Wanpela Gavman Em Bai Kamapim Paradais
Taim Jisas i stap long graun em i tokim lain bilong em long beten long Kingdom Bilong God i mas i kam: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:9, 10) Na planti taim Jisas “i autim gutnius bilong kingdom.” (Matyu 4:23) Jisas i mekim planti tok long Kingdom, winim ol narapela tok em i mekim. Bilong wanem? Long wanem, Kingdom em rot bilong God long stretim ol hevi i save painim yumi nau long dispela taim. Long rot bilong dispela Kingdom, liklik taim bai God i pinisim ol pait, hangre, sik, na pasin nogut, na bihain ol man bai stap wanbel na bel isi.
Olsem wanem? Yu laik i stap long gutpela taim olsem? Sapos olsem, orait, yu mas ritim dispela buklet. Em bai lainim yu olsem Kingdom em i wanpela gavman, na em i winim olgeta narapela gavman i bin bosim graun. Bai yu save, isi isi God i bin toksave long lain bilong em long ol samting em bai mekim long rot bilong dispela Kingdom. Na bai yu save tu long olsem wanem Kingdom i ken helpim yu long nau.
Na long nau yu ken i kam aninit long dispela Kingdom Bilong God. Tasol pastaim yu mas kisim save long Kingdom. Olsem na mipela laik bai yu ritim gut dispela buklet. Baibel em as bilong olgeta tok bilong en.
Pastaim yumi mas save, bilong wanem Kingdom Bilong God i mas bosim graun.
Taim God i wokim namba wan man God i wokim em i nambawan olgeta, na God i putim em long wanpela gutpela ples paradais. Long dispela taim i no gat wok long God i mas kamapim Kingdom.
Tasol Adam tupela Iv, em namba wan tumbuna papamama bilong yumi, tupela i harim tok bilong Satan, em wanpela ensel i bikhet. Em i mekim sampela tok giaman long tupela long pasin bilong God. Dispela tok i kirapim ol long bikhet long God. Olsem na nau ol i mas i dai, long wanem, “sin i save givim pe long ol,” na “dispela pe em dai tasol.”—Rom 6:23.
Sinman i no inap kamapim pikinini i nambawan olgeta, olsem na olgeta pikinini bilong Adam i no nambawan olgeta; ol i sinman na ol i bilong i dai.—Rom 5:12.
Kirap long dispela taim na i kam inap nau, Kingdom Bilong God tasol inap helpim ol man na bai sin na dai i ken lusim ol. Na Kingdom bai kamapim long ples klia ol tok giaman Satan i bin sutim long God. Na dispela tok i no ken bagarapim moa nem bilong God.
God Jehova i bin tok promis long wanpela pikinini o “lain” bai kamap na em bai helpim ol man long lusim sin. (Stat 3:15) Dispela pikinini bai stap King bilong Kingdom Bilong God.
Dispela pikinini em i husat?
Inap 2,000 yia samting bihain long Adam i bin mekim rong, wanpela gutpela man i stap, nem bilong em Abraham. Jehova i tokim Abraham long lusim ples bilong em na i go sindaun long ol haus sel long hap bilong Palestain.
Abraham i mekim olgeta samting Jehova i tokim em long mekim, na em i mekim wanpela samting i hatwok tru long em: Jehova i tokim em long kilim i dai pikinini bilong em, Aisak, olsem ofa long wanpela alta.
Tasol Jehova i no laik bai Abraham i kilim tru Aisak olsem wanpela ofa, nogat. Jehova i laik save, Abraham i givim bel olgeta long em o nogat. Olsem na klostu Abraham i laik kilim i dai Aisak na nau Jehova i pasim em.
Nau Jehova i save pinis Abraham i gat strongpela bilip, olsem na Jehova i tok promis long givim graun bilong Palestain long lain tumbuna pikinini bilong Abraham. Na Jehova i tok, dispela Pikinini bipo em i tok promis long en, em bai kamap insait long lain tumbuna pikinini bilong Abraham na Aisak.—Stat 22:17, 18; 26:4, 5.
