God i Win Long Skulim Ol Man
“Bikpela bai . . . skulim yupela. Na . . . bai yupela i lukim em long ai bilong yupela yet. Na . . . em bai i stap baksait long yupela na em bai i tokim yupela long rot yupela i mas bihainim.”—AISAIA 30:20, 21.
1. Jehova i skulim yumi olsem wanem?
GOD JEHOVA em i As bilong ol gutpela save, na i no gat narapela inap skulim yumi gut olsem. Taim em i givim tok long yumi, yumi mas putim gut yau long dispela tok na bai em i stap olsem Nambawan Tisa bilong yumi. Baibel Holi em i namba wan rot bilong em long givim tok long yumi. (Aisaia 30:20) Baibel i tok, Jehova em “God I Gat Olgeta Strong.” (Song 50:1) Sapos ol i givim tok bilong Jehova long yumi, i olsem em yet i skulim yumi.
2. Olsem wanem yumi ken tok, save na gutpela tingting bilong God i winim bilong ol man?
2 I gat planti skul na yunivesiti long graun, tasol ol i no givim save bilong God long ol man. Olgeta save bilong ol man i olsem samting nating sapos yumi skelim wantaim ol gutpela save Jehova i skulim yumi long en. Rom 16:27 i tok, Jehova tasol i gat save tru na gutpela tingting. Em i gat save long olgeta samting.
3. Olsem wanem Krais Jisas em i nambawan tisa tru, i winim olgeta narapela tisa i bin i stap long graun?
3 Krais Jisas em i Pikinini bilong God na em tu i gat bikpela save na gutpela tingting. Em i nambawan bikpela tisa i bin i stap long graun, long wanem, God i bin skulim em taim em i stap yet long heven. Em i namba wan Pikinini bilong God, na God i bin kirap long skulim em long pastaim tru. Olsem na Jisas i tok: “Mi no mekim wanpela samting long tingting bilong mi yet. Nogat. Mi save autim olgeta tok olsem Papa i bin soim mi.” (Jon 8:28; Sindaun 8:22, 30) Ol tok bilong Jisas i stap long Baibel, na dispela i ken givim save bilong God long yumi. Ol Kristen God i bin makim long spirit holi, taim ol i skulim ol man long tok bilong Jisas, ol i bihainim tok bilong God, em Nambawan Tisa. God i laik bai “ol kain kain gutpela tingting na save bilong en i kamap ples klia” long rot bilong kongrigesen, na bai yumi “ken save long tingting bilong God.”—Efesus 3:10, 11; 5:1; Luk 6:40.
Painim Save na Gutpela Tingting
4 God i bin givim tingting long yumi na bai yumi ken wokim tingting na kisim save i kam long em. Kru bilong yumi inap mekim olsem. Wanpela buk (The Incredible Machine, pes 326) i tok: ‘Kru bilong man em i winim ol kompyuta. Ol wok em kompyuta inap mekim, sapos yumi skelim wantaim ol wok em kru inap mekim, kompyuta i olsem samting nating. Insait long kru planti milion toksave i wok long i go i kam. Ol hap bilong skin i salim tok i go long kru, na kru i salim tok i go bek tu long ol dispela hap. Kru i save kisim na salim tok olsem wanpela pinga bilong lek i pen, o gutpela smel bilong kopi i kamap, o wanpela pren i mekim tok yumi ken lap long en. Na i gat planti ol narapela toksave em kru i kisim na em i mas skelim, na dispela i kirapim yumi long pilim ol samting long bel, na tingim bek ol samting, na tingting long mekim wanpela samting. Orait, wantu tasol, kru i salim tok long ol narapela narapela hap bilong skin long mekim ol samting, olsem meknaisim pinga bilong lek, o dring kopi, o lap long dispela tok em pren i mekim. Na kru i bosim wok bilong yumi long pulim win, na bosim ol marasin i stap long blut, na bosim hat bilong skin na em i no ken hat tumas o kol tumas, na kru i bosim planti samting moa, tasol yumi no pilim na bai yumi ken save. Kru i givim tok long ol hap bilong skin na bai skin i ken stap gut na wok gut, na kru i redim ol samting skin i mas mekim bihain tu.’
