Husat Bai Laikim Dispela Atikol?
1. Taim yumi ritim Wastaua o Kirap! bilong yumi yet, yumi mas tingim wanem samting, na bilong wanem?
1 Lain bilong wokim nius Wastaua na Kirap! i tingim olgeta kain lain na wokim dispela tupela nius. Olsem na ol atikol bilong ol dispela nius i stori long kain kain samting. Taim yumi ritim wanpela atikol, yumi mas skelim, wanem kain man o lain bai laikim dispela stori, na bihain tingting strong long tilim dispela nius long ol.
2. Wanem ol stori long ol magasin bilong yumi bai i stret long narapela narapela lain?
2 Olsem wanem? Nupela Wastaua i kamapim wanpela stori bilong Baibel em i no longtaim i go pinis yu na wanpela wanwok i bin stori long en? I gat wanpela atikol bilong famili we inap helpim wanpela wanblut? Olsem wanem? Wanpela pren bilong yu i mekim plen long go raun long wanpela kantri we Kirap! i bin stori long en? Yu ting wanpela magasin i stret long sampela kampani o wanpela dipatmen bilong lokel gavman i stap long teritori bilong yumi? Olsem: Magasin i stori long ol samting bilong helt ating ol haus sik bai laikim. Na ating ol polis bai laikim magasin i stori long wok bilong daunim pasin raskol samting.
3. Stori long wanpela ekspiriens i kamapim olsem gutpela samting inap kamap taim yumi tilim ol magasin i stret long man o lain em ol bai laikim ol tok bilong en.
3 Gutpela Samting i Kamap: Bihain long tupela marit long Saut Afrika i kisim Kirap! bilong Oktoba-Disemba 2011, i stori long “Skulim Ol Pikinini Long Mekim Gut Wok,” ol i ring long 25 skul long teritori bilong kongrigesen bilong ol. Inap 22 bilong ol dispela skul i laikim dispela nius na tupela i go tilim long ol sumatin. Narapela tupela marit long dispela kantri yet i mekim wankain pasin na tilim dispela nius long ol skul long ol teritori bilong ol. Ol tisa long wanpela bilong ol dispela skul i yusim dispela magasin long olgeta wik taim ol i lainim ol nupela sumatin na taim ol i mekim lesen bilong rit. Dispela tupela marit i stori long wasman sekit long ekspiriens bilong ol. Na bihain wasman sekit i kirapim ol kongrigesen long sekit bilong em long tilim dispela nius long ol skul long ol teritori bilong ol. Brens ofis i bin kisim planti oda long kisim sampela magasin moa, olsem na ol i mas prinim gen dispela magasin!
4. Bilong wanem yumi laik tilim ol dispela magasin long olgeta man?
4 Ol nius bilong yumi i stori long as bilong ol hevi i wok long kamap long nau na i stiaim ol man i go long Baibel na Kingdom Bilong God. Long graun olgeta, dispela tupela magasin tasol i mekim wok bilong “autim tok long God i kisim bek ol [man].” (Ais. 52:7, NW ) Olsem na yumi laik tilim long olgeta man. Gutpela rot bilong mekim olsem em yu ken askim yu yet, ‘Husat bai laikim dispela atikol?’