Aisak i kamapim tupela pikinini man, em Iso na Jekop; tupela i twins. Jehova i bin tok promis olsem dispela Pikinini bai kamap insait long lain tumbuna pikinini bilong Jekop.—Stat 28:13-15.
Jehova i givim nem Israel long Jekop, na Jekop i kamapim 12-pela pikinini man, na 12-pela i kamapim sampela pikinini moa, olsem na ol tumbuna pikinini bilong Abraham i kamap planti.—Stat 46:8-27.
Taim bilong bikpela hangre i kamap, na bos bilong kantri Isip, em Fero, em i singautim Jekop na Jekop i kisim famili bilong em na ol i go sindaun long Isip.—Stat 45:16-20.
Taim ol i stap long Isip ol i kisim save olsem dispela Pikinini bai kamap insait long lain bilong Juda, em wanpela pikinini man bilong Jekop.—Stat 49:10.
Bihain Jekop i dai pinis, na ol lain tumbuna pikinini bilong em i kamap planti tru, olsem na ol Isip i pret, na ol i kalabusim ol na ol i mas wok kalabus long ol Isip.—Kisim Bek 1:7-14.
Bihain Jehova i salim wanpela man i gat strongpela bilip, em Moses, bilong tokim Fero long larim ol Israel i go.—Kisim Bek 6:10, 11.
Fero i sakim dispela tok, olsem na Jehova i salim 10-pela hevi i kam long ol Isip. Long namba 10 hevi Jehova i salim wanpela ensel bilong kilim i dai namba wan pikinini man long olgeta famili bilong lain Isip.—Kisim Bek, sapta 7 i go inap sapta 12.
God i tokim Israel olsem sapos ol i kilim wanpela yangpela sipsip na kaikai dispela long apinun, na putim hap blut bilong en long tupela pos bilong dua, ensel bai kalapim ol dispela haus. Ol i mekim olsem, na ensel i no kilim i dai ol namba wan pikinini bilong ol.—Kisim Bek 12:1-35.
Fero i pilim dispela bikpela hevi, olsem na em i tokim ol Israel long lusim Isip. Tasol bihain gen em i senisim tingting na em i ronim ol Israel bilong kisim bek ol.
Jehova i opim solwara Retsi na wokim rot bambai ol Israel i ken ranawe. Fero wantaim ami bilong em i bihainim ol, tasol wara i karamapim ol na ol i dring wara na ol i bagarap.—Kisim Bek 15:5-21.
Jehova i bringim ol Israel i go long wanpela maunten i stap long hap i no gat man. Nem bilong dispela maunten em Sainai. Jehova i givim Lo bilong em long ol na em i tok, sapos ol i bihainim, ol bai kamap lain pris bilong wanpela kingdom na lain holi. Olsem na rot i op long ol Israel na bihain bai ol inap holim bikpela wok insait long Kingdom Bilong God.—Kisim Bek 19:6; 24:3-8.
Ol Israel i stap olsem wanpela yia samting long maunten Sainai, na nau Jehova i bringim ol i go long hap bilong Palestain, bipo Jehova i tok promis long givim long tumbuna bilong ol, em Abraham.
Ol Israel i kamap pinis long Palestain, na bihain God i orait long ol i gat king bilong bosim ol, olsem na God i gat wanpela kingdom long graun.
Devit em i namba 2 king bilong Israel. Devit em tumbuna pikinini bilong Juda. Devit i daunim olgeta birua bilong Israel, na em i makim Jerusalem bilong kamap nambawan biktaun bilong lain Israel.
Ol samting i kamap taim Devit i stap king i soim olsem taim Jehova i helpim wanpela king, i no gat wanpela gavman o hetman bilong graun inap daunim dispela king.
Jehova i tok pinis, dispela Pikinini em i tok promis long salim i kam, em i wanpela tumbuna pikinini bilong Devit.—1 Stori 17:7, 11, 14.
