Memorial—Redim na Mekim
1 Det Bilong Memorial: Em bai kamap long Sarere, Mas 26, 1994, taim san i go daun pinis. No ken mekim narapela miting long dispela de. Ol wasman sekit i mas tingim taim bilong Memorial na wokim sedyul bilong ol i stret long dispela.
2 Autlain Bilong Tok Bilong Memorial: Mipela i salim nupela autlain bilong Memorial wantaim Wok Kingdom bilong Mas 1994. Olsem wanem? Brata bilong mekim tok bilong Memorial em i kisim pinis dispela autlain bambai em i ken redim tok?
3 Wokim Bret Bilong Memorial: Kisim plaua bilong wit o rais samting (sapos i no gat braunpela plaua, kisim waitpela; tasol kisim plaua nating i no gat bekpaura samting long en). Kisim wanpela kap plaua olsem, na tanim wantaim liklik wara. No ken putim sol o bekpaura long en. Nau wokim long han na bai em i strong, tasol em i mas malumalum liklik. Tromoi liklik plaua long tebol na putim bret antap long en, na krungutim bret long wanpela botol samting na bai bret i go braitpela nating. Kisim samting olsem praipen na rapim liklik gris long en na putim bret antap long en. Putim insait long aven na kukim bret i go inap long taim bret i strong na braunpela.
4 Wain Bilong Memorial: Yu mas kisim retpela wain i no gat suga samting long en. Yu ken mekim wok long wain ol i kolim Claret o Cabernet Sauvignon o Shiraz.
5 Wanem Taim Ol i Mas Tilim Bret na Wain: No ken tilim bret na wain paslain long taim san i go daun—mas tilim long taim san i go daun pinis. Long dispela yia san i go daun long kain taim olsem: Arawa, 5:46; Rabaul, 5:59; Pot Mosbi, 6:18; Lorengau, 6:20; Lae, 6:20; Mount Hagen, 6:30; Wewak, 6:34.
6 Sapos Hevi i Kamap na Ol Brata Sista i No Inap Bung Long Memorial: Sapos bikpela win na ren i kamap o ol lain i pait, na ol brata sista i no inap bung wantaim long dispela taim na ples ol i bin makim bilong mekim Memorial, orait, ating ol grup wan wan i ken bung, o ol brata sista em haus bilong narapela i stap klostu long haus bilong narapela ol i ken bung wantaim, o ol wan wan famili i ken bung na mekim Memorial.
7 Sapos ol grup wan wan i bung, orait, bihain kongrigesen i ken skelim hamas manmeri i bin bung long ol dispela liklik grup na bungim wantaim na dispela namba bai makim hamas bilong kongrigesen ol i bin bung long dispela taim, na ol i ken salim dispela ripot i go long Sosaiti.
8 Sapos sampela brata i kalabus, o narapela samting i mekim na ol i no inap kisim bret na wain, ol i mas tingting long bung na toktok wantaim long stori bilong Memorial long Baibel. Na ol i mas raitim hamas manmeri i bung wantaim bilong harim dispela tok.
9 Sapos i no gat wanpela brata i stap, orait wanpela sista i gat save em i ken karamapim laplap samting long het bilong em na lukim Matyu 26:17-30 na Luk 22:7-23, 28-30 na 1 Korin 11:20-31 na stori long en.
10 Ples: Memorial i ken kamap long Haus Kingdom o long narapela hap em ol elda i makim. Bilong redi long Memorial ol elda i mas lukautim ol wok bilong klinim gut Haus Kingdom. Ating ol i mas kisim sampela sia moa, long wanem, planti manmeri bai kam. Na ol i mas stretim gut ol sia na bai ol brata inap mekim stret wok bilong givim bret na wain i go long olgeta man na ol i no ken abrusim wanpela. Ol i mas tingim hamas brata ol i mas makim bilong mekim wok atendan, na ol atendan i mas save gut long ol wok ol i mas mekim.
11 Ol Brata Bilong Tilim Bret na Wain: Ol i mas tingim hamas man bai kam bung long taim bilong Memorial, na tingim hamas brata ol i mas makim bilong mekim wok bilong tilim bret na wain. Ol brata i mekim dispela wok i mas waswas gut na pasim klos i stret. Taim ol i tilim pinis bret i go long ol manmeri, ol i ken kam sanap paslain long namba wan lain sia, na brata i mekim tok bai tilim bret i go long ol. Na bihain, wanpela bilong ol dispela brata i ken tilim bret i go long brata i mekim tok bilong Memorial. Ol i mas mekim wankain samting long wain.
12 Sapos ol brata i redim gut ol dispela samting, bai olgeta samting bilong Memorial i wok stret, na dispela bai litimapim nem bilong Jehova long ai bilong olgeta manmeri i kam bung.
This is a repeat of article in km 3/91, unique to PNG. Also repeated in km 4/92, 3/93.