Bilong Mekim Gut Ol Gobek
1 Jisas i tokim yumi ol man i gat wok long autim tok bilong Kingdom long yumi mas kamapim ol disaipel. (Mt 28:19, 20) Olsem na yumi mas mekim ol gobek. Olsem wanem? Yu ting wok bilong mekim ol gobek em i bikpela hap wok Kristen bilong yumi? Yumi save, wok bilong mekim gut ol gobek em i wanpela bikpela wok yumi mas tingim gut.—Snd 22:29.
2 Olgeta wan wan Kristen i dediket pinis ol i pilim olsem ol i mas insait long wok bilong kamapim ol disaipel. Bilong helpim ol narapela long kisim save long tok bilong Kingdom, yumi no ken tingim tumas skin bilong yumi yet; ating yumi mas lusim sampela samting yumi yet i laik mekim. Taim yumi mekim ol gobek, yumi gat rot bilong helpim ol man i gat gutpela bel long kisim ol samting bilong spirit ol i sot long en.
3 Go Bek Lukim Olgeta Man i Harim Tok: Yumi mas go bek lukim olgeta man i laik harim tok bilong Kingdom. Planti man i laik harim tok, maski ol i no kisim wanpela buk samting yumi laik tilim long ol. Planti man i laik toktok wantaim yumi long ol tok bilong Baibel, na dispela i makim olsem ol i laik harim tok. Jisas na ol aposel i soim rot bilong kirapim tingting bilong ol man na bai ol i amamas long harim tok bilong Kingdom, olsem: Ol i toktok wantaim ol man long ol tok bilong Baibel na ol i kamapim klia ol samting ol i mas mekim.—Mk 10:21; Ap 2:37-41.
4 Yumi laik kirapim ol Baibel-stadi, olsem na long dispela as yumi mekim ol gobek. Ating yumi inap stori liklik wantaim man bilong haus long pasin bilong mekim Baibel-stadi. Yu inap bilip olsem Jehova bai harim beten bilong yu bilong helpim yu long painim wanpela man i gat gutpela bel na yu ken lainim em long tok bilong Baibel. Sapos yu wok strong long mekim wok bilong Jehova, em bai blesim yu. Gutpela sapos yu beten askim Jehova long helpim yu long kirapim wanpela Baibel-stadi na putim olsem wanpela mak bilong winim.
5 Mekim Gutpela Wok Long Ol Liklik Nius: Yumi ken mekim gutpela wok long ol liklik nius bilong kirapim Baibel-stadi. Sampela, taim ol i autim tok, ol i bin stori long piksa i stap long skin bilong liklik nius bilong kirapim tok wantaim man bilong haus. Kaunim ol wan wan paragraf. Taim paragraf i kamapim wanpela askim, orait malolo liklik na tokim man bilong haus long kamapim tingting bilong em. Opim Baibel na lukim ol skripsa bilong paragraf na kamapim gut insait bilong en na olsem wanem ol i helpim tok bilong paragraf. Mekim olsem long ol narapela paragraf yu laik kaunim. Orait nau yu ken soim wanpela buk long man bilong haus, em buk yu laik stadi wantaim em long en.
6 Mekim Wok Long Buk Reasoning o buklet Sampela Tok Bilong Baibel Bilong Toktok Wantaim Man Long En: Buk Reasoning o buklet Sam- pela Tok Bilong Baibel Bilong Toktok Wantaim Man Long En inap helpim yumi long mekim gut ol gobek. Sapos yu lukim lista bilong ol bikpela tok o lukim indeks, dispela inap helpim yu long painim sampela tok moa bilong toktok wantaim man long en taim yu go bek lukim em. Wanpela hap long buk Reasoning i stori long sampela skripsa em ol man i save kamapim kranki (Scriptures Often Misapplied, pes 445), na ating yu ken mekim wok long dispela ol tok taim man bilong haus i kamapim sampela tingting o bilip bilong em yet bilong daunim ol tok bilong ol Witnes. Ol tok i stap long pes 204 bilong buk Reasoning, (How do Jehovah’s Witnesses arrive at their explanation of the Bible?) i bin helpim sampela painia long kirapim planti Baibel-stadi. Ol i helpim ol man i harim tok long save long ol samting ol Witnes Bilong Jehova i mekim bilong larim Baibel yet i kamapim as bilong ol tok bilong en. Dispela rot i bin helpim gut ol painia long kirapim planti Baibel-stadi.
7 Olsem Jisas na ol aposel, yumi tu mas kamapim klia olsem yumi tingim tru ol sipsip bilong Jehova. (Lu 9:11) Sapos yumi laikim tru ol manmeri, orait, dispela bai kirapim yumi long kamapim ol tok i tru bilong Kingdom long ol. (2 Ko 2:17) Sapos yumi gat bikpela tingting long givim taim na strong bilong yumi yet long helpim ol narapela long ol samting bilong spirit, orait, bai yumi inap mekim gut dispela wok bilong mekim ol gobek.
[Ol Askim]
1, 2. (a) Bilong wanem yumi mas mekim ol gobek? (b) Kaunim Sindaun 22:29. Dispela tok i kirapim yumi long mekim wanem? (c) Sapos yumi mekim ol gobek, bai yumi inap helpim ol man olsem wanem?
3. (a) Yumi mas go bek lukim husat? (b) Kaunim Mak 10:21. Dispela samting Jisas i mekim i lainim yumi long wanem samting?
4. (a) Yumi olgeta i mas putim wanem samting i olsem mak bilong winim? (b) Bilong winim dispela mak, yumi mas mekim wanem?
5. Olsem wanem yu inap mekim gutpela wok long ol liklik nius bilong kirapim Baibel-stadi?
6. Olsem wanem buk Reasoning inap helpim yumi long mekim gut ol gobek? Olsem wanem buklet Sampela Tok Bilong Baibel Bilong Toktok Wantaim Man Long En inap helpim yumi long mekim gut ol gobek?
7. Wanem samting bai helpim yumi long mekim gut dispela wok bilong mekim ol gobek?