Jehova i Save Stiaim Yumi Olsem Wanem?
“Bringim mi long gutpela rot.”—SONG 27:11.
1, 2. (a) Olsem wanem Jehova i save soim rot long lain bilong em long nau? (b) Bilong kisim ol gutpela samting long ol miting, yumi mas mekim wanem?
JEHOVA em i As bilong lait na tok i tru, olsem yumi bin lainim long stori i kamap paslain long dispela. Tok bilong em i save givim lait long yumi taim yumi wokabaut long rot bilong stretpela pasin. Jehova i save skulim yumi long ol rot bilong em, na long dispela pasin em i save soim rot long yumi. (Song 119:105) Olsem man bilong raitim Song, yumi amamas long bihainim rot God i bringim yumi long en, na yumi beten olsem: “Bikpela, yu ken lainim mi long samting yu laik bai mi mekim. . . . Yu ken bringim mi long gutpela rot.”—Song 27:11.
2 Wanpela rot bilong Jehova long skulim yumi, em long rot bilong ol miting Kristen. Orait yumi ken askim olsem: Bilong kisim gutpela samting long ol dispela miting, yumi save (1) go oltaim long miting, na (2) putim gut yau long ol tok i kamap, na (3) bekim ol tok long ol hap bilong miting i gat ol askim long en? Na taim yumi kisim sampela tok bilong helpim yumi long i stap long “gutpela rot,” yumi save amamas long bihainim?
Yu Save Go Oltaim Long Miting?
3. Wanpela meri i save mekim wok bilong God long olgeta de, olsem wanem em i bin kisim gutpela pasin bilong go oltaim long miting?
3 Sampela pablisa bilong Kingdom ol i bin kirap long i go long ol miting taim ol i liklik yet. Wanpela Witnes Bilong Jehova i save mekim wok bilong God long olgeta de em i tok: “Taim mi wantaim ol susa bilong mi i wok long i go bikpela long 1930 i go inap 1940 samting, mipela i no gat wok long askim papamama olsem mipela bai go long miting o nogat. Mipela i save pinis olsem mipela bai go. Taim mipela i gat sik, long dispela taim tasol mipela i no save go. Famili bilong mipela i no save lusim miting.” Olsem profet meri Ana, dispela sista “i no save lusim” haus bilong lotuim Jehova long en.—Luk 2:36, 37.
4-6. (a) Bilong wanem sampela pablisa bilong Kingdom i save lusim sampela miting? (b) Bilong wanem em i bikpela samting long go long ol miting?
4 Olsem wanem long yu? Yu wanpela bilong dispela lain i save go oltaim long ol miting Kristen, o sampela taim yu save go na sampela taim nogat? Sampela Kristen ol i bin ting ol i mekim gut dispela wok, tasol ol i laik save tru long dispela. Olsem na inap sampela wik ol i bin raitim long pepa olgeta miting ol i go long en. Orait long pinis bilong dispela hap taim ol i bin makim, ol i skelim pepa na ol i kirap nogut long lukim hamas miting ol i bin lusim.
5 Ating sampela bai tok, ‘Mi no kirap nogut long dispela, long wanem, long nau i gat planti samting i putim hevi long ol man, olsem na i hatwok long ol i go long olgeta miting.’ Tru, yumi stap long taim bilong planti hevi. Na yumi save, ol hevi bai go bikpela moa. (2 Timoti 3:13) Tasol dispela i mekim na i bikpela samting tru long yumi mas i go oltaim long miting, a? Sapos yumi no kisim ol gutpela kaikai bilong spirit long olgeta taim bilong strongim yumi, yumi no ken ting bai yumi sanap strong na karim ol hevi i save painim yumi nau long dispela taim. Sapos yumi no bung oltaim wantaim ol narapela Kristen, sampela samting inap pulim yumi long lusim dispela “rot bilong ol stretpela man” na yumi lusim olgeta! (Sindaun 4:18) Tru, taim yumi bin mekim bikpela wok na yumi kam bek long haus long apinun, sampela taim yumi no pilim olsem yumi laik go long miting. Tasol taim yumi go, maski skin bilong yumi i les tru, dispela i save helpim yumi, na yumi save strongim bel bilong ol narapela Kristen i stap long Haus Kingdom.
