Jehova i Skulim Ol Man i Kam Inap Long Nau
“God, Bikpela i bin skulim mi long gutpela pasin bilong toktok.”—AISAIA 50:4.
GOD JEHOVA i bin i stap Tisa kirap long taim em i kamap Papa. Bihain long taim sampela pikinini bilong em i bikhet long em, em i bin skulim wanpela sumatin em i laikim tumas, em Namba Wan Pikinini, long mekim wanpela wok long graun. (Sindaun 8:30) Aisaia sapta 50 i tok profet long wanpela tok dispela sumatin i mekim, olsem: “God, Bikpela i bin skulim mi long gutpela pasin bilong toktok, olsem na mi inap mekim gutpela tok bilong strongim bel bilong ol manmeri i no gat strong.” (Aisaia 50:4) Taim Jisas i stap long graun, em i bihainim ol tok Papa i bin skulim em long en, olsem na ol tok bilong em i strongim bel bilong ol manmeri “i save hatwok tru na i karim ol bikpela hevi.”—Matyu 11:28-30.
2 Jisas i bin mekim planti strongpela wok taim em i stap long graun. Em i opim ai bilong ol aipas na em i kirapim bek ol man i dai pinis, tasol nambawan wok bilong em ol man long taim bilong em ol i save tingim, em wok bilong em long skulim ol man olsem tisa. Ol disaipel bilong em na ol birua bilong em tu ol i save kolim em olsem tisa. (Matyu 8:19; 9:11; 12:38; 19:16; Jon 3:2) Jisas i no tok, dispela tok em i skulim ol man long en, em i tok bilong em, nogat. Long pasin daun em i tokaut olsem: “Dispela tok mi givim yupela, em i no bilong mi yet. Nogat. Em i bilong God, em i bin salim mi na mi kam.” “Mi save autim olgeta tok olsem Papa i bin soim mi.”—Jon 7:16; 8:28; 12:49.
Tisa i Save Tingim Gut Sumatin
3 Gutpela tisa tru em i save sori na tingim gut ol sumatin bilong em. Aisaia sapta 50 i kamapim klia olsem God Jehova i save mekim olsem long ol sumatin bilong em. Dispela tok profet i tok: “Olgeta moning em i save mekim mi i laikim tumas long harim ol nupela samting em i laik skulim mi long en.” (Aisaia 50:4) Dispela tok i givim tingting long yumi na yumi tingim wanpela tisa i save kirapim ol sumatin bilong em long moningtaim tru bambai em i ken skulim ol. Wanpela saveman bilong Baibel i tingim samting dispela tok profet i makim na em i tok: “Dispela i givim tingting long yumi olsem Man bilong kisim bek ol man . . . em i olsem sumatin long skul bilong God; na em bai inap long skulim ol narapela. . . . Mesaia bai inap tru long i stap tisa bilong ol man, long wanem, God yet i bin skulim em.”
4 Ol sumatin i save harim gut ol tok em tisa bilong ol i save skulim ol long en. Orait, olsem wanem long Jisas? Em i bin harim gut ol tok Papa i bin skulim em long en? Samting Jisas i mekim i stret wantaim tok bilong Aisaia 50:5, i tok: “Bikpela i opim yau bilong mi long harim tok bilong em, na mi no bikhet long em na mi no surik long wok em i laik givim mi.” Tru tumas, Jisas i laik tru long kisim save. Em i putim gut yau long ol tok Papa i skulim em long en, na em i amamas long mekim olgeta samting Papa i laik bai em i mekim. Em i no bikhet. Em i tokim Papa: “Yu no ken bihainim laik bilong mi. Nogat. Yu mas bihainim laik bilong yu tasol.”—Luk 22:42.