Solomon em pikinini man bilong Devit, na Solomon i kisim wok king bihain long Devit. Solomon i gat savetingting, na taim em i bosim ol Israel ol i gat gutpela sindaun.
Solomon i wokim wanpela gutpela haus lotu bilong Jehova long Jerusalem. Taim Solomon i stap king, lain Israel i gat gutpela sindaun tru na ol i stap bel isi, na dispela i makim ol gutpela gutpela samting ol manmeri bai kisim taim Kingdom Bilong God i bosim graun.—1 King 4:24, 25.
Tasol planti king i kamap bihain long Solomon ol i no stap gut long Jehova.
Orait, taim lain tumbuna pikinini bilong Devit i mekim wok king long Jerusalem, Jehova i salim profet bilong em, em Aisaia, long tokaut olsem long bihain wanpela Pikinini bilong Devit bai stap king na bosim olgeta hap bilong graun na em bai bihainim stretpela pasin. Dispela king em dispela Pikinini bipo Jehova i tok promis long salim i kam.—Aisaia 9:6, 7.
Aisaia i tok profet olsem wok king bilong Em bai winim tru wok king bilong Solomon.—Aisaia, sapta 11 na sapta 65.
Orait nau ol wokboi bilong God ol i tingting strong na ol i laik save, dispela Pikinini em i husat tru.
Tasol taim dispela Pikinini i no kamap yet, ol king bilong Israel i mekim pasin nogut tru, olsem na long yia 607 B.C.E. Jehova i larim ol Babilon i daunim ol Israel na kisim ol i go kalabus long Babilon. Tasol God i no lusim tingting long tok promis em i bin mekim. Bihain dispela Pikinini i mas kamap tru insait long lain bilong Devit.—Esekiel 21:25-27.
Yumi tingim ol samting i bin painim ol Israel na nau yumi save, maski wanpela gutpela king i kamap, em inap helpim ol man liklik tasol, na em i no inap helpim ol long olgeta samting. Ol gutpela king i dai, na bihain ol king nogut i kamap. Husat inap stretim dispela hevi? Em dispela Pikinini tasol God i tok promis long kamapim.
Planti tausen yia bihain dispela Pikinini i kamap tru. Em i husat?
Wanpela ensel bilong God i bekim dispela askim long wanpela meri singel bilong lain Israel, nem bilong em Maria. Ensel i tok, Maria bai karim wanpela pikinini man na bai ol i kolim em Jisas. Ensel i tok:
“Em bai i stap bikman. Na bai ol i kolim em Pikinini bilong God Antap Tru. Na God bai i putim em i stap king olsem tumbuna bilong en Devit.”—Luk 1:32, 33.
Olsem na Jisas em dispela Pikinini God i bin tok promis long kamapim, na bihain em bai stap King bilong Kingdom Bilong God. Olsem wanem Jisas i narapela kain long ol dispela gutpela man bilong bipo?
Jisas i kamap long rot bilong wanpela mirakel. Mama bilong em i no bin slip wantaim wanpela man, na papa bilong em i no wanpela man bilong graun. Bipo Jisas i stap laip long heven, na holi spirit o strong bilong God i kisim laip bilong em long heven na putim i go long bel bilong Maria. Olsem na em i no kisim sin bilong Adam. I no gat wanpela taim Jisas i bin mekim rong. Nogat.—1 Pita 2:22.
Taim Jisas i gat 30 krismas em i kisim baptais.
Em i tokim ol man long ol samting bilong Kingdom Bilong God, na bihain em i tokim ol olsem em i King bilong dispela Kingdom.—Matyu 4:23; 21:4-11.
Na em i wokim planti mirakel.
Em i oraitim ol sikman.—Matyu 9:35.
Em i wokim mirakel na givim kaikai long ol man i hangre.—Matyu 14:14-22.
Na em i kirapim bek sampela man i dai pinis.—Jon 11:38-44.
