Putim Ol Bikpela Samting i Go Pas Long Ol Narapela Wok!
Em taim bilong miting, tasol yu gat sampela wok yu mas mekim. Bai yu putim wanem samting i go pas?
TINGIM olsem yu wanpela man marit na wanpela papa. Yu bin wok strong tru long de olgeta long ples wok, na nau yu tingim miting bilong kongrigesen bai kamap long nait. Sapos yu hariap lusim ples wok, bai yu gat hap taim long waswas, na pasim klinpela klos, na kisim kaikai paslain long yu lusim haus na go long miting. Tasol nau, wantu, bos bilong yu i kam askim yu long wok ovataim. Em i tok em bai givim gutpela pe long yu. Yu sot long mani.
O tingim olsem yu wanpela meri marit na wanpela mama. Taim yu wok long redim kaikai bilong apinun yu lukim planti klos i hip i stap yu no ainim yet, na sampela yu mas ainim bilong famili i ken mekim wok long ol long tumora. Yu askim yu yet, ‘Sapos mi go long miting nau long nait, wanem taim bai mi ainim ol klos?’ Nau tasol yu kisim wok mani long olgeta de na yu wok long kisim save olsem i hatwok long lukautim ol samting bilong haus na wok mani wantaim.
O tingim olsem yu wanpela sumatin. Planti homwok i stap. Longtaim pinis yu kisim, tasol yu no wokim yet, na nau taim i kamap pinis bilong givim sampela long tisa tumora. Yu laik askim papamama long ol i ken orait long yu ken lusim miting na stap long haus bambai yu ken pinisim homwok bilong yu.
Bai yu putim wanem samting i go pas: wok ovataim, ainim klos, homwok, o miting bilong kongrigesen? Olsem wanem yumi inap putim ol bikpela samting i go pas? Wanem tingting bilong Jehova long dispela samting?
Yu Mas Putim Wanem Samting i Go Pas?
Liklik taim bihain long ol Israel i kisim ol Tenpela Lo, ol i lukim wanpela man i wok long kisim paiawut long de Sabat. Lo i tambuim dispela samting. (Namba 15:32-34; Lo 5:12-15) Sapos yu yet i bin harim kot bilong dispela samting, bai yu mekim wanem? Bai yu tok dispela man i no gat asua, long wanem, dispela wok em i mekim i bilong helpim famili bilong em long i stap laip na i no bilong kisim gutpela sindaun na planti gutpela samting? Bai yu tok i gat planti taim long yia long bihainim de Sabat, olsem na sapos i gat wanpela taim long yia na man i no bihainim de Sabat—ating em i no bin stretim gut ol samting pastaim bambai em i ken bihainim—orait God i ken lusim dispela rong?
Tasol Jehova i gat narapela tingting long dispela samting. Baibel i tok: “Bikpela i tokim Moses olsem, ‘Yupela i mas kilim dispela man i dai.’ ” (Namba 15:35) Bilong wanem Jehova i mekim strongpela tok olsem?
Ol man i gat sikspela de bilong kisim paiawut na mekim ol narapela wok bilong ol samting bilong kaikai, klos, na haus. Long de namba 7 ol i mas mekim wok bilong tingim ol samting bilong spirit. I no gat rong long kisim paiawut, tasol i gat rong long mekim wok long dispela hap taim lo i makim bilong lotuim Jehova. Tru, ol Kristen i no stap aninit long Lo Bilong Moses, tasol dispela samting i skulim yumi long pasin bilong putim ol bikpela samting i go pas long ol narapela wok.—Filipai 1:10.
Ol Israel i stap 40 yia long ples drai nating, na nau ol i redi long go insait long Graun Bilong Promis. Sampela i les long kaikai dispela mana God i save givim long ol long dispela ples drai na ating ol i wet long kisim sampela narapela kain kaikai. Bilong helpim ol long holimpas stretpela tingting taim ol i go insait long dispela graun i gat “ol kaikai i save kamap gutpela tumas,” Jehova i tokim ol: ‘Yupela i no inap kisim laip long kaikai tasol. Nogat. Yupela mas bihainim olgeta tok bilong God tu na bai yupela kisim laip.’—Kisim Bek 3:8; Lo 8:3.
