Teks Bilong Yia 1993: “Bikpela, . . . lainim mi gut bai mi tingting long yu wanpela tasol.”—Song 86:11
1 Yu bin mekim wok bilong God Jehova inap hamas yia? Inap sampela mun tasol? o inap planti yia?
2 Tingim Devit, em i bin raitim ol tok bilong Song 86. Em i go bikpela olsem wanpela wokboi bilong Jehova i dediket pinis. Taim em i gat 30 krismas, em i kisim wok king, na em i mekim dispela wok inap 40 yia. Yumi no save wanem taim stret em i bin raitim Song 86, tasol ating em i bin raitim taim em mekim wok king na bosim lain bilong God long graun inap planti yia pinis. Em i gat bikpela save na bikpela wok bilong mekim, tasol em i beten long God, na i tok: “Bikpela, yu mas skulim mi gut long pasin yu laik mi mekim, na oltaim bai mi bihainim laik bilong yu. Lainim mi gut bai mi tingting long yu wanpela tasol, na mi mekim wok bilong yu oltaim.”—Sng 86:11.
3 Dispela tok bilong Baibel i helpim yumi long save, maski yumi mekim wok bilong God tru inap planti yia, yumi mas wok yet long askim em long givim save long yumi, na yumi mas laik tru long kisim dispela save.
4 Taim yu skelim wok bilong Jehova yu bin mekim inap sampela mun o yia pinis, na yu save olsem yu gat tupela tingting long sampela samting, gutpela sapos yu pasim tok long bel bilong yu long wok strong long tingim Jehova long yia 1993. Tingim tok bilong Jisas, em i tok yumi no inap mekim wok bilong tupela bos wantaim—yu “no inap i stap aninit long God na long mani wantaim.” (Mt 6:24) Askim yu yet olsem: ‘Olsem wanem? Mi givim bel tumas long kisim mani kago? Ol samting mi tingting long mekim long bihain, dispela i makim olsem mi laik kisim gutpela sindaun, o i makim olsem mi wok long i go klostu moa long God?’
5 Yumi gat planti samting tru bilong mekim long olgeta de, olsem na nogut yumi lusim tingting long kisim save long ol tok bilong God long Baibel. Long dispela yia, yu ting yu ken mekim wanem na bai yu inap kaunim planti hap moa bilong Baibel? Wanpela sista bilong Itali i tokim wanpela elda, inap planti yia em i bin kaunim planti hap tok bilong Baibel, tasol em i no bin kaunim ol tok bilong Baibel kirap long namba wan pes na i go olgeta long laspela pes. Olsem na nau em i wok strong long kaunim olgeta tok bilong Baibel, kirap long namba wan hap bilong en na i go olgeta long laspela hap bilong en. Olsem wanem? Yu ting i gutpela sapos yu mekim olsem insait long dispela yia?
6 Maski yu bin mekim wok bilong God inap planti yia o nogat, taim yu wok long kisim sampela save moa long Tok bilong em, God bai stap klostu moa long yu, na bai yu pas gut long em. Teks Bilong Yia 1993 em i stap long Song 86, na long ol 17 ves bilong dispela singsing, inap 11-pela taim Devit i kolim nem bilong God. Em inap mekim olsem, long wanem, em i pilim olsem em i stap klostu tru long Papa bilong em long heven. Nau em i gutpela taim bilong yumi tu i kam klostu tru long God, em i Tisa bilong yumi.
[Ol Askim]
1-3. Bihain long Devit i mekim wok bilong Jehova inap planti yia pinis, em i beten askim em long wanem samting?
4, 5. (a) Wanem samting inap mekim na man i gat tupela tingting? (b) Paragraf i kolim wanem gutpela samting yumi ken mekim?
6. Sapos yumi kisim sampela save moa long Jehova, dispela inap helpim yumi olsem wanem?
This article has been taken partly from w92-E 12/15 “Walking With A Unified Heart”.