Jehova—God Bilong Skulim Ol Man
“God bai i skulim olgeta manmeri.”—JON 6:45.
1. Nau Jisas i mekim wanem long Kaperneam?
KRAIS JISAS i wokim ol mirakel na nau ol i lukim em i skulim ol man insait long wanpela haus lotu long Kaperneam, klostu long raunwara Galili. (Jon 6:1-21, 59) Planti ol i no bilip long tok bilong em, em i bin tok: “Mi . . . lusim heven na kam daun.” Ol i kros na i tok: “Dispela man em Jisas, pikinini bilong Josep. Yumi save long papa wantaim mama bilong en. Orait olsem wanem na nau em i tok, ‘Mi bin lusim heven na mi kam daun’?” (Jon 6:38, 42) Jisas i krosim ol na em i tokaut olsem: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi. Na long las de bai mi kirapim em long matmat.”—Jon 6:44.
2. I gat wanem as na yumi inap bilip long tok promis bilong Jisas long ol man i dai pinis bai kirap bek?
2 Dispela em i wanpela gutpela tok promis tru, a? Jisas bai kirapim bek ol man long las de, taim Kingdom bilong God i bosim graun! Yumi inap bilip long dispela tok promis, long wanem, Papa, em God Jehova, em tu i mekim wankain tok promis na i strongim dispela tok bilong Jisas. (Jop 14:13-15; Aisaia 26:19) Tru tumas, Jehova, em God bilong skulim yumi olsem ol man i dai pinis bai kirap bek, “em i gutpela tisa tru.” (Jop 36:22) Jisas i laik stiaim tingting bilong ol man i go long ol tok bilong Papa, olsem na nau em i tok: “Tok i stap long buk bilong ol profet olsem, ‘God bai i skulim olgeta manmeri.’ ”—Jon 6:45.
3. Bai yumi skelim wanem ol askim?
3 Em bai gutpela samting tru sapos yumi insait long dispela lain em profet Aisaia i bin tok long ol olsem: “Bai mi [Jehova] yet mi skulim ol pikinini bilong yu.” (Aisaia 54:13) Olsem wanem? Jehova inap skulim yumi tu? Husat ol i bin i stap olsem pikinini bilong em na em i bin skulim ol? Na wanem ol bikpela tok Jehova i skulim ol man long en na yumi mas kisim save long en na bihainim bambai em inap mekim gut long yumi? Long bipo Jehova i bin skulim ol man olsem wanem? Long nau em i save mekim wankain pasin long skulim ol man o nogat? Bai yumi skelim ol dispela askim.
Papa, Tisa, Man Marit
4. Husat ol i namba wan pikinini bilong Jehova em ol i bin kisim skul long em?
4 Namba wan taim bilong Jehova long kamap Papa na Tisa wantaim, em taim em i bin wokim dispela wanpela Pikinini tasol bilong em, em Jisas taim em i no kamap man yet long graun. Nem bilong dispela Pikinini, em “Tok,” long wanem, em i Nambawan Maus bilong Jehova. (Jon 1:1, 14; 3:16) Tok em i bin wok wantaim Papa, “na [Papa] em i makim [em] olsem saveman i bosim wok,” na Papa bilong em i bin skulim em gut. (Sindaun 8:22, 30) Em i bin kamap rot bilong Papa long wokim ol narapela pikinini bilong God, em “ol ensel,” na olgeta narapela samting tu. Yumi save, ol i bin amamas tru taim God i skulim ol! (Jop 1:6; 2:1; 38:7; Kolosi 1:15-17) Bihain God i wokim namba wan man, em Adam. Em tu i “pikinini bilong God,” na Baibel i kamapim klia olsem Jehova i bin skulim em.—Luk 3:38; Stat 2:7, 16, 17.