Ol Israel i mas wok strong bambai ol inap kisim dispela “kaikai i save kamap gutpela tumas.” I gat ol ami ol i mas daunim, na i gat ol haus ol i mas wokim, na i gat hap graun ol i mas planim kaikai long en. Tasol maski i gat planti wok ol i mas mekim, Jehova i tokim ol long makim sampela hap taim long olgeta de bambai ol i ken tingim ol samting bilong spirit. Na ol i mas lusim hap taim long skulim ol pikinini bilong ol long ol gutpela pasin bilong God. Jehova i tok: “Yupela i mas lainim ol dispela lo long ol pikinini bilong yupela. Na yupela i mas toktok oltaim long ol dispela lo, long taim yupela i stap long ples na long taim yupela i stap longwe, na long taim bilong wok na long taim bilong malolo.”—Lo 11:19.
Tripela taim long wanpela yia olgeta man Israel na ol man bilong narapela lain i bihainim lotu Juda ol i mas kam lotu long Jehova. Tasol planti papa i stretim rot bilong meri pikinini bilong ol i ken kam tu—ol i save dispela bai helpim famili olgeta long ol samting bilong spirit. Tasol husat bai lukautim haus na gaden bilong ol na bai ol birua i no ken kisim? Jehova i tok promis: “Taim yupela i kam lotu long mi long dispela tripela taim long olgeta yia, bai i no gat birua i laik kisim graun bilong yupela.” (Kisim Bek 34:24) Ol Israel i mas bilip strong olsem sapos ol i putim ol wok bilong spirit i go pas, bai ol i no lus long ol samting bilong skin. Olsem wanem? Jehova i bihainim tok bilong em? Tru tumas, em i mekim!
Wok Long Painim Kingdom Pastaim
Jisas i lainim ol disaipel bilong em long ol i mas putim ol samting bilong spirit i go pas long olgeta narapela samting. Long bikpela tok bilong em long maunten, em i tok: “Yupela i no ken tingting planti na tok, ‘Bai yumi kaikai wanem samting? Bai yumi dring wanem samting?’ Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu [bilong skin yupela i mas kisim] long yupela.” (Matyu 6:31, 33, Nupela Testamen na Ol Sam, bilong 1980) Bihain liklik long taim Jisas i dai, ol nupela Kristen i kisim baptais ol i kirap na bihainim dispela tok. Planti ol i bilong lain Juda o ol i man bilong narapela lain i bihainim lotu bilong ol Juda na ol i bin go long Jerusalem bilong bung long bikpela de Pentikos long yia 33 C.E. Taim ol i stap long dispela hap, wanpela samting i kamap olsem: Ol i harim gutnius bilong Krais Jisas na ol i bilip. Ol i gat bikpela laik long kisim sampela save moa long dispela nupela bilip ol i kisim, olsem na ol i stap long Jerusalem. Bihain ol i sot long kaikai samting, tasol dispela samting i stap olsem nambatu samting long ol. Ol i painim pinis Mesaia! Ol brata Kristen i helpim ol long ol samting bilong skin na bai olgeta inap harim yet “tok bilong ol aposel, na . . . beten.”—Aposel 2:42.
Bihain liklik, sampela Kristen i les na ol i lusim pasin bilong go oltaim long ol miting na bung wantaim. (Hibru 10:23-25) Ating ol i kisim pasin bilong laikim tumas mani kago samting, o ol i laik mekim bikpela wok bilong kisim mani bilong lukautim ol yet wantaim famili bilong ol, na dispela i mekim na ol i lusim pasin bilong tingim gut ol samting bilong spirit. Aposel Pol i tok strong long ol brata long ol i no ken lusim pasin bilong i go long ol miting, na bihain em i tok: “Yupela i no ken bihainim pasin bilong mangal long mani. Yupela i mas ting olsem, samting yupela i holim pinis, em inap long yupela. God i tokim yumi pinis olsem, ‘Bai mi no lusim yu. Bai mi no larim yu i stap nating. Nogat tru.’ ”—Hibru 13:5.
