ol tok na harim gut. Bilong redi long “putim gut yau” long ol tok bilong kibung, tingim ol samting yu ken mekim, olsem: (1) Yu mas slip gut, na taim yu kamap long ples kibung long olgeta moningtaim, bai yu pilim olsem yu bin kisim malolo na skin i gat strong. Bilong mekim olsem yu mas stretim gut ol samting na famili i mas wok gut wantaim. Sapos skin i les, long wanem yu no bin slip gut o yu bin lusim kaikai long moningtaim na yu hangre, o yu no stap isi, long wanem yu bin hariap mekim ol samting, orait, ol tok bilong kibung i no inap helpim yu tumas. (2) Kirapim famili bilong yu long tingim as tok bilong kibung. Sampela wik paslain long kibung, taim yupela i mekim famili-stadi, gutpela sapos olgeta wan wan bilong famili i stori liklik long ol wok em man i stap olsem gutpela lait i mas mekim. Na taim yupela i kamap long ples kibung na program i no kirap yet, tingim ol tok i laik kamap. (3) Bilas gut inap long kibung, na taim ol brata i mekim yet ol tok long kibung, no ken kaikai o dring. Bipo, taim ol brata i mekim yet ol tok, sampela long stediam na ol narapela ples sindaun ol i bin kaikai na dring ol koldring samting. Dispela i makim olsem ol i no tingim gut brata i mekim tok na dispela i pulim ai na tingting bilong ol narapela, na tu, em i makim olsem yu no bosim gut skin.
6 Gutpela sapos yumi raitim sampela hap tok long notbuk. Sapos yumi mekim gut, dispela bai helpim yumi long tingim gut ol tok na holimpas long tingting. Na tu, tingting bilong yumi i no ken raun na tingim ol narapela samting. Wanpela man bilong raitim ol stori em i tok: ‘Pasin bilong putim yau na harim gut tok i hatwok moa, winim pasin bilong mekim tok.’ Ol Kristen bilong pastaim ol i save kisim sampela brukpela hap sospen graun i kam long ol miting na ol i raitim sampela skripsa long en ol i harim. Yumi inap mekim wankain samting long rot bilong notbuk na pensil o pen. Bilong mekim gut wok bilong raitim ol tok long notbuk, yumi mas raitim ol bikpela tok tasol, nogut yumi raitim planti ol liklik liklik tok na nau as bilong raitim i lus nating. Raitim ol bikpela tok tasol na sotim sampela hap tok. Taim yu go bek long ples slip long olgeta apinun bilong kibung, na taim kongrigesen i laik kamapim ol bikpela tok bilong kibung long Miting Bilong Wok Autim Tok, orait, gutpela sapos yu lukim gen ol tok yu bin raitim long notbuk, na long dispela rot ol dispela tok inap helpim yu tru.
This article has been taken partly from km-E 5/92 “1992 ‘Light Bearers’ District Convention,” par. 1-6. Part 2 is in km 12/92.