Ol dispela mirakel i makim ol samting Jisas bai mekim bilong helpim ol man taim em i stap King long Kingdom Bilong God.
King Devit i makim Jerusalem i kamap nambawan biktaun long kingdom bilong em, a? Yu tingim yet? Jisas i tok, Kingdom Bilong God i no ken i stap long graun; em bai stap long heven. (Jon 18:36) Olsem na ol i kolim dispela Kingdom olsem “Jerusalem i stap long heven.”—Hibru 12:22, 28.
Jisas i kolim ol lo ol manmeri i aninit long Kingdom ol i mas bihainim. Ol dispela lo i stap long Baibel. Ol bikpela lo i tok, man i mas laikim tru God na laikim ol narapela man.—Matyu 22:37-39.
Na Jisas i tok, i no em tasol bai bosim dispela Kingdom. God bai makim sampela man bilong graun na bai ol i go i stap long heven na mekim wok king wantaim Jisas. (Luk 12:32; Jon 14:3) God i makim hamas man? Kamapim Tok Hait 14:1 i tok: 144,000.
Sapos 144,000 tasol bai go long heven, orait ol narapela man bilong graun i ken tingting long wanem gutpela samting ol inap kisim long bihain?
Baibel i tok: “Ol stretpela man bai i kisim graun God i givim ol, na bai ol i stap oltaim long en.”—Song 37:29.
Dispela ol manmeri bai stap oltaim long graun, Baibel i kolim ol olsem ol “arapela sipsip.”—Jon 10:16.
Olsem na i gat tupela samting ol man i ken tingting long kisim: God Jehova i makim 144,000 bilong i go long heven na wok king wantaim Jisas Krais. Tasol ol narapela planti milion manmeri i ken tingting tru long i stap laip oltaim long graun aninit long Kingdom bilong em.—KTH 5:10.
Satan i bel nogut long Jisas na i biruaim em. Jisas i bin autim tok inap 3-pela yia na 6-pela mun, na nau Satan i kirapim ol man long holim em na kilim em i dai; ol i nilim em long wanpela pos. Bilong wanem God i larim dispela samting i painim Jisas?
Tingim, yumi olgeta i tumbuna pikinini bilong Adam, olsem na yumi olgeta i gat sin, na i stret yumi mas i dai.—Rom 6:23.
Na yu ken tingim narapela samting tu: God i wokim mirakel na Maria i karim Jisas, olsem na skin bilong Jisas i nambawan olgeta na em i no mekim wanpela rong bambai em i mas i dai. Tasol God i larim Satan i “kaikaim lek bilong” Jisas, olsem kilim em i dai. Tasol God i kirapim bek Jisas na em i stap laip gen olsem wanpela spirit i no inap i dai. Em inap holim yet dispela laip olsem man bilong graun i nambawan olgeta, olsem na nau em inap mekim wok long dispela samting long baim bek yumi ol manmeri long kalabus bilong sin.—Stat 3:15; Rom 5:12, 21; Matyu 20:28.
Long Baibel i gat sampela tok profet na dispela i olsem piksa bilong lainim yumi long as bilong dispela ofa Jisas i bin mekim.
Jehova i bin tokim Abraham long kilim i dai pikinini bilong em olsem ofa; Jehova i traim Abraham, em i laikim tumas Jehova o nogat. Yu tingim yet?
Dispela i olsem piksa bilong makim ofa bilong Jisas. Na em i makim tu pasin bilong Jehova long laikim tru ol manmeri, olsem na em i larim Pikinini bilong em, Jisas, i dai bilong yumi ken i stap laip.—Jon 3:16.
Jehova i bin helpim ol Israel long lusim Isip, na em i helpim ol namba wan pikinini bilong ol na bai ensel i no ken kilim ol i dai. Yu tingim yet dispela?—Kisim Bek 12:12, 13.