Dispela tok bilong Pol i kamap long taim stret. Inap faipela yia bihain long Pol i raitim pas i go long ol Hibru, ami bilong Rom em Sestius Galus i bosim ol i kam banisim Jerusalem. Ol gutpela Kristen i tingim dispela tok lukaut bilong Jisas: “Long dispela taim . . . , sapos man i stap antap long haus, orait taim em i go daun em i no ken i go insait long haus bilong kisim ol samting bilong en. Na man i stap long gaden, em i no ken i go bek long haus bilong kisim longpela klos bilong en.” (Mak 13:14-16) Ol i save olsem bilong abrusim bagarap ol i mas bihainim tok bilong Jisas; wok mani na mani kago bilong ol i no inap helpim ol. Ol man i bin bihainim tok bilong Pol na putim ol samting bilong spirit i go pas, ol i no hatwok long lusim haus, wok mani, klos, na ol gutpela samting bilong ol, na ranawe i go long ples maunten. Tasol ol man i no bin lusim pasin bilong laikim tumas mani, ating ol i hatwok tru long ranawe.
Ol Samting Sampela Long Nau i Mekim
Ol gutpela Kristen long nau ol i amamas tru long bung oltaim wantaim ol brata bilong ol, na planti ol i lusim planti samting na bai ol inap go long ol miting. Long sampela hap, i gat wanpela kain wok tasol ol brata inap kisim: Sampela taim ol i mas wok long san na sampela taim ol i mas wok long nait. Wanpela brata i save mekim olsem: Taim em i mas wok long nait, na em taim bilong miting, em i save kisim ples bilong ol wanwok i mas wok long Sarere long nait, na ol i kisim ples bilong em long ol nait i gat miting. Ol i amamas long mekim olsem, long wanem, planti man long dispela hap ol i tingim Sarere long nait em i gutpela taim bilong kisim sampela kain amamas. Sampela narapela brata i wok long nait ol i save go long ol miting bilong narapela kongrigesen klostu sapos wok bilong ol i mekim na ol i no inap go long miting bilong ol yet. Long dispela rot ol i no save lusim wanpela miting—ating wan wan tasol ol i lusim. Wanpela meri long Kanada i nupela long kam long ol miting, kwiktaim em i kisim save olsem Skul Bilong Wok Autim Tok na Miting Bilong Wok Autim Tok em bikpela samting, olsem na em i baim wanpela wanwok long mekim wok bilong em long nait na bai em inap kam long ol dispela miting.
Planti man i gat bikpela sik ol i no save lusim ol miting. Taim ol i no inap kam long Haus Kingdom, ol i stap long haus na harim ol tok bilong miting long rot bilong kaset o telefon. Ol i pilim tru ol dispela samting bilong spirit Jehova i givim long ol long rot bilong “wokboi i gat gutpela tingting”! (Matyu 24:45) Ol Kristen i save lukautim lapun papa o mama bilong ol, ol i amamas tru taim wanpela brata o sista i tok em bai lukautim dispela papa o mama na bai em i ken go long wanpela miting long kongrigesen.
Redi Gut Pastaim!
Papamama i pilim olsem ol i sot long ol samting bilong spirit, ol i save helpim ol pikinini bilong ol long amamas long go long ol miting. Ol i laik bai ol pikinini i mas wokim homwok bilong ol long de stret ol i kisim—nogut planti homwok tumas i hip i stap. Long ol nait bilong miting, ol pikinini i kirap kwik long wokim homwok taim ol i kamap pinis long haus. Ol i no larim ol samting bilong kisim amamas na ol narapela samting i pasim ol long go long miting.
Olsem wanem? Sapos yu wanpela man marit na yu wanpela papa, yu save putim ol miting i go pas long ol narapela samting? Sapos yu wanpela meri marit na yu wanpela mama, yu save skelim gut ol wok yu mas mekim na bai yu gat hap taim bilong i go long ol miting? Sapos yu wanpela yangpela, yu save putim ol miting i go pas long homwok, o yu putim homwok i go pas long ol miting?
Ol miting bilong kongrigesen ol i gutpela samting Jehova i putim bilong helpim yumi. Yumi mas taitim tru bun bilong i go long ol dispela miting. Jehova bai mekim gut tru long yu sapos yu putim ol bikpela samting i go pas long ol narapela wok!