Yumi Olgeta i Mas Stadi
1 Jisas i stap wantaim ol disaipel na em i beten long Jehova olsem: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jo 17:3) Tru tumas, olgeta disaipel bilong Krais, i no ol nupela man tasol, ol i mas kisim dispela save. Yumi ken kisim dispela save taim yumi yet yumi stadi, na long rot bilong famili-stadi, na ol miting. Olsem wanem? Yu bihainim gut wanpela sedyul bilong helpim yu bai yu yet yu stadi long olgeta taim?
2 Taim ol Witnes i stadi wantaim ol nupela man na lainim ol long ol tok bilong Baibel, dispela i save helpim ol. Tasol ol yet i mas wok long kisim save na bihainim ol tok ol i lainim. (Hi 5:13, 14) Yu yet yu mekim olsem?
3 I no hatwok long ol yangpela Witnes Bilong Jehova i kisim save, long wanem ol i gat strongpela laik long kisim save long planti nupela samting na kisim save long as bilong ol samting. Yumi ‘no ken lusim nating taim,’ olsem aposel Pol i tok. Mekim gutpela wok long taim bilong yu bilong kisim save long Baibel, na taim yu yet yu stadi, dispela bai strongim bilip bilong yu.—Kl 4:5.
4 Yumi yet yumi mas stadi na mekim famili-stadi tu bambai yumi ken i stap strong long spirit na yumi inap mekim gut wok autim tok. Olsem wanem long yu yet? Yu save redim ol tok bilong miting? Yu redim ol samting bilong mekim wok autim tok na bai yu inap mekim gut dispela wok? Sapos yu save long tok Inglis, yu save kaunim buk Reasoning From the Scriptures na mekim wok long en taim yu autim tok?
5 2 Timoti 2:15 i tok olsem: “Yu mas wok strong long kamap wokman tru, na bai God i laikim wok bilong yu. Olsem na bai yu autim stret tok tru bilong God, na bai yu no gat sem long ai bilong en.” Bilong mekim olsem, yumi olgeta i mas stadi na bihainim ol tok yumi lainim.
[Ol Askim]
1. (a) Yumi olgeta i mas kisim wanem save? (b) Yumi ken kisim dispela save long wanem ol rot?
2. Yumi mas mekim wanem, olsem Hibru 5:13, 14 i tok?
3. (a) Olsem wanem na ol yangpela i no hatwok long kisim save? (b) Yumi mas mekim wanem, olsem aposel Pol i tok long Kolosi 4:5?
4. Yumi mas mekim wanem na bai yumi stap strong long spirit? Na yumi mas mekim wanem bambai yumi inap mekim gut wok autim tok?
5. Bilong wanem i bikpela samting yumi mas stadi na bihainim ol tok yumi lainim, olsem 2 Timoti 2:15 i tok?