Dispela samting i olsem piksa. Blut bilong sipsip i helpim ol namba wan pikinini bilong ol Israel na ol i stap laip. Na i olsem tu long blut bilong Jisas i kapsait—dispela blut i helpim ol man i bilip long Jisas na ol i ken i stap laip. Ol samting i bin kamap long dispela nait em i helpim ol Israel na ol i lusim kalabus; na i olsem tu long dai bilong Jisas—dispela i helpim ol manmeri long lusim kalabus bilong sin na dai.
Olsem na Baibel i kolim Jisas olsem “Pikinini Sipsip Bilong God. Em i kam bilong rausim sin bilong olgeta manmeri bilong graun.”—Jon 1:29.
Tasol taim Jisas i stap yet long graun em i bungim sampela disaipel na em i lainim ol long autim gutpela tok bilong Kingdom, na em i mekim tu bihain long taim em i dai.—Matyu 10:5; Luk 10:1.
Ol dispela disaipel i namba wan manmeri bilong dispela lain God i singautim ol bilong mekim wok king wantaim Jisas long Kingdom bilong em.—Luk 12:32.
Yu tingim yet dispela tok promis God i bin mekim long ol Juda? Em i tok, sapos ol i bihainim ol tok bilong Lo bai ol i stap lain bilong “mekim wok . . . pris.” Sapos ol i bilip long Jisas, orait nau rot i op bambai ol i ken insait long Kingdom Bilong God na ol i ken mekim wok pris long heven. Tasol planti ol i sakim Jisas.
Olsem na kirap long dispela taim na i kam inap long nau, ol Juda i no i stap lain bilong God moa, na Palestain i no Graun Bilong Promis olsem bipo, nogat.—Matyu 21:43; 23:37, 38.
Kirap long taim bilong Jisas na i kam inap long taim bilong yumi, Jehova i bin wok long singautim na bungim dispela lain ol bai stap king wantaim Jisas long heven. I gat sampela tausen bilong ol i stap yet long graun. Yumi kolim ol olsem lain remnan God i bin makim ol long holi spirit. —KTH 12:17.
Nau yu save liklik long Kingdom Bilong God, a? Em i wanpela gavman bilong heven, na King bilong en em Jisas Krais, na i gat 144,000 man bilong graun ol bai wok wantaim em. Dispela Kingdom bai bosim olgeta gutpela manmeri long graun, na em bai i gat strong tru inap long kamapim gutpela taim long graun.
Taim Jisas i dai pinis na em i kirap bek, em i go long heven. Em i stap long heven na em i wetim taim God i bin makim na bai em i kirap mekim wok king olsem King bilong Kingdom Bilong God. (Song 110:1) Wanem taim bai em i kirap mekim dispela wok?
Bipo, taim Jehova i laik tokim ol man long ol samting bilong Kingdom bilong em, sampela taim em i givim driman long ol.
Long taim bilong Daniel, Jehova i bin givim driman long king bilong Babilon, em Nebukatnesar, na long driman em i lukim wanpela bikpela diwai.—Daniel 4:10-37.
Ol i katim diwai na i pundaun, na as bilong en ol i banisim long ain na bai em i no ken kru inap 7-pela yia.
Diwai i makim Nebukatnesar. Ol i kalabusim as bilong diwai long ain, na dispela i makim Nebukatnesar i kamap longlong na i stap olsem inap 7-pela yia. Bihain em i kisim bek tingting bilong em na em i orait gen.
Ol dispela samting i bin kamap i olsem piksa bilong samting bai kamap bihain. Nebukatnesar i makim olsem Jehova i king bilong olgeta hap graun. Pastaim Jehova i mekim dispela wok king long rot bilong lain tumbuna pikinini bilong King Devit long Jerusalem. Tasol long yia 607 B.C.E. Babilon i daunim Jerusalem na dispela i pasim wok king long Jerusalem. Bai i no gat narapela king long lain bilong Devit i go “inap long taim dispela man husat i gat rait long kisim, em i kam.” (Esekiel 21:27, NW ) Dispela man em Jisas Krais.