6 Hibru 10:25 i kamapim narapela bikpela as na yumi mas i go oltaim long miting. Long dispela skripsa, aposel Pol i tokim ol wanlain Kristen long ol i mas bung wantaim, na ol i mas mekim moa yet taim ol i lukim “De bilong Krais em i kam klostu.” Tru tumas, yumi no ken lusim tingting olsem de bilong Jehova i kam klostu pinis. (2 Pita 3:12) Sapos yumi kisim tingting olsem pinis i no ken kam hariap, ating bai yumi larim ol laik bilong yumi yet i daunim ol wok bilong spirit yumi mas mekim, olsem go long ol miting. Em nau, olsem Jisas i tok, ‘dispela de bilong Bikpela bai i kamap long yumi wantu tasol.’—Luk 21:34.
Putim Gut Yau
7. Bilong wanem em i bikpela samting long ol pikinini i mas putim yau long ol tok i kamap long miting?
7 Maski yumi go long ol miting, dispela tasol i no inap. Yumi mas putim yau long ol tok i kamap long miting. (Sindaun 7:24) Ol pikinini bilong yumi tu i mas mekim olsem. Taim pikinini i go long skul, em i mas putim yau long ol tok bilong tisa, maski em i no laikim wanpela samting tisa i skulim em long en, o em i no inap kisim gut. Tisa i save, sapos pikinini i wok strong long putim yau, ol dispela tok bai helpim em. Olsem na yumi save, ol pikinini em ol i gat bikpela krismas inap long ol i go long skul, ol i mas putim yau long ol tok bilong skulim yumi i save kamap long ol miting bilong kongrigesen, na no ken larim ol i slip taim miting i kirap. Tru, sampela tok i tru i stap long Baibel em “yumi save hatwok long save gut long as bilong [ol dispela] tok.” (2 Pita 3:16) Tasol yumi no ken ting ol pikinini i no inap lain na kisim save. God i no save ting olsem. Long taim bilong ol man i bin raitim Baibel, God i bin tokim ol yangpela long ol i mas ‘harim na i stap aninit long em na bihainim gut olgeta tok bilong em.’ Ating sampela tok i hatwok long ol pikinini i kisim gut. (Lo 31:12; skelim wantaim Wok Pris 18:1-30.) Orait Jehova i laik bai ol pikinini long nau tu i mas mekim olsem, a?
8. Sampela papamama i save mekim wanem bilong helpim ol pikinini long putim yau na harim ol tok bilong miting?
8 Ol papamama Kristen i save, sampela samting bilong spirit ol pikinini i sot long en, ol i save kisim long ol tok ol i lainim long miting. Olsem na long de bilong ol miting, sampela papamama i save tokim ol pikinini long ol i mas slip liklik, na taim ol i kamap long Haus Kingdom ol i gat nupela strong na ol i redi long lainim sampela tok. Long ol nait i gat miting, sampela papamama i no save larim ol pikinini i lukim tumas televisen, na sampela i bihainim gutpela tingting na ol i tambuim ol pikinini long lukim. (Efesus 5:15, 16) Na long miting ol dispela papamama i no save larim ol samting i pulim ai bilong ol pikinini, na ol i save kirapim ol long putim yau na kisim save, inap long skel bilong krismas na save bilong ol long lainim ol tok.—Sindaun 8:32.
9. Wanem samting inap helpim yumi long kisim pasin bilong putim gut yau?
9 Jisas i bin toktok long ol manmeri i bikpela pinis taim em i tok: “Yupela i mas lukaut gut bai yupela i harim gut tok.” (Luk 8:18) Long nau, sampela taim i hatwok long mekim olsem. Tru, i hatwok long putim yau na harim gut ol tok, tasol yumi inap kisim dispela pasin. Taim yu putim yau long wanpela tok bilong Baibel o narapela tok ol i mekim long miting, wok strong long kisim ol bikpela as tok bilong en. Na yu ken tingting: Brata bai mekim wanem tok bihain long dispela? Tingim wanem ol tok yu inap mekim wok long en taim yu autim tok, o yu inap bihainim long i stap bilong yu. Taim ol i kamapim ol tok, kamapim gen long tingting. Raitim sampela sotpela tok long notbuk.
10, 11. Olsem wanem sampela papamama i bin helpim ol pikinini long putim yau long ol tok bilong miting? Wanem sampela pasin yu bin traim na dispela i helpim ol pikinini bilong yu long putim gut yau?
