Go Long Ol Miting—Em Bikpela Samting
1 Olsem wanem? Yu ting em bikpela samting long yumi mas go long miting? Dispela em i wanpela bikpela askim, laka? Ating yumi olgeta i pilim olsem ol miting i bikpela samting. Tasol sori tumas, long nau ol ripot i makim olsem long planti kongrigesen namba bilong ol man i bung long miting i go daun. Wanem as bilong dispela? Ating sampela bilong yumi i larim ol wok bilong skin, o skin i les, o homwok, o liklik sik, o ren samting i pasim yumi long go long miting long olgeta taim, olsem yumi mas mekim. (Lo 31:12) Go long ol miting em i wanpela lo bilong Baibel, olsem na gutpela yumi olgeta wan wan i beten na tingim gut dispela askim: Mi ting em i bikpela samting long yumi mas go long ol miting?
2 Sampela brata bilong yumi i wokabaut inap planti aua long ol rot i gat planti das long en na ol i brukim ol wara i gat planti pukpuk bambai ol i ken go long ol miting. Ating long kongrigesen bilong yumi tu i gat sampela brata i “no save lusim” ol miting, maski ol i gat bikpela sik, o skin bilong ol i bagarap, o ol i gat bikpela wok bilong skin, o ol i gat planti homwok bilong skul. (Lu 2:37) Bilong wanem ol i wok strong long go long miting? Long wanem ol i save, long strong bilong ol yet ol i no inap long winim ol hevi bilong dispela graun na sanap strong. Long strong bilong God tasol ol inap.—2 Ko 12:9, 10.
3 Long nau yumi save bihainim pasin bilong ol Kristen bilong bipo, oltaim ol i bin bung wantaim long beten, na stori long sampela ekspiriens, na stadi long Baibel. (Ap 4:23-30; 11:4-18; Kl 4:16) Yumi skul long ol tok profet na bilip i stap long Baibel, na long pasin God i laikim, na stretpela pasin ol Kristen i mas bihainim. Na yumi skul long bihainim ol lo bilong Baibel long olsem wanem yumi ken stretim wokabaut bilong yumi long nau. (1 Ti 4:8) Na tu yumi kisim ol gutpela tok bilong ol samting yumi wetim long bihain, taim olgeta hevi na pen i pinis. Em i bikpela samting yumi mas tingting oltaim long dispela gutpela samting yumi wetim i kamap.—Hi 6:19.
4 Olsem wanem? Famili bilong yu i ting miting em i bikpela samting? Yu ting miting em i bikpela samting wankain olsem kaikai o mekim wok bilong skin? Long taim bilong go long miting yu gat tupela tingting olsem bai yu go long miting o nogat? O insait long famili bilong yu, yupela ting em i bikpela samting long bung wantaim ol brata long miting long olgeta taim? Planti pablisa i tingim gutpela pasin papamama bilong ol i bin mekim taim ol i mekim bikpela long ol. Wanpela elda i tingim dispela samting na em i tok: “Long olgeta taim papa bilong mipela i bin strong long famili i mas go long ol miting. Sapos wanpela i sik, wanpela bilong mipela i bin stap wantaim em long haus na ol narapela i bin go long miting!”
5 Long ol Wok Kingdom Bilong Yumi i kamap bihain bai yumi stori long olsem wanem ol wan wan miting bilong kongrigesen i bikpela samting, na ol dispela tok bai helpim yumi long pilim tru ol gutpela samting bilong spirit yumi kisim long ol dispela miting. Sapos yu no go long ol miting long olgeta taim, ol dispela tok bai helpim yu long save long ol gutpela samting yu lus long en taim yu no go long miting. Bai i gat sampela gutpela tok bilong helpim ol brata i lukautim ol miting, na sampela gutpela tok yumi olgeta i ken bihainim taim yumi redim ol tok bilong miting na taim yumi bekim tok long miting. Gutpela sapos famili bilong yu i sindaun wantaim na long rot bilong beten yupela i skelim pasin bilong yupela long go long miting. Na sapos yupela i no save go long ol miting long olgeta taim, bai yupela inap stretim dispela samting. Em i bikpela samting yumi mas go long ol miting long olgeta taim, em bilong skulim yumi long ol samting bilong spirit, na yumi no ken ting em i liklik samting tasol.
[Ol Askim]
1. (a) Bilong wanem sampela i no go long ol miting long olgeta taim? (b) Go long ol miting em i wanpela lo bilong Baibel, olsem na yumi mas beten na tingim wanem askim?
2. (a) Sampela brata i mekim wanem bikpela samting bilong kam long ol miting? (b) Bilong wanem ol i taitim bun long mekim olsem?
3. (a) Taim yumi go long miting yumi bihainim pasin bilong husat long bung wantaim? (b) Taim yumi go long miting yumi kisim wanem gutpela samting?
4. Yumi mas ting olsem wanem long go long ol miting?
5. (a) Ol Wok Kingdom Bilong Yumi i kamap bihain bai stori long wanem samting? (b) Gutpela sapos nau olgeta wan wan famili i mekim wanem?