Kirap long 607 B.C.E. na i go inap long taim Jisas i kirap long mekim wok king, em hamas yia? Long tok profet em 7-pela yia, na dispela kain yia i olsem piksa, na em i makim 2,520 yia. (KTH 12:6, 14) Kirap long 607 B.C.E. na 2,520 yia bihain, em 1914 C.E.
Olsem na Jisas i kirap long mekim wok king long heven long 1914. Orait, wanem samting i kamap?
Baibel i tokim yumi long rot bilong wanpela driman aposel Jon i bin lukim.
Long driman em i lukim wanpela meri long heven, em i karim wanpela pikinini man.—KTH 12:1-12.
Dispela meri i makim oganaisesen bilong Jehova long heven, em olgeta ensel bilong God ol i mekim wok bilong em long heven. Na dispela pikinini man i makim Kingdom Bilong God, em i kamap long 1914.
Orait, wanem samting i kamap bihain long en? Nau Jisas i stap King, na namba wan wok bilong em, em i tromoi Satan na ol ensel i bin bikhet wantaim em, ol i lusim heven na i kam daun long graun.—KTH 12:9.
Baibel i stori long samting nau i kamap na i tok: “Yu heven, na yupela olgeta lain i stap long heven, yupela i ken amamas. Tasol yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.”—KTH 12:12.
Olsem na taim Jisas i kirap mekim wok king long heven ol birua bilong em i kirap mekim planti samting long graun. Olsem Baibel i tok, Jisas i kirap long mekim wok king namel long ol birua bilong em.—Song 110:1, 2.
Ol dispela samting bai mekim wanem long ol man?
Jisas i tokim yumi: pait, hangre, sik, guria, bai painim ol man.—Matyu 24:7, 8; Luk 21:10, 11.
Yumi lukim pinis ol dispela samting, kirap long 1914 na i kam inap long nau, na dispela samting em i narapela as na bai yumi ken save, Kingdom i bin kirap long dispela yia 1914.
Buk Kamapim Tok Hait i tok ol man bai “bagarapim graun.” (KTH 11:18) Yumi bin lukim dispela samting tu, na moa yet kirap long yia 1914 na i kam inap long nau.
Na aposel Pol i tok, “ol man bai i laikim ol yet tasol, na bai ol i laikim tumas long kisim mani. . . . Ol bai i sakim tok bilong papamama. . . . Bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol.”—2 Timoti 3:1-5.
Em nau, yu save pinis long as bilong ol dispela planti hevi i stap long graun nau long dispela taim. Satan i wok strong tru. Tasol Kingdom Bilong God tu i wok strong.
Bihain liklik long 1914, dispela liklik hap lain ol i wet long mekim wok king wantaim Krais long heven, ol i kirap long autim gutpela tok long ol man na tokim ol, Kingdom i kamap pinis. Dispela wok i kamap bikpela na nau em i go kamap long olgeta hap bilong graun, olsem Jisas i bin tok.—Matyu 24:14.
Bilong wanem ol i mekim dispela wok bilong autim tok?
Namba wan, ol i laik tokim ol man long Kingdom Bilong God.
Namba tu, dispela wok i bilong helpim ol manmeri long tingim samting ol i laik mekim—ol i laik i stap aninit long Kingdom o nogat.
Jisas i tok, long taim bilong yumi olgeta lain manmeri bai bruk i go tupela lain na bai i gat ol man i olsem sipsip na ol man i olsem meme.—Matyu 25:31-46.
Ol manmeri i save laikim tumas Jisas na ol brata bilong em, ol i olsem “sipsip.” Na ol manmeri i no save laikim Jisas na ol brata bilong em, ol i olsem “meme.”
Ol “sipsip” bai kisim laip i stap oltaim, tasol ol “meme” nogat.
Dispela wok bilong autim gutnius bilong Kingdom i helpim ol manmeri long kamapim klia olsem ol i sipsip o meme.
