Mekim Gutpela Wok Long Ol Liklik Nius
1 Olsem wanem? Taim yu autim tok yu bin mekim gutpela wok long ol liklik nius? Yumi ken lusim ol liklik nius long taim i no gat man i stap long haus. O yumi ken givim long ol man i no gat taim long harim tok bilong yumi taim yumi autim tok long ol. Na sampela i mekim wok long ol liklik nius bilong kirapim tok wantaim man bilong haus, na dispela i kirapim tingting bilong man long harim tok bilong ol. Na sampela i save givim nating liklik nius long ol man i amamas long harim tok, tasol ol i no kisim sampela buk o magasin samting.
MEKIM WOK LONG OL LONG WANEM TAIM NA OLSEM WANEM
2 Sapos yu tingting gut bai yu inap painim planti rot bilong tilim ol liklik nius. Olsem: Yu inap tilim taim yu autim tok long ol wanblut bilong yu, na taim yu go malolo long wanpela hap, na taim yu go long stua long baim kaikai samting, o taim yu raun long PMV o balus samting, o long skul, o long ples wok bilong yu. Yu save putim sampela liklik nius long poket bilong siot o paus bilong yu? Maski yu mekim wanem o yu go long wanem hap, gutpela sapos yu holim sampela liklik nius na taim rot i op yu inap autim tok na tilim long ol man. Gutpela sapos yu painim rot bilong tilim ol liklik nius.
3 Maski yu stap we o yu mekim wanem, yu inap painim rot bilong mekim wok long ol liklik nius na autim gut tok moa yet. Ol dispela nius i no gat planti tok tumas long en, tasol ol man inap pilim tru, na i gat skripsa bilong Baibel tu bilong strongim ol dispela tok. Ol liklik nius i gat ol gutpela piksa i gat kala kala na yumi inap mekim gutpela wok long ol taim yumi autim tok. Yu mas redi long tilim long olgeta ples.
LONG TAIM BILONG AUTIM TOK
4 Olsem wanem? Taim yu autim tok long ol haus yu bin mekim wok long gutpela het-tok bilong ol dispela liklik nius? Ol inap kirapim tingting bilong ol man na ol i laik harim tok bilong Kingdom yu autim long ol. Sampela pablisa, taim ol i bungim man bilong haus, ol i kolim nem bilong liklik nius taim ol i kirapim tok. Gutpela sapos yu traim mekim olsem, a? Ating yu ken tok olsem: “Moning! Mi amamas long lukim yu. Mi kam long haus bilong yu long tokim yu long wanpela bikpela samting. Tok bilong dispela samting i stap long dispela liklik nius Husat Tru i Bosim Dispela Graun? Mi laik givim dispela liklik nius long yu. I no gat pe bilong en. [Givim wanpela long man bilong haus na stori long piksa i stap long skin bilong en.] Dispela liklik nius bai bekim gut dispela askim hia i stap long skin bilong en.” Sapos rot i op, orait toktok long Stori Bilong Dispela Mun na kirapim em long kisim dispela samting yumi tilim long dispela mun.
5 Long sampela hap yu autim tok long en, sapos ol man i save laikim Baibel ating i gutpela yu tokim ol yu laik kamapim sampela tok bilong Baibel long ol. Ating bai ol i laikim tru liklik nius I Gat Wanem As na Yu Inap Bilip Tru Long Baibel? Yu inap tok olsem: “Mipela i laik givim dispela liklik nius long olgeta manmeri long dispela hap, em i kamapim tok bilong Baibel na no gat pe bilong en. Dispela liklik nius em i bilong yu. [Givim wanpela long man bilong haus.] Yu lukim, dispela nius i kamapim tok bilong Baibel. Olsem wanem? Yu ting ol manmeri long nau i bilip long tok bilong Baibel? [Larim man bilong haus i bekim tok.] Dispela liklik nius bai helpim yu long save bilong wanem yumi inap bilip long tok bilong Baibel.” Bihain kamapim sampela skripsa i stret long tok bilong yu o tilim buk yumi wok long tilim long dispela mun.
6 Pasin bilong tilim liklik nius bilong Baibel em i wanpela gutpela rot tru bilong autim “gutnius.” (Mt 24:14) Ol i olsem bikpela samting yumi inap mekim wok long en taim yumi autim tok long ol haus o long taim yumi autim tok long kain kain taim na ples. Gutpela sapos yumi mekim wok long ol liklik nius bilong yumi bambai yumi inap autim gut tok, na long dispela rot yumi inap helpim ol narapela man long kisim save long Kingdom bilong God.
[Ol Askim]
1. Long wanem taim yumi ken mekim wok long ol liklik nius?
2. Long wanem taim yumi ken mekim wok long ol liklik nius? Yumi ken mekim olsem wanem?
3. Bilong wanem ol liklik nius i gutpela tru?
4. Olsem wanem yumi ken mekim wok long gutpela het-tok bilong liklik nius taim yu laik kirapim tok long man bilong haus?
5. Taim yu autim tok long man, olsem wanem yu ken mekim wok long liklik nius I Gat Wanem As na Yu Inap Bilip Tru Long Baibel?
6. Olsem wanem ol liklik nius i bikpela samting long wok autim tok bilong yumi?