5. Wanem gutpela samting tru i lus long Adam? Tasol Jehova i skulim husat? Bilong wanem Jehova i mekim olsem?
5 Tasol sori tru! Long laik bilong em yet Adam i bikhet long Jehova na em i no stap moa olsem pikinini bilong God. Olsem na ol pikinini na tumbuna pikinini bilong em i no inap tok ol i pikinini bilong God, maski Adam i tumbuna bilong ol. Tasol ol man i laik bai Jehova i soim rot long ol, em i bin skulim ol, maski ol i gat sin. Yumi ken tingim Noa, “em i gutpela man, na wokabaut bilong en i stret long ai bilong God,” olsem na Jehova i skulim Noa. (Stat 6:9, 13–Stat 6:13 i go inap 7:5) Abraham i bihainim tok bilong Jehova, na em i kamapim long ples klia olsem em i “pren bilong [Jehova],” olsem na Jehova i skulim em tu.—Jems 2:23; Stat 12:1-4; 15:1-8; 22:1, 2.
6. Bihain Jehova i tingim husat ol i olsem “pikinini” bilong em? Em i wanem kain tisa bilong ol?
6 Bihain bihain, long taim bilong Moses, Jehova i wokim kontrak wantaim lain Israel. Olsem na dispela lain i kamap olsem lain God i bin makim bilong em stret, na God i tingim ol i olsem “pikinini” bilong em. God i tok: “Israel i olsem namba wan pikinini man bilong mi.” (Kisim Bek 4:22, 23; 19:3-6; Lo 14:1, 2) Dispela kontrak Jehova i mekim wantaim ol Israel i as na ol inap tok long em olsem: “Yu Bikpela, yu papa tru bilong mipela.” (Aisaia 63:16) Jehova i mekim wok papa bilong em na long pasin sori em i skulim ol pikinini bilong em, em lain Israel. (Song 71:17; Aisaia 48:17, 18) Taim ol i lusim em, em i marimari long ol na tokim ol: “Yupela manmeri i bin lusim mi, yupela i mas kam bek long mi.”—Jeremaia 3:14.
7. Lain Israel i stap olsem wanem wantaim Jehova?
7 Taim Jehova i wokim kontrak wantaim Israel, em i kamap olsem Man bilong dispela lain, na Israel i kamap olsem meri bilong em. Profet Aisaia i tok long dispela meri olsem: “Mi God i bin wokim yu, mi . . . stap olsem man bilong yu. Nem bilong mi, em Bikpela [Jehova] I Gat Olgeta Strong.” (Aisaia 54:5; Jeremaia 31:32) Jehova i bin mekim stret wok bilong em olsem Man bilong Israel, tasol lain Israel i kamap olsem meri i no stap gut long man bilong em. Jehova i tok: “Yupela . . . Israel, yupela i bin lusim mi, olsem meri bilong brukim marit i lusim man bilong en.” (Jeremaia 3:20) Jehova i wok long tokim ol pikinini bilong dispela meri i lusim em pinis long ol i mas i kam bek long em; em i wok yet long skulim ol.—Aisaia 30:20; 2 Stori 36:15.
8. Jehova i rausim lain Israel, tasol em i gat wanem “meri” i stap yet, em dispela meri bilong pastaim i olsem piksa bilong en?
8 Taim lain Israel i sakim na kilim i dai Pikinini bilong God, em Krais Jisas, God i rausim dispela lain. Dispela lain Juda i no stap moa olsem meri bilong em, na em i no stap moa olsem Papa na Tisa bilong ol bikhet pikinini bilong dispela “meri.” (Matyu 23:37, 38) Tasol Israel i olsem piksa tasol bilong narapela “meri.” Aposel Pol i kolim tok bilong Aisaia 54:1, i toktok long “meri i no save karim pikinini,” na narapela meri em “meri, man bilong en i stap yet wantaim em,” em lain Israel bilong skin; tupela meri hia i narapela narapela. Pol i tokaut olsem ol Kristen God i makim, ol i pikinini bilong dispela “meri i no save karim pikinini,” em Pol i kolim olsem “Jerusalem i stap long heven.” Dispela “meri,” em lain Israel bilong skin i olsem piksa bilong en, em oganaisesen bilong God long heven, olsem ol ensel.—Galesia 4:26, 27.