5 Tru tumas, kru bilong man em inap mekim planti wok, tasol wanem gutpela wok yumi ken mekim long kru bilong yumi? Sapos yumi givim bel long kisim bikpela save long sampela tok ples o stori bilong bipo o saiens o sampela lotu, yumi no mekim gutpela wok tumas long kru bilong yumi. Nambawan wok yumi mas mekim long kru bilong yumi, em yumi mas kisim save i kam long God. Long dispela rot tasol yumi inap kisim gutpela tingting. Stretpela save i as bilong dispela gutpela tingting em Baibel i toktok long en. Sapos yumi gat stretpela save na gutpela tingting i kam long God, yumi inap mekim wok long en bilong skelim gut ol samting, na stretim ol hevi, na abrusim ol samting nogut, na helpim ol narapela man, na mekim gut ol wok bilong yumi. Baibel i tok, gutpela tingting em i narapela kain long tingting kranki. Yumi no laik i stap olsem man i gat tingting kranki, a? Olsem na yumi mas larim Jehova i skulim yumi.—Lo 32:6; Sindaun 11:29; Saveman 6:8.
Buk Bilong God Long Skulim Man
6 Long nau i gat planti save long ol samting bilong dispela graun. (1 Korin 3:18, 19) Long olgeta hap i gat planti haus skul, na i gat planti milion milion buk i pulap long ol haus buk. Ol dispela buk inap skulim man long ol tok ples, o long bungim ol namba, o long saiens, o sampela save moa. Tasol Nambawan Tisa Jehova i givim wanpela buk long yumi i winim olgeta dispela buk. Em i givim buk Baibel long yumi, em yet i bin kamapim. (2 Timoti 3:16, 17) Baibel i kolim stret stori bilong ol samting i bin kamap bipo, na ol ples na kantri samting i stap we, na stori bilong ol diwai na plaua samting, na em i kolim stret ol samting i mas kamap bihain. Na Baibel i helpim yumi long i stap amamas long nau na long mekim ol gutpela wok. Ol skulmanki i mas save gut long ol buk bilong skul, na ol i mas mekim wok long en. Olsem tasol yumi mas save gut long ol tok bilong Baibel na long mekim wok long dispela bikpela Buk na bai yumi ken bihainim gutpela tingting bilong ol man em ‘God i skulim ol.’—Jon 6:45.
7. Sapos yumi inap kolim planti tok bilong Baibel, bilong wanem dispela tasol i no inap?
7 Sampela man i save long sampela tok na stori bilong Baibel, tasol dispela i no olsem gutpela tingting tru i kam long God, na i no makim olsem ol i bihainim ol tok Jehova i skulim yumi long en. Long yia 1600 samting Kornilius van de Stin, em man Katolik, em i laik kamap wanpela Jesuit, tasol ol i sakim em, long wanem, em i sotpela tumas. Long wanpela buk (The Jesuits—History & Legend of the Society of Jesus) Manfred Barthel i tok: “Komiti i tokim van de Stin, sapos em i lainim olgeta tok bilong Baibel na bai em i ken kolim olgeta na no ken lukim Baibel, em i ken kamap wanpela Jesuit. Em i bin mekim olsem. Em i lainim olgeta hap tok, kirap long Stat i go inap long Kamapim Tok Hait, na em i kolim olgeta.” Em bikpela wok tru dispela man i mekim, a? Tasol nogut yumi inap kolim nating tasol. Yumi mas kisim gut insait bilong ol tok bilong Baibel na pilim tru.
8. Wanem samting bai helpim yumi long bihainim gutpela tingting na save God i skulim yumi long en?
8 Yumi mas kisim stretpela save long ol tok bilong Baibel na bai yumi ken bihainim gutpela tingting i kam long God. Na spirit holi bilong Jehova i mas stiaim tingting bilong yumi na bai yumi ken kisim save long “olgeta tingting hait bilong God.” (1 Korin 2:10) Olsem na yumi mas wok strong long stadi long Baibel na beten askim God long helpim yumi long spirit holi bilong em. Olsem Sindaun 2:1-6 i tok, yumi mas givim bel long painim gutpela tingting na save. Yumi mas wok strong long mekim, olsem yumi laik painim mani samting i hait i stap insait long graun. Olsem “bai yu save tru long pasin bilong stap aninit long Bikpela, na bai yu save gut long God. Long wanem, Bikpela yet em i as bilong gutpela tingting. Na em i save givim gutpela tingting na save long yumi.” Nau yumi ken stori long olsem wanem God i win long skulim yumi, na dispela skul inap helpim yumi olsem wanem, na bai yumi inap pilim tru ol dispela gutpela tingting i kam long God.