Em hia, wanpela tok profet bilong Aisaia:
“Wanpela taim bai i kamap bihain na dispela maunten, haus bilong Bikpela i sanap long en, em bai i stap antap tru na i winim olgeta arapela maunten. Na olgeta lain manmeri bai i kam bung long en.”—Aisaia 2:2.
Long nau ol man i stap long dispela “taim.”
“Haus” bilong Jehova bilong lotuim Em i stap “antap tru” long ol lotu giaman.
“Ol lain manmeri bilong olgeta hap bai i tok olsem, ‘Kam, yumi go long maunten Saion, em maunten bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.’ Ol bai i tok olsem, long wanem, Jerusalem bai i stap ples bilong Bikpela i skulim ol manmeri na autim tok bilong em long ol.”—Aisaia 2:3.
Olsem na planti man bilong olgeta lain ol i kam bilong lotuim Jehova, na ol i singautim ol narapela man long i kam bung wantaim ol. Ol i lain long bihainim pasin Jehova i save laikim.
“Na bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.”—Aisaia 2:4.
Ol manmeri i lotuim Jehova ol i stap wanbel na i stap isi.
Kingdom Bilong God i mekim dispela wok, olsem na nau i gat planti milion manmeri i aninit long Kingdom, na ol i stap long olgeta hap bilong graun.
Ol i bung wantaim lain remnan, em ol i wet long i go long heven na mekim wok king wantaim Krais.
Ol i kisim kaikai bilong spirit i kam long rot bilong oganaisesen bilong God.—Matyu 24:45-47.
Ol i wanpela bikpela lain brata Kristen i stap long olgeta hap bilong graun, na narapela i laikim tru narapela.—Jon 13:35.
Ol i stap bel isi, na ol i wetim gutpela samting bai kamap bihain.—Filipai 4:7.
Liklik taim na bai ol inapim wok bilong autim gutnius. Na long dispela taim ol “sipsip” bai stap ples klia. Orait, taim ol dispela wok i pinis, Kingdom bai mekim wanem?
Gutpela King Devit i bin daunim ol birua bilong lain bilong God. Yu tingim yet? Orait, King Jisas bai mekim olsem tasol.
King Nebukatnesar i bin driman na em i lukim wanpela traipela imis o piksa na dispela imis i makim olgeta gavman bilong graun, kirap long taim bilong em na i kam inap long nau.
Nau Nebukatnesar i lukim wanpela bikpela ston ol i bin kamautim long wanpela maunten, na dispela ston i sutim imis na imis i bruk olgeta. Dispela ston i makim Kingdom Bilong God.
Ol dispela samting i makim olsem dispela pasin nogut nau i stap long graun wantaim olgeta samting bilong en bai kisim bagarap.—Daniel 2:44.
Em hia sampela samting Kingdom bai daunim na bagarapim:
Olgeta lotu giaman bai pinis, olsem wanpela bikpela ston bilong wilwilim wit ol i tromoi i go daun long solwara.—KTH 18:21.
Olsem na olgeta manmeri i laikim tumas God, NAU ol i mas hariap na lusim ol lotu giaman.—KTH 18:4.
Bihain long dispela, King Jisas bai ‘daunim ol manmeri bilong olgeta lain na em bai i holim stik ain na i bosim strong olgeta lain manmeri.’—KTH 19:15.
Olsem na ol Witnes Bilong Jehova i no save insait liklik long ol wok politik, tasol ol i save givim takis na bihainim ol lo bilong gavman.
Na laspela wok, King Jisas bai tromoi “bikpela snek,” em Satan, i go daun long bikpela hul i no gat as.—KTH 20:2, 3.
Ol “sipsip,” em ol manmeri i save daun long King Jisas, ol tasol bai winim dispela taim bilong bikpela hevi tru, na stap laip.—Matyu 25:31-34, 41, 46.
Aposel Jon i driman na i lukim ol dispela “sipsip” i winim taim bilong bikpela hevi.
