Save God i Skulim Yumi Long En i Gat Strong
1 Em gutpela samting tru yumi inap kisim skul long Man bilong wokim yumi, em God I Gat Olgeta Strong, em God Jehova! (Sng 50:1; Ais 30:20b) Long nau, planti manmeri bilong olgeta lain ol i kam bung long maunten bilong lotuim God long en na bai em i ken skulim ol. (Mai 4:2) Planti milion ol narapela i go long ol skul i litimapim save na tingting bilong ol man bilong dispela graun. Tasol kain save i givim baksait long Jehova na long ol Tok bilong em, em i kranki tru long ai bilong God, na ol man i bihainim dispela kain save ol i kamap longlong long ai bilong God.—Sng 14:1; 1 Ko 1:25.
2 Long kibung distrik i kamap long pinis bilong dispela yia bai yumi kisim save olsem: Save God i skulim yumi long en i gat strong. As tok bilong kibung em “God i Skulim Yumi,” na olgeta tok bilong kibung bai kamapim dispela samting. Bai yumi lain olsem Tok bilong God wantaim spirit bilong em i mekim yumi i stap wanbel olsem wanpela bikpela lain brata i stap long olgeta hap, na i mekim pasin na tingting bilong yumi i kamap nupela, na i lukautim yumi na bai ol tok bilong ol spirit nogut i no ken giamanim yumi, na i lainim yumi long autim gut tok. Olsem wanem save God i skulim yumi long en i ken helpim yu yet?
3 Save God i Skulim Yumi Long En i Mekim Wanem Long Pasin Bilong i Stap Olsem Kristen: Save God i skulim yumi long en i helpim yumi long lainim maus bilong bel bilong yumi. Tru, taim mama i karim yumi, yumi olgeta i gat maus bilong bel, tasol yumi mas lainim bel na bai maus bilong bel i ken stiaim yumi long bihainim stretpela pasin na mekim wok Jehova i laikim. (Sng 19:7, 8; Ro 2:15) Ol man bilong dispela graun ol i no larim Tok bilong God i bosim tingting bilong ol, olsem na ol i longlong nabaut; ol i no klia gut long wanem samting i stret na wanem samting i no stret. Ol i paitim tok i go i kam long ol samting bilong stretpela pasin, long wanem, olgeta wan wan i strong long mekim ol samting i olsem stret long ai bilong ol wan wan yet. Planti ol i laik i stap fri tru na bai ol i ken tingim wanem rot ol yet i laik bihainim. Tok bilong Jehova tasol i as bilong gutpela tingting na save, tasol ol i sakim dispela tok. (Sng 111:10; Jer 8:9; Dan 2:21) Tasol save God i skulim yumi long en i mekim na yumi no longlong nabaut—God i skulim yumi, olsem na yumi pas gut wantaim na stap wanbel olsem lain bilong em. Na yumi no pret long ol samting i laik kamap long bihain, na bel bilong yumi i no gat tok, na yumi wok strong long autim tok.
4 God i skulim yumi na dispela i helpim yumi long sakim ‘olgeta tok i olsem win.’ (Ef 4:14) Yumi no laikim ol giaman save ol man bilong skelim ol samting i kisim, long wanem, dispela inap kirapim man long daunim tok bilong Baibel, na bihainim laik bilong em yet, na mekim ol pasin nogut. Yumi amamas long Jehova i skulim yumi, na dispela i mekim na yumi no bel hevi olsem planti man long nau. Ol tok na lo bilong Jehova i olsem i ‘stap baksait long yumi na tokim yumi long rot yumi mas bihainim.’—Ais 30:21.
5 Ol Miting Bilong Yumi na Wok Autim Tok: Yumi tingim tok bilong Hibru 10:23-25 i olsem wanpela wok God i tok yumi mas mekim. Jehova i skulim yumi long taim yumi bung long ol miting. Olsem wanem? Em pasin bilong yumi long go long olgeta miting, o yumi ting pasin bilong i go long ol miting i no bikpela samting tumas? Tingim: Pasin bilong bung wantaim em hap wok lotu bilong yumi. Em i no samting bilong laik bilong ol wan wan. No ken tru lusim wanpela hap bilong ol kaikai bilong spirit em Jehova i bin redim bilong yumi.
6 Moses i beten long God olsem: “Yu skulim mipela gut bai mipela i ken save olsem mipela i no inap i stap longpela taim long graun. Olsem na bai mipela i gat gutpela save tru.” (Sng 90:12) Olsem wanem? Dispela em i olsem beten bilong yumi tu? Yumi pilim tru olgeta de wan wan yumi stap laip? Sapos olsem, bai yumi “gat gutpela save tru”; bai yumi mekim gutpela wok long olgeta de bilong litimapim nem bilong Nambawan Man Bilong Skulim yumi, em God Jehova. Save God i skulim yumi long en bai helpim yumi long mekim olsem.
[Ol Askim]
1. Olsem wanem save bilong God i narapela kain long save bilong ol man bilong dispela graun?
2. Save God i skulim yumi long en inap helpim yumi olsem wanem?
3. Save God i skulim yumi long en i mekim wanem long pasin bilong i stap olsem Kristen?
4. God i skulim yumi na dispela i helpim yumi olsem wanem?
5. Bilong wanem ol miting i bikpela samting?
6. Moses i beten askim God Jehova long wanem samting?