Wok Long Kisim Save
9 Jehova i win long skulim lain bilong em, long wanem, em i wok long helpim lain bilong em long kisim save long insait bilong ol tok bilong Baibel, olsem: Nau yumi save, Satan yet i bin mekim tok long rot bilong snek long Iden na em i tok, God i giaman taim em i tokim Iv em bai dai sapos em i kaikai pikinini bilong diwai i tambu. Tasol dispela pasin bilong bikhet long God Jehova em i as na ol man i save dai. (Stat 3:1-6; Rom 5:12) Tasol God i givim wanpela tok long Satan na ol man inap tingim gutpela samting bai kamap bihain. God i tokim em: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long [pikinini] bilong meri. Bai [em] i krungutim het bilong yu, na bai yu kaikaim lek bilong [em].”—Stat 3:15.
9, 10. God i tok wanem, olsem yumi lukim long Stat 3:15? Wanem insait tru bilong dispela tok?
10 Dispela em wanpela tok hait, tasol isi isi Jehova i bin kamapim insait bilong en. Em i bin skulim lain bilong em na nau ol i save, as tok bilong Baibel i olsem: Dispela Pikinini bilong em bai kamap long lain bilong Abraham na Devit, na em i bilong kamap King bilong Kingdom, na em bai litimapim wok king bilong Jehova. (Stat 22:15-18; 2 Samuel 7:12, 13; Esekiel 21:25-27) Na Nambawan Tisa Jehova i bin skulim yumi olsem Krais Jisas em i Pikinini bilong dispela “meri,” em oganaisesen bilong Jehova long heven. (Galesia 3:16) Satan i bin wok long pundaunim Jisas, tasol Jisas i stap strong na holimpas bilip i go inap long taim em i dai—olsem Satan i “kaikaim lek” bilong em. Na yumi bin kisim save olsem lain 144,000 bai wok king wantaim Jisas na ol bai insait long dispela wok bilong em long “krungutim het” bilong Satan, em dispela “snek bilong bipo tru.” (KTH 14:1-4; 20:2; Rom 16:20; Galesia 3:29; Efesus 3:4-6) Jehova i bin skulim yumi na givim ol dispela save bilong Baibel long yumi, na yumi amamas!
“Lait i Gutpela Moa”
11 Na God i win long skulim ol man, long wanem, ol i kisim save long ol samting bilong spirit na i olsem ol i lusim tudak na i kam long lait. Dispela i bin painim ol Kristen em God i bin makim ol long spirit holi, olsem 1 Pita 2:9 i tok: “Yupela i stap lain manmeri bilong em stret. Yupela . . . ol pris bilong lain bilong king. Yupela i stap lain manmeri i holi . . . Yupela i stap lain manmeri God i bin makim bilong em yet, bai yupela i ken tokaut long olgeta gutpela pasin em i bin mekim long yupela. . . . Em i bin singautim yupela long lusim tudak . . . na em i bringim yupela i kam insait long lait bilong em, em lait i gutpela moa yet.” Na bikpela lain bilong i stap oltaim long Paradais long graun, ol tu i amamas long kisim dispela “lait” i kam long God. (KTH 7:9; Song 37:11) God i skulim lain bilong em, olsem na “rot bilong ol stretpela man i lait olsem san i kamap long moningtaim, na lait i wok long kamap strong moa, inap long belo.” (Sindaun 4:18) Isi isi dispela skul bilong God i wok long givim gutpela tingting na save long yumi, olsem taim gutpela tisa i lainim ol pikinini long skul na ol i wok long kisim save long ol samting.
12, 13. Ol save i kam long God i helpim yumi long sakim wanem ol bilip giaman?
12 Ol tok Jehova i skulim yumi long en i save helpim yumi long abrusim ol tok giaman em ol spirit nogut i as bilong en. (1 Timoti 4:1) Tasol ol lain i holim nating nem Kristen ol i no olsem. Ol tok giaman bilong ol spirit nogut i pulap long ol. Long 1878 John Henry Newman, em wanpela bikman bilong misin Katolik, em i tok, ‘Lotu Kristen i gat strong inap long sakim ol pasin nogut, na em i ken kisim ol samting bilong lotuim ol spirit nogut na mekim wok bilong God long en. Kirap long bipo yet, Misin i bin orait long kisim ol samting bilong ol lotu haiden na pasin haiden i kam insait long lotu Katolik, na kisim ol tingting na save bilong ol man i bin kisim bikpela skul.’ Na em i tok, ‘Wara santu, na bilas bilong pris, na ol piksa na imis, ol dispela samting i bilong ol haiden, tasol Misin i kisim i kam insait long lotu na ol dispela pasin i kamap holi.’ Lain bilong God ol i amamas long ol save God i bin skulim ol long en, olsem na ol i no inap paul na kisim ol bilip giaman i kam insait long bilip bilong ol, na ol tok giaman bilong ol spirit nogut i no inap paulim ol.—Aposel 19:20.