9. (a) Jisas i tok long husat taim em i tok, ‘[Jehova] yet bai i skulim ol pikinini bilong yu’? (b) Olsem wanem ol man inap kamap pikinini bilong God long spirit?
9 Olsem na taim Jisas i stap long dispela haus lotu long Kaperneam na em i kolim tok profet bilong Aisaia i tok: “Bai mi [Jehova] yet mi skulim ol pikinini bilong yu,” em i toktok long ol manmeri ol bai kamap “pikinini” bilong “Jerusalem i stap long heven,” em dispela oganaisesen bilong God long heven, olsem meri bilong em. Ol Juda i bilip long tok bilong Krais Jisas, em God i salim i kam olsem maus bilong em, ol inap kamap pikinini bilong dispela “meri” bilong God bipo em i no save karim pikinini, na ol bai kamap wanpela “lain manmeri i holi,” em “Israel tru bilong God” long spirit. (1 Pita 2:9, 10; Galesia 6:16) Aposel Jon i stori long Jisas i bin opim rot bambai ol inap kamap pikinini bilong God long spirit na em i tok: “Em i go long as ples bilong em yet, tasol ol lain bilong en ol i no kisim em. Tasol sampela manmeri i kisim em, em ol lain i bilip long nem bilong em. Na em i givim namba long ol bai ol i ken kamap pikinini bilong God.”—Jon 1:11, 12.
Ol Bikpela Tok Jehova i Skulim Yumi Long En
10. Taim pasin bikhet i kamap long Iden, kwiktaim Jehova i kirap skulim ol man long wanem samting bilong dispela “lain,” olsem pikinini? Dispela Pikinini em i husat?
10 Jehova i gutpela Papa na em i save tokim ol pikinini bilong em long ol samting em i laik mekim. Olsem na taim wanpela ensel i bikhet na i kirapim namba wan man na meri long sakim tok, kwiktaim Jehova i tokaut long ol samting em bai mekim bilong kamapim laik bilong em long mekim graun i kamap olsem paradais. Em i tok, em bai mekim pasin birua i kamap namel long “snek bilong bipo yet,” em Satan, “na meri.” Orait nau Jehova i tok, “lain,” olsem pikinini, bilong meri bai krungutim “het” bilong Satan, na em bai dai. (Stat 3:1-6, 15; KTH 12:9; 20:9, 10) Olsem yumi tok pinis, dispela meri—em dispela “Jerusalem i stap long heven”—em oganaisesen bilong God long heven, olsem ol ensel. Tasol husat dispela pikinini bilong meri? Em Pikinini bilong God, Krais Jisas, em i bin i stap long heven na God i salim em i kam, na em bai bagarapim Satan long bihain.—Galesia 4:4; Hibru 2:14; 1 Jon 3:8.
11, 12. Olsem wanem Jehova i skruim sampela save moa long dispela bikpela tok bilong em long “pikinini”?
11 Jehova i skruim sampela tok moa long dispela bikpela tok bilong em long “pikinini” taim em i tok promis long Abraham: “Bai mi mekim ol lain tumbuna pikinini bilong yu i kamap planti tru olsem ol sta bilong skai . . . na olgeta lain [bai kisim blesing long rot bilong tumbuna pikinini bilong yu, NW].” (Stat 22:17, 18) Jehova i mekim wok long aposel Pol long tokaut olsem Krais Jisas em i Pikinini bilong Abraham em God i tok promis long kamapim, tasol i gat sampela moa bai kamap olsem ol nambatu pikinini. Pol i tok: “Sapos yupela i stap lain bilong Krais, orait yupela i stap pikinini bilong Abraham tu. Em yupela tasol ol lain bilong kisim dispela ol samting bipo God i bin promis long givim long ol lain bilong Abraham.”—Galesia 3:16, 29.
