Ol Miting Bilong Wok Bilong Janueri
Wik i Kirap long Disemba 28
Singsing 180
10 min: Ol toksave bilong kongrigesen.
20 min: “Mekim Gut Famili-Stadi.” Paslain long miting, makim sampela brata o sista i save gut long kaunim tok na ol i ken redi long kaunim ol paragraf. Kaunim pinis paragraf, orait kamapim askim bilong en. Sapos taim i no sot, singautim wanpela o tupela papa o mama i kam antap long pletfom na ol i ken stori long ol samting ol yet i mekim long famili-stadi na bai ol pikinini i lain gut na ol i laikim tru dispela stadi.
15 min: “Teks Bilong Yia 1993: ‘Bikpela, . . . lainim mi gut bai mi tingting long yu wanpela tasol.’—Song 86:11.” Taim brata i kaunim pinis paragraf, kamapim askim bilong en.
Singsing 77 na beten.
Wik i Kirap long Janueri 4
Singsing 10
10 min: Ol toksave bilong kongrigesen.
20 min: “Long 1993 Bai Yu Mekim Wanem Long Skul?” Tokim narapela narapela brata o sista long kaunim ol paragraf. Taim brata o sista i kaunim pinis paragraf, orait kamapim askim bilong en.
15 min: Ol Pikinini na Ol Yangpela! Yupela i Ken Mekim Wanem Long 1993 Bilong Amamasim Jehova? Klostu nau bai ol pikinini na ol yangpela bilong yumi i go bek long skul long dispela yia. Wanpela elda i ken toktok wantaim sampela skulmanki long dispela samting. Paslain long taim bilong miting, em i mas redim gut dispela hap. Givim ol dispela askim long ol:
1. Sapos yu wok strong long kisim save long skul, bilong wanem Jehova bai amamas long yu?
2. Bilong wanem yu mas bihainim tok bilong tisa bilong yu?
3. Ol tisa i save amamas long wanem kain sumatin?
4. Yu inap mekim wanem bilong amamasim ol tisa bilong yu?
5. Yu ting i gutpela sapos long sampela taim yu kisim presen i go givim long tisa bilong yu? Bilong wanem i gutpela yu mekim olsem?
6. Bai yu tokim ol tisa bilong yu long Jehova?
7. Yu ting olsem wanem long ol holide bilong ol man bilong graun?
8. Yumi save lotuim husat tasol?
9. Bai yu mekim wanem sapos ol narapela sumatin i subim yu long kisim buai o smok o drak o bia samting?
(Harim: Taim yu givim ol dispela askim long ol pikinini na ol yangpela, yu mas tingim gut krismas na save bilong ol.)
Singsing 146 na beten.
Wik i Kirap long Janueri 11
Singsing 92
10 min: Ol toksave bilong kongrigesen.
20 min: Stori Bilong Dispela Mun. Stori long olsem wanem dispela nupela Stori Bilong Mun bai helpim ol manmeri.
Taim Bilong Planti Hevi Bai Pinis
2 Ti 3:1-5: Taim bilong las de em i taim bilong planti hevi nogut tru
Lu 21:28: Taim bilong God i kisim bek yumi i kam klostu pinis
SOIM: Tupela yangpela sista i autim tok long ol haus. Ol i bungim wanpela meri i wok long haus kuk bilong em. Em i stori long pe bilong olgeta samting i go antap. Tupela sista i kamapim nupela Stori Bilong Mun. Meri bilong haus i kisim buk Bel Isi. Ol i stretim tok long go bek lukim em.
SOIM: Tupela yangpela brata i autim tok long ol haus. Ol i bungim wanpela man i bel hevi. Inap sampela mun bipo, pikinini bilong em i bin kisim bagarap long wanpela ka na em i dai. Tupela brata i kamapim nupela Stori Bilong Mun. Ol i givim liklik nius long man bilong haus i stori long ol man i dai pinis bai ol i kirap bek. Ol i tok ol bai kam bek lukim em long wik antap.
15 min: Putim Tok Bilong God Long Bel Bilong Ol Pikinini na Salim Ol i Go Long Skul. Wanpela elda i ken mekim dispela tok.
Ol man bilong dispela graun i wok strong long pulim yumi long bihainim pasin na tingting bilong ol. Ol i mekim moa yet long ol yangpela bilong yumi. Olsem na papamama i mas pilim tingting na ol hevi bilong ol. (Snd 20:5) Papamama i mas skulim ol pikinini long ol lo bilong God na helpim ol long save, God Jehova wantaim papamama bilong ol i laikim ol tru.
