Mekim Baibel-Stadi
1 Olsem wanem yumi ken mekim gut Baibel-stadi? Yumi ken bihainim pasin bilong husat long mekim Baibel-stadi? Olsem wanem yumi ken mekim wok long ol skripsa? Husat i mas kaunim ol paragraf? Yumi mas stadi wantaim man long buk, tasol yumi mas mekim wanem samting moa bilong helpim sumatin long pilim gut tok i tru? Yumi no ken mekim wanem ol samting?
2 Pasin Bilong Mekim Stadi: Pasin bilong mekim Baibel-stadi i wankain olsem pasin bilong mekim Buk-Stadi Bilong Kongrigesen. Pastaim kaunim paragraf. Nau brata i mekim Baibel-stadi i ken kamapim askim bilong paragraf na larim sumatin i bekim. Sapos sumatin i no bekim hariap, orait brata i mas redi long kamapim sampela askim moa bilong stiaim tingting bilong sumatin na bai em i kisim gut ol tok na kamapim bekim i stret.
3 Yu mas save olsem wanem ol skripsa i stret wantaim ol tok bilong paragraf. Helpim sumatin long save, ol tok bilong skripsa i stap we long paragraf na helpim em long save long insait bilong ol tok bilong skripsa. Sapos paragraf i no kamapim ol tok bilong skripsa, em i kolim sapta na ves tasol, orait sapos skripsa i no longpela tumas, gutpela sapos yu opim Baibel long dispela skripsa. Nau larim sumatin i kaunim. Taim em i kaunim pinis larim em i stori long olsem wanem ol dispela tok i helpim tok bilong paragraf o i kamapim klia ol tok bilong en.
4 Helpim Sumatin Long Pilim Gut Tok i Tru: Kirapim sumatin long redim gut tok bilong stadi. Tokim em, pasin bilong kaunim buk em bikpela samting, long wanem, em rot bilong kisim save. Sapos em i kaunim planti buk bilong stadi long en na i tingim gut, dispela bai helpim em long kisim planti moa save. Long taim bilong mekim Baibel-stadi, sampela brata i save tokim sumatin long kaunim olgeta paragraf. Tasol sampela i tokim sumatin long kaunim wanpela paragraf na ol yet i kaunim wanpela, na ol i mekim olsem long ol narapela paragraf. Taim yu stadi wantaim sumatin yu mas tingting—em i wok long kamap strong long spirit na em inap mekim ol samting yu tokim em long mekim insait long stadi o nogat.
5 Sapos yu stori tasol long ol tok bilong wanpela buk, ating dispela bai helpim sumatin long kisim save, tasol i no olsem em i bilipim ol tok em i lainim, nogat. Bilong em yet inap pilim gut tok i tru, em i mas save olsem wanem dispela tok inap helpim em. Givim askim long em olsem: Yu gat wanem tingting long ol samting yu lainim? Yu mas mekim wanem bilong bihainim ol save yu kisim pinis? Kain askim olsem inap putim tok i go daun long bel bilong em.
6 Sampela Samting Yu No Ken Mekim: Taim yu mekim Baibel-stadi i gat sampela samting yu no ken mekim. Taim ol narapela tok i kamap i no samting tru bilong ol tok bilong stadi, nogut yu stori nabaut long ol dispela tok. Yu ken stori long ol dispela narapela samting taim yu mekim pinis stadi o long narapela taim. Na bikpela samting em olsem: Kirapim sumatin long bekim ol askim long toktok bilong em yet; nogut em i kaunim tasol ol tok bilong buk. Dispela samting bai helpim yu long save, sumatin i kisim gut ol dispela tok o nogat.
7 Gutpela sapos yu gat wanpela Baibel-stadi bilong lukautim na yu mas putim olsem wanpela mak bilong winim. Sapos yu bilip olsem Jehova bai helpim yu na yu bihainim pasin brata i lukautim Buk-Stadi Bilong Kongrigesen i mekim, ating bai yu no hatwok tumas long mekim Baibel-stadi. Pasin bilong mekim Baibel-stadi em i gutpela rot tru bilong lainim ol man long tok i tru na kamapim ol disaipel. Sapos yu mekim olsem, yu tu bai kisim amamas long mekim dispela wok em Jisas i tokim yumi long mekim long Matyu 28:19, 20.
[Ol Askim]
1. Kolim sampela askim bilong pasin bilong mekim Baibel-stadi.
2. Pasin bilong mekim Baibel-stadi i wankain olsem wanem samting?
3. Sumatin yet i ken mekim wanem?
4. Bilong wanem i gutpela sapos sumatin i kaunim sampela o olgeta paragraf?
5. Olsem wanem yumi ken helpim sumatin long pilim gut tok i tru?
6. Taim yu mekim Baibel-stadi, yu no ken mekim wanem?
7. (a) Wanem gutpela rot tru bilong lainim ol man long tok i tru? (b) Wanem tupela samting bai helpim yumi long mekim gut Baibel-stadi?