12 Jehova i tokaut tu olsem dispela Pikinini, em Krais, em bai kamap insait long lain king bilong lain Juda, na em “bai i bosim olgeta lain manmeri.” (Stat 49:10) Jehova i mekim wanpela tok promis long King Devit bilong lain Juda, olsem: “Oltaim wanpela man long lain bilong en bai i stap king. Na wanpela king bilong lain bilong en bai i bosim ol Israel oltaim, olsem skai antap i stap oltaim. Ol lain tumbuna bilong en i no inap pinis. Bai ol i stap oltaim. Na ol lain bilong en bai i bosim ol manmeri longtaim tru inap olsem san i stap.” (Song 89:3, 4, 29, 36) Taim ensel Gebriel i tokaut olsem mama i karim pinis Jisas, em i tok, dispela pikinini em man God i bin makim bilong kamap King—em dispela Pikinini bilong Devit. Gebriel i tok: “Em bai i stap bikman. Na bai ol i kolim em Pikinini bilong God Antap Tru. Na God bai i putim em i stap king olsem tumbuna bilong en Devit. . . . Na wok king bilong en bai i no inap pinis.”—Luk 1:32, 33; Aisaia 9:6, 7; Daniel 7:13, 14.
13. Taim Jehova i skulim yumi, yumi mas mekim wanem na bai yumi ken kisim blesing long em?
13 Bilong kisim blesing long Jehova, yumi mas save long dispela bikpela tok long Kingdom bilong God na bihainim dispela tok. Yumi mas bilip olsem Jisas i bin lusim heven na i kam daun, na em i dispela man God i bin makim bilong kamap King—em dispela Pikinini i kamap insait long lain king na em bai bosim wok bilong kamapim bek Paradais long graun—na em bai kirapim bek ol man i dai pinis. (Luk 23:42, 43; Jon 18:33-37) Long Kaperneam, taim Jisas i toktok long kirapim bek ol man i dai pinis, ol Juda inap save, tok bilong em i tru. Long wanem, sampela wik tasol paslain long dispela, ating long Kaperneam yet, Jisas i bin kirapim bek pikinini meri bilong hetman bilong haus lotu, em pikinini i gat 12-pela krismas! (Luk 8:49-56) Na i gat as na yumi tu i mas bilip na mekim ol samting i stret wantaim ol tok bilong Kingdom Jehova i skulim yumi long en na i strongim yumi long wetim ol gutpela samting bai kamap bihain!
14, 15. (a) Jisas i ting olsem wanem long Kingdom bilong Jehova? (b) Wanem ol samting bilong Kingdom bilong Jehova yumi mas save gut long en na save long pasin bilong kamapim gut long ol man?
14 Taim Jisas i stap man long graun, long olgeta taim em i skulim ol man long Kingdom bilong Jehova. Dispela em i as tok bilong olgeta tok em i autim long ol man, na em i tokim ol disaipel long beten long dispela Kingdom i mas i kam. (Matyu 6:9, 10; Luk 4:43) Ol Juda bilong skin ol inap “i stap long kingdom,” olsem kamap pikinini bilong kingdom, tasol planti ol i no bilip, olsem na ol i lus long kisim dispela gutpela namba. (Matyu 8:12; 21:43) Jisas i tokaut olsem “liklik lain” tasol bai kamap olsem “ol manmeri [olsem ol pikinini] bilong kingdom.” Dispela lain “manmeri bilong kingdom” ol i bilong “kisim ol gutpela samting” wantaim Krais long Kingdom bilong em long heven.—Luk 12:32; Matyu 13:38; Rom 8:14-17; Jems 2:5.
15 Hamas manmeri Krais bai kisim i go long heven bilong i stap king wantaim em na bosim graun? Baibel i tok, i gat 144,000 tasol. (Jon 14:2, 3; 2 Timoti 2:12; KTH 5:10; 14:1-3; 20:4) Tasol Jisas i tok em i gat “ol arapela sipsip” em ol bai stap aninit long dispela Kingdom. Bai ol i no gat sik, na bai ol i stap bel isi wantaim long Paradais long graun. (Jon 10:16; Song 37:29; KTH 21:3, 4) Yumi mas save gut long ol tok bilong Kingdom Jehova i skulim yumi long en, na yumi mas save long pasin bilong kamapim gut dispela tok long ol man.