5 Dispela tok profet i makim olsem Pikinini i save long samting bai painim em taim em i mekim laik bilong God. Yumi inap save long dispela, long wanem, dispela man God i bin skulim em, em i tok: “Mi bin larim ol man i paitim baksait bilong mi long kanda na kamautim mausgras bilong mi. Na taim ol i tok nogut long mi na spetim pes bilong mi, mi no bin haitim pes bilong mi long ol.” (Aisaia 50:6) Olsem dispela tok profet i makim, ol man i bin mekim nogut tru long Jisas taim em i stap long graun. Olsem aposel Matyu i tok, “ol i spetim pes bilong Jisas,” na “sampela i solapim em.” (Matyu 26:67) Em ol hetman bilong lotu i bin mekim olsem long em long nait bilong Pasova long yia 33. Long de bihain long dispela, Jisas i larim ol i paitim baksait bilong em; ol soldia bilong Rom i paitim em nogut tru na bihain ol i hangamapim em long pos na em i dai.—Jon 19:1-3, 16-23.
6 Papa i bin skulim gut Pikinini bilong em pastaim, olsem na Pikinini i bilip tru long Tisa bilong em. Dispela i kamap ples klia long narapela tok em i mekim long dispela tok profet: “Tok nogut bilong ol i no inap daunim mi, long wanem, God, Bikpela, i save helpim mi.” (Aisaia 50:7) Jisas i bilip tru olsem Tisa bilong em bai helpim em, olsem na em i kisim gutpela pe tru. Papa bilong em i givim biknem na bikpela namba tru long em, winim olgeta narapela wokman bilong God. (Filipai 2:5-11) Na yumi tu bai kisim ol gutpela blesing tru sapos yumi bihainim ol tok Jehova i skulim yumi long en na yumi no “surik long wok em i laik givim” long yumi. Orait, nau yumi ken stori long olsem wanem ol man i bin kisim ol dispela tok God i bin skulim ol long en i kam inap long nau.
Wok Bilong Skulim Planti Man
7 Olsem yumi tok pinis, long taim bilong ol aposel Jehova i skulim ol man long rot bilong Maus bilong em i bin i stap long graun, em Krais Jisas. (Jon 16:27, 28) Long olgeta taim Jisas i tokaut olsem Buk Bilong God i as bilong ol tok em i skulim ol man long en. Em i stap olsem gutpela piksa bilong ol man em i bin skulim ol. (Matyu 4:4, 7, 10; 21:13; 26:24, 31) Bihain Jehova i skulim ol man bilong graun long rot bilong ol dispela man Jisas i bin skulim ol. Yumi tingim tok Jisas i bin givim long ol, em i tok: “Yupela i mas i go mekim olgeta lain manmeri i kamap disaipel bilong mi. . . . Yupela lainim ol long bihainim olgeta tok mi bin givim long yupela.” (Matyu 28:19, 20) Taim ol i kamapim ol disaipel, ol dispela disaipel i kamap olsem “lain bilong God, . . . sios bilong God bilong i stap oltaim.” (1 Timoti 3:15) Na ol i kamap olsem ol kongrigesen, na Jehova i skulim ol insait long ol dispela kongrigesen. (Aposel 14:23; 15:41; 16:5; 1 Korin 11:16) Olsem wanem? Jehova i bihainim dispela pasin bilong skulim ol man i kam inap long nau?
8 Yes, em i bin mekim olsem! Tripela de paslain long taim Jisas i dai, em i bin tok profet olsem, taim las de i klostu, wanpela bikpela wok bilong autim tok bai kamap. Em i tok: “Na bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” Nau Jisas i stori long samting bai stap olsem rot bilong bosim dispela wok bilong autim tok na skulim ol man long olgeta hap. Em i toktok long “wokboi i gat gutpela tingting” em bai stap olsem rot bilong givim kaikai bilong spirit long ol wokboi bilong Em. (Matyu 24:14, 45-47) God Jehova i bin makim dispela “wokboi” bilong bosim wok bilong Kingdom hia long graun.