13 God i win long skulim ol man, long wanem, em i kamapim long ples klia ol bilip kranki. Olsem na nau yumi save, dispela bilip long God Triwan em i giaman. Jehova i Nambawan Bikpela God, na Jisas i Pikinini bilong em, na spirit holi em i strong bilong Jehova. Na yumi no bilip long bikpaia. Na taim man i dai em i go long matmat na em i no gat tingting moa. Ol lotu giaman i tok, yumi gat tewel, tasol yumi save Baibel i no tok olsem. Na i gat planti tok i tru moa yet God i bin lainim yumi long en. Em gutpela tru, long wanem, ol bilip giaman bilong Bikpela Babilon i no kalabusim moa yumi!—Jon 8:31, 32; KTH 18:2, 4, 5.
14. Olsem wanem lain bilong God inap wokabaut long lait bilong spirit?
14 Ol dispela gutpela save i helpim lain bilong God long wokabaut long lait bilong spirit. I olsem God i stap baksait na “i tokim yupela long rot yupela i mas bihainim.” (Aisaia 30:21) Ol tok bilong God i helpim lain bilong em long skelim gut ol samting i stret o nogat na bai ol tok giaman i no inap grisim ol. Bipo “ol giaman aposel” i kamapim hevi insait long kongrigesen Korin, na aposel Pol i tok: “Olgeta samting bilong pait mipela i holim, ol i no samting bilong dispela graun. Nogat. Ol i gat strong bilong God, na ol inap brukim ol strongpela banis bilong ol birua. Mipela i save daunim olgeta kain tingting na giaman tok i save pasim rot bilong ol man i laik kisim save long God. Na . . . bilong mekim tingting bilong ol i bihainim laik bilong Krais.” (2 Korin 10:4, 5; 11:13-15) Sapos wanpela man i gat tingting i no wankain long ol tok God i skulim yumi long en, ol tok yumi mekim long pasin isi insait long kongrigesen o long taim yumi autim tok long man, dispela inap daunim tingting kranki bilong em.—2 Timoti 2:24-26.
Lotu Long Spirit na Tok Tru
15 Wok bilong autim tok bilong Kingdom i go bikpela, na God i skulim ol man i gat pasin daun na bai ol i ken lotu long em “long [spirit bilong ol yet]a na long pasin i tru.” Long hul wara bilong Jekop, klostu long taun Sikar, Jisas i tokim meri Samaria em inap givim wara long ol man na bai ol i ken i stap oltaim, na em i tokim meri olsem: “Yupela Samaria i save lotu long samting yupela i no save long en. . . . Tasol taim i . . . kamap pinis, na olgeta man i laik lotu tru bai ol i lotu long Papa long [spirit bilong ol yet] na long pasin i tru. Na Papa i laikim tumas bai ol kain man olsem i mas lotu long em.” (Jon 4:7-15, 21-23) Na nau Jisas i tok em i Mesaia, em dispela man God i tok promis long salim i kam.
15, 16. Olsem wanem yumi lotu long Jehova long “spirit” na long “pasin i tru”?
16 Tasol olsem wanem yumi inap lotuim God long spirit? Sapos yumi bin kisim stretpela save long Baibel na yumi laikim tumas Jehova na yumi pilim tru ol gutpela pasin em i bin mekim long yumi, na yumi lotu tru long em, orait, yumi lotu long em long “spirit.” Na sapos yumi sakim ol tok giaman bilong ol lotu, na bihainim laik bilong Jehova olsem Baibel i makim, yumi lotu long em long “pasin i tru.”
