Redi Long Mekim Gut Bel Bilong Man i Krai Long Man i Dai Pinis

¹ Olgeta manmeri i dediket pinis long God Jehova ol i mas tok klia long ol famili bilong ol na long ol man i stap long ples, na bai ol i ken save, lain bilong Jehova i no ken tru insait long wanpela pasin i olsem bilong lotuim man i dai pinis, o bilong mekim gut bel bilong em bambai em i no ken mekim nogut long ol man, o bilong askim man i dai pinis long helpim ol man. Em hia, sampela tok bilong helpim yumi na bai yumi ken save yumi ken mekim wanem long taim man i dai:

A. Sapos wanpela bilong famili bilong yumi i dai pinis, o wanpela pren, yumi ken mekim ol pasin i stret bilong tingim em.

B. Sapos wanpela bilong famili bilong yumi i dai pinis, yumi save krai na hevi; no gat rong long mekim olsem. Sapos pikinini bilong yu i dai o poroman marit o brata bilong skin o papa samting, orait ating bai yu stap bel hevi longtaim liklik. Tasol sapos yumi krai krai na yumi hevi nogut tru, dispela bai makim olsem yumi no bilip tumas olsem man i dai pinis em bai kirap bek.

C. Sapos wanpela man i dai na ol brata i laik planim em o putim wanpela bung bilong mekim sampela tok bilong tingim dispela man, yumi ken i go long dispela. O sapos narapela lotu i laik planim man na ol i mekim ol tok, yumi ken i go harim, tasol sapos ol i beten o singsing o mekim sampela samting olsem bilong lotu giaman, yumi no save insait long dispela, olsem na gutpela sapos yumi no go insait long haus lotu bilong ol.

D. Na sapos wanpela man i dai na yumi mas helpim famili bilong em long stretim ol samting bilong planim em, o wokim hul bilong matmat, o painim wanpela bokis, yumi ken mekim.

E. Sapos yumi givim kaikai o mani long famili bilong man i dai pinis, bilong helpim ol long lukautim ol man i mekim wok long planim dispela man o ol i kam bung long taim bilong planim em, na dispela kaikai o mani i no bilong helpim sampela pasin bilong lotu giaman o bilip giaman, i no gat rong long givim dispela samting. Em i olsem pasin sori tasol.

F. Sapos wanpela wanblut o pren bilong yumi i dai pinis, yumi ken mekim pasin sori bilong Kristen na yumi ken i go lukim famili bilong em o sindaun wantaim ol bilong mekim bel bilong ol i stap isi.

G. Sapos wanpela bilong famili bilong yumi em i dai pinis na long taim bilong planim em o long bihain, famili i bung bilong stretim ol samting bilong dispela man o bilong famili, i orait long yumi bung wantaim ol, tasol yumi no ken mekim wanpela samting bilong litimapim dispela man, olsem lotu long em.

² Sapos yumi go long bung bilong planim man i dai pinis, o long wanpela kaikai em famili i wokim na i bilong tingim dispela man, i gat sampela bikpela samting yumi mas tingim, olsem:

Bai yumi brukim lo bilong Jehova na yumi mekim wok bilong ol spirit nogut sapos yumi mekim samting i stap daunbilo hia:

A. Toktok o beten long man i dai pinis.

B. Pret long man i dai pinis.

C. Givim kaikai o presen samting long man i dai pinis.

D. Go long kaikai o bung i bilong amamasim man i dai pinis o mekim gut bel bilong em bambai em i no mekim nogut long ol man.

E. Pasim narapela kain klos, o mekim sampela pasin, o larim mausgras i kamap, o go slip inap sampela taim long haus bilong man i stap sori, na mekim ol dispela samting bilong litimapim man i dai pinis, o bilong bihainim pasin bilong ples, em as bilong en i olsem ol man bilong dispela ples i ting tewel bilong man i dai pinis em inap mekim sampela samting long ol.

F. Kisim sampela samting bilong man i dai pinis, olsem klos bilong em o hap bilong skin bilong em, na dispela i bilong lukautim yumi o bilong lotuim dispela man.

G. Skrapim o katim skin o pes bilong yumi taim yumi sori long man i dai pinis.

H. Kisim hap kaikai bilong wanpela kaikai ol i bin wokim bilong lotuim o amamasim man i dai pinis.

I. Mekim wanpela samting bilong lotuim o amamasim man i dai pinis.

³ Taim yumi kaunim ol dispela tok hia, i gutpela yumi save, i no gat rong long tingim man i dai pinis, tasol i no stret yumi lotuim man i dai pinis. Sapos yumi tingim man i dai pinis, i olsem yumi tingim ol gutpela pasin bilong em na ol gutpela wok samting em i bin mekim taim em i stap laip na nau em i gat gutpela nem. (Sav 7⁠:⁠1) Tasol sapos long tingting bilong yumi, yumi litimapim man i dai pinis, olsem lotuim em, o yumi wok long mekim sampela samting na i olsem yumi lotuim em, dispela i no stret, na i olsem yumi brukim lo bilong God, na i olsem yumi lotuim man i dai pinis na i olsem em i kamap god giaman bilong yumi.

This article is unique to PNG.