10 Taim pikinini i liklik yet, em i gutpela taim bilong lainim em long putim gut yau. Taim ol i no lain yet long rit rait na ol i no kirap yet long go long skul, sampela papamama i save kirapim ol long “raitim” sampela tok long miting. Ol i holim hap pepa, na taim ol i harim ol tok olsem “Jehova,” o “Jisas,” o “Kingdom,” ol i putim wanpela mak long pepa. Long dispela pasin, ol pikinini inap lain long putim gut yau long ol tok i kamap long miting.
11 Ol pikinini i bikpela liklik, sampela taim papamama i mas kirapim ol tu long putim yau. Wanpela pikinini man i gat 11-pela krismas, papa i lukim olsem tingting bilong em i wokabaut long taim bilong wanpela kibung Kristen. Olsem na papa i givim wanpela Baibel long pikinini na i tokim em long opim Baibel na painim ol skripsa em man bilong mekim tok i kamapim. Papa i wok long raitim sampela tok bilong kibung, na em i wok long lukim Baibel em pikinini i holim i stap. Em nau, kirap long dispela taim pikinini i givim bel long harim ol tok bilong kibung.
Larim Ol Man i Harim Nek Bilong Yu
12, 13. Bilong wanem em i bikpela samting long yumi mas insait long ol singsing bilong kongrigesen?
12 King Devit i mekim singsing olsem: “Bikpela, . . . mi wokabaut raunim alta bilong yu, na mi lotu long yu. Mi mekim olsem, na mi singim wanpela song bilong tenkyu long yu.” (Song 26:6, 7) Long miting bilong ol Witnes Bilong Jehova yumi gat gutpela rot bilong tokaut long bilip bilong yumi. Wanpela rot bilong mekim olsem, em yumi ken insait long ol singsing bilong kongrigesen. Dispela em i wanpela bikpela samting long lotu bilong yumi, tasol nogut sampela taim yumi les na yumi no mekim.
13 Sampela pikinini em ol i no lain yet long kaunim buk, ol i save lain long putim long tingting ol tok bilong ol singsing bilong Kingdom ol bai mekim long ol miting long olgeta wik. Ol i save amamas long singsing wantaim ol manmeri i bikpela pinis. Tasol taim ol pikinini i go bikpela liklik, sampela taim ol i no laik insait long ol singsing bilong Kingdom. Na sampela manmeri i bikpela pinis, ol tu i sem long mekim singsing long miting. Tasol singsing em i wanpela hap wok bilong lotu bilong yumi, wankain olsem wok bilong autim tok. (Efesus 5:19) Yumi save wok strong long litimapim nem bilong Jehova taim yumi autim tok. Orait yumi mas givim biknem long em long rot bilong mekim ol singsing tu, a? Maski yumi gat gutpela nek bilong singsing o nogat, yumi mas givim bel long mekim ol singsing bilong litimapim nem bilong Jehova.—Hibru 13:15.
14. Ol samting yumi stadi long en long ol miting bilong kongrigesen, bilong wanem yumi mas redim gut pastaim?
14 Na yumi save litimapim nem bilong God taim yumi mekim ol tok bilong strongim ol narapela insait long ol hap bilong miting i gat ol askim long en. Bilong bekim gut ol tok, yumi mas redi gut pastaim. Yumi mas lusim bikpela hap taim liklik bilong tingim tingim ol strongpela tok i stap long Baibel. Aposel Pol, em man bilong stadi long Baibel, em i save long dispela. Em i tok: “Olaman! Ol gutpela pasin bilong God na tingting na save bilong en i pulap tru, na i daun tumas olsem solwara!” (Rom 11:33) Yupela ol papa bilong famili, yupela i mas helpim olgeta wan wan long famili bilong yupela long wok strong long painim ol gutpela tingting na save bilong God i stap long Baibel. Makim hap taim insait long famili-stadi bilong kamapim klia ol tok i hatwok long kisim gut, na helpim famili long redi gut long ol tok bai kamap long miting.