16. Yumi mas kisim save long wanem bikpela tok bilong Jehova na bihainim?
16 Aposel Pol i kamapim klia narapela bikpela tok Jehova i skulim yumi long en. Em i tok: “Pasin bilong givim bel bilong yupela long ol manmeri bilong God, . . . God i skulim yupela pinis long dispela pasin.” (1 Tesalonaika 4:9) Yumi mas kamapim long ples klia olsem yumi gat dispela pasin bilong laikim ol narapela bambai God i ken amamas long yumi. Baibel i tok: “God em i as bilong dispela pasin bilong laikim ol arapela,” olsem na yumi mas bihainim dispela pasin bilong em. (1 Jon 4:8; Efesus 5:1, 2) Sori tru, planti man i pundaun tru na ol i no lain long laikim ol narapela man olsem God i skulim ol long mekim. Orait, olsem wanem long yumi? Yumi bihainim dispela tok Jehova i skulim yumi long en?
17. Yumi mas bihainim tingting bilong husat?
17 Em i bikpela samting tru long yumi mas putim gut yau long olgeta tok Jehova i skulim yumi long en. Yumi mas i gat wankain tingting olsem bilong ol man bilong raitim Song, ol i tok: “God, yu mas skulim mi long ol gutpela pasin bilong yu, na soim mi long rot bilong yu. Lainim mi long bihainim tok tru bilong yu.” “Yu mas lainim mi long ol stretpela lo bilong yu. . . . Givim gutpela tingting na gutpela save long mi. . . . Skulim mi gut long tok bilong yu.” (Song 25:4, 5; 119:12, 66, 108) Sapos yu gat wankain tingting olsem bilong ol man bilong raitim ol dispela Song, orait yu inap insait long dispela bikpela lain tru Jehova i skulim ol.
Jehova i Skulim Planti Manmeri Tru
18. Profet Aisaia i tok profet long wanem samting bai kamap long taim bilong yumi?
18 Profet Aisaia i tok profet long ol samting bai kamap long taim bilong yumi: “Wanpela taim bai i kamap bihain na dispela maunten, haus bilong Bikpela i sanap long en, em bai i stap antap tru na i winim olgeta arapela maunten. Na . . . [planti manmeri] bai i tok olsem, ‘Kam, yumi go antap long maunten . . . bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim.’ ” (Aisaia 2:2, 3; Maika 4:2) Husat ol dispela manmeri Jehova i skulim ol?
19. Jehova i skulim husat long nau?
19 Jehova i no skulim dispela lain tasol em ol bai mekim wok king wantaim Krais long heven, nogat. Olsem yumi tok pinis, Jisas i tok em i gat “ol arapela sipsip” ol bai stap long graun aninit long Kingdom, na ol i no bilong dispela “liklik lain sipsip” ol bai stap insait long Kingdom. (Jon 10:16; Luk 12:32) Dispela lain “planti manmeri tru” ol bai abrusim bagarap long taim bilong “bikpela hevi tru,” ol i bilong dispela lain arapela sipsip na Jehova i orait long ol, long wanem, ol i bilip long blut bilong Jisas em i kapsaitim pinis. (KTH 7:9, 14, NW) Tru, ol dispela “arapela sipsip” i no insait tru long dispela lain, olsem pikinini, em Aisaia 54:13 i tok long en, tasol Jehova i skulim ol tu. Olsem na i stret ol i kolim Jehova olsem “Papa,” long wanem, bihain bai em i kamap olsem Bubu bilong ol long rot bilong “Papa bilong i stap oltaim oltaim,” em Krais Jisas.—Matyu 6:9; Aisaia 9:6.
Jehova i Skulim Yumi Olsem Wanem
20. Jehova i save skulim ol man long wanem ol rot?
20 Jehova i save skulim ol man long kain kain rot. Em i skulim yumi long rot bilong ol samting em i bin wokim, na ol i kamapim long ples klia olsem em i stap tru na em i gat gutpela tingting na bikpela save tru. (Jop 12:7-9; Song 19:1, 2; Rom 1:20) Na narapela rot bilong em long skulim ol man, em i save toktok stret wantaim ol, olsem em i bin mekim long Jisas taim em i stap yet long heven. Baibel i stori long 3-pela taim Jehova i bin toktok stret long sampela man long graun.—Matyu 3:17; 17:5; Jon 12:28.
