Nupela Program Bilong Kibung Sekit na Bikpela De Kibung
1 Program Bilong Kibung Sekit: Long olgeta taim ol trupela Kristen i bin bihainim tok bilong Jisas long Matyu 6:33 olsem ol i mas wok pastaim long painim Kingdom. Olsem na i stret tru ol i putim nem bilong kibung sekit i kirap long Februeri 1994 olsem “Wok Pastaim Long Painim Kingdom.”
2 Olgeta tok bilong program i kamapim olsem Kingdom em i wanpela gavman tru na i gat ol lain em i bosim, na em i gat ol king, na ol lo. Planti lo bilong ol gavman bilong graun i helpim ol man long nau, ol dispela lo i kam long Baibel.
3 Bai ol i toktok long ol gutpela samting yumi kisim sapos yumi tingim Kingdom pastaim long olgeta samting yumi mekim, na olsem wanem dispela bai lukautim yumi. Bai ol i givim sampela gutpela tok long yumi bilong helpim yumi long abrusim sampela hevi. Ol tok na ol soim samting bai helpim yumi long save, bilong wanem ai bilong yumi i mas i stap gutpela.
4 Long Sarere bilong kibung ol man i winim mak bilong kisim baptais ol i ken kamapim bel bilong ol olsem ol i dediket pinis long Jehova. Na long Sande yumi olgeta i laik i stap bilong harim pablik-tok “Kingdom Bilong God Bai Mekim Wanem Samting Long Ol Man.”
5 Wok strong bambai yu inap stap long tupela de bilong kibung sekit. Yumi laik harim olgeta tok bilong program bilong kibung na bung wantaim ol brata bilong yumi, long wanem, dispela bai strongim yumi.
6 Program Bilong Bikpela De Kibung: Taim yumi bin stadi long buk Nambawan Man Tru i Winim Olgeta Narapela Man yumi pilim moa yet ol samting Krais Jisas i bin mekim bilong helpim yumi. Olsem na program bilong bikpela de kibung bilong 1994 i gat nem olsem “Bihainim Gut Pasin Bilong Krais.” Em bai helpim yumi long save gut moa yet long olsem wanem yumi ken bihainim pasin bilong em.
7 Kibung bai kirapim yumi olgeta long bihainim moa yet pasin bilong Krais, maski yumi gat hamas krismas o yumi stap planti yia long tok i tru. Sampela hap bilong program bai i gat tok bilong helpim ol yangpela na strongim ol taim sampela traim i painim ol long ol samting bilong skul na amamas na mani kago. Bai i gat sampela tok na ekspiriens na soim i kamapim klia olsem wanem yumi ken sakim pasin bilong dispela graun na bihainim pasin bilong Krais.—1 Pita 2:21.
8 Long rot bilong baptais ol nupela man i dediket pinis inap kamapim bel bilong ol, olsem ol i bihainim tru lek bilong Krais. Paslain long kisim baptais bai i gat wanpela gutpela tok bilong baptais. Ol man i laik kisim baptais long bikpela de kibung i mas toksave hariap long wasman siaman, na bai em i gat taim bilong makim sampela elda long bung wantaim ol na kamapim ol askim bilong kisim baptais.
9 Brata em Asosiesen i makim bai mekim bikpela tok bilong kibung, het-tok bilong en “Sapos Yumi Bihainim Gut Pasin Bilong Krais Wanem Samting Bai Painim Yumi?” No ken lusim tingting long singautim olgeta man i amamas long harim tok bilong yumi long kam na harim dispela gutpela program em inap long strongim tru bilip bilong yumi. I no gat narapela gutpela samting i winim pasin bilong bihainim lek bilong Krais.—Mt 19:27-29.
This article is unique to PNG.