15. Wanem ol samting man i ken mekim bilong helpim em long bekim tok long miting?
15 Sapos yu laik bekim tok planti taim long ol miting, orait paslain long miting yu ken redim sampela tok yu laik mekim. Yu no ken ting yu mas bilasim gut ol tok. Makim wanpela ves bilong Baibel na givim bel long kaunim, o mekim sampela liklik tok em yu bin tingim gut. Sampela pablisa i save askim man bilong lukautim stadi long makim ol long bekim namba wan tok bilong wanpela paragraf ol yet i bin makim, na bai ol i no ken lus long tokaut long bilip bilong ol.
Ol Man i No Gat Planti Save Ol i Kisim Gutpela Tingting
16, 17. Wanpela elda i bin givim wanem gutpela tok long wanpela wokman bilong kongrigesen? I gat wanem as na tok bilong elda i helpim gut dispela yangpela man?
16 Long miting bilong ol Witnes Bilong Jehova, sampela taim ol i save tokim yumi long kaunim Tok Bilong God long olgeta de. Sapos yumi mekim olsem, dispela bai givim nupela strong long yumi. Na tu, em i save helpim yumi long bihainim gutpela tingting na save taim yumi skelim ol samting yumi mas mekim, na long stretim sampela pasin kranki bilong yumi, na sakim ol traim, na stretim wokabaut bilong yumi sapos yumi bin popaia na lusim rot liklik.—Song 19:7.
17 Ol elda i gat save ol i sambai na redi long givim ol gutpela tok bilong Baibel long yumi i stret long yumi mas kisim. Tasol yumi mas “pulim dispela tingting i kam antap”—olsem yumi go askim ol long givim dispela gutpela tok bilong Baibel long yumi. (Sindaun 20:5) Wanpela yangpela wokman bilong kongrigesen i bin askim wanpela elda long givim sampela tok long em long olsem wanem em inap mekim bikpela wok moa insait long kongrigesen. Elda i save gut long dispela yangpela man na em i opim Baibel long 1 Timoti 3:3, i tok ol man i holim wok insait long kongrigesen ol i mas “isi” long ol narapela. Long gutpela pasin elda i tokim yangpela man long sampela pasin em i ken mekim bilong isi long ol narapela. Orait yu ting yangpela brata i bel hevi long dispela tok em i kisim? Nogat tru! Em i tok: “Elda i mekim wok long Baibel, olsem na mi save, ol tok em i mekim i kam long Jehova.” Dispela wokman bilong kongrigesen i bihainim ol tok em i kisim na em i wok long kamap strong.
18. (a) Wanem samting i helpim wanpela yangpela Kristen long sakim ol traim long skul? (b) Taim wanpela traim i painim yu, yu save tingim wanem ol tok bilong Baibel?
18 Na tu, Baibel inap helpim ol yangpela long “givim baksait long olgeta kain laik nogut i save kamap long bel bilong ol yangpela man.” (2 Timoti 2:22) Wanpela yangpela Witnes Bilong Jehova i winim pinis haiskul, em inap sakim ol traim i bin kamap insait long ol yia em i bin i stap long skul, long wanem, em i save tingim tingim long bel sampela tok bilong Baibel na em i bihainim. Planti taim em i tingim tok bilong Sindaun 13:20, i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting.” Olsem na em i was gut na em i kisim ol pren i save daun tru long ol lo bilong Baibel. Em i tingting olsem: “Mi no winim ol narapela. Sapos mi poroman wantaim ol lain i no stret mi bung wantaim ol, bai mi gat laik long mekim ol samting ol i laikim, na hevi inap painim mi long dispela.” Na tok bilong Pol long 2 Timoti 1:8 i bin helpim em. Pol i tok: “Yu no ken sem long autim tok bilong Bikpela bilong yumi. . . . Yu mas . . . karim hevi wantaim mi long wok bilong autim gutnius.” Olsem na dispela yangpela meri i strongim bel na long taim i stret long mekim em i autim tok long ol wanklas na kamapim ol bilip bilong em i stap long Baibel. Taim tisa i makim em long givim wanpela tok long klas, em i makim wanpela tok i givim rot long em long autim tok bilong Kingdom bilong God, tasol em i mekim long gutpela pasin.
19. Bilong wanem wanpela yangpela man i no inap sakim ol samting bilong dispela graun i strong long pulim em? Tasol wanem samting i givim strong bilong spirit long em?
