Ol Samting Yu Ken Mekim na Bai “God i Skulim Yumi” Kibung Distrik Bilong 1993-1994 i Helpim Yu Tru (Namba Wan Hap)
1 “Bikpela, yu mas skulim mi gut.” (Sng 86:11) Yumi olgeta wokboi bilong Jehova i dediket pinis, yumi tu i mas beten strong olsem. Yumi pasim tok strong long bel olsem yumi no ken tru lusim pasin bilong kisim save na bihainim ol samting yumi kisim save long en. Olsem man bilong raitim Song, sampela taim yumi tu i mas i gat man bilong stretim yumi, na yumi mas krai long God i mas helpim yumi long tingim em wanpela tasol na bai tingting bilong yumi i no inap pulim yumi i go long tupela rot. “God i Skulim Yumi” Kibung Distrik bai kamapim ol tok yumi ken mekim wok long en bilong helpim yumi na stretim yumi, na bai yumi inap stap gut long Jehova na mekim wok bilong em long taim hevi na traim i painim yumi.
2 Fopela De Kibung: Dispela kibung bai kamap long 3-pela hap long Papua Niugini, olsem:
POT MOSBI: Sarere, Disemba 25 i go Tunde, Disemba 28, 1993 long Sir Hubert Murray Stediam.
RABAUL: Fonde, Janueri 6 i go Sande, Janueri 9, 1994 long Malaguna Teknikal Haiskul.
LAE: Fonde, Janueri 13 i go Sande, Janueri 16, 1994 long Lae Sograun.
Long Lae na Rabaul, program bai kirap long Fonde long 12:30, na bai i pinis long Sande long 4:10 samting long apinun. Long Pot Mosbi, program bai kirap long Sarere long 12:30 na bai i pinis long Tunde long 4:10 samting long apinun.
3 Bai yumi kisim wanem ol samting? Bai yumi kisim planti strongpela kaikai bilong spirit long kain kain rot olsem ol tok, na ol soim samting, na tupela pilai. No ken lusim wanpela hap bilong ol dispela tok i skulim yumi long ol bikpela samting! Na tu, bai yumi amamas long toktok gen wantaim ol pren bilong pastaim na painim ol nupela pren.
4 Bai Yu Bringim Namba Ten Hap Olgeta i Kam Long Haus Bilong Jehova? Long Malakai 3:10 Jehova i tok promis long ol Israel, sapos ol i traim em na bringim namba ten hap olgeta bilong ol samting bilong ol i kam long haus bilong em, em bai inapim olgeta samting long ol.
5 Ating sampela i mas traim Jehova olsem: Ol i mas hariap tokim bos bilong ol olsem ol i laik kisim sampela malolo o liv na bai ol inap i go long kibung. Bipo, sampela brata i bin surik long mekim dispela samting—ol i ting bos bilong ol bai i no larim ol i go long kibung. Tasol long ol narapela samting, em ol samting i no bilong spirit, ol dispela brata i no pret o surik tumas long tokim bos long ol samting ol i laik mekim.
6 Yu mas askim yu yet olsem: Sapos wanpela gutpela pren bilong yu bai marit long narapela hap, bai yu no surik long tokim bos bilong yu olsem yu laik kisim malolo na bai yu ken i go long dispela marit, a? Na sapos bos hia i no amamas tumas long givim malolo long yu, ating bai yu tokim em, sapos yu inap i go long dispela marit bai em i bikpela samting tru long yu. Orait, sapos em i bikpela samting long yumi mas i go long wanpela marit, bai em i bikpela samting moa long yumi mas i go long kibung na bai Jehova i ken skulim yumi, a? Sapos yumi bilip tru olsem ol tok bilong kibung inap helpim yumi long kamap moa strong long ol samting bilong spirit, ating bai yumi no hatwok tumas long tokim bos long givim malolo long yumi na bai yumi ken i go long kibung.—Je 1:7, 8.