9 Long nau dispela “wokboi i gat gutpela tingting” em liklik hap lain bilong Kingdom, em ol Kristen God i bin makim na ol i stap yet long graun; ol i bilong lain 144,000, em ol i “lain bilong Krais” na ol i ‘pikinini bilong Abraham.’ (Galesia 3:16, 29; KTH 14:1-3) Orait, olsem wanem yu inap luksave long dispela lain wokboi i gat gutpela tingting? Yu inap lukim ol wok ol i mekim na pasin bilong ol long bihainim gut Tok Bilong God, em Baibel.
10 Long nau Jehova i save skulim ol man long rot bilong dispela “wokboi.” Long 1931 dispela lain wokboi i kisim nem olsem Witnes Bilong Jehova. Kirap long dispela taim, inap sampela milion manmeri ol i kam bung wantaim ol na ol i kisim dispela nem na ol tu i autim tok bilong Kingdom bilong God. Dispela nius, em Wastaua i Tokaut Long Kingdom Bilong Jehova, em i nambawan samting dispela “wokboi” i mekim wok long en bilong skulim ol man. Tasol ol i save mekim wok long ol buk, na buklet, na ol liklik nius, na nius Kirap! tu.
11 Na dispela “wokboi” i save putim sampela skul tu, olsem Wastaua Baibel Skul Bilong Gileat, em bilong lainim ol yangpela manmeri inap 5-pela mun bambai ol i ken mekim wok misineri long ol narapela narapela kantri. Na i gat Skul Bilong Lainim Wok Bilong Lukautim Kongrigesen, na long dispela skul ol elda na ol wokman bilong kongrigesen i no marit ol i save skul inap tupela mun long sampela bikpela wok insait long oganaisesen bilong God. Na i gat Skul Bilong Wok Kingdom tu, em bilong skulim ol elda na wokman bilong kongrigesen long ol wok bilong ol insait long kongrigesen; na Skul Bilong Wok Painia, em bilong skulim ol painia long mekim gut wok bilong ol long autim tok.
12 Na i gat sampela rot moa bilong skulim ol man—em 5-pela miting ol i save mekim long olgeta wik long ol 75,500 kongrigesen bilong ol Witnes Bilong Jehova long olgeta hap. Olsem wanem? Yu save mekim ol samting bambai ol dispela miting inap helpim yu gut? Yu save putim gut yau long ol tok i kamap na bai yu kamapim klia bel bilong yu, yu bilip tru olsem yu stap insait long skul bilong God? Yu wok long kamap strong long ol samting bilong spirit na bai ol narapela i ken save, Jehova ‘i bin skulim yu long gutpela pasin bilong toktok’?—Aisaia 50:4; 1 Timoti 4:15, 16.
Ol Miting i Skulim Yumi
13 Bikpela rot tru bilong Jehova long skulim yumi, em wanpela stadi bilong Baibel i save kamap long olgeta wik, em ol i mekim long rot bilong Wastaua. Olsem wanem? Yu tingim dispela miting i olsem ples Jehova inap skulim yu? Tru, tok bilong Aisaia 50:4 i makim Jisas, tasol em inap makim olgeta man ol i laik mekim wok long ol samting Jehova i putim bilong ‘skulim ol long gutpela pasin bilong toktok.’ Wanpela rot bilong kamapim klia olsem yu laikim tumas Wastaua, em yu ken kaunim taim yu kisim nupela. Orait, taim ol i mekim stadi Wastaua long kongrigesen, yu ken i stap long dispela stadi na redi long mekim sampela tok bilong kamapim bilip bilong yu, na long dispela rot yu kamapim klia olsem yu tenkyu long Jehova.—Hibru 10:23.