Winim Ol Hevi na Traim Bilong Dispela Graun
17 Taim ol hevi na traim i painim lain bilong God, ol tok God i skulim ol long en i helpim ol long sanap strong. Namba 2 Pait i bin kirap long Septemba 1939, na long dispela taim lain bilong Jehova i mas save gut long tok bilong Baibel. Wastaua bilong Novemba 1, 1939, i bin helpim ol. Em i tok, ol Kristen i no insait long ol samting bilong dispela graun. (Jon 17:16) Na bihain liklik long 1960 Wastaua i tok, yumi mas daun long gavman, tasol yumi mas moa daun long God. Ol dispela tok bilong Jehova i helpim lain bilong em long dispela taim bilong hevi, em planti man i kros na bikhet long ol gavman.—Rom 13:1-7; Aposel 5:29.
18. Ol man bilong bipo i tok ol i Kristen, ol i bin ting olsem wanem long ol amamas nogut bilong graun? Olsem wanem ol tok God i skulim yumi long en i helpim yumi long abrusim ol dispela amamas nogut?
18 Na ol tok God i skulim yumi long en i helpim yumi long sakim ol traim na ol amamas nogut bilong graun. Long bipo tu i olsem. Wanpela man i tok em i Kristen, nem bilong em Tetulian, em i tok: ‘Mipela Kristen i no laik harim tok ol i mekim long ples amamas bilong ol o lukim ol samting ol i mekim; em ol pasin sem na pasin nogut.’ Na narapela man bilong dispela taim bipo em i tok: “Ol dispela amamas bilong ol i no samting bilong gutpela Kristen; em i no ken tingting long ol pasin nogut, na em i no ken kisim amamas long ol samting bilong sem.” Dispela ol man i bin stap planti yia bihain long ol Kristen bilong pastaim, tasol ol i no laikim ol pilai na amamas nogut bilong ol man. Na long nau tu, ol save yumi kisim long God i givim gutpela tingting long yumi na yumi inap abrusim ol amamas nogut bilong graun i gat ol tok nogut na pasin sem na pait long en.
19. Olsem wanem ol tok God i skulim yumi long en i helpim yumi long winim pasin bilong dispela graun?
19 Sapos yumi bihainim ol tok God i skulim yumi long en, yumi inap winim pasin bilong dispela graun. Nambawan Tisa Jehova bai helpim yumi long sakim ol pasin nogut bilong dispela graun em Satan i bosim, na ol i no inap pulim yumi. (2 Korin 4:4; 1 Jon 5:19) Efesus 2:1-3 i tok, bipo yumi bihainim pasin bilong dispela graun na yumi stap aninit long Satan na i olsem yumi dai pinis, tasol Jehova i helpim yumi na i olsem yumi stap laip gen. Yumi amamas long Jehova i bin skulim yumi na dispela i helpim yumi long sakim ol laik nogut bilong dispela graun na ol tingting bilong graun em Satan i kirapim—em birua bilong God na bilong yumi, na em i man bilong giamanim ol man!
20. Wanem sampela askim yumi mas save long en?
20 Tru tumas, God i win long skulim yumi. Ol samting em i bin skulim yumi long en i planti tru na yumi no inap kolim olgeta. Ol dispela samting i helpim ol man bilong olgeta hap. Tasol olsem wanem long yu yet? Ol save yu kisim long Jehova, dispela i helpim yu long bihainim pasin i stret?
[Ol Futnot]
a Lukim sta daunbilo long Baibel bilong Jon 4:23-24
Yu Bin Lainim Wanem Samting?
◻ Gutpela tingting i kam long God em i wanem samting?
◻ Isi isi God i bin kamapim klia wanem ol samting bilong Stat 3:15?
◻ Ol save i kam long God i bin helpim lain bilong em olsem wanem?
◻ Olsem wanem yumi ken lotu long God long spirit na long pasin i tru?
◻ Olsem wanem ol save i kam long Jehova i bin helpim lain bilong em long winim ol hevi na traim bilong dispela graun?
4. Wanpela buk i tok wanem long kru?
5. Olsem wanem long dispela gutpela tingting em Baibel i toktok long en?
6. Bilong bihainim gutpela tingting i kam long God, yumi mas mekim wok long wanem samting?
11. Taim God i skulim ol man, olsem wanem dispela i bringim ol i kam long lait bilong spirit?
17. Olsem wanem ol tok Jehova i skulim ol man long en i bin helpim lain bilong em long sanap strong long taim bilong hevi?
[Ol Piksa long pes 10]
Jisas i stap strong inap long em i dai—em olsem Satan i kaikaim lek bilong em