SOIM: Famili, olsem papa na mama na 3-pela pikinini, i toktok wantaim long pasin bilong mekim wok long buklet Skul. Wanpela pikinini i kirap nau tasol long go long skul na narapela tupela i bin go long skul inap sampela yia. Makim wanpela tok bilong buklet i stret long ol wan wan pikinini. Papa o mama i ken makim olsem tisa, na ol pikinini i ken kamapim sampela tok bilong dispela samting long em. Tasol ol i mas mekim long tok bilong ol yet. Papamama i mas helpim ol pikinini long save gut long ol lo bilong Baibel long dispela samting. Brata i lukautim dispela hap i ken kirapim ol brata sista long mekim famili-stadi, na stori gut olsem em bikpela samting long papamama i mas pas gut wantaim ol pikinini bilong ol olsem gutpela pren bilong ol.
Singsing 165 na beten.
Wik i Kirap long Janueri 18
Singsing 118
10 min: Ol toksave bilong kongrigesen. Ripot bilong ol akaun.
20 min: “Mekim Wok Painia na Tingting Long Mekim Oltaim.” Paslain long miting, makim wanpela brata i save gut long kaunim tok na em i ken redi long kaunim ol paragraf. Kaunim pinis paragraf, orait kamapim askim bilong en.
15 min: “Haus Kingdom—Yu Ting Olsem Wanem Long En na Mekim Wanem Long En?” Toktok wantaim kongrigesen long ol dispela tok.
Singsing 15 na beten.
Wik i Kirap long Janueri 25
Singsing 151
10 min: Ol toksave bilong kongrigesen.
20 min: “Tilim Planti Magasin na Kisim Amamas.” Paslain long miting, makim sampela brata o sista i save gut long kaunim tok na ol i ken redi long kaunim ol paragraf. Kaunim pinis paragraf, orait kamapim askim bilong en.
15 min: Taim Bilong Hevi Bai Pinis. Wanpela elda i ken redim dispela soim.
Wanpela meri bilong ples, nem bilong em Mareta, em i kam lukim wantok bilong em long taun, nem bilong em Jeni. Mareta em i bihainim lotu bilong ples, tasol Jeni i kirap harim tok bilong ol Witnes Bilong Jehova.
Jeni: Mareta, mi no save bihainim moa dispela lotu long ples. Nau mi tingting long kamap wanpela Witnes Bilong Jehova.
Mareta: Olaman! Yu laik lusim olpela lotu bilong yu? Mi kirap nogut long dispela tok bilong yu, long wanem, pastaim yu strong long bihainim lotu bilong ples. Bilong wanem yu laik senisim lotu bilong yu?
Jeni: Yu save, ol lain bilong dispela lotu bilong ples ol i no stap wanbel—ol i save kros na pait.
Mareta: Mi save. Na mi tu mi tingting planti long dispela samting.
Jeni: Na narapela samting! Ol i no bin lainim mi gut long planti tok bilong Baibel.
Mareta: Tasol wanem samting i mekim na yu kirap harim tok bilong ol Witnes?
Jeni: Wanpela taim mi sindaun long haus na mi bel hevi i stap, na wanpela Witnes i kam long haus bilong mi. Em i tok, Baibel i kamapim rot bilong stretim olgeta hevi bilong yumi ol man, olsem na mi tokim em long kam sindaun. Mi tokim em long hevi bilong mi, na em i kisim Baibel bilong em na kaunim wanpela tok long mi. Pastaim mi pret long dispela tok.
Mareta: Em i kaunim wanem tok?
Jeni: Bai mi kisim Baibel bilong mi na kaunim dispela tok long yu. [Em i kisim Baibel bilong em.] Lukim dispela tok i stap long 2 Timoti 3:1, 2. [Em i kaunim.] Mi lukim dispela tok na mi save yumi stap long taim bilong las de. Na meri Witnes i tok, ‘Yu no ken pret long dispela tok. Gutpela yumi lukim tok bilong Jisas.’ [Em i kaunim Luk 21:28.]
Mareta: Em i gutpela tok. Em i kamapim sampela tok moa?
Jeni: Em i kisim Wastaua na soim long mi. Bai mi go kisim dispela Wastaua. [Em i soim Wastaua long Mareta.] Mi laik kaunim dispela tok long pes 2 i stori long “Wok Bilong Wastaua.” Olsem na mi kisim sabskripsen bilong Wastaua bilong wanpela yia, na sampela Wastaua moa i wok long i kam nau.
Mareta: Yu tromoi hamas mani bilong kisim sabskripsen bilong wanpela yia?
Jeni: Em K6.00 tasol! Ol pikinini i lusim skul na i kam nau. Bihain bai yumi stori moa long dispela samting. [Ol pikinini i kam antap long pletfom, na nau olgeta i lusim pletfom.]
Elda: Olsem wanem? Yu gat sampela pren olsem Mareta? Yu bin tokim ol long lotu bilong yu? Ating sampela bai amamas long kisim sabskripsen. Gutpela sapos yu askim ol. Mekim traim.
Singsing 165 na beten.