14 Taim yu bekim tok long ol miting, yu insait long bikpela wok bilong Jehova long skulim ol man. Yu pilim tru dispela gutpela samting? Tru tumas, taim yumi bekim tok long ol miting, em wanpela bikpela rot bilong yumi long kirapim lain bilong God long “laikim ol arapela na mekim gutpela pasin long ol.” (Hibru 10:24, 25) Tasol olsem wanem long ol pikinini? Ol tu inap insait long dispela skul Jehova i putim bilong skulim ol man? Ol inap. Taim ol pikinini i givim bel long bekim tok, dispela i save strongim ol narapela i bikpela pinis. Sampela taim ol nupela manmeri i kam long ol miting ol i bin harim ol dispela tok bilong ol pikinini na dispela i kirapim ol long wok strong long kisim save long tok i tru bilong Baibel. Sampela pikinini, taim ol i bekim tok ol i save kaunim sampela tok bilong paragraf, o wanpela man o meri i save kolim bekim isi isi long yau bilong ol. Tasol taim ol i redim gut sampela tok ol i laik mekim, dispela i save kirapim tru ol narapela. Taim ol pikinini i mekim ol kain bekim olsem, dispela i save givim biknem long Bikpela Tisa bilong yumi na bikpela wok em i bin kamapim bilong skulim ol man.—Aisaia 30:20, 21.
15 Yumi save amamas tru taim yumi lukim ol pikinini i gat laik long litimapim nem bilong God bilong yumi. Jisas i bin amamas long tok ol pikinini i mekim bilong litimapim nem bilong God. (Matyu 21:15, 16) Wanpela elda Kristen i tok: “Taim mi pikinini, mi laik bekim tok long Stadi Wastaua. Papa i save helpim mi long redim wanpela bekim, na em i tokim mi long kolim kolim inap 7-pela taim samting.” Taim yupela mekim Baibel-stadi wantaim famili, yupela papamama i ken makim sampela paragraf long Wastaua na helpim ol pikinini long redim sampela tok bilong en na mekim long tok bilong ol yet. Helpim ol long pilim dispela gutpela samting tru ol inap mekim, em ol inap insait long dispela bikpela wok bilong Jehova long skulim ol man.
16 Wok bilong skulim ol man long ol narapela miting Kristen, em tu i bikpela samting. Olsem na ol man i gat wok long mekim ol tok long ol dispela miting na ol narapela i sindaun na harim ol dispela tok, ol i mas tingim gut. Inap 50 yia pinis Jehova i bin mekim wok long rot bilong Skul Bilong Wok Autim Tok bilong lainim ol sampela milion manmeri long autim gut tok bilong Kingdom. Ol manmeri i save kam long olgeta miting bilong kongrigesen, na ol manmeri i kirap nupela long kam long ol miting, ol tu inap insait long dispela skul sapos pasin na sindaun bilong ol i stret wantaim ol lo Kristen.
17 Na narapela rot bilong skulim ol man, em Miting Bilong Pablik-Tok. Olsem nem bilong en i makim, ol i bin putim dispela miting bilong helpim ol man i no Witnes na bai ol i ken save long ol bikpela as tok bilong Baibel. Olsem na man i mekim dispela tok em i mas kamapim gut bambai ol nupela man i harim dispela tok bilong Baibel long namba wan taim ol inap kisim gut. Olsem na taim em i kolim ol tok olsem “ol arapela sipsip,” o “ol brata,” o “remnan,” em i mas kamapim klia, long wanem, ol man i no Witnes ating ol i no save long ol dispela tok. Na sampela manmeri i save kam long ol Miting Bilong Pablik-Tok, ating ol i gat ol bilip na pasin i narapela kain long tok bilong Baibel, tasol ol manmeri bilong nau i orait long ol dispela samting. Olsem na man bilong mekim pablik-tok em i mas tingim gut ol tok em i mekim, nogut em i mekim sampela tok i olsem tok bilas o i daunim ol bilip na pasin bilong ol.—Skelim wantaim 1 Korin 9:19-23.
