Autim Gutpela Tok—Long Rot Bilong Ol Olpela Buk
1 Em i bikpela samting long yumi mas pasim tok long bel olsem yumi bai lotu long God, long wanem, dispela em i rot bilong kisim laip i stap oltaim. Olsem na yumi mas putim mak olsem yumi bai wok strong long kisim save long tok i tru na kisim gutpela tingting bambai yumi ken bihainim dispela save yumi kisim.—Snd 23:23; Jo 17:3.
2 Bilong kisim save na gutpela tingting yumi mas stadi gut long Baibel. Long dispela rot bai yumi kisim save long ol lo na tok bilong God. Na tu yumi mas tingim tingim ol samting Jehova i bin mekim long lain bilong em. Jehova i save givim planti save na gutpela tingting long ol man i askim em. Inap planti yia long rot bilong oganaisesen bilong em Jehova i bin givim planti buk long yumi i stori long planti samting bilong Baibel. Ol dispela buk inap helpim gut planti man i no save yet long Jehova.
OL OLPELA BUK I BIKPELA SAMTING
3 Long mun Janueri bai yumi tilim buk Nau Tasol o buk Bel Isi long 25 toea. I gat planti ol gutpela tok i stap long ol dispela buk. Ol inap helpim gut ol man long ol samting bilong spirit. (Lukim Matyu 5:14-16.) Olsem na long dispela mun yumi laik wok strong long tilim ol dispela olpela buk i stap long kongrigesen bilong yumi.
4 Orait nau yumi ken stori long ekspiriens bilong wanpela man i bin kisim wanpela bilong ol dispela olpela buk olsem presen long meri bilong em, em i wanpela Witnes. Dispela i kamapim klia olsem em i bikpela samting long yumi tilim ol dispela olpela buk. Inap long dispela taim dispela man i no laik save long Baibel. Meri i kirap nogut tru long man bilong em i kaunim dispela buk long wanpela nait tasol. Dispela i mekim na nau em i bilip tru olsem Baibel em i Tok bilong God, olsem na em i go long namba wan miting i kamap bihain na em i tokaut olsem em i laik stadi long Baibel. Tripela mun bihain em i go autim tok na nau em i baptais pinis.
MAS I GAT STRETPELA TINGTING
5 No ken ting Tok bilong God i no gat strong. Maski ol dispela buk i olpela, ol i save kamapim tok tru bilong Baibel, olsem na yumi mas tingting strong long tilim. Yumi mas was gut, nogut sampela olpela buk yumi laik tilim i bagarap liklik—ol i mas i stap klin. Sapos ol i bagarap, no ken tilim long ol haus, long wanem, dispela inap nogutim gutpela tok yumi autim.
6 Sapos yumi olgeta i givim gutpela save bilong Baibel long ol man long rot bilong ol dispela olpela buk, wok bilong yumi bai karim gutpela kaikai, na em inap givim laip oltaim long ol man yumi autim tok long ol.
[Ol Askim]
1. Bilong wanem yumi mas pasim tok long bel olsem yumi bai lotu long God?
2. Long wanem rot yumi ken kisim save na gutpela tingting?
3. Long mun Janueri bai yumi wok strong long mekim wanem?
4. Wanem ekspiriens i soim yumi olsem em i bikpela samting long tilim ol olpela buk?
5. (a) Bilong wanem yumi mas i gat strongpela tingting long tilim ol olpela buk? (b) Yumi mas was gut, nogut yumi mekim wanem samting?