7 Long taim bilong ol Israel namba 10 hap em olsem ol samting bilong gaden na sampela animal samting em ol i givim bilong helpim haus bilong lotuim Jehova long en. Long nau, namba ten hap i makim olsem yumi givim taim bilong yumi na strong bilong yumi na hap mani tu bilong yumi long mekim laik bilong Jehova na bilong helpim wok bilong Kingdom. Yumi mekim olsem long taim yumi go long ol miting na kibung, na taim yumi lukautim Haus Kingdom na klinim ol samting bilong en. Long “God i Skulim Yumi” Kibung Distrik bai yumi gat planti rot long bringim namba 10 hap olgeta i kam long haus bilong Jehova long spirit. Wanem sampela samting yumi ken mekim?
8 Yumi ken givim namba 10 hap long Jehova long taim yumi putim gut yau long harim ol tok bilong kibung, na long taim yumi givim bel long mekim singsing bilong Kingdom, na long taim yumi putim yau na harim gut olgeta beten na bai yumi inap givim bel long mekim tok amen.
9 Sapos yumi laik kamap strong long tok i tru, yumi mas putim yau na harim gut tok. Long bikpela haus o stediam samting i gat planti samting bilong pulim ai na tingting bilong yumi, olsem na yumi mas strong moa long putim gut yau—nogut tingting bilong yumi i raun na yumi tingim ol narapela samting. Bilong redi, yumi mas bringim Baibel bilong yumi i kam long kibung, na buk singsing, na pen na notbuk samting, na Wastaua bilong stadi long dispela wik. Gutpela sapos yumi raitim sampela hap tok na skripsa long notbuk, long wanem, dispela bai helpim yumi long tingim gut ol tok ol brata i mekim. Raitim ol bikpela tok tasol; sapos yumi raitim planti ol liklik liklik tok bai yumi no inap tingim gut ol tok yumi harim. Na lainim ol yangpela pikinini tu long putim gut yau na harim tok. Ol pikinini wantaim papamama bilong ol i ken givim namba 10 hap long rot bilong putim gut yau long olgeta tok bilong kibung inap long skel bilong ol.
10 Sampela papamama i stretim rot na long olgeta de bai i gat hap taim bilong ol yangpela bilong ol i ken sindaun isi na kaunim wanpela buk bilong Sosaiti o lukim ol piksa long en. Kain gutpela pasin olsem em sampela papamama i lainim ol pikinini long en, dispela i mekim na long taim bilong ol miting na kibung ol pikinini i no hatwok tumas long sindaun isi. Ol pikinini i stap olsem gutpela piksa, papamama bilong ol i tok i no gat wanpela taim na ol i bin larim ol i bringim ol samting bilong pilai long en o ol buk bilong rait nabaut long en i kam long miting. Ol liklik pikinini tu inap lain olsem ol i kam long miting bilong lotuim Jehova. Yupela ol papamama i lainim ol yangpela bilong yu long ol samting ol i mas mekim bilong bringim namba ten hap olgeta i kam long haus bilong Jehova, yupela i mekim gutpela wok tru!
[Ol Askim]
1. “God i Skulim Yumi” Kibung Distrik bai helpim yumi olsem wanem?
2. (a) Kibung bai kamap long hamas hap? (b) Kibung long Lae na Rabaul bai kamap long wanem ol de? (c) Kibung long Pot Mosbi bai kamap long wanem ol de?
3. Bai yumi kisim wanem ol samting?
4. Long Malakai 3:10, Jehova i mekim wanem tok promis long ol Israel?
5. Sampela brata, nau ol i mas mekim wanem samting?
6. Sapos yumi gat tupela tingting long askim bos long givim malolo long yumi long go long kibung, orait yumi ken givim wanem askim long yumi yet?
7. Long nau namba 10 hap i makim wanem samting?
8. Yumi ken mekim wanem ol narapela samting bilong givim namba 10 hap?
9. (a) Kolim sampela samting yumi mas bringim i kam long kibung? (b) Ol pikinini i ken mekim wanem bilong givim namba 10 hap?
10. Sampela papamama i lainim ol pikinini bilong ol long wanem gutpela pasin na bai ol i redi long kam long ol miting?
This article is unique to PNG.