18 Buk-Stadi Bilong Kongrigesen em wanpela miting i save kamap long olgeta wik na ol i save stadi long Baibel wantaim wanpela buk samting em lain wokboi i gat gutpela tingting ol i redim. Nau long dispela taim ol kongrigesen long planti hap ol i stadi long buk Kamapim Tok Hait—Bikpela Samting Bilong En i Laik Kamap! Miting Bilong Wok Autim Tok, em bilong skulim lain bilong Jehova long mekim olgeta hap wok bilong ol insait long wok bilong autim gutnius bilong Kingdom na kamapim ol disaipel.—Matyu 28:19, 20; Mak 13:10.
Ol Bikpela Miting Tu i Skulim Yumi
19 Winim wan handet yia pinis, “wokboi i gat gutpela tingting” i putim ol bikpela na liklik kibung bilong skulim na strongim ol Kristen tru. Long nau i gat tripela bikpela miting olsem i save kamap long olgeta yia. I gat wanpela kibung bilong wanpela de tasol, na ol kongrigesen i insait long wanpela sekit, ol i save go long en. Na insait long yia i gat wanpela bung bilong tupela de, ol i kolim kibung sekit. Na tu, i gat wanpela bung ol i kolim kibung distrik, em ol kongrigesen bilong sampela sekit wantaim ol i bung long en. Long sampela yia ol i save wokim ol kibung intenesenel. Ol Witnes bilong planti kantri ol i save kam long ol dispela bikpela bung, olsem na ol dispela bung i save strongim tru bilip bilong lain bilong Jehova.—Skelim wantaim Lo 16:16.
20 Long 1922 i gat wanpela kibung i kamap long Sida Poin, Ohaio, long Amerika, na 10,000 ol i bung. Wanpela man bilong mekim tok long dispela kibung em i kirapim tru ol manmeri taim em i tok: “Nau em i bikpela taim. Harim, King i kirap pinis long mekim wok! Yupela i gat wok bilong autim tok long dispela samting. Olsem na yupela i mas autim tok, autim tok, autim tok, na tokim ol man long dispela King na kingdom bilong em.” Long ol dispela bikpela kibung, planti taim ol i toktok long wok bilong autim tok. Long kibung intenesenel i bin kamap long Nu Yok Siti long 1953, ol i tokaut long wanpela samting ol bai kirapim insait long ol kongrigesen, olsem: Ol manmeri i gat save long autim tok long ol haus, bai ol i lainim ol narapela em ol i no save long mekim. Dispela wok bilong skulim ol i helpim gut wok bilong autim tok bilong Kingdom long planti hap.
Ol i Skul Bilong Skulim Ol Narapela
21 Tru tumas, dispela rot bilong Jehova long skulim ol man long olgeta hap long nau, em i gutpela samting tru! Ol man i laik insait long en, God inap skulim ol, na ol inap insait long dispela lain em God i bin ‘skulim ol long gutpela pasin bilong toktok.’ Em i gutpela samting tru long yumi inap insait long dispela skul bilong God! Tasol taim yumi larim Jehova i skulim yumi, yumi no ken lusim tingting long as na yumi skul olsem. Jehova i bin skulim Jisas bambai em inap skulim ol narapela man, na Jisas i bin skulim ol disaipel bambai ol i ken mekim wankain wok olsem em i mekim, tasol ol bai mekim long planti hap moa. Na yumi tu i olsem. Jehova i skulim yumi bambai yumi ken skulim ol narapela man.—Jon 6:45; 14:12; 2 Korin 5:20, 21; 6:1; 2 Timoti 2:2.
22 Tasol ating bai yu mekim wankain tok olsem Moses, em i tok, “Mi no inap toktok gut,” o olsem Jeremaia i tok, “Mi no save long pasin bilong autim tok.” Tasol Jehova bai helpim yu olsem em i bin helpim tupela. Em i bin tokim Moses: “Bai mi helpim yu long toktok.” Na Jehova i tokim Jeremaia: “Yu no ken pret . . . mi stap wantaim yu.” (Kisim Bek 4:10-12; Jeremaia 1:6-8) Taim ol hetman bilong lotu i laik pasim ol disaipel long autim tok, Jisas i tok: “Mi tokim yupela, sapos ol i pasim maus, ol ston yet bai i singaut.” (Luk 19:40) Tasol i no gat wok long ol ston i mas singaut long dispela taim bipo, na long nau tu i no gat wok long ol ston i mas mekim olsem, long wanem, Jehova i mekim wok long dispela lain em i bin skulim ol na ol i autim tok bilong Kingdom.