19 Sapos yumi lusim “rot bilong ol stretpela man,” Tok Bilong God inap helpim yumi long stretim wokabaut bilong yumi. (Sindaun 4:18) Samting i bin painim wanpela yangpela man long Afrika i skulim em pinis long dispela samting. Taim wanpela Witnes Bilong Jehova i go lukim em, em i orait long stadi long Baibel. Em i amamas long ol samting em i lainim, tasol i no longtaim na em i kirap poromanim ol manki long skul i gat pasin nogut. Bihain em i kirap mekim pasin pamuk na em i bihainim dispela pasin long i stap bilong em. Em i tok: “Oltaim bel bilong mi i gat tok, olsem na mi lusim pasin bilong go long miting.” Orait bihain em i kirap gen long i go long ol miting. Em i tokaut olsem: “Mi kisim save olsem wanpela as bilong dispela pasin mi bin mekim, em mi no save kisim ol kaikai bilong spirit. Mi no bin stadi long haus. Olsem na mi no inap sakim ol traim. Em nau, mi kirap kaunim ol Wastaua na Kirap! Isi isi mi kisim bek strong bilong spirit na mi stretim pasin na wokabaut bilong mi. Ol man i lukim pasin bilong mi i senis, na dispela i litimapim nem bilong Jehova. Mi kisim baptais na nau mi stap amamas.” Wanem samting i givim strong long dispela yangpela man na em inap daunim ol pasin nogut bilong skin? Long olgeta taim em i stadi long Baibel long haus na dispela i helpim em long kisim bek strong bilong spirit.
20. Olsem wanem ol yangpela inap sakim pait bilong Satan?
20 Yupela ol yangpela Kristen, Satan i wok long mekim pait long yupela long nau! Bilong sakim pait bilong em, yupela mas kisim kaikai bilong spirit long olgeta taim. Man bilong raitim Song, ating em yet i yangpela man, em i save long dispela samting. Em i tenkyu long Jehova, long wanem, Jehova i bin givim Tok bilong en long em bambai “yangpela man i ken wokabaut long klinpela pasin.”—Song 119:9.
Bai Yumi Bihainim Rot God i Makim
21, 22. Bilong wanem yumi no ken ting rot bilong tok i tru i hatwok tumas long bihainim?
21 Jehova i bin kisim lain Israel long Isip na em i bringim ol i go long Graun Bilong Promis. Long tingting bilong ol man, dispela rot em i makim bilong ol, i olsem ol i hatwok nating long wokabaut long en. Em i no bringim ol long rot i gutpela liklik na i bihainim nambis bilong solwara Mediterenian, nogat. Jehova i bringim lain bilong em i go long wanpela rot long ples drai nating i hatwok long bihainim. Tasol God i mekim gutpela pasin long ol na em i bringim ol long dispela rot. Tru, rot bilong nambis i sotpela rot, tasol ol Israel i mas brukim graun bilong ol Filistia, em ol birua lain. Taim Jehova i makim narapela rot, em i helpim lain bilong em na bai ol i no gat wok long pait long ol Filistia long dispela taim ol i kirap nupela long wokabaut.
22 Na olsem tasol, dispela rot Jehova i bringim yumi long en long nau, sampela taim i olsem i gat hatwok long en. Long olgeta wik yumi gat planti wok Kristen bilong mekim, olsem go long ol miting bilong kongrigesen, na stadi long haus, na autim tok. Sampela ol narapela rot i olsem i no gat hatwok long en. Tasol sapos yumi bihainim rot God i bringim yumi long en, bai yumi kamap long ples yumi wok strong long kamap long en. Olsem na yumi mas wok yet long kisim ol save Jehova i skulim yumi long en na stap gut long dispela “gutpela rot” i go inap oltaim oltaim!—Song 27:11.
Yu Inap Bekim?
• Bilong wanem yumi mas go oltaim long ol miting Kristen?
• Ol papamama i ken mekim wanem bilong helpim ol pikinini long putim yau long ol tok bilong miting?
• Bilong putim gut yau long ol tok, yumi mas mekim wanem?
• Wanem samting inap helpim yumi long bekim tok long miting?
[Piksa long pes 16, 17]
Taim yumi go long ol miting Kristen, dispela i save helpim yumi long tingim de bilong Jehova
[Ol Piksa long pes 18]
I gat kain kain rot bilong litimapim nem bilong Jehova long ol miting Kristen