Tingting Strong Long Mekim Wok i Kamap Gutpela Moa
1 Ol brata sista i save long tok Inglis, ating ol i kaunim pinis Yearbook bilong 1992. Yumi amamas long kisim save olsem long yia bilong wok bilong 1991, lain pablisa bilong Kingdom long olgeta hap i go bikpela inap 6.5 pesen long 211 kantri, winim 4 milion 250 tausen! Tru tumas, ol dispela samting i truim tok bilong Aisaia 2:2-4 na Maika 4:1-4.
2 Mipela i no kisim yet olgeta ripot bilong yia bilong wok bilong 1992, tasol ol samting i kamapim klia olsem Jehova i blesim dispela yia bilong wok—ol wok bilong Kingdom i go bikpela moa. Yumi mekim yet wok bilong singautim ol man i kam insait long bikpela lain i stap olsem brata brata long olgeta hap. Planti manmeri i bin i go long Memorial na ol kibung distrik, na dispela i kamapim klia olsem planti milion manmeri i laik harim tok bilong Kingdom. Ol man bilong olgeta lain ol i wok long bihainim dispela singaut olsem: “Kam, yumi go long maunten Saion, em maunten bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.”
3 Tingting Strong Long Mekim Wok Bilong Yumi i Kamap Gutpela Moa: Oganaisesen bilong Jehova i kamap strong moa. Planti nupela i ran i kam long maunten bilong Jehova bilong lotu tru long em, olsem na i bikpela samting long ol i mas kamap strong long spirit na helpim ol narapela nupela long mekim olsem. Dispela tok “Kam” i makim olsem ol man i bihainim dispela singaut bilong i kam long maunten bilong Jehova ol i mas wok long kamap strong, long wanem, ol tu i mas tokim ol narapela long “Kam.” Aposel Jon i kamapim wankain tok long Kamapim Tok Hait 22:17: “Holi Spirit wantaim meri bilong Pikinini Sipsip tupela i tok, ‘Yu kam.’ Na olgeta man i harim dispela tok, ol tu i mas tok, ‘Yu kam.’ ”
4 Jisas i makim gutpela rot bilong mekim dispela singaut. Taim ol man i harim tok bilong em, em i singautim ol i kam mekim wok autim tok wantaim em na em i lainim ol long pasin bilong mekim olsem. (Mt 4:19; 10:5-7, 11-14) Ol disaipel bilong Jisas i raun wantaim em na ol i lukim pasin em i mekim, na long dispela rot ol i lain long mekim gut wok em i bin mekim. Olsem na taim ol i mekim wok bilong ol long autim tok, ol i bihainim pasin bilong Jisas. Ol i mekim gut, na ol i no pret long autim tok, olsem na ol birua i save, ol i disaipel bilong Jisas. Aposel 4:13 i tok: “Ol i lukim tupela i tokaut strong na i no pret, olsem na . . . ol i save, bipo tupela i stap wantaim Jisas.”
5 Taim Jisas i no go bek yet long heven, em i tokim ol disaipel long ol i mas kamapim ol nupela disaipel na lainim ol long ol samting ol yet i lain pinis long en, na long dispela rot wok bilong autim tok bai i stap longpela taim moa. Long Matyu 28:19, 20, Jisas i tok: “Yupela i mas i go mekim olgeta lain manmeri i kamap disaipel bilong mi. . . . Lainim ol long bihainim olgeta tok mi bin givim long yupela.” Bilong kamapim klia olsem dispela wok bai i stap inap long taim bilong yumi long nau, em i tok: “Mi save stap wantaim yupela olgeta de, i go inap long dispela taim i pinis.”
6 Ol disaipel tru bilong Krais Jisas ol i save bihainim ol tok bilong em na ol i lainim ol nupela disaipel long olgeta tok em i bin givim long ol. Lain Witnes Bilong Jehova long olgeta hap i wok long i go bikpela hariap, olsem na yumi mas tingim ol nupela brata sista i baptais pinis na ol pablisa i no baptais yet na olsem wanem yumi inap helpim ol. Na tu, yumi mas tingim ol man yumi stadi wantaim ol long Baibel, ating ol i kirap pinis long kam planti taim long ol miting bilong kongrigesen.
7 Hibru 6:1 i kirapim yumi olgeta long kamap olsem “man i bikpela pinis.” Pasin bilong kamap olsem man i bikpela pinis, i no olsem yumi putim ripot bilong autim tok na em tasol. Nogat. Yumi mas wok long mekim stadi bilong yumi yet i kamap gutpela moa na go oltaim long ol miting na givim bel long autim tok. Na yumi mas helpim ol narapela long kisim save long tok i tru bambai ol tu inap kisim laip. Yumi mas wok long lain gut moa long pasin bilong ‘toktok wantaim ol man long ol tok i stap long buk bilong God.’ (Ap 17:2) Bilong kamap olsem man i bikpela pinis, yumi mas lusim bikpela hap taim, na yumi mas givim bel tru long lotuim God na stap gut long em, na lain gut long pasin bilong autim tok. Pasin bilong givim bel tru long lotuim God em samting yumi yet i mas mekim, tasol bilong save gut long pasin bilong autim gut tok, yumi mas bihainim gutpela tingting na larim ol strongpela brata na sista i helpim yumi. Gutpela sapos yumi larim pasin bilong ol long autim tok i lainim yumi—nogut yumi mekim nating i go na traim traim na popaia nabaut na long dispela rot tasol yumi kisim save. I hatwok long kisim save long autim tok long dispela rot, a?