Yu Inap Bekim?
◻ Aisaia sapta 50 i tok wanem long gutpela pasin namel long Tisa na sumatin?
◻ Olsem wanem Jehova i mekim bikpela wok bilong skulim ol man long olgeta hap?
◻ Jehova i mekim wok long wanem ol samting bilong skulim ol man?
◻ Bilong wanem em i gutpela samting tru long yumi inap insait long wok bilong Jehova long skulim ol man?
[Askim Bilong Stadi]
1, 2. (a) Jehova i skulim dispela sumatin em i laikim tumas na bai sumatin i ken mekim wanem? Wanem samting i kamap long dispela? (b) Jisas i tokaut olsem husat i As bilong ol tok em i skulim ol man long en?
3. Olsem wanem tok profet bilong Aisaia i makim olsem Jehova i save tingim ol man em i skulim ol?
4. Jisas i mekim wanem taim Papa bilong em i skulim em?
5. (a) Wanem samting i makim olsem Jisas i save pinis long ol hevi na pen bai painim em long graun? (b) Tok profet bilong Aisaia 50:6 i kamap tru olsem wanem?
6. Wanem samting i kamapim klia, long olgeta taim Jisas i bilip tru long Tisa bilong em? Olsem na em i kisim wanem gutpela pe long dispela?
7. Olsem wanem Jehova i mekim wok bilong em long skulim ol man bilong graun?
8. Jisas i tok wanem na em i makim olsem wok bilong autim tok bai kamap long graun paslain long las de?
9. Husat dispela wokboi i gat gutpela tingting?
10. Lain wokboi i mekim wok long wanem ol samting bilong helpim ol man long kisim ol tok Jehova i skulim ol long en?
11. Dispela “wokboi” i kirapim wanem ol skul? Ol dispela wan wan skul i gat wanem wok?
12. Wanem samting i save kamap long olgeta wik bilong skulim ol man?
13. (a) Wanem wanpela bikpela rot bilong Jehova long skulim ol man long nau? (b) Olsem wanem yumi ken kamapim klia olsem yumi amamas long Wastaua yumi save kisim?
14. (a) Taim yumi bekim tok long miting, olsem wanem dispela em i bikpela samting tru yumi inap mekim? (b) Wanem kain bekim bilong ol pikinini i save kirapim tru ol narapela?
15. Ol papamama i ken mekim wanem na bai ol pikinini bilong ol inap bekim gut ol tok?
16. Skul Bilong Wok Autim Tok i mekim wanem gutpela wok? Husat inap insait long dispela skul?
17. (a) Bilong wanem ol i kamapim Miting Bilong Pablik-Tok? (b) Ol man bilong mekim pablik-tok i mas tingim gut wanem samting?
18. I gat wanem ol narapela miting bilong kongrigesen? Wanem wok bilong ol?
19. “Wokboi” i save putim wanem ol bikpela bung long olgeta yia?
20. Long ol bikpela kibung bilong ol Witnes Bilong Jehova, planti taim ol i bin toktok long wanem samting?
21. Yumi mas laik long insait long wanem samting na yumi save, i gat as na yumi mekim?
22. (a) Moses na Jeremaia i gat wanem hevi? Tasol wanem samting i kamap bilong stretim? (b) Olsem wanem yumi inap save tru, God bai mekim na ol Witnes bai inapim tru wok bilong autim tok bilong Kingdom?
[Piksa long pes 16]
Taim ol pikinini i givim bel long bekim tok, olsem wanem dispela i save kirapim ol manmeri i bikpela pinis?