Long 1993 Bai Yu Mekim Wanem Long Skul?
1 Long planti hap, Februeri em i taim bilong ol pikinini i go bek long skul. Ating bai ol i kisim ol nupela tisa, na ol i mas lainim ol nupela samting, na i gat ol narapela senis tu. Taim ol i skul, rot i op na bai ol inap lainim sampela man long tok i tru. Ol inap autim tok long ol tisa na wanskul bilong ol. Gutpela wok ol i mekim long skul long autim tok long narapela man, dispela samting i litimapim nem bilong Jehova, na bai ol i kisim bikpela amamas.
OL SAMTING JEHOVA I LAIK BAI YUMI MEKIM
2 Jehova i laik bai ol yangpela i mekim wok bilong lotu i tru. (Sng 148:12, 13) Em i givim wok long ol yangpela long lain bilong em. (Sng 110:3; Mt 19:13,14) Sapos yu givim bel long autim tok long ol wanskul bilong yu, na yu bihainim gutpela pasin taim yu stap long skul, bai yu inap litimapim nem bilong Jehova. (Snd 27:11) Gutpela pasin bilong yu inap kirapim ol narapela long litimapim nem bilong God Jehova.—Mt 21:15, 16.
3 Sapos yu laik mekim gut wanpela wok, yu mas mekim mekim na bai yu lain gut long mekim. Sapos man i lain long paitim gita, dispela samting i no makim olsem em i save gut long mekim. Na i wankain tu long ol yangpela Kristen, ol i mas lain long ol wok bilong Kristen na bai ol inap mekim gutpela wok bilong autim tok. Wok long kisim bikpela save moa olsem Jisas i bin mekim. (Lu 2:52) Lain long kaunim gut tok. Wok strong long kisim save long skul. Yu mas tingim famili-stadi na ol miting bilong kongrigesen em i bikpela samting. Sapos yu mekim olsem, bai ol man i tok yu bihainim gutpela pasin olsem Timoti i bin mekim.—Ap 16:1, 2.
OL SAMTING PAPAMAMA INAP MEKIM
4 Ol papamama i ken kirapim pikinini bilong ol long autim tok long skul. Ol i mas helpim ol pikinini long save, sapos pikinini i stap gut long tok i tru na autim tok long skul, dispela samting inap helpim em na bai ol wanskul bilong em i no inap pulim em long mekim pasin nogut. Na sapos pikinini Witnes i bihainim gutpela pasin long skul, orait bai ol narapela skulmanki i litimapim nem bilong em.
5 Sampela taim long skul, ol narapela skulmanki i save subim ol pikinini Witnes long mekim ol samting ol yet i save mekim, olsem go raun long sampela hap samting. Na sampela taim tisa na ol kosa bilong spot i laik subim pikinini Witnes long mekim sampela narapela wok bihain long taim bilong skul, na ating dispela samting i givim hevi long pikinini Witnes na em wanpela i no inap karim dispela hevi. Sampela gutpela tok bilong helpim yupela long save gut long dispela samting i stap long pes 22-25 long buklet Skul. Na i gat sampela gutpela tok tu long buk Sampela Askim Bilong Ol Yangpela. Sapos yupela i toktok wantaim pikinini bilong yupela long ol dispela samting, gutpela samting bai kamap.—Snd 22:6.
6 Taim yu go long skul long dispela yia na yu wok yet long bihainim ol gutpela pasin Kristen, yu ken save Jehova bai helpim yu long nau na long bihain tu. Sindaun 20:11 i tok: “Yumi lukim pasin bilong wanpela man na yumi ken save, em i gutpela na stretpela man o em i man nogut. Na long wankain pasin tasol, yumi ken save long ol pikinini tu.”—Lukim tu Song 37:37.
[Ol Askim]
1. (a) Taim ol yangpela Witnes i go bek long skul long 1993, wanem ol nupela samting bai painim ol? (b) Ol yangpela Witnes i gat wanem gutpela wok ol inap mekim? (c) Taim yu skul long 1993, yu ken mekim wanem na bai yu kisim bikpela amamas moa?
2. (a) Jehova i laik bai ol yangpela i mekim wanem olsem Song 148:12, 13 i tok? (b) Olsem wanem ol yangpela inap bihainim tok bilong Sindaun 27:11? (c) Sapos yangpela Witnes i bihainim gutpela pasin, wanem gutpela samting inap kamap?
3. (a) Ol yangpela Kristen i ken mekim wanem na bai ol i lain gut long autim tok? (b) Ol yangpela Kristen i mas mekim wanem na bai ol i bihainim pasin bilong Jisas? na Timoti?
4. (a) Ol pikinini Witnes i ken mekim wanem na bai ol narapela skulmanki i litimapim nem bilong ol? (b) Ol papamama i ken mekim wanem bilong helpim pikinini bilong ol?
5. (a) Kolim sampela traim i painim ol pikinini Witnes long skul. (b) Famili i ken lukim wanem ol buk long famili-stadi bilong ol?
This is a repeat of article in km 1/91 taken from km-E 9/85 “What Will You Do in School This Year?”