“Mi lukim planti manmeri tru ol i bung i stap, na i no inap man i kaunim namba bilong ol. Dispela ol manmeri ol i bilong olgeta lain man na bilong olgeta kantri na bilong olgeta kain skin na bilong olgeta tok ples. Ol i sanap i stap long pes bilong sia king na long ai bilong Pikinini Sipsip. Ol i bin putim ol longpela waitpela klos, na long han bilong ol, ol i holim ol lip bilong diwai pam.”—KTH 7:9.
Dispela “planti manmeri tru,” em olgeta manmeri i save laikim gutnius ol man i autim long ol na ol i bihainim.
Ol dispela manmeri ol i winim taim bilong “bikpela hevi” tru.—KTH 7:14.
Dispela “lip bilong diwai pam” ol i holim i makim olsem ol i amamas long Jisas i stap King bilong ol.
Ol i putim “longpela waitpela klos,” na dispela i makim olsem ol i bilip long ofa bilong Jisas.
“Pikinini Sipsip” em Jisas Krais.
Wanem ol gutpela samting bai ol i kisim? Yu tingim yet bikpela amamas ol Israel i bin kisim taim gutpela King Solomon i stap king bilong ol? Dispela i olsem piksa na i makim bikpela amamas bai kamap long graun taim King Jisas i bosim graun.
Olgeta lain man bai stap isi wantaim na i stap wanbel, na ol man na animal bai stap isi wantaim, olsem profet Aisaia i bin tok.—Song 46:9; Aisaia 11:6-9.
Taim Jisas i stap long graun em i bin oraitim sik bilong ol man; orait, olsem tasol bai em i pinisim sik bilong olgeta man.—Aisaia 33:24.
Em i bin givim kaikai long planti tausen manmeri; orait, bihain bai olgeta man i no ken sot moa long kaikai.—Song 72:16.
Bipo Jisas i bin kirapim bek sampela man i dai pinis, na bihain tu bai em i kirapim bek ol manmeri em bipo ol i no gat rot bilong daunim ol yet aninit long Kingdom Bilong God.—Jon 5:28, 29.
Isi isi Jisas bai helpim ol man bambai ol i ken kamap gutpela olgeta olsem Adam i bin i stap.
Em gutpela samting tru bai kamap bihain, a? Olsem wanem? Yu laik i stap long dispela taim na bai yu ken lukim tru ol dispela gutpela samting? Sapos olsem, orait yu mas wok strong bambai nau yu ken aninit long Kingdom Bilong God na yu ken kamap olsem wanpela “sipsip.”
Stadi long Baibel na kisim save long God Jehova na Jisas Krais.—Jon 17:3.
Bung wantaim ol manmeri i stap aninit long Kingdom.—Hibru 10:25.
Kisim save long ol lo bilong Kingdom na bihainim ol dispela lo.—Aisaia 2:3, 4.
Givim laip bilong yu long Jehova na mekim wok bilong em, na kisim baptais.—Matyu 28:19, 20.
Lusim ol pasin nogut olsem stil, tok giaman, pamuk, na dring longlong, em ol samting God Jehova i no save laikim.—1 Korin 6:9-11.
Mekim wok bilong autim gutnius bilong Kingdom long ol man.—Matyu 24:14.
Sapos yu mekim olsem, bai God i helpim yu, na bai yu lukim dispela Paradais em i bin lus long Adam na long ol tumbuna pikinini bilong em—em dispela Paradais bai God i kamapim bek long graun. Na bai yu lukim truim bilong dispela tok promis: “Mi harim maus bilong wanpela man i singaut strong olsem, ‘Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.’ ”—KTH 21:3, 4.
[Sat long pes 20]
(Bilong save ol dispela rait i stap we long pes, lukim buk o magasin)
607 B.C.E. 1914 C.E.
B.C.E. | C.E.
500 1,000 1,500 2,000 2,520
[Ol Piksa long pes 11]
Abraham
Aisak
Jekop
Juda
Devit
[Piksa long pes 14]
144,000
[Ol Piksa long pes 16]
Adam
Jisas