21. Wanem ensel i mekim bikpela wok tru olsem maus bilong Jehova? Tasol olsem wanem yumi save, i gat sampela moa ol i stap olsem maus bilong Jehova?
21 Na Jehova i save skulim ol man long rot bilong ol ensel, na wanpela bilong ol em dispela Namba Wan Pikinini bilong em, em “Tok.” (Jon 1:1-3) Jehova inap toktok stret long nambawan gutpela pikinini bilong em Adam long gaden Iden, tasol yumi ken ting em i bin toktok wantaim Adam long rot bilong Jisas, em i stap long heven. (Stat 2:16, 17) Na yumi ken ting Jisas yet em “dispela ensel bilong God i save go paslain long ami bilong Israel,” na Jehova i tokim ol long em olsem: “Yupela i mas harim gut tok bilong en na bihainim.” (Kisim Bek 14:19; 23:20, 21) Na yumi ken ting, Jisas em dispela “kepten bilong ami bilong Bikpela” em i kamap long Josua bilong strongim em. (Josua 5:14, 15) Jehova i save skulim ol man long rot bilong ol narapela ensel tu, olsem ol ensel em i bin mekim wok long ol bilong givim Lo bilong em long Moses.—Kisim Bek 20:1; Galesia 3:19; Hibru 2:2, 3.
22. (a) Husat ol man long graun Jehova i bin mekim wok long ol bilong skulim ol man? (b) Wanem nambawan rot bilong Jehova long skulim ol man long nau?
22 Na God Jehova i save skulim ol man long rot bilong sampela man bilong graun tu. Ol papamama long Israel ol i mas skulim ol pikinini bilong ol; ol profet, ol pris, ol bikman, ol Livai, ol i bin skulim lain Israel long Lo bilong Jehova. (Lo 11:18-21; 1 Samuel 12:20-25; 2 Stori 17:7-9) Jisas i bin i stap nambawan Maus bilong Jehova long graun. (Hibru 1:1, 2) Planti taim Jisas i tok, ol tok em i skulim ol man long en, em ol tok Papa i bin skulim em long en, olsem na ol man i harim ol tok bilong Jisas, i olsem Jehova yet i skulim ol. (Jon 7:16; 8:28; 12:49; 14:9, 10) Jehova i bin kirapim ol man long raitim ol tok bilong em long buk, na long taim bilong yumi em i save skulim ol man long rot bilong dispela buk em spirit bilong em i bin kamapim, em Baibel.—Rom 15:4; 2 Timoti 3:16.
23. Long stori i kamap bihain long dispela, bai yumi skelim wanem ol askim?
23 Dispela taim nau yumi stap long en em i bikpela taim tru, long wanem, Baibel i tok promis olsem ‘wanpela taim bai i kamap bihain [em taim bilong yumi] na God bai i skulim planti manmeri long ol pasin em i laik bai ol i mekim.’ (Aisaia 2:2, 3) Em i save skulim yumi olsem wanem? Yumi mas mekim wanem bambai dispela bikpela wok bilong Jehova long skulim ol man i ken helpim yumi na yumi tu i ken insait long dispela wok? Bai yumi skelim ol dispela askim long stori i kamap bihain long dispela.
Bai Yu Bekim Olsem Wanem?
◻ Olsem wanem Jehova i kamap Papa, na Tisa, na Man Marit?
◻ Jehova i skulim yumi long wanem ol samting bilong “pikinini”?
◻ Yumi mas bihainim wanem bikpela tok Jehova i skulim yumi long en?
◻ Jehova i save skulim yumi long wanem rot?
[Piksa long pes 10]
Jisas i bin kirapim bek pikinini bilong Jairus na dispela i as na yumi ken bilip tru long tok promis bilong em long kirapim bek ol man i dai pinis