Ol Toksave

◼ Gutpela sapos long nau olgeta kongrigesen i putim pinis teks bilong yia long Haus Kingdom bilong ol. Wasman siaman i mas tingim dispela samting na kirapim ol brata long mekim kwik long olgeta yia.

◼ Kirap long Februeri ol wasman sekit bai mekim pablik-tok “Ol Kristen i Stap Narapela Kain Long Pasin Bilong Dispela Graun​—⁠Dispela i Helpim Ol Olsem Wanem?”

◼ Ol pablisa i laik mekim wok painia haptaim long mun Mas na Epril, gutpela sapos nau ol i stretim rot bilong mekim na kwiktaim ol i putim aplikesen. Dispela bai helpim ol elda long stretim ol samting bilong wok autim tok na bai ol i no sot long ol buk na magasin samting bilong tilim.

◼ Kuskus na wasman bilong wok autim tok i mas skelim wok bilong olgeta painia oltaim. Sapos sampela i hatwok long winim mak bilong aua ol elda i mas stretim rot bilong helpim ol.

◼ Long pinis bilong Oktoba na kirap bilong Novemba, i gat 31 brata sista bilong yumi em brens i bin makim ol na ol i bin go long ol kibung intenesenel long Hong Kong na Manila. Dispela i bin strongim tru bilip bilong ol. Planti brata i go long ol dispela kibung, em namba wan taim bilong ol long go long narapela kantri na ol i bin harim ol tok na ekspiriens ol brata bilong Lain Bilong Bosim Ol Witnes na ol narapela brata i bin mekim. I gat planti brata sista bilong Filipin na Hong Kong i bin stap, na i gat planti handet brata sista bilong ol narapela kantri tu, em Sosaiti i bin makim ol na ol i go. Ol i bin askim tupela brata bilong yumi long kaunim wanpela ripot bilong wok bilong yumi long Papua Niugini inap long tupela minit. Na ol narapela brata i bin kaunim ripot long wok bilong kantri bilong ol. Long dispela rot narapela i strongim bel bilong narapela, na olgeta brata sista i bin kam long ol dispela kibung ol i no inap lusim tingting long ol dispela gutpela ekspiriens. Na ol i pilim tru olsem ol i insait long wanpela bikpela lain brata sista i stap long olgeta hap bilong graun.

◼ Ol kongrigesen i mas stretim gut ol samting bilong Memorial. Long dispela yia em bai kamap long Sarere, Mas 26, 1994, taim san i go daun pinis. Em i gutpela sapos olgeta wan wan kongrigesen i gat Memorial bilong ol yet, tasol ating i no olgeta kongrigesen inap mekim olsem. Sapos sampela kongrigesen i save bung long wanpela Haus Kingdom, ating i gutpela sapos wanpela o tupela kongrigesen i painim narapela ples bilong bung long dispela nait. I no gutpela sapos Memorial i kirap long nait tru na bai i hatwok long ol nupela man long kam. Na tu, i no gutpela sapos wanpela kongrigesen i pinisim Memorial bilong ol na kwiktaim narapela kongrigesen bai kirapim Memorial bilong ol, na namel long tupela miting bilong Memorial i no gat taim long sekanim ol man i kam, o stretim rot bilong helpim sampela na bai ol i ken wok long kisim ol samting bilong spirit, o mekim sampela gutpela tok bilong strongim bel bilong olgeta man i stap long miting. Taim ol elda i skelim gut olgeta samting pinis, ol bai tingim wanem samting bai helpim gut olgeta man i kam long Memorial na bai Memorial i ken helpim gut ol.

◼ Bikpela pablik-tok bilong taim bilong Memorial bai kamap long olgeta hap bilong graun long Sande, Epril 10, 1994. Nem bilong tok em “Lotu i Tru i Save Helpim Olgeta Man.” Bihain yupela bai kisim autlain. Sapos wasman sekit bai kam lukim kongrigesen o ol i makim kibung sekit o bikpela de kibung i mas kamap long dispela Sarere Sande, orait, yupela i ken mekim dispela bikpela pablik-tok long wik bihain. I no gat wanpela kongrigesen i ken mekim dispela pablik-tok paslain long Epril 10.

◼ Samting bilong tilim long Februeri: Buk Yu Inap i Stap Oltaim Long Paradais Long Graun, long K3.00. Mas: Buk Sampela Askim Bilong Ol Yangpela​—⁠Ol Gutpela Bekim, long K1.50. Epril na Me: Wastaua na Kirap! na wanpela buklet. (No ken tilim buklet Skul.) Sabskripsen bilong Wastaua long K6.00, na Kirap! long K3.00. HARIM: Ol kongrigesen i sot long ol dispela buk na magasin bilong tilim, orait long mun bihain ol i mas putim oda long pepa S-AB-14 (Literature Order).