Ol Samting Bilong Helpim Ol Man i No Lain Gut Yet
1 Kongrigesen Kristen bilong pastaim i kamapim pasin olsem narapela i helpim narapela. Jisas i lainim ol disaipel bilong em. (Mk 3:14; Lu 9:1; 10:1) Na ol disaipel i lainim ol narapela. Aposel Pol i helpim na strongim Timoti, na Akwila tupela Prisila em ol i gat planti save liklik ol i helpim Apolos, na em i kamap strong long spirit. (Ap 18:24-27; 1 Ko 4:17) Ol strongpela brata sista bilong kongrigesen Kristen long nau ol i bihainim gutpela pasin bilong ol Kristen bilong pastaim, na ol i lainim na strongim ol narapela, na ol nupela na yangpela tu, em ol i no lain gut yet. Olsem Rom 15:1, 2 i tok, “Yumi man i gat strongpela bilip, yumi gat wok bilong helpim ol man i no gat strongpela bilip na karim hevi bilong ol.”
2 Ol papamama i gat wok bilong helpim ol pikinini bilong ol long kamap strong long ol samting bilong spirit. Olsem na ol i mas mekim famili-stadi wantaim ol, na lainim ol long pasin bilong mekim stadi bilong ol yet, na kirapim ol long go oltaim long ol miting na bekim sampela tok, na helpim ol long bihainim ol tok ol i lainim. (Ef 6:4; 1 Ti 5:8) Ol brata i lukautim Buk-Stadi i mas go pas long helpim ol brata sista long Buk-Stadi na long ol bung bilong i go autim tok long kamap strong long ol samting bilong spirit. Na ol narapela tu i ken helpim ol, olsem wasman bilong wok autim tok na ol narapela elda, na ol wokman na ol narapela tu long kongrigesen.
3 Helpim Ol Long Ol Samting Ol i Sot Long En: Ating sampela i no lain gut yet long mekim sampela hap wok Kristen, olsem wok bilong mekim stadi bilong ol yet, na yumi ken helpim ol. Ating yumi ken givim gutpela tingting long ol bilong wokim wanpela sedyul bilong stadi, em ol inap bihainim. O yumi ken helpim ol long redim sampela tok ol i ken bekim long miting, o long redim sampela tok ol i mas mekim long miting. Ating yumi ken helpim sampela long kisim save long pasin bilong painim save long ol bikpela tok bilong Baibel.
4 Planti nupela i no lain gut yet long pasin bilong mekim wok autim tok na yumi ken helpim ol. Olsem: Ating pablisa i laik mekim gut moa wok bilong autim tok long ol man long haus, na mekim ol gobek, na kirapim na mekim ol Baibel-stadi. O ating yumi ken helpim ol long wokim wanpela sedyul bilong autim tok em ol inap bihainim, na helpim ol long bihainim gut. Sapos yumi makim hap taim bilong autim tok wantaim ol pablisa i laik bai yumi helpim ol, dispela inap helpim ol long mekim ol wok ol i bin putim olsem mak bilong winim.
5 Tok bilong God i kirapim yumi long kamap strong long spirit na bai ol narapela i ken lukim. (1 Ti 4:15) Yumi mas bihainim kwik olgeta tok yumi kisim save long en na bai yumi inap bihainim laik bilong God, na bai ol man i ken save, yumi bihainim pasin Kristen tru. Na tu, wok bilong lainim ol man na bai ol i kamap disaipel bilong Krais Jisas i dediket pinis, yumi mas mekim i kamap gutpela moa.—Je 1:22-25.
[Questions for Tingting Strong Long]
1, 2. Kaunim Aisaia 2:2-4. Truim bilong en i kamap olsem wanem long nau?
3. Olsem Kamapim Tok Hait 22:17 i tok, ol nupela man i gat wanem wok?
4. (a) Kaunim Matyu 4:19; 10:5-7, 11-14. Olsem wanem Jisas i makim gutpela rot bilong mekim singaut olsem “Yu kam.” (b) Olsem wanem ol birua bilong ol disaipel bilong Jisas i save, bipo ol disaipel i bin i stap wantaim Jisas?
5. Taim Jisas i no go bek yet long heven, em i givim wanem laspela tok long ol disaipel bilong em? Dispela wok i bilong i stap inap long wanem taim?
6, 7. (a) Bilong kamap olsem man i bikpela pinis, yumi mas mekim wanem? (b) Bilong wanem i gutpela sapos sampela taim yumi askim ol narapela long helpim yumi?
[Questions for Ol Samting Bilong]
1. Ol Kristen bilong pastaim ol i makim wanem gutpela rot bilong helpim ol man i no lain gut yet?
2. Ol papamama i ken mekim wanem bilong helpim ol pikinini bilong ol i no lain gut yet?
3-5. Long 1 Timoti 4:12-15, Pol i givim wanem gutpela tok long Timoti?