Ripot Long Wok Bilong Kingdom

Ol i Go Long Ol Longwe Ples Long Grinlan

INAP planti yia pinis ol Witnes Bilong Jehova i bin mekim wok long ol nius Wastaua na Kirap! bilong autim gutnius. Ol dispela nius i save litimapim gutpela tingting na save bilong Jehova i stap long Baibel. I olsem ol i was i stap bilong lukim wanem ol bikpela samting i kamap long graun em ol tok profet bilong Baibel i tok long en, na ol i kamapim ol gutpela tok bilong Baibel olsem rot bilong helpim ol man long karim ol hevi bilong nau.​—⁠Jems 3:⁠17.

Long 1994 ol Witnes long Grinlan i wok strong tru long tilim Wastaua na Kirap! long planti man. Long ol mun i olsem taim bilong san, ol i stretim rot bilong i go autim tok long ol longwe ples long Grinlan. Wanpela lain bilong autim tok bilong Kingdom ol i kisim bot na ol i bihainim nambis long hap bilong wes inap 4,000 kilomita samting, i go inap long Granag (Tul); long dispela pasin ol inap autim tok long ol setelmen i stap long hap not tru bilong graun. Ol i mekim dispela raun i go inap 7-pela wik. Long hap bilong is, tupela marit Witnes i go kamap long wanpela setelmen long Idogrodormit, na ol i autim gutnius long olgeta wan wan haus, em namba wan taim ol i bin mekim olsem long dispela hap.

Sampela mun paslain long dispela taim, long mun Epril, ol Witnes i bin tilim 7,513 Wastaua na Kirap! long ol manmeri bilong Grinlan. I gat 127 pablisa bilong Kingdom, olsem na yumi ken tok, olgeta wan wan i tilim 59 nius. Na wanpela long olgeta 7-pela 7-pela manmeri bilong Grinlan i bin kisim wanpela nius. Long dispela mun yet, Kirap! i bin kamapim sampela stori long sik kensa bilong susu (“Breast Cancer​—⁠Every Woman’s Fear”). Wanpela Witnes i tilim 140 nius, na em i tilim sampela bilong dispela Kirap! long wanpela ripota bilong televisen. Sampela de bihain, taim ol i kamapim nius long televisen, ol i kamapim ol dispela stori bilong sik kensa bilong susu. Ripota i kamapim dispela Kirap! long televisen, na em i opim sampela pes na em i tok ol i bin mekim gutpela wok tru long tanim ol tok bilong en long tok ples Grinlan. Na em i kamapim sampela tok bilong dispela Kirap! i stori long ol samting yumi inap mekim bilong lukautim gut skin na traim sakim dispela sik.

Na ol i singautim dispela Witnes i bin tilim nius long ripota hia long mekim sampela tok long dispela program long televisen. Em i bekim ol askim bilong ol long ol Witnes Bilong Jehova, na em i stori long ol dispela planti nius ol Witnes i bin tilim long dispela mun. Na em i stori tu long ol gutpela tingting na save i stap long ol tok bilong Baibel na em inap helpim yumi long karim ol hevi bilong nau.

Bilong pinisim dispela hap program, ol i toktok wantaim presiden bilong Sosaiti Bilong Sik Kensa long Grinlan. Em i tok, em i no bin lukim sampela tok long sik kensa bilong susu long ol narapela nius bilong tok ples Grinlan olsem ol i kamapim long Kirap! Orait nau em i tokim olgeta i laik save long ol samting bilong dispela kain sik kensa long kaunim ol dispela stori long Kirap! Em i tok, yumi mas tenkyu long ol Witnes Bilong Jehova long ol i bin kamapim ol dispela tok.

Olsem ol i mekim long Grinlan, ol Witnes Bilong Jehova long olgeta hap ol i wok yet long autim tok “long olgeta manmeri i stap long graun.” (Kolosi 1:23; Aposel 1:⁠8) Long rot bilong Wastaua na Kirap! na ol narapela nius na buk bilong Baibel, ol i save helpim olgeta kain man long karim ol hevi bilong nau, na helpim ol tu long tingim na wetim gutpela taim bai kamap bihain.

[Mep long pes 8]

(Bilong save ol dispela rait i stap we long pes, lukim buk o magasin)

Granag (Tul)

Idogrodormit

Nuk (Godtab)