Wanem Samting i Makim Man i Kristen Tru
1 Jisas i singautim ol man long kamap disaipel bilong em na i tok: “Sapos wanpela man i laik bihainim mi, orait em i mas daunim laik bilong em yet, na em i mas karim diwai [pos] bilong en na bihainim mi.” (Mt 16:24) Ol Kristen tru i bilip strong olsem Krais Jisas em Man God i Makim na em i dispela wanpela Pikinini bilong God, na em i dispela Pikinini God i Bin Promis Long En na em i bin givim laip bilong em olsem ofa bilong baim bek ol man. Na ol i bilip strong olsem God i bin kirapim bek em, na em i kisim bikpela namba na i sindaun long han sut bilong Jehova, na em i kisim strong long daunim ol birua bilong em na kamapim long ples klia olsem Jehova i King tru. (Mt 20:28; Lu 24:46; Jo 3:16; Ga 3:16; Fl 2:9-11; Hi 10:12, 13) Ol Kristen i bilip olsem Baibel em i Tok bilong God na spirit bilong God i bin kamapim, na em i tru olgeta, na i gutpela long skulim na stretim ol manmeri.—Jo 17:17; 2 Ti 3:16; 2 Pi 1:21.
2 Ol Kristen tru i no ken tok tasol ol i bilip, nogat; pasin bilong ol i mas kamapim klia olsem ol i bilip. (Ro 10:10; Je 2:17, 26) Mama i karim ol olsem sinman, olsem na ol man i laik kamap Kristen tru i mas tanim bel, na baut, na dediket, olsem givim skin olgeta long Jehova, na ol i mas lotu long em, na mekim wok bilong em, na ol i mas kisim baptais. (Mt 28:19; Ap 2:38; 3:19) Ol i no ken mekim pasin pamuk, na lotu long god giaman, na kaikai blut. (Ap 15:20, 29) Ol i rausim olpela pasin olsem belhat, tok nogut, giaman, stil, spak, na “olkain pasin olsem,” na ol i stretim pasin bilong ol olsem Baibel i tok. (Ga 5:19-21; 1 Ko 6:9-11; Ef 4:17-24; Kl 3:5-10) Aposel Pita i tokim ol Kristen: “Yupela i mas lukaut, nogut ol i givim pen long yupela, long wanem, yupela i bin kilim man i dai o stilim ol samting o mekim ol arapela kain pasin nogut o yupela i bin paulim wok bilong ol arapela.” (1 Pi 4:15) Ol Kristen i mas mekim gutpela pasin na tingim narapela, na ol i mas i gat pasin bilong i stap isi na no ken belhat kwik, na ol i mas daunim laik bilong olpela bel. (Ga 5:22, 23; Kl 3:12-14) Ol i lukautim ol wanblut tru bilong ol na ol i laikim ol narapela man olsem ol i laikim ol yet. (1 Ti 5:8; Ga 6:10; Mt 22:36-40; Ro 13:8-10) Na nambawan bikpela pasin i soim olgeta man olsem ol i Kristen tru, em bikpela pasin sori narapela i mekim long narapela. Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—Jo 13:34, 35; 15:12, 13.
3 Ol Kristen tru i bihainim pasin bilong Jisas olsem Bikpela Tisa na Man bilong autim stret olgeta tok bilong Jehova. (Jo 18:37; KTH 1:5; 3:14) Gopas bilong ol i tokim ol: “Yupela i mas i go mekim olgeta lain manmeri i kamap disaipel bilong mi.” (Mt 28:19, 20) Ol Kristen tru i bihainim dispela tok na ol i autim tok “long ol bung bilong ol manmeri na long olgeta haus,” na ol i wok strong long kirapim ol man bilong olgeta hap long lusim Bikpela Babilon na bilip tru long Kingdom bilong God. (Ap 5:42; 20:20, 21; KTH 18:2-4) Dispela em i gutpela tok tru, tasol taim ol Kristen i autim dispela tok ol man i mekim nogut tru long ol na ol i kisim planti hevi na pen, wankain olsem Krais Jisas i bin kisim. Ol disaipel bilong em i no winim em—ol i kisim wankain hevi olsem em. (Mt 10:24, 25; 16:21; 24:9; Jo 15:20; 2 Ti 3:12; 1 Pi 2:21) Aposel Pita i tok: “Sapos man em i Kristen, na long dispela as em i karim pen, orait em i no ken sem. Nogat. Em i mas amamas long dispela nem Kristen, na litimapim nem bilong God.” (1 Pi 4:16) Ol Kristen i save givim long “Sisar” ol samting i bilong ol gavman bilong dispela graun—ol i daun long ol na givim takis long ol—tasol ol i no insait long ol pasin bilong dispela graun (Mt 22:21; Jo 17:16; Ro 13:1-7), na long dispela as ol man bilong graun i save birua long ol.—Jo 15:19; 18:36; 1 Pi 4:3, 4; Je 4:4; 1 Jo 2